Owanyanyami o ku muvo aa na mona Yesu
2
Yesu kuma erekiwerire mu mbongi ethzi thzi nethsiwa Betelehema, mu ditunga dya Judea, Heroda o ku di fumu. Mwethso thsikati akwerume owanyanyamia o ku muvo a keyire mu Yerusalema. 2 Epurire ci: “Kupi a di oyu kambu nerekiwa, oyu wa kwikara Fumu o Majuda? Tu na mono ditungwethzi dyenthzi o ku di va ku muvo, ngouno tu na di shupwera ku na mu pa direma.”3 Fumu Heroda ou a i yuvire wa karuperire nene, mofoci kengeyo nanu wahe o mu Yerusalema. 4 Wa wanekire akuru o mapurisita wahe narongithsi o murao no kwipura ci: “Oyu Mesiya ne kupi a na roera kwerekiwera?” 5 A mu tawire ci: “Mu Betelehema mbongi thzo mu ditunga dya Judea. Inene eyi a ñorire mukwakukethza po eyi:
6 “ ‘Owe Betelehema o mu ditunga dya Juda,
kadi cingwa o muonye ku mambongi oakuru o mu Juda,
inene ku koe kenge mba ku tunda muendithsi,
oyu wa ku dithsa anuange Maisiraele.’ ”
7 Heroda ngou ethserire ku mukunda awo akwerume owanyanyami no ku wepwerikethza thsikati shemwa ethsi dya monaharire edyo ditungwethzi. 8 Wa wa amberire ci: “Mu thze ku Betelehema mu ka fotithsithse nawa yoyo mwanuke. Ou mwa ku ka mu wana mwa ku na ni tongwere, ci nga name na ku thze na ku ka mu pe direma.”
9 Ou a manine ku yuva eyi a ambire fumu, awo akwerume owanyanyami a shumunine ku thza. O kwa di mu dikuñwa, ditungwethzi edi a monine ku muvo dya wa tangererire ku Betelehema no ku kemana peuru thzo ndau apa ekarire mwanuke. 10 A nyanyukire nene shemwa ou a monine edyo ditungwethzi. 11 Engenine mu nthzio no ku mona mwanuke na mama wenthzi Madiya. A tongamine ku manwi ku mu remeka, a kwatire mwinyungero yo no ku shimbamo ekunda yo gauda, insense no mira eyi a mu shimberire. 12 Pakuninga ci Nyambi wa wa nomenithsire ku turo ci a ku huka kwa Heroda, a hukire ku ditunga dyo ko dikuñwa dyadyo.
Yesu aa mu cirithsera ku Egepita
13 Akwerume owanyanyami o ku muvo ou a thzire, kangeru ka Fumu ka hokokire kwa Josefa ku turo. Ka mu amberire ci: “O pinduke o shimbe mwanuke na mama wenthzi o cirere ku Egepita. Wa ku kekareko shime ou na ku ku tongwera karo ci o huke, inene Heroda kenge a ku fotafota oyu mwanuke ci a mwipae.” 14 Oo othsiku Josefa wa pindukire no ku shimba mwanuke na mama wenthzi ku thza ku Egepita. 15 A kekarireko shime Heroda ou a fire. Eyi ya tendaharire ci i citombore neyi a ambire Fumu ka mukwakukethza yo kuninga ci: “Na nithsa mwanange ku tunda mu Egepita.”
16 Heroda ou a monine ci a mwangerire awo akwerume owanyanyami, wa anthzipire nene. Wa tumine mashwarare ku Betelehema no muya mu ditunga momuhe ku kepaa anuke wahe wakwerume o myaka thzidi no ku huthsa pashi, ku endererithsa thsikati thsiya a yuvire kwakwerume owanyanyami ethsi dya monaharire ditungwethzi. 17 Mweyo, eyi a tendire Heroda ya citomborire neyi a ambire mukwakukethza Jeremia ci:
18 “Mainga aa yuvahara mu mbongi thza Rama,
o makuano no mathsiwa oshokuru,
Rahele aa direra anenthzi,
karo aa kana ku hengawethziwa,
inene anenthzi a na fu.”
Yesu nashemienthzi aa huka ku Nazareta
19 Heroda ou a fire, kangeru ka Fumu ka hokokire kwa Josefa ku turo mu Egepita. 20 Ka mu amberire ci: “O pinduke, o shimbe mwanuke na mama wenthzi o huke ku ditunga dya Isiraele, inene waya a fotire ci epae mwanuke na fu.”
21 Josefa ngou a pindukire no ku shimba mwanuke na mama wenthzi, no ku huka ku ditunga dya Isiraele. 22 Unone Josefa ou a yuvire ci Akelausi yodiyo na a shwana tata wenthzi Heroda kwikara fumu mu Judea, wa yapire ku thzako. Unone ou a mu nomenithsire Nyambi ku turo, wa thzire mu thsikiriti thsa Galilea. 23 Wa ka tungire mu mbongi ethzi thzi nethsiwa Nazareta. Eyi kuma ya citomborire neyi a ambire akwakukethza ci: “Kenge a kwithsiwa ci MukwaNazareta.”