Kayongo ko kwipaa Yesu
14
Kuma kwa thsiarire mayuwa edi ci kwikare Thsidika thso Paseka no Makende o kupira Mamene. Akuru o mapurisita narongithsi o murao a fotire thsikati thsothsiwa thso ku kwata Yesu kanthzimbere ci a mwipae. 2 A ambire ci: “Twa i tenda mu thsikati thso Thsidika, inene kuinashimi mbunga kenge nga thzi tenda mukwangarakanyi.”Yesu aa wethsiwa thsende mu Betania
3 Yesu o ku di mu Betania ku nthzio thza Simoni wengondwe o ku nekara ku tafure, kwa keyire mbuyama no kakeka ko alabasitere ko thsende o ku nuka nawa no ku tura nene. Wa kuyurire thsingo thzoko kakeka no ku shukumwena thsende pa mutwi wa Yesu.
4 Amweya kowa ekarire apo a anthzipire no ku amba ci: “Ine yo ku pethsapethsera oyu thsende? 5 Oyu thsende nga kuma a na urithsiwa madi oangi o ku twethsa ku piterera o ku kwamena munu mu mwaka, no ku a pa ahepwe.” Ngou a anthziperire oyo mbuyama.
6 Yesu wa wa amberire ci: “Mu mu thsie. Ine eyi mu mu shupera? O na tende enu yoiwa ku kwange. 7 Ahepwe po kenge mwikarangano thsikati thsothsihe no ku wa kwathsa popahe apa mu na shimena. Unone ame ka mwikaranga nange thsikati thsothsihe. 8 O na kwama momuhe omu a na twethsera ku kwamena. O na wethse erama yange thsende, ku i roithsera diyuwa dyo ku i vumbeka, thsikati o ku thsi shime ku kuma. 9 Naa mi tongwera yoshemwa ci kokuhe oku mba u hongiwa Muthzimbu Ouwa mu kaye, oyu mbuyama kenge mba a vurukiwa keyi a na kwama ku kwange.”
Judasi aa tawa ku omba Yesu
10 Ngou Judasi Isikariota yumweya werongwa yo dikumi naidi, a thzire kwakuru o mapurisita ku ka ciyuvano edi nga a twethsa ku omba Yesu. 11 A nyanyukire ou a yuvire eyo, ngou a mu kumbwethzire ku mu pa madi. Judasi wa fotire thsikati thsothsiwa ethsi nga a twethsa ku omba Yesu.
Murarero o mahurerero
12 Mu diyuwa dyo kutanga dyo Thsidika thso Makende o kupira Mamene, apa epaerangire manguana eyambero yo Paseka, erongwa ya Yesu ya mwipurire ci: “Kupi oku o na foto ci tu ka ku roithsereko murarero o Paseka?”
13 Wa tumine erongwa idi no ku i ambera ci: “Mu thze mu thsikuña, kenge mu ka cihangana no mukwerume oyu na shimbi kafuma ko meyu, mu ka mu shupwere. 14 Mu nthzio omu a kengena mu ka tongwere thsinda thsa nthzio ci: ‘Murongithsi aepura ci kupi ku nthzio thzenda oku nga ni dyera Paseka nerongwa yange?’ 15 Kenge a ka mi twara mu kapingwethzi kokakuru ko ku koroi aka ka na roithsiwa kare, modiyo mu ka roithsera murarero wetu.” 16 Ngou honi eyo erongwa idi ya thzire no ku kengena mu mbongi. Ya ka wanine enu yoihe dyodi a i tongwerire Yesu. Ya ka roithseriremo murarero o Paseka.
17 Runguro, Yesu wa kumine nerongwa yo dikumi naidi. 18 O kwa dya ku tafure, Yesu wa ambire ci: “Naa mi tongwera yoshemwa ci yumweya ku kwenu oyu ni dya nenthzi pano kenge a ni omba.”
19 Erongwa ya cinyengire nene no ku tateka ku mwipura munu no munu ci: “Ene yame nji?”
20 Yesu wa i tawire ci: “Yumweya ku kwenu mwakwa dikumi naidi oyu ni dya nenthzi mu karonga kofoci. 21 Mwana Munu kenge a ku fa eci dyodi ya ñoriwire keyi yenthzi. Unone o di nothsimo oyu wa ku mu omba! Nga yekarire nawa ci nga ka erekiwire.”
Murarero wa Fumu
22 O kwa dya, Yesu wa shimbire dikende, munyima thzo ku di fiyawera, wa di pire erongwa yenthzi no ku amba ci: “Mu shimbe, eyi po erama yange.”
