Yesu aa yoa edyato yerongwa yenthzi
13
Thsikati thso Paseka ou thsa kokerire po pepi, Yesu wa dimukire ci thsikati thsenthzi thsi na kumu thso ku thsia kano kaye no ku thza kwa Tata wenthzi. Thsikati thsothsihe wa shimine awo ekarire enthzi muno mu kaye, karo wa wa shimine ku twara ku mahurerero. 2 Yesu nerongwa o kwa dya murarero, shamaonga wa pire kare Judasi mwana Simoni Isikariota eanekera yo ku omba Yesu. 3 Yesu wa dimukire ci Tata wenthzi wa mu pire okoro wenu yoihe, karo ci kuma a tundire kwa Nyambi, karo kenge a ku huka kwa Nyambi. 4 Yesu wa katukire ku tafure, wa cishupurire thsikoveyo thsenthzi thso peuru no ku cianga tauro mu mbunda. 5 Ngou a pakire meyu mu dironga no ku tateka ku yoa edyato yerongwa yenthzi no ku i porora no tauro ethzi a ciangire mu mbunda.6 Wa kumine pa Simoni Peturu oyu wa mu amberire ci: “Fumu, ene waa fota ku yoa edyato yange nji?” 7 Yesu wa mu tawire ci: “Pano ko yuvithsithsa eyi ni tenda, unone ku rupara kenge wa ku i yuvithsithsa.”
8 Peturu wa mu amberire ci: “Dikuce ku yoa edyato yange.”
Yesu wa tawire ci: “Ngeci ka ni yoo edyato yoe, ko wa kwikara wange.”
9 Simoni Peturu wa mu amberire ci: “Fumu, wa yoa edyato yange pohuma, unone o yoe moko no mutwi wange kengeyo.” 10 Yesu wa mu amberire ci: “Munu oyu na cihupu ka a roerire ku cihupa karo, shime ku ciyoa kwidyato yenthzi pohuma, unone erama yenthzi yoihe ikenu. Amwe mwa kenu, uno honi kadi cingwa mwahe.” 11 Yesu wa dimukire ci edye oyu wa ku mu omba, ngeyi a amberire ci: “Kadi cingwa mwahe mwakenu.”
12 Ou a manine ku yoa edyato yerongwa yenthzi, wa vatire thsikoveyo thsenthzi no ku huka ku tafure. Wa i amberire ci: “Ene mu na yuvithsithsa eyi ni na tende ku kwenu? 13 Mwaa ni thsa ci Murongithsi no Fumu, karo yashemwa, inene yame. 14 Uno honi, ngeci ame no Fumu, karo Murongithsi wenu ni na yoo edyato yenu, namwe kengeyo mwaa roera ku ciyoa oandu edyato. 15 Ni na mi monithsa yo ku tenda, ci namwe mwaa roera ku tenda dyodi ni na tende ku kwenu. 16 Naa mi tongwera yoshemwa ci ngamba tumba a piti ñathsire wenthzi, karo oyu naa tumiwa tumba a piti oyu naa mu tumu. 17 Uno mu na dimuka eyi, mwakwa thsiyauthzi ngeci amwepo mu i tenda.
18 “Ka ni ningire amwe mwahe, ni na dimuka awa na ni hangura. Unone eyi i na ñoriwa mu Mañoro yaa roera ku citombora, yo ku ninga ci: ‘Oyu na di nange dikende dyange o na ni piruka.’ 19 Naa mi tongwera eyi o ku i shime ku tendahara, ci ou ya ku tendahara, nga mwa ku tawe ci Yame. 20 Naa mi tongwera yoshemwa, yomuhe o ku tambura oyu ni na tumu, name aa ni tambura kengeyo. Karo yomuhe o ku ni tambura aa tambura noyu naa ni tumu.”
21 Yesu ou a manine ku amba eyi wa cinyengire mu mupepo wenthzi, ngou a pire ombangi ci: “Naa mi tongwera yoshemwa ci yumweya ku kwenu kenge a ni omba.”
22 Erongwa ya cikengakengire, o ku i na cikomokera nene ko kukana ku dimuka ci oyu a ninga ne edye. 23 Thsimweya kwirongwa ya Yesu, ethsi a shimine nene, thsekarire ku nyonga thzenthzi. 24 Simoni Peturu wa thsi rapethzire no ku thsi ambera ci: “O mwipure ci edye oyu a ninga?” 25 Thsiya thsirongwa thsa hendamenine Yesu thsa mwipurire ci: “Fumu, ene edye oyu o ninga?”
26 Yesu wa tawire ci: “Aye oyu ni pa ethsi thsipara thso dikende ou ni mana ku thsierera yodiyo.” Ou a manine kwerera ethso thsipara thso dikende wa thsi pire Judasi mwana Simoni Isikariota. 27 Judasi ou a manine ku tambura edyo dikende, popo Satana wa mwingenine. Yesu wa mu amberire ci: “O i tende wanguwangu eyi o tamba ku tenda.” 28 Uno honi awa ekarire nenthzi ku tafure kwithsa oyu wa yuvithsithsire eyi a ambire Yesu. 29 Pakuninga ci Judasi nedi yodiyo mukwakunyunga thsipaupau thso madi, amweya kukwo a anekerire ci Yesu kuma a mu amberire ci a ka ure eyi ya fotaharire pa thsidika, nji ci a ka pe thsimweya kwahepwe. 30 Mweyo, Judasi ou a manine ku tambura edyo dikende, popo wa punine pora. Apo nedi othsiku.
Thsiraerera thsothsipe
31 Judasi o ku na thzi pora, Yesu wa ambire ci: “Pano honi Mwana Munu aa piwa kutethzima, karo no Nyambi aa piwa kutethzima mu mwenthzi. 32 Ngeci Nyambi aa piwa kutethzima mu mwenthzi, Nyambi naye kenge a mu pa kutethzima mu mwenthzi aye, karo kenge a ku mu pa kutethzima popo mwene. 33 Anange, kenge nikara nenu thsikati thsothsipu pohuma. Kenge mwa ku ni fotafota, karo dyodiya na amberire Majuda, pano honi naa i mi ambera namwe ci oku ni thza tumba mu twethsa ku kumako. 34 Naa mi pa thsiraerera thsothsipe. Mu cishime, eci ame edi ni na mi shimi, namwe mu cishime kengeyo. 35 Yoihe mu cishima, anu wahe mbeci a dimuke ci mwerongwa yange.”
Yesu aa ambera Peturu ci kenge a mu hamura
36 Simoni Peturu wa mwipurire ci: “Fumu, ene kupi oku o thza?”
Yesu wa tawire ci: “Tumba o twethsa ku ni shupwera thsino thsikati oku ni thza, uno honi ku rupara kenge wa ku ni shupwera.”
37 Peturu wa mwipurire ci: “Fumu, ine eyi nga ni kana ku twethsa ku ku shupwera thsino thsikati? Ni na ciroithsera ku ku fera!”
38 Yesu wa tawire ci: “Ene o na ciroithsera shemwa ku ni fera? Naa ku ambera yoshemwa ci ñombwe o ku shime kwiya kenge o ni hamura ruhatu!”