Kupinduka kwa Yesu kwafu
28
Dyo Savata o ku di na pu, ruura mu diyuwa dyo kutanga mu sunda, a Madiya Magadalena na Madiya yumweya a thzire ku ka thzingura pa thsidi.2 Popo kwekarire kungangama kokukuru ko kaye, inene kangeru ka Fumu ka tundire ku wiru no ku na arumuna diwe ku thsidi no kwikarapo. 3 Thsihanga thsako thsa monaharire eci kwethsa ko mvura, nevata yako nedi ikenu too. 4 Akwakunyunga thsidi a yapire nene no ku tutuma, a pwererire no kuara eci ethzimbi.
5 Unone kangeru ka amberire awo ambuyama ci: “Mwa yapa, inene ni na dimuka ci mwaa fota Yesu oya namba pa mbinda. 6 Ka a dimo omu! Na pinduka kwafu eci diya a ambire. Mu keye na mu mone paya naa rara. 7 Mu yokorore mu thze mu ka tongwere erongwa yenthzi ci o na pinduka kwafu, o na citangethza ku Galilea oku mwaa ka mu monena. Eyi yo ni na keyera ku na mi tongwera.”
8 Awo ambuyama a tundire pa thsidi wanguwangu. A yapire, unone ekarire no thsinyanyu thsothsikuru. A yokororire ku ka tongwera erongwa. 9 Popo Yesu wa hokokire kukwo, wa wa vumenenine. Awo a mu henyenine no ku mu kwata kwidyato no ku mu rombera. 10 Yesu ngou a wa amberire ci: “Mwa yapa! Mu thze pohuma, mu ka tongwere aenthzange ci a thze ku Galilea, kodiyo aa ka ni monena.”
Muthzimbu wakwakunyunga
11 Awo ambuyama o kwa di mu dikuñwa, amweya kwakwakunyunga thsidi a thzire mu mbongi no ku ka tongwera akuru o mapurisita yoihe eyi ya tendaharire. 12 Akuru o mapurisita a ciwanine nakuru o mbunga ku ciyongora. Ngou a pire mashwarare madi oangi, 13 no ku wa ambera ci: “Mu tongwere anu ci: ‘Erongwa yenthzi kuma i na keye othsiku no ku nethza thsithzimbi atwe o ku tu na rara.’ 14 Shaanga waa ku i yuve nguvuru, atwe kenge twa ku mu rakwithsa no ku mi tundithsa mukaru ouhe.” 15 Mashwarare a shimbire ao madi no ku tenda eci edi a wa tongwerire. Mweyo, eyi ya yukire mu kaci ko Majuda, karo koku amba a i amba no rerodino.
Thsitumiwa thsoshokuru
16 Erongwa yo dikumi na thsofoci ngou ya thzire ku Galilea, ku mukinya ou a wa tongwerire Yesu. 17 Ou ya mu monine, ya mu romberire, unone imweya ya mu tamangerire. 18 Yesu wa henyenine kwirongwa yenthzi no ku i ambera ci: “Na ni piwa okoro ouhe mu wiru no pano pa kaye. 19 Mweyo, mu thze mu ka rongithse anu o matunga oahe ci ekare erongwa yange. Mwa ku ka wa korovethze mu dithzina dya Tata nedi dya Mwana nedi dyo Mupepo Oukenu. 20 Mu ka wa rongithse ku hengeka yoihe eyi na ni mi raerera. Mu dimuke ci kenge nikaranga nenu mayuwa oahe shime ku ka kuma ku mamaneneno o kaye.”