Yesu aa ratweriwa kufa
19
Pilatu ngou a tuminine ci Yesu a shimbiwe no ku mu mwashura. 2 Mashwarare a thzingire mushukwe o miunga no ku u paka ku mutwi wenthzi. A mu vatithsire thsikoveyo thso muvara o muhombohombo. 3 A mu keyerangire no ku mu varaera ci: “Shooshoo Fumu o Majuda.” A mu vakaurire mambanda.4 Pilatu wa punine karo no ku na wa ambera ci: “Mu teerere, oyu munu naa mu punithsa ku kwenu ci mu mone ci ame ka ni wanine murandu o ku mu ratwera.” 5 Yesu wa punine o ku na vata mushukwe o miunga ku mutwi no thsikoveyo thso muvara o muhombohombo. Pilatu ngou a ambire ci: “Munu oyu!”
6 Apa a mu monine akuru o mapurisita nakwakunyunga Tembere a yoomokire ci: “O mwambe pa mbinda! O mwambe pa mbinda!” Pilatu wa ambire ci: “Mu mu shimbe yoyamwe mu ka mwambe, inene ame ka ni mu wanenine murandu.”
7 Akuru o Majuda a mu huthsire ci: “Tu di no murao, karo kokuthza koo murao, aa roera ku fa inene na cithsa ci Mwana Nyambi.”
8 Pilatu ou a wa yuvire o kwa amba kengeyo wa yapererire. 9 Wa hukire mu marombe no kwipura Yesu ci: “Oku wa tunda ne kupi?” Unone Yesu ka a mu tawire. 10 Pilatu wa mu amberire ci: “Ine eyi o kanena ku amba nange? Ko dimukire ci ame po ni di nokoro o ku ku rukurura nokoro o ku kwamba?”
11 Yesu wa mu tawire ci: “Ko di nokoro pa pange owe, shime okoro o ku ku pa Nyambi. Mukaci keyo oyu na ni pa ku koe o di no thsivi thsothsikuru kupita thsoe.”
12 Pilatu ou a i yuvire eyo, wa fotire nene ku rukurura Yesu. Unone Majuda a yoomokire ci: “Ngeci o mu rukurure oyo, kadi o mbusha Sesare. Munu yomuhe o ku cithsa ci fumu aa rwithsa Sesare.”
13 Pilatu pa ku yuva ao maywi wa punithsire Yesu pora, aye no kwikara mu thsipura thso ku ratwera pa ndau ethzi thzi nethsiwa ci “Mbanthza thzo Mawe” (mu Thsiheveru ci “Gabata”). 14 Edyo diyuwa nedi Diyuwa dyOciroithsero o Paseka, diyuwa o ku di kokera pa kaci ko mutwi. Pilatu wa amberire Majuda ci: “Fumu wenu oyu!”
15 A yoomokire ci: “O mu tware, o mu tware, o ka mwambe!” Pilatu wepurire ci: “Mwaa fota ci niambe Fumu wenu pa mbinda?” Akuru o mapurisita a tawire ci: “Ka tu di no fumu wao shime Sesare.”
16 Pilatu ngou a wa pire Yesu ci a ka mwambe pa mbinda.
Yesu a ambiwa pa mbinda
Ngou a shimbire Yesu. 17 Wa shimbire mbinda thzenthzi no ku puna ku thza ku ndau ethzi thzi nethsiwa Katendere (mu Thsiheveru ci “Gologota”). 18 Apo podiyo a kamberire Yesu, namweya aidi, oyu oku, oyu oku, Yesu mu kaciko. 19 Pilatu wa ñorire thsidimukithso ethsi a pakire pa mbinda thso ku amba ci: “YESU WA NAZARETA, FUMU O MAJUDA.” 20 Majuda owangi a varire ethso thsidimukithso inene apo pa ndau ambiwerire Yesu nedi pepi no thsikuña karo kuma thsa ñoriwire mu Thsiheveru, Thsilatini no Thsigerike.
21 Akuru o mapurisita o Majuda a amberire Pilatu ci: “Wa ñora ci: ‘Fumu o Majuda,’ unone o ñore ci: ‘Oyu munu kuma naa amba ci: “Yame no Fumu o Majuda.” ’ ” 22 Pilatu wa tawire ci: “Ethsi ni na ñoro ni na ñoro.”
