Kayongo ko kwipaa Yesu
26
Yesu ou a manine ku rongithsa yoihe eyo, wa amberire erongwa yenthzi ci: 2 “Mu na dimuka ci ku na thsiara mayuwa edi ci Thsidika thso Paseka thsi tateke, apo Mwana Munu kenge a ku twariwa ku ka mwamba pa mbinda.”3 Kethsiya thsikati akuru o mapurisita nakuru o mbunga a ciwanawanine ku dirapa dya Kayafa oyu wekarire mupurisita shokuru, 4 ku yongora edi nga a twethsa ku kwatera Yesu ku mukunda no ku mwipaa. 5 Unone a ningire ci: “Twa i kwama mu thsikati thso thsidika, inene kenge nga ya ku reta ci mbunga thzi tende mikwangarakanyi.”
Mbuyama aa wethsa Yesu thsende mu Betania
6 Yesu o ku di mu Betania mu nthzio thza Simoni wengondwe, 7 kwa keyire mbuyama ku kwenthzi no kakeka ko alabasitere ko thsende o ku tura nene no ku mu shukumwena pa mutwi wa Yesu o ku nekara ku tafure.
8 Erongwa ou ya monine kengeyo ya anthzipire no ku amba ci: “Kwa ine oko kupethsapethsa ko kengeyo? 9 Oyu thsende nga na urithsiwa pa madi oangi no ku a pa ahepwe!”
10 Yesu pa ku dimuka eyi ya ambire, wa i amberire ci: “Ine eyi mu mu shupera oyu mbuyama pa ku kwama thsinu thsothsiwa ku kwange? 11 Kenge mwikaranga nahepwe thsikati thsothsihe, unone ame ka mwikaranga nange thsikati thsothsihe. 12 Oyu mbuyama eyi a na kwama yo ku ni shukumwena thsende perama po aa roithsera erama yange ku vumbekiwa. 13 Naa mi tongwera yoshemwa ci kokuhe oku mba u hongiwa Muthzimbu Ouwa mu kaye kokahe, oyu mbuyama kenge mba a vurukiwa keyi a na kwama.”
Judasi aa tawa ku omba Yesu
14 Ngou Judasi Isikariota yumweya pa tunganda to dikumi na twidi a thzire kwakuru o mapurisita 15 no ku ka wepura ci: “Ine eyi nga mu ni pa ngeci amepo ni mi ombera Yesu?” Ngou a tarire madi o ku kuma mu makumi ahatu o muwayawaya o silivera no ku a mu pa. 16 Ku tunda apo, Judasi wa fotire thsikati thsothsiwa thso ku omba Yesu.
Yesu aa dya Paseka nerongwa yenthzi
17 Mu diyuwa dyo kutanga dyo Thsidika thso Makende o kupira Mamene, erongwa ya keyire kwa Yesu no ku na mwipura ci: “Kupi o na foto ci tu ka ku roithsereko ci o ka dyereko Paseka?”
18 Wa i tawire ci: “Mu thze mu mbongi kenge mu ka wana mukwerume, mu ka mu ambere ci: ‘Murongithsi aa amba ci: Thsikati thsange thsi na kumu, naa fota ku na dyera Paseka mu nthzio thzoe nerongwa yange.’ ” 19 Erongwa ya tendire dyodi a i amberire Yesu no ku ka roithsa murarero o Thsidika thso Paseka.
20 Runguro, Yesu wekarire nerongwa yenthzi yo dikumi na idi ku tafure. 21 O kwa dya Yesu wa ambire ci: “Naa mi tongwera yoshemwa ci yumweya ku kwenu kenge a ni omba.”
22 Ko mathsiwa oakuru, a tatekire ku mwipura munu no munu kukwo ci: “Fumu, ene yame nji?”
23 Yesu wa tawire ci: “Oyu nerera nange mu karonga yo wa ku ni omba. 24 Mwana Munu aa roera ku fa eci edi i na ñoriwa mu Mañoro, unone o di nothsimo oyu munu wa ku mu omba! Nga yekarire nawa ci oyu munu nga ka erekiwire.”
25 Judasi mukwa ku mu omba naye wa mwipurire ci: “Murongithsi, ene yame nji?”
Yesu wa tawire ci: “O na amba!”
Murarero o mahurerero
26 O kwa dya kengeyo, Yesu wa shimbire dikende no ku di fiyawera. Wa di kuyaurire no ku di pa erongwa yenthzi no ku amba ci: “Mu shimbe mu dye, eyi po erama yange.”
