Evangeli thza
Mateu
Dihumo dya Yesu Krisitu
1
Ou po odiyo mundandwe o mathzina o dihumo dya Yesu Krisitu ku tunderera kwa Davida, o mu mukuta wa Aburahama.2 Aburahama yo tata wa Isaka,
Isaka yo tata wa Jakovo,
Jakovo yo tata wa Juda nakurwenthzi naminenthzi,
3 Juda yo tata wa Paresi na Zera, mama wo po Tamare,
Paresi yo tata wa Hesiromi,
Hesiromi yo tata wa Rama,
4 Rama yo tata wa Aminadabi,
Aminadabi yo tata wa Nashoni,
Nashoni yo tata wa Salimoni,
5 Salimoni yo tata wa Boazi, mama wenthzi po nedi Rahaba,
Boazi yo tata wa Obedi, mama wenthzi po nedi Ruti,
Obedi yo tata wa Jese,
6 Jese yo tata wa Fumu Davida.
Davida yo tata wa Solomoni, mama wenthzi po nedi munu wa Uria,
7 Solomoni yo tata wa Rehoboami,
Rehoboami yo tata wa Abiya,
Abiya yo tata wa Asa,
8 Asa yo tata wa Jehoshafati,
Jehoshafati yo tata wa Jorami,
Jorami yo tata wa Uzia,
9 Uzia yo tata wa Jotami,
Jotami yo tata wa Ahazi,
Ahazi yo tata wa Hezekia,
10 Hezekia yo tata wa Manase,
Manase yo tata wa Amoni,
Amoni yo tata wa Josaya,
11 Josaya yo tata wa Jekonia naminenthzi mu thsikati ethsi a twariwire kupika ku Babilona.
12 Munyima thzo ku twariwa kupika ku Babilona:
Jekonia wa kerekire Salatiele,
Salatiele yo tata wa Zerubabele,
13 Zerubabele yo tata wa Abiudi,
Abiudi yo tata wa Eliakimi,
Eliakimi yo tata wa Azori,
14 Azori yo tata wa Sadoki,
Sadoki yo tata wa Akimi,
Akimi yo tata wa Eliudi,
15 Eliudi yo tata wa Eliazare,
Eliazare yo tata wa Matani,
Matani yo tata wa Jakovo,
16 Jakovo yo tata wa Josefa munu wa Madiya, mama wa Yesu oyu nethsiwa ci Mesiya.
17 Mweyo, kwekarire mikuta thzo dikumi na thzine ku tunda kwa Aburahama ku na kuma kwa Davida, thzo dikumi na thzine karo ku tunda kwa Davida shime ku na kuma apa a twariwerire kupika ku Babilona, no mikuta thzo dikumi na thzine ku tunda apa a twariwerire kupika shime ku na kuma pa kwerekiwa kwa Mesiya.
Kwerekiwa kwa Yesu Krisitu
18 Kwerekiwa kwa Yesu Krisitu kwekarire kenge: Mama wenthzi Madiya kuma a ungekeriwire kwa mukwerume o dithzina dyo Josefa. Uno honi o kwa shime ku ciyeka, kwa wanaharire ci Madiya wekarire poremu kokoro o Mupepo Oukenu. 19 Mweyo, pakuninga ci munuwenthzi Josefa nedi munu o muwawa, ka a fotire ku mu fithsa honyi kwanu, wa anekerire ku mu rukurura ko kukana ku i dimuka anu.
20 Unone o ku anekera eyo, kangeru ka Fumu ka hokokire ku kwenthzi ku turo no ku mu ambera ci: “Josefa mwana Davida, wa yapa ku shimba Madiya ci ekare munuwoe, inene eyi a na remenena po yaa tunda ku Mupepo Oukenu. 21 Kenge a kwereka mukwerumeana, wangu wa ku mute dithzina dyo Yesu, inene kenge a ku yoyithsa anuenthzi kwivi yo.”
22 Eyi yoihe kuma ya tendaharire ci i citombore neyi a ambire Fumu ka mukwakukethza ci: 23 “Diungu kenge mba a thza poremu no kwereka mwana o mukwerumeana, kenge mba mwithsa ci ‘Imanuele,’ ku amba ci ‘Nyambi netu a di.’”