23 Wa shimbire nganja thzo waine no ku kanderera kwa Nyambi. Wa thzi i pire, yoihe ya nwinemo. 24 Wa i amberire ci: “Ou po onyinga wange o thsiyuvano thsa Nyambi nanuenthzi, ou wa ku mwaarera owangi. 25 Naa mi tongwera yoshemwa ci ka na ku nwa waine karo shime mu diyuwa edi na ku mu nwa ope mu Kutumina kwa Nyambi.”
26 Ou a manine kwimba dimbo dyo kushangara, a thzire ku Mukinya wEtondo yo Miywera.
Yesu a okethza ya Peturu ci kenge a mu hamura
27 O kwa di mu dikuñwa, Yesu wa i amberire ci: “Mwahe kenge mwa ku ni yeuka. Inene mu Mañoro ku na ñoriwa ci:
‘Kenge na kwipaa mudithsani,
no mangu kenge a ku panthzaana.’
28 “Unone munyima thzo kupinduka kwange kwafu, kenge na ku citangethza ku Galilea.”
29 Peturu wa ambire ci: “Shaanga aenthzange wahe wa cire ku ku thsia, ame ka ni ku thsii!”
30 Yesu wa mu tawire ci: “Peturu, naa ku tongwera yoshemwa ci o uno othsiku, ñombwe o ku shime kwiya rwidi, owe o ku na ni hamura ruhatu.”
31 Unone Peturu wa tanarithsire ku amba ci: “Shaanga ku fa kenge na ku fa noe, ka na ku ku hamura!” Namweya wahe a ambire kengeyo.
Yesu aa rombera mu Getesemani
32 Ngou a thzire ku ndau ethzi thzi nethsiwa Getesemani. Yesu wa amberire erongwa yenthzi ci: “Mwikare pano, uno ni ka rombera.” 33 Wa shimbire Peturu, Jakovo no Johani no ku thzano. Wa mwingenenine wowa no ku cithzekera. 34 Wa wa amberire ci: “Mucima wange mu mathsiwa oakuru u di ku ninga ci mane eci nene ni fe. Mwikare apa, mu kuñwere nange.”
35 Ou a wa thsiire kamanana, wa furumanine pashi no ku rombera ci: “Ngeci yaa tawa ethsi thsikati thso makando thsa keya ku kwange.” 36 “Aba, Tata, waa twethsa enu yoihe. O tundithse ethzi nganja thzo dikando ku kwange. Shaanga kengeyo, o tende omu o na fotera owe, kadi omu ni na fotera ame.”
37 Ou a ka hukire kwirongwa yenthzi, wa na i wanine o ku i na rara. Wa amberire Peturu ci: “Simoni, epo o na rara? Waa kwanga ku kuñwera shaanga thsitunde thsofoci? 38 Mu kuñwere no ku rombera ci katere mu were mwiereka. Mupepo waa shima, unone erama yaa faratera.” 39 Yesu wa hukire karo ku ka rombera eci edi a romberire pa kutanga. 40 Ou a ka hukire, wa na wa wanine o kwa na rara karo, inene meho o kuma a remine nene, ka dimukire neyi yo ku mu tawa.
41 Ou a ka hukire ro muthsihatu, wa i amberire ci: “Epo no pano tu di shimbi mwa rarera no ku turumwithsa? Ku na kwana! Thsikati thsi na kumu. Mu mone, Mwana Munu aa ombiwa no ku piwa mu moko anu wevi. 42 Mu katuke tu thzenu! Mukwa ku ni omba o na kumu.”
Yesu aa kwatiwa
43 Popo Yesu o ku amba eyo, Judasi, yumweya ko iya erongwa yo dikumi naidi wa kumine. Kuma a keyire no thsipani thsanu awa shimbire myere no miramu, awa tumine akuru o mapurisita, arongithsi o murao nakuru o mbunga. 44 Judasi aye mukwa ku mu omba, kuma a wa pire thsidimukithso ci: “Mukwerume oyu ni ka yamwa yodiyo, mu ka mu kwate no ku mu twara o ku mu thza o mu nyunga ci katere omboroke.” 45 Popa a ka kumine Judasi wa ka thzerererire kwa Yesu, no ku amba ci: “Murongithsi!” no ku mu yamwa.
46 A kwatire Yesu no ku mwanga. 47 Yumweya kowa ekarire na Yesu wa shwamunine mwere wenthzi, no ku teta ditwi dya mupika mupurisita shokuru.