27 Karo wa shimbire nganja thzo waine no ku kanderera kwa Nyambi. Wa thzi wa pire no ku amba ci: “Mwaheno mu nwemo. 28 Ou po onyinga wange o thsiyuvano thsa Nyambi nanuenthzi. Waa mwaarera anu owangi ci evi i teteriwe. 29 Naa mi tongwera yoshemwa ci ka na ku nwa karo oyu waine shime mu diyuwa edi na ku mu nwa ope nenu mu Kutumina kwa Tata.”
30 Ngou embire dimbo no ku thza ku Mukinya wEtondo yo Miywera.
Yesu aa ambera Peturu ci kenge a mu hamura
31 Yesu wa amberire erongwa yenthzi ci: “Uno othsiku wa rero mwaheno kenge mu cira ku ni thsia nofoci, inene mu Mañoro ku na ñoriwa ci:
“ ‘Kenge na kwipaa mudithsani,
no mutanga o mangu kenge wa ku panthzaana.’a
32 “Unone munyima thzo kupinduka kwange kwafu, kenge na ku citangethza ku Galilea.” 33 Peturu wa ambire ci: “Shaanga ci wa cire wahe ku ku thsia, ame dinice ku ku thsia.” 34 Yesu wa tawire Peturu ci: “Naa ku tongwera yoshemwa ci o uno othsiku wa rero ñombwe o ku shime kwiya kenge o ni hamura ruhatu.” 35 Unone Peturu wa mu tawire ci: “Shaanga ku fa kenge ni fa noe, ka na ku ku hamura!” Nerongwa imweya yoihe ya ambire kengeyo.
Yesu aa rombera mu Getesemani
36 Yesu ngou a thzire nerongwa yenthzi ku ndau ethzi thzi nethsiwa Getesemani. Wa amberire erongwa yenthzi ci: “Mwikare pano uno ni thza paya ku ka rombera.” 37 Wa shimbire Peturu nana Zebedea aidi. Wa tatekire ku cithzekera no kwikara mu mathsiwa oakuru. 38 Wa i amberire ci: “Ni di no mathsiwa oakuru nene mu mucima wange ku ninga ci mane eci nene ni fe. Mwikare pano, mu kuñwere nange.”
39 Wa i thsiire kamanana, wa kupamine no ku rombera ci: “Tata, ngeci yaa tawa, ethzi nganja thzo makando nga thzi tunde ku kwange. Unone ku tendiwe omu o na shimena owe kadi omu ni na shimena ame.”
40 Wa hukire kwirongwa yenthzi no ku ka i wana o ku i na rara. Wa amberire Peturu ci: “Ene tumba nga mu twethsa ku hungera nange shaanga thsitunde thsofoci nji? 41 Mu hungere no ku rombera ci katere mwingene mwiereka. Mucima waa fota, unone erama yaa kwanga.”
42 Wa i thsiire karo ro muthsidi no ku ka rombera ci: “Tata, ngeci ethzi nganja tumba nga thzi tawa ku thzi tundithsa ku kwange shime ci ni nwemo, eshima yoe i tendahare.” 43 Ou a hukire karo kwirongwa yenthzi, wa ka i wanine o ku i na rara pakuninga ci meho ayo a remine.
44 Ngou a i thsiire no ku huka ku ka rombera karo ro muthsihatu o ku ambanga thsinu thsofoci. 45 Wa hukire kwirongwa yenthzi no ku ka amba ci: “Ene shimbi mwa rarera no ku turumwithsa? Mu mone! Thsikati thsi na kumu thso kuninga ci Mwana Munu a piwe mu moko anu wevi. 46 Mu pinduke tu thze! Mukwa ku ni omba na kumu!”
Yesu aa kwatiwa
47 Yesu o ku amba kengeyo, Judasi, yumweya o tunganda to dikumi na twidi wa kumine nanu owangi awa a shimbire myere no miramu. Kuma a wa tumine akuru o mapurisita nakuru o mbunga. 48 Judasi mukwa ku mu omba wa wa pire thsimonithso ci: “Oyu ni ka yamwa yodiyo oyu mu fota. Mu ka mu kwate.” 49 Judasi wa keyererire kwa Yesu no ku na amba ci: “Shangwe Murongithsi!” No ku mu yamwa.
