Evangeli thza
Mareka
Erongithsa ya Johani Mukwakukorovethza
1
Matatekero o Muthzimbu Ouwa wa Yesu Krisitu Mwana Nyambi po aa: 2 Eci edi ku na ñoriwa mu vuka thza mukwakukethza Isaya ci:“Kenge na ku tuma kanganda kange ku rupara rwoe,
oyu wa ku ka roithsa dikuñwa dyoe.
3 Diywi dyoyu kuerera mu dikunguthsitu dya amba ci:
‘Mu roithse mukwakwa wa Fumu,
mu orore makuñwa enthzi!’ ”
4 Johani ngou a monaharire mu dikunguthsitu no ku korovethza anu no ku honga ci: “Mu cere evi yenu no ku korovethziwa, ci evi i teteriwe.” 5 Ditunga dya Judea dyodihe no thsikuña thsa Yerusalema thsothsihe a thzire ku kwenthzi. A citawerire evi yo, Johani ngou a wa korovethzire mu Rware rwa Jorodani. 6 Johani kuma a vatangire thsikoveyo thso ku ruka pohunga o kamere, no ku cianga mwiya o thsitumba mu mbunda. Wa dyangire thsetuthsetu noki.
7 Wa hongire ci: “Aa keya munyima thzange o mukoro kupita ame, ka ni roerire shaanga ku kotama ku putura tuangithso to mashangu enthzi. 8 Ame naa mi korovethza ko meyu, unone aye kenge a ku na mi korovethza ko Mupepo Oukenu.”
Korovethzo neereka ya Yesu
9 Mwethso thsikati Yesu wa tundire ku Nazareta mbongi thzo mu Galilea. Johani wa na mu korovethzire mu Rware rwa Jorodani. 10 Yesu o ku womboka mu meyu, popo wa monine diwiru o ku di yanthzuruka, no Mupepo o ku u shurumukera pa penthzi eci dikuci. 11 Ngou kwa tundire diywi ku wiru ci: “Yowe o Mwanange oyu na shima no ku ni roerithsa nene.”
12 Popo Mupepo wa mu twarire mu dikunguthsitu, 13 oku a ka mu tumawerire Satana mayuwa o makumi ane. Wa kekarire nekondwama yo mu murundu, karo tungeru twa mu kwamenine.
Yesu aethsa erongwa yo kutanga
14 Munyima thzo kupakiwa kwa Johani mu kamenga, Yesu wa thzire mu Galilea o ku thza o honga Muthzimbu Ouwa wa Nyambi. 15 Wa ambire ci: “Thsikati ethsi a kumbwethzire Nyambi thsi na kumu, no Kutumina kwa Nyambi pepi ku di. Mu cere evi yenu no ku tawa Muthzimbu Ouwa!”
16 Diyuwa dimweya Yesu o ku thza o enda ku mukenga o Diviya dya Galilea, wa monine Simoni na Andereasi minenthzi o kwa konthzera dituwa mu Diviya dya Galilea, inene nedi eyambi yothsi. 17 Yesu wa wa amberire ci: “Mu keye mu ni shupwere na ni mi rongithse ku yamba anu.” 18 Popo a thsiire matuwa o no ku mu shupwera.
19 Ou a endireko kamanana, wa monine Jakovo na minenthzi Johani ana Zebedea, o kwa honga matuwa o mu wato. 20 Popo Yesu wa wethsire, awo a thsiire tata wo Zebedea mu wato nakwerume amweya awa a kumunine, no ku shupwera Yesu.
Yesu aa porithsa o mupepo oumango
21 Yesu nerongwa yenthzi a thzire mu mbongi thza Kapenauma. Ou dya vire dyo Savata, Yesu wa kengenine mu sinagoge no ku tateka ku rongithsa. 22 Anu a komokire kerongithsa yenthzi, inene kuma a rongithsire kokoro, kadi eci arongithsi o murao.
23 Popo omo mu sinagoge thzo kwengenine mukwerume oyu wekarire no mupepo oumango. Wa kumbire ci: 24 “Yesu wa Nazareta, ine eyi o fota ku kwetu? Ene waa keyera ku na tu thzirithsa nji? Ni na ku dimuka, yowe O Shokenu wa Nyambi!”
25 Yesu wa u kutururire ci: “O tutware! O tunde ku kwenthzi!” 26 Uya mupepo oumango ngou wa mu tukukithsire kokoro, no ku tunda ku kwenthzi ko ku karumuka nene.
27 Anu wahe awa ekarire apo a komokire no ku cipaura ci: “Ine eyi? Erongithsa yoipe kokoro! Aa tumina shaanga mipepo thzothzimango, karo thzaa mu yuvera.” 28 Muthzimbu keyi ya Yesu wa yukire ko wanguwangu mu mandau oahe a Galilea.
Yesu aa porithsa akwakukora owangi
29 Yesu ou a punine mu sinagoge, wa thzire na Jakovo na Johani ku nthzio thza Simoni na Andereasi. 30 Ngumwenya Simoni kuma a rarire o ku kora dihokoma. Popo a tongwerire Yesu keyi yenthzi. 31 Aye wa thzire ku kwenthzi no ku ka mu kwata ku dyoko ku mu kwathsa ci a katuke. Dihokoma dya mu pwire, ayepo tateka ku wa kwamena yo ku dya.
32 Runguro diyuwa o ku di na toko, anu a retire kwa Yesu akwakukora wahe, nakwamathzimu. 33 Anu wahe omo mu mbongi, ongumanine pa thsero. 34 Yesu wa porithsire anu owangi wekora yo mishovoshovo, karo wa cithzire mathzimu oangi. Unone wa kanithsire mathzimu ku amba thsimweya, inene a mu dimukire ci yodiyo edye.
Yesu aa rongithsa mu Galilea
35 Mu ruura diyuwa o ku di shime ku va, Yesu wa pindukire no ku thza mu dikunguthsitu ku ka rombera. 36 Munyima Simoni naenthzenthzi a thzire o mu fota. 37 Ou a ka mu wanine a ka mu amberire ci: “Anu wahe aa ku fota.”
38 Yesu wa wa tawire ci: “Twaa roera ku thza no ku mambongi amweya ku ka honga, inene yodiyo na ni keyera.” 39 Ngou a thzire mu ditunga dyodihe dya Galilea, o ku thza o honga mu masinagoge o, no ku cithza mathzimu.
Yesu aa porithsa munu wengondwe
40 Diyuwa dimweya munu wengondwe wa keyire ku na tongama ku rupara rwa Yesu, no ku mu adikanena ci: “Nga o i shime kenge nga o ni porithsa.”
41 Ko ku yuva ñekeñeke, Yesu wa ororire dyoko ku mu kwata no ku amba ci: “Ni na i shimi, o pore!” 42 Popo engondwe ya pwire wa porire. 43 Yesu wa mu amberire ci a thze, unone wa mu koñomekire ku mu raerera ci: 44 “O teerere! Katere o i tongwere munu eyi, o thze kwa mupurisita a ka ku mone. O ka punithse thsikunda thso kukenithsiwa koe, eci edi a i raererire Mushe ci ikare ombangi kwanu wahe.”
45 Unone aye wa thzire o tongora kokuhe oku a pitire keyi ya tendaharire ku kwenthzi. Mukaci keyo, Yesu ka a twethsire karo kwingena mu mambongi ko ku cimonaharithsa. Unone kuma ekarangire pohuma kokumengi. Shaanga kengeyo anu a keyangire ku kwenthzi ku tunda mu mandau oahe.