48 Yesu wa ambire ci: “Ene no thsikeremi eyi mu na ni keyera no myere no miramu ku na nianga? 49 Ine eyi na mu kana ku nianga uya na nikaranga nenu mu Tembere o ku ni rongithsa diyuwa no diyuwa. Unone eyi ya tendahara ci i citombore neyi ya ñoriwire mu Mañoro keyi yange.”
50 Popo erongwa ya Yesu yoihe ya cirire no ku mu thsia yofoci. 51 Kwekarire mushumba yumweya oyu wa shupwerire Yesu, o ku na cianga thsinduva thso lineni. A fotire ku mu kwata, 52 unone ou a cipothsorire, wa thsiire mu moko o ethso thsinduva thso lineni a ciangire, no ku cira thsisheshe.
Yesu aa twariwa mu Nthzango
53 A twarire Yesu kwa mupurisita shokuru, oku a ciwanawanenine akuru o mapurisita wahe, nakuru o mbunga, narongithsi o murao. 54 Peturu wa shupwerire Yesu o ku enderanga kokure shime ku nengena mu dirapa dya mupurisita shokuru. Ngou ekarire pofoci nakwakunyunga ku yota mudiro.
55 Akuru o mapurisita pofoci no Nthzango thzothzihe a fotire ombangi ou nga twethsa ku ratwera Yesu kufa, unone ka u wanine. 56 Anu owangi a pire o mbangi o mbango ku mu capa, unone ombangi wo ka wa endererire. 57 Ngou kwemanine akwerume amweya no ku pa ombangi o mbango. 58 A ambire ci: “Na tu mu yuvu o ku amba ci: ‘Kenge na ku umburura ethzi Tembere thza umbiwire ko moko anu, kenge na ku umba thzathzo mu mayuwa ahatu thzo kukana ku umba ko moko anu.’” 59 Unone napo karo ombangi wo ka wa endererire.
60 Ngou mupurisita shokuru emanine mu kaciko no kwipura Yesu ci: “Ene ko i di eyi o na foto ku huthsako? Ine eyi o na foto ku ciambera othsinda kweyi a ku capa awa anu?” 61 Unone Yesu wa tutwarire, ka a tawire thsimweya. Ngou mupurisita shokuru a mwipurire karo ci: “Ene yowe o Krisitu, Mwana Nyambi Shathsiyauthzi?”
62 Yesu wa tawire ci: “Yame! Kenge mba mu mona Mwana Munu o ku nekara ku dyoko dyo rudyo dya Nyambi Shokoro ouhe. Karo kenge mba mu mu mona o ku keya mu mavui o ku wiru.”
63 Mupurisita shokuru wa yaturire ekoveyo yenthzi no ku amba ci: “Ombangi wine karo tu fota? 64 Mu na i ciyuvera mwahe o ku yengwera Nyambi. Amwe ne mwa i mona ngepi?” Wahe a kumbire ci: “Nepithsa, aa roera ku fa!”
65 Ngou amweya a tatekire ku mu thsipera mate no ku mu anga thsito pa meho, a mu furire no mafaindi no ku amba ci: “O ukethze oyu na ku furu ci edye,” Akwakunyunga nawo, a mu shimbire o kwa ka thza o mu vakaura mambanda.
Peturu aa hamura Yesu
66 Peturu o ku di mushi mu dirapa, yumweya kwambuyamaana kwapika mupurisita shokuru wa keyire. 67 Ou a monine Peturu o ku yota ku mudiro, wa mu kengererire thsithzui no ku amba ci: “Nowe shime wa ekaranga na Yesu o ku Nazareta.”
68 Unone Peturu wa hamurire ci: “Ka ni dimukire nji ku yuvithsithsa eyi o amba ci ine.” Ngou a thzire ku mengeneno. Popo ñombwe weyire.
69 Oyu mbuyamaana ou a mu monineko, wa amberire awa emanine apo karo ci: “Oyo mukwerume oyo naye wa mu thsipani thso.” 70 Peturu wa hamurire karo.
Munyima thzo thsikati thsothsipu, awa emanine pepi nenthzi a mu amberire ci: “Yoshemwa nowe o mukwa thsipani thsenthzi, inene nowe o Mugalilea.”
71 Unone wa tatekire kwethza ngoro no ku amba ci: “Na diyerire ame ku mu dimuka oyu munu mu tongora ci edye.” 72 Popo ñombwe weyire ro muthsidi.
Ngou honi Peturu a vurukire eyi a mu amberire Yesu ci: “Ñombwe o ku shime kwiya ro muthsidi kenge o ni hamura miendo thzihatu ci ko ni dimuka.” Ngou a cithziururire ku dira.