23 Mashwarare ou a manine kwamba Yesu a ciererire eto yenthzi momune wo. A shimbire kengeyo no thsikoveyo thsenthzi ethsi thsa rukiwire pa thsito thsofoci ko kupira mufumo ku tunda ku wiru thzathso ku kuma no kushi thzathso. 24 Mashwarare a ciyongorire ci: “Twa thsi yatura, tu pepenu ñera tu mone oyu thsi shimba ci edye.” Eyi ya citomborire no Mañoro o ku ninga ci:
“A na citepera eto yange
no ku pepera ñera thsivata thsange.”a
Eyo yodiyo a kwamine mashwarare.
25 Awa emanine po pepi no mbinda nedi mama wa Yesu no mina mama wa Yesu o mbuyama no Madiya munu wa Kolopasi no Madiya Magadalena. 26 Yesu ou a monine mama wenthzi noya thsirongwa a shimine nene o kwa nemana po pepi, wa amberire mama wenthzi ci: “Mama, mwanoe oyo.” 27 Karo wa amberire oya thsirongwa ci: “Njinoe oyo.” Ku tunda edyo diyuwa oya thsirongwa wa shimbire Madiya ku kekaranga nenthzi mu mwanda wenthzi.\fig Yesu aa amba na Johani na Madiya o ku di pa mbinda|alt="Jesus on cross speaks to John and Mary" src="cn01840c.tif" size="col" loc="Jhn 19:25-27" copy="Cook" ref="19.25-27"
Kufa kwa Yesu
28 Munyima thzeyi, Yesu ko ku dimuka ci ekwama yenthzi i na kwana, karo ko kuninga ci Mañoro a citombore, wa ambire ci: “Ni na fu dinotwa.” 29 Apo pekarire kafuma ko kuyara ko waine o kuwawata. Ngou a cumbwiremo thsiponji no ku thsi shwameka ku katondo ko hisopa no ku thsi mu twarikethza ku miromo. 30 Yesu ou a manine ku nwa waine o kuwawata, wa ambire ci: “Ku na pu!” Popo wa nyongamine mutwi no ku mina mwoyo.
Yesu aa kiñiwa mu maci
31 Nedi Diyuwa dyOciroithsero, karo akuru o Majuda ka fotire ci erama yanu i kare kengeyo pa mambinda mu diyuwa dyo Savata edi dya randireko karo nedi Savata thzo Paseka. Ngou a rombire kwa Pilatu ci a wa cothzaure mauru a wamburepo. 32 Mashwarare ngou a keyire ku na cora mauru o mukwerume o ku tanga noyu o muthsidi waya ambiwire na Yesu. 33 Unone ou a kumine kwa Yesu no ku mona ci o na fu kare, ka corire mauru enthzi. 34 Uno honi, yumweya ku mashwarare wa shimbire ñothzi no ku thzi kiña Yesu mu maci, popo mwa tundire onyinga no meyu. 35 Oyu tongora eyi kuma a i monine, karo aa pa ombangi o shemwa. Karo na dimuka ci aa tongora oshemwa, ci namwe nga mu tawe. 36 Eyi kuma ya tendaharire ci i citombore neyi ya ñoriwire mu Mañoro yo kuninga ci: “Kwithsa kwishoko yenthzi shaanga thsofoci ethsi mba thsi coriwa.”b 37 Karo ko di di Diñoro dimweya dyo kuninga ci: “Kenge a ku mu kenga oyu na kiñi.”c
Yesu aa vumbekiwa
38 Munyima thzeyo, Josefa o ku Arimatea oyu wekarire thsirongwa thsa Yesu thso ku mukunda pa ku yapa akuru o Majuda, wa rombire Pilatu ci a mu tawethze ku kambura erama ya Yesu pa mbinda. Pilatu wa mu tawethzire, ngou a thzire no ku kambura erama ya Yesu. 39 Wa thzire na Nikodema oya mukwerume wa thzire kwa Yesu othsiku. Nikodema wa keyire no thsende o ku nuka nawa o mira o ku vandakana no aloe oremu o ku fota ku piterera makumi ahatu o makiro. 40 Ngou a shimbire erama ya Yesu no ku i vungera mu mambatu o lineni neyo ehefu yo ku nuka nawa. Thsodiyo thsithsemwa thso Majuda thso ku vumbeka munu. 41 Apo pa ndau amberire Yesu nedi pepi no dikanda omu mwekarire thsidi thsothsipe omu mwa kana ku vumbekiwa munu. 42 Pakuninga ci nedi Diyuwa dyo Majuda dyOciroithsero, karo thsidi thsekarire po pepi, a vumbekire momo Yesu.