Yesu aa twariwa kwa Pilatu
27
Ruura mathsikuthsiku, akuru o mapurisita wahe nakuru o mbunga a ciwanawanine karo ku ciyongora dyo kwipaa Yesu. 2 Ngou a mwangire no ku mu twara ku ka mu pa mu moko a nguvuru Pilatu.Judasi aa cihonda
3 Judasi mukwa ku mu omba ou a monine ci Yesu na ratweriwa kufa, wa cerire no ku huthsa aya madi o muwayawaya o makumi ahatu kwakuru o mapurisita nakuru o mbunga. 4 Judasi wa wa amberire ci: “Na ni tende thsivi pa ku omba munu o kupira murandu.”
Unone awo a mu tawire ci: “Eyo ne tu i tende ngepi atwe? Eyo po yoe.”
5 Judasi wa konthzerire ao madi mu Tembere, no ku thza ku ka ciangerera muothzi mu thsingo ku cipaa.
6 Akuru o mapurisita a torire ao madi no ku amba ci: “Murao wetu ka u tawethzire ci madi o kenge a pakiwe mu thsipaupau thso Tembere, pakuninga ci madi aa naa piti pa mwoyo o munu.” 7 Ou a manine ku ciyuva eyo, a urire dikanda kwa mukwakumba tunyungu toma no ku di tenda mararo enda. 8 Eyi yodiyo di nethsiwera no rerodino ci Dikanda dyOnyinga. 9 Eyi ya tendaharire ci i citombore neyi a ñorire mukwakukethza Jeremia yo ku amba ci: “A na shimbi makumi ahatu o muwayawaya o silivera o muuro wenthzi, eci edi a ciyuvire Maisiraele. 10 Na urupo dikanda kwa mukwakumba tunyungu toma eci edi a ni raire Fumu.”a
Yesu mu kuta thza Pilatu
11 Yesu wa kemanine pa meho a Pilatu nguvuru o Muroma oyu wa mwipurire ci: “Ene yowe o fumu o Majuda?”
Yesu wa mu tawire ci: “Ii, dyodi o amba.”
12 Unone ou a mu capire eamba akuru o mapurisita nakuru o mbunga, ka a tawire thsimweya. 13 Pilatu wa mu amberire ci: “Ene ko yuvire eyi enu yo shongi a ku capa?” 14 Unone Yesu ka a huthsireko shaanga diywi dyofoci. Eyo ya komokithsire nene Pilatu.
Yesu aa ratweriwa kufa
15 Pa thsidika no thsidika thso Paseka nguvuru kuma a punithserangire anu thsinthzinda thsothsihe ethsi a fotire. 16 Kethsiya thsikati kwekarire thsinthzinda oyu wa yukire nene o dithzina dyo Barabasi. 17 Mbunga ou thza ciwanawanine, Pilatu wepurire ci: “Edye oyu mu na foto ci ni mi punithsere, Barabasi nji Yesu oyu nethsiwa Krisitu?” 18 Pilatu wa dimukire ci anu kuma a retire Yesu ku kwenthzi mukaci ko mbamba.
19 Pilatu o ku nekara mu thsipura thso ku ratwera, munuwenthzi wa mu tumenine diywi dyo kuninga ci: “Wa vanda yenthzi oyo munu o kupira murandu, inene kuma ni na shupeka nene ku turo ku rota yenthzi.”
20 Unone akuru o mapurisita nakuru o mbunga a hongaurire anu ci a rombe ku wa punithsera Barabasi no kwipaa Yesu. 21 Nguvuru karo wa wepurire ci: “Yupi kowa aidi oyu mu na foto ci ni mi punithsere?”
A tawire ci: “Barabasi!”
22 Pilatu wa wepurire ci: “Oyu Yesu nethsiwa Krisitu ne ni mu tende ngepi aye?” Wahe a tawire ci: “Ambiwe pa mbinda!” 23 Pilatu wepurire ci: “Murandu mwine naa tende?”
Unone mbunga thza yoomokire nene ku amba ci: “O mwambe pa mbinda!”
24 Pilatu wa pirire dyo ku tenda, karo wa monine ci kenge nga pa tunda mukwangarakanyi. Wa shimbire meyu no ku cihupa ku moko pa meho anu no ku amba ci: “Ame ka ni di no murandu mu kufa koyu munu! Eyo po yenu!”
25 Mbunga thzothzihe thza tawire ci: “Murandu o kufa kwenthzi wikare wetu nanetu!” 26 Pilatu ngou a wa punithserire Barabasi, no ku tumina ci Yesu a mwashuriwe no ku u wa pa ci a ka mwambe pa mbinda.
Mashwarare aa varaera Yesu
27 Mashwarare a Pilatu a shimbire Yesu no ku mu twara mu marombe a Pilatu. Thsipani thso mashwarare thsothsihe thsa konganenine kwa Yesu no ku mu paka mu kaci. 28 A mu shupurire evata yenthzi no ku mu vateka thsikoveyo thsothsikihu thso thsifumu. 29 A thzingire mushukwe o miunga no ku u mu shupeka ku mutwi no ku mu kwatererithsa dingondo ku dyoko dyo rudyo. Ngou a tongamine pa rupara rwenthzi no ku mu varaera ci: “Shooshoo Fumu o Majuda!” 30 A mu thsipaerire mate no ku shimba edyo dingondo ku di mu fura pa mutwi. 31 Ou a manine ku mu varaera a mu shupurire ethso thsikoveyo thso thsifumu. A mu vatithsire eto yenthzi no ku mu punithsa pora ku ka mwamba pa mbinda.
