Yesu aa pinduka kwafu
16
Ou dya pwire diyuwa dyo Savata, Madiya Magadalena no Madiya mama wa Jakovo, no Salome a urire ehefu ci a ka wethse erama ya Yesu. 2 Diyuwa dyo kutanga mu sunda mathsikuthsiku diyuwa o ku di va, a thzire ku thsidi. 3 Mu dikuñwa a cipurire ci: “Edye oyu ka tu arumwena diya diwe dyo ku thsero thzo thsidi?” 4 Unone ou a kamburire meho, a monine ci diya diwe dyodikuru nene di na arumuniwako kare.5 Ou engenine mu thsidi, a yapire nene ou a monine mushumba oyu wa vatire thsivata thsothsire thso kuvyakima, o ku nekara ku rudyo rwo. 6 Wa wa amberire ci: “Mwa yapa! Mwaa fota Yesu o ku Nazareta oyu naa ambiwa pa mbinda. O na pinduka kwafu! Ka a dimo muno, mu mone apa na mu paka. 7 Unone mu thze, mu ka tongwere erongwa yenthzi no Peturu ci o na citangethza ku Galilea. Kodiyo mu ka mu monena eci diya naa mi tongwera.”
8 Awo ambuyama ngou a punine no ku cira ku thsidi, inene a yapire no ku tutuma. Mukaci ko ku yapa nene, ka tongwerire munu thsimweya.
Yesu aa hokoka kwa Madiya Magadalena
9 [Mu diyuwa dyo kutanga mu sunda mathsikuthsiku, Yesu ou a pindukire kwafu, wa tangire ku hokoka kwa Madiya Magadalena oya a tundithsire mathzimu o mutanu na edi. 10 Madiya wa thzire no ku ka tongwera awa ekarangire na Yesu awa ciyuvire mathsiwa no ku dira. 11 Unone ou a yuvire ci Yesu po muyumi karo o na mu mono, ka i tawire.
Yesu aa hokoka kwirongwa yenthzi idi
12 Munyima thzeyo, Yesu wa hokokire mu thsihanga thsathso kwirongwa idi kwirongwa yenthzi o kwa tunda mu thsikuña thsa Yerusalema ku thza ku maumbo. 13 A hukire no ku ka tongwera amweya, unone nawo ka ka wa tawire.
Yesu aa hokoka kwirongwa yo dikumi na yofoci
14 Munyima thzo ku pinduka kwenthzi, Yesu wa hokokire kwirongwa yo dikumi na thsofoci o ku i dya. Wa i kutururire pa kupira kwayo thsitawo no mukanayuva wayo, inene ya kanine ku tawa eyi a i tongwerire awa a mu monine munyima thzo ku pinduka kwenthzi kwafu.
15 Wa wa amberire ci: “Mu thze mu kaye kokahe mu ka honge mishovo thzothzihe Muthzimbu Ouwa. 16 Yomuhe oyu wa ku tawa no ku korovethziwa kenge a ku yoyithsiwa, unone yomuhe o kukana ku tawa kenge a ku raturiwa. 17 Awa a ku tawa kenge a ku twethsa ku kwama emonithso yoikuru. Ko dithzina dyange kenge a ku cithza mathzimu no ku amba madimi oape, 18 kenge a ku kwata mayoka no moko, karo shaanga wa ku nwe ndambyekera ka ya ku wa retera okaru. Kenge a ku kambeka moko peuru thzakwakukora karo kenge a ku pora.”
Yesu aa huka ku wiru