Kwerekiwa kwa Yesu
2
Mwao mayuwa kwa tundire thsiraerera kwa Sesare Agusitu ci ku tariwe anu wahe awa a di mu matunga aa a na endithsa. 2 Oku kutara ko kutanga, kwa tendaharire Kwirino o ku di muendithsi wa Siria. 3 Anu wahe a ka ciñorithsire munu no munu, ku diumbo dyo mukuta wa tata wenthzi.4 Mweyo, Josefa naye wa tundire ku Galilea mu diumbo edi di nethsiwa Nazareta, ku thza ku Judea mu diumbo dya Davida edi di nethsiwa Betelehema, inene naye wa mu mukuta no dihumo dya Davida. 5 Wa ka ciñorithsire na Madiya oyu a ungekerire. Madiya wekarire poremu. 6 O kwa di mu Betelehema thsikati thsenthzi thso ku shamuruka thsa kumine. 7 Wa shamurukire mwedi wenthzi o mukwerumeana. Wa mu vungerire peto yombu no ku mu rangeka mu thsikungu, mukaci ko kuninga ci ka wanine maturero mu nthzio thzenda.
Tungeru nadithsani
8 Omo mu ndau kwekarire adithsani po pepi awa a hungererire mitanga thzo othsiku. 9 Kangeru ka Fumu ka hokokire kukwo, kutethzima kwa Fumu kwa wa pakire mu kaci. Adithsani a cishutukire no ku yapa nene. 10 Kangeru ka wa amberire ci: “Mwa yapa! Inene naa mi retera Muthzimbu Ouwa, ou wa ku retera thsinyanyu thsothsikuru anu wahe. Naa amba ci 11 uno othsiku, mu diumbo dya Davida mu nerekiwera muyoyithsi, Krisitu Fumu. 12 Kenge mu ka mu dimuka ko thsimonithso ethsi, kenge mu ka wana kambu aka ka na vungeriwa mwito no ku rangekiwa mu thsikungu.”
13 Ko wanguwangu mungi o dikanga dyo mu wiru dyo tungeru wa ciwanine no Kangeru ko kutanga. Twa shangarire Nyambi no ku amba ci:
14 “Kutethzima kwikare kwa Nyambi mu diwiru,
thsiyaro thsenthzi thsikare kwanu wahe mu kaye awa a na mu roerithsa.”
15 Tungeru ou twa wa thsiire ku huka ku wiru, adithsani a ningire ci: “Tu thzenu ku Betelehema tu ka mone eyi i na tendahara, eyi a na tu tongwera Fumu.”
16 Adithsani a yakamenine ku Betelehema. A ka wanine a Madiya na Josefa no kambu aka ka na rangekiwa mu thsikungu. 17 Ou a ka mu monine, a tongorire eyi ka wa tongwerire kangeru yoyu mwanuke. 18 Wahe awa i yuvire ya wa komokithsire eyi a ambire adithsani. 19 Madiya aye wa pakire yoihe eyi enu mu mucima no ku i cikupaura. 20 Adithsani a hukire ku mitanga thzo o kwa ka thza o remeka Nyambi no ku mu shangara keyi a yuvire no ku mona, inene enu yoihe ya tendaharire komu ka wa tongwerire kangeru.
Yesu aa tiwa dithzina no ku twariwa mu Tembere
21 Ou a kwanine mayuwa o mutanu na ahatu, a mu twarire ku mukanda oku a ka tiwerire edi dithzina dyo Yesu, dithzina edi ka mu tire kangeru, mama wenthzi o ku shime ku thza poremu.
22 Mayuwa o ku cikenithsa ou a pwire kokuthza komu u na ambera Murao wa Mushe, a Madiya na Josefa a twarire mwano ku Yerusalema ku ka mu yareka kwa Fumu. 23 Inene mu Murao wa Fumu kwaa ñoriwa ci: “Mwedi yomuhe o mukwerumeana kenge mba a torweriwa Fumua.” 24 Mweyo, awopo a reta muyambo komu u na ambera Murao wa Fumu, “makuci edi nji mayembeanab”.