Yesu a ambiwa pa mbinda
32 O kwa tunda kengeyo mu mbongi, a hanganine mukwerume o dithzina dyo Simoni, o mu mbongi ethzi thzi nethsiwa Sirene. A mu ooterire ku shimba mbinda thza Yesu. 33 Ou a kumine pa ndau ethzi thzi nethsiwa Gologota, (ku amba ci Ndau thzo Katendere), 34 a pire Yesu waine o ku vandakana no muthzi oururu ci a nwe. Unone ou a mu erekire, wa kanine ku mu nwa.
35 Ou a manine ku mwamba pa mbinda, a cierire eto yenthzi ko ku pepa ñera. b 36 Munyima thzeyo ekarire pashi no ku mu nyunga. 37 Peuru thzo mutwi wenthzi a pakirepo thsidimukithso thso murandu wenthzi ci: “Oyu po Yesu, Fumu o Majuda.” 38 A mwambire nethzi aidi, oyu ku rudyo oyu ku rumoho.
39 Anu awa a pitire mu dikuñwa a nyungire mitwi ko ku mu varaera, no ku mu yengwera ci: 40 “Ewa, yowe no ningi ci waa twethsa ku umburura Tembere no ku thzi umba karo mu mayuwa ahatu. O ciyoyithse othsinda ne! Ngeci yowe o Mwana Nyambi o shiruke apo pa mbinda!”
41 Akuru o mapurisita, arongithsi o murao nakuru o mbunga nawo a mu varaerire. 42 A ambire ci: “Naa yoyithsa amweya, unone aye aa kwanga ku ciyoyithsa! Ene kadi yodiyo Fumu o Maisiraele oyu? A shiruke popano apa pa mbinda wangu tu tawe ku kwenthzi. 43 Na a kurupera Nyambi, pano honi a mu amwene ne ngeci Nyambi wa ku mu shima. Inene kuma na a amba ci: ‘Yame no Mwana Nyambi.’ ” 44 No waya ethzi ambiwire nenthzi a mu varaerire kengeyo.
Kufa kwa Yesu
45 Diyuwa o ku di di pa kaci ko mutwi, mirema thza thsikire ditunga dyodihe mwitunde ihatu. 46 Ko thsikati thso muthsihatu runguro Yesu wa kumbire ko diywi dyodikuru ci: “Eli, Eli lama sabakatani?” ku amba ci: “Nyambi wange, Nyambi wange, waa ni thsiererera ine?”c
47 Amweya kowa emanine po pepi ou a yuvire eyo, a ambire ci: “Aethsa Eliya.” 48 Popo yumweya kukwo wa ndandumukire no ku ka shimba thsiponji no ku thsi cimbeka mu waine o kuwawata. Wa thsi pakire ku dimbungu no ku mu pa ci a nwe. 49 Unone amweya a ambire ci: “O thsie tango tu mone ngeci Eliya kenge a keya ku na mu yoyithsa.”
50 Yesu ngou a kumbire karo ko diywi dyodikuru no ku mina mwoyo. 51 Popo dimbatu dyo mu Tembere dya yaturiwire epinthzi idi, ku tatekera ku wiru ku twara pashi. Kaye ka ngangamine no mawe a yatathzokire. 52 Idi ya yanthzurukire, nethzimbi yoingi yanua Nyambi awa a fire ya pindukire kwafu. 53 A tundire mu idi yo Yesu ou a pindukire kwafu, engenine mu thsikuña thso shokenu thsa Yerusalema omu a monaharire kwanu owangi.
54 Muendithsi o mashwarare o Maroma no mashwarare amweya aa a nyungire nenthzi Yesu ou a monine kungangama ko kaye neyi ya tendaharire yoihe, a yapire nene no ku amba ci: “Oyu munu yashemwa nedi Mwana Nyambi!”
55 Ambuyama owangi awa a shupwerire Yesu ku tunda ku Galilea o kwa mu kwathsa, emanine kokure kamanana ku tanekera eyi ya tendaharire. 56 Mu kaciko kwekarire Madiya Magadalena, Madiya mama wa Jakovo na Josefa, no mama wa Jakovo na Johani ana Zebedea.
Yesu aa vumbekiwa
57 Runguro kwa keyire mukwerume o fumanyi o ku Arimatea. Dithzina dyenthzi po nedi Josefa, naye nedi thsirongwa thsa Yesu. 58 Wa thzire kwa Pilatu no ku ka romba erama ya Yesu. Pilatu wa tuminine ci a i piwe. 59 Josefa wa shimbire erama ya Yesu no ku i vungera mu dimbatu dyodikenu dyo lineni. 60 Ngou a i pakire mu thsidi thsothsipe ethsi a cakurire kare mu diwe no ku arumwena diwe dyodikuru ku mengeneno o thsidi no ku thza. 61 Madiya Magadalena no Madiya yumweya pekarire, o kwa nekara oshungashunga no thsidi.
Akwakunyunga thsidi
62 Diyuwa edi dya randire Diyuwa dyOciroithsero,d akuru o mapurisita nAfarithsi a ciwanawanenine kwa Pilatu. 63 A ka ambire ci: “Ñathsire wetu, shimbi twa vurukera eyi a ambire oya mukwakwangera o ku yoya yo kuninga ci: ‘Munyima thzo mayuwa ahatu kenge na ku pinduka kwafu.’ 64 Mweyo, o tumine ci thsidi thsi nyungiwe nawa shime ku ka kuma mu diyuwa dyo muthsihatu ci erongwa yenthzi katere a ku mwithze no ku tongwera anu ci na pinduka kwafu. Kwangera ko kengeyo kenge kwa kwikara kokumango nene kupita ko kutanga.”