50 Yesu wa mu tawire ci: “Shadi, ngo kwame pohuma eyi o neyera.”
Popo anu awa endire nenthzi a kwatire Yesu no ku mwanga. 51 Unone yumweya kowa ekarire na Yesu wa shwamunine mwere no ku teta ditwi dya mupika mupurisita shokuru.
52 Yesu wa mu amberire ci: “O pake mwere woe mu ndaro thzao, inene wahe o ku kwamithsa mwere kenge a ku paiwa ko mwere. 53 Ene ko dimukire ci nga naa fota ku kwathsiwa kenge nga ni romba Tata, karo kenge nga a ni tumena popano epani yoikuru yo kupiterera dikumi na idi yo tungeru? 54 Uno honi ngeci amepo ni tenda kengeyo, ngepi nga a citombora Mañoro neyi i na roera ku tendahara pano?”
55 Kethsiya thsikati Yesu wa amberire ethzo mbunga ci: “Ene no thsikeremi yo ku ni keyera no myere no miramu ku na ni kwata? Ine eyi na mu kana ku ni kwata uya na nikaranga nenu mu Tembere mayuwa oahe o ku ni rongithsa? 56 Uno honi eyi yoihe ya tendaharera ci i citombore neyi a ñorire akwakukethza mu Mañoro.” Popo erongwa yoihe ya cirire ku mu thsia.
Yesu aa twariwa mu Nthzango
57 Awa a kwatire Yesu a mu twarire kwa Kayafa oyu wekarire mupurisita shokuru oku a ciwanawanenine arongithsi o murao nakuru o mbunga. 58 Peturu wa mu shupwerire o ku enderanga kokure shime ku ka kuma ku dirapa dya mupurisita shokuru. Wengenine mu dirapa no kwikara nakwakunyunga ku tanekera oku i ka pwera.
59 Akuru o mapurisita no Nthzango thzothzihe a fotire ombangi o mbango ci a paerepo Yesu. 60 Unone ka u wanine, shaanga ci kwa keyire mambangi oangi o kwithsa. Ku hura kwa keyire anu aidi 61 no ku na amba ci: “Oyu munu kuma naa amba ci aa twethsa ku umburura Tembere thza Nyambi no ku thzi umba karo mu mayuwa ahatu.”
62 Mupurisita shokuru wemanine no kwipura Yesu ci: “Ene kwithsa ethsi nga o huthsako kweyi enu a ku capa?” 63 Unone Yesu ka a tawire. Mupurisita Shokuru wa mu amberire ci: “Naa kwethzera ngoro mu dithzina dya Nyambi oyu yoya ci o tu tongwere ngeci yowe o Mesiya,b Mwana Nyambi.”
64 Yesu wa tawire ci: “Dyodi o amba. Uno honi naa mi ambera ci ku tunda pano kenge mbo mu mona Mwana Munu o ku nekara ku dyoko dyo rudyo dya Nyambi Shokoro noku keya mu mavui o mu wiru.”
65 Popo mupurisita shokuru wa yaturire evata yenthzi no ku amba ci: “Na yengwa! Ine eyi tu fotera mambangi karo? Mu na ciyuvera o ku yengwa. 66 Amwe ne mwa i anekera ngepi?”
Awo a tawire ci: “Aa roera ku fa.”
67 Ngou a mu thsipaerire mate pa rupara no ku mu fura no mafaindi. Amweya a mu furire mambanda 68 no ku amba ci: “Krisitu, o ukethze oyu na ku furu ci edye?”
Peturu aa hamura Yesu
69 Peturu kuma ekarire pora mu dirapa. Kwa keyire ngamba o mbuyamaana no ku ambera Peturu ci: “Nowe shime wa ekaranga na Yesu o ku Galilea.”
70 Unone wa hamurire pa meho anu wahe ci: “Ka ni i dimuka eyi o amba.”
71 Peturu ngou a tuturukerire ku thsero thzo dirapa. Ngamba yumweya o mbuyamaana wa mu monine no ku ambera anu awa ekarirepo ci: “Oyu munu shime aekara na Yesu o ku Nazareta.”
72 Wa hamurire karo no kwethza ngoro ku amba ci: “Ka ni mu dimuka oyu munu!”
73 Munyima thzo thsikati thsothsipu, anu awa emanine apo a keyire kwa Peturu no ku mu ambera ci: “Yoshemwa nowe o mukwa mu thsipani thso, inene ambithso thzoe thzaa monithsa nawanawa.”
74 Peturu wa tatekire ku cikuya no kwethza ngoro ci: “Ka ni mu dimuka oyu munu!”