Simioni aa shangara Fumu
25 Mu Yerusalema mwekarire mukwerume o dithzina dyo Simioni. Oyu mukwerume wekarire munu o muwawa pa meho a Nyambi, karo wa cipakire kwa Nyambi. Wa tatererire Muyoyithsi wa Isiraele, karo Mupepo Oukenu wekarire ku kwenthzi. 26 Mupepo Oukenu wa mu dimukithsire ci ka a ku fa shime o ku na mono Mesiya oyu a kumbwethzire Fumu. 27 Wa keyire mu Tembere ko ku mu tangerera Mupepo Oukenu, a Josefa na Madiya a retire mwano Yesu mu Tembere eci omu u na ambera Murao. 28 Simioni wa mu shimbire no ku mu kwaterera mu nyara thzenthzi, ayepo shangara Nyambi ci:
29 “Fumu, thsikumbwethzo thsoe thsi na tendahara,
o thsie mupikoe a cithzere mu thsiyaro.
30 Inene meho ange a na mono kuyoyithsa koe,
31 oku no roithsa pa meho o mambunga oahe.
32 Ou po mwethzi ou wa ku hokora Nyambi kwAnukenge,
karo waa pa kutethzima ku mbunga thzoe thza Isiraele.”
33 Tata wenthzi na mama wenthzi a komokire nene mwiambaura ya Simioni yoyu mwana. 34 Ngou Simioni a wa fiyawerire, wa amberire Madiya mama wa Yesu ci: “O mone, Nyambi na a hangura oyu mwanuke ci a retere Maisiraele owangi kunongithsiwa no kuyoyithsiwa, ethsi po thsimonithso thsa Nyambi ethsi mba hamura. 35 Mweyo, eanekera yo micima thzothzingi kenge mba i hokoriwa. Owe o mbuyama, mathsiwa oakuru kenge a ku ku kiña ku mucima eci mwere.”
Mukwakukethza o mbuyama o dithzina dyo Ana
36 Kwekarire mukwakukethza o mbuyama o dithzina dyo Ana, mwana Fanuelu, o ku mukuta wa Asere. Wa kuruparire nene. Ku tunda apa a yekiwerire wa yoyire pohuma myaka mutanu na thzidi na munu wenthzi. 37 Ku tunda apo, wekarire difakathzi katere ku kwanithsa myaka 84. Ka a tundangire mu Tembere, wa kwamenine Nyambi othsiku no mutenya o ku rombera no ku cikanganga no nthzara. 38 Wa keyire mwethso thsikati, wa kandererire kwa Nyambi no ku ambaura yoya mwana kwanu wahe awa tatererire ci Nyambi a pature Yerusalema.
39 Ashemi a Yesu ou a manine enu yoihe kokuthza ko Murao wa Fumu, a hukire ku Galilea ku diumbo dyo dya Nazareta. 40 Mweyo, mwana wa kurire no ku koropa, wa yarire onyanyami, karo thsihemo thsa Nyambi thsekarire pa penthzi.
Yesu o ku di no myaka thzo dikumi na thzidi
41 Mwaka no mwaka ashemi a Yesu a thzangire ku Yerusalema ku thsidika thso Paseka. 42 Yesu o ku di no myaka dikumi na thzidi, a thzire ku thsidika eci omu na kwamenanga. 43 Thsidika ou thsa pwire, a hukire ku diumbo dyo dya Nazareta, aye mwano Yesu wa thsiarire mu Yerusalema ashemienthzi ko kukana ku dimuka. 44 Awo kuma a anekerire ci aa enda namweya. A thzire kengeyo diyuwa mutumbi shime runguro mbeci a ka mu tonde, no ku tateka ku mu fota mu kaci kapo naenthzo.
45 Unone ka mu wanine, ngou a hukire ku Yerusalema o kwa ka thza o mu fota. 46 Munyima thzo mayuwa ahatu a ka mu wanine mu Tembere, o ku nekara mu kaci karongithsi o majuda o ku teerera kukwo no ku wepaura mangudi. 47 Awa a mu yuvire wahe a komokire mathsaano enthzi nedi a wa tawangire mangudi.
48 Ashemienthzi a ka komokire ou a mu monine, mama wenthzi ayepo ninga ci: “Mwanange, ine o na i tu tendera kenge? O na mono tata woe name tu na shupeka nene ku ku fota.”
49 Wa wa tawire ci: “Ine eyi mu na ni fotera? Ka mu dimukire ci naa roera kwikara mu nthzio thza tata nji?”. 50 Unone awo ka yuvithsithsire eyi a wa amberire.
51 Yesu wa hukireno ku Nazareta, wa cihuthsire kushi thzo, mama wenthzi aye wa i pakire yoihe eyo enu mu mucima wenthzi.
52 Yesu wa kurire munyanyami nerama, karo wa roerithsire Nyambi nanu.