Yesu aa amba yo ku umburuka kwa Yerusalema
13
Yesu o ku tunda mu Tembere, thsimweya kwirongwa yenthzi thsa mu amberire ci: “Murongithsi, o mone owa oa mawe nokuru weyi eumba?”2 Yesu wa mu tawire ci: “Eyi eumba o mona yoshokuru kenge ya ku umburuka. Kwithsa shaanga diwe dyofoci edi dya ku thsiara peuru thzedi dimweya.”
Emonithso yo kupwa ko kaye
3 Yesu ou a kekarire pa Mukinya wEtondo yo Miywera, oshungashunga no Tembere, Peturu, Jakovo na Johani na Andereasi a mwipurire ku mukunda ci: 4 “O tu tongwere, diyuwa dipi ya ku tendahara eyo? Karo thsimonithso mwine ethsi thsa ku monithsa ci yoihe eyi pepi i di no ku tendahara?”
5 Yesu wa wa amberire ci: “Mu mamere ci munu katere a ku miangere, 6 inene owangi kenge mba keya mu dithzina dyange no ku amba ci: ‘Yame no Mesiya,’ karo kenge mbangera owangi. 7 Ou mwa ku yuva yo mandwa no mapurwatwi o mandwa, mwa ku cithzekera. Eyo po yo i na roera ku tendahara, unone kadi kodiyo kupwa ko kaye. 8 Matunga kenge a ku cirwithsa, no kutumina kenge kwa ku rwithsa kutumina kumweya. Kenge kwa kwikara kungangama ko kaye mu mandau oangi, no mandombo kengeyo. Ao po odiyo matatekero o makando.
9 “Unone amwe mu ciroithsere, inene anu kenge a ku mi twara ku makuta, no ku mi fura mu masinagoge. Kenge a ku mi twara ku manguvuru no mafumu mukaci kange, ci mu ka pe ombangi ku kwo. 10 Muthzimbu Ouwa waa roera ku hongiwa tango mu matunga oahe. 11 Ou a ku mi kwata no ku mi twara ku ka mi thzekithsa, mwa ku cithzekera ci ine eyi mu ka amba. Mwa ku ka ambe pohuma eyi mwa ku ka piwa mwethso thsikati, inene kadi yamwe mwa ku ka amba, unone Mupepo Oukenu.
12 “Mukurwamunu kenge a ku omba minenthzi ci a paiwe, no tatawamunu kenge a ku omba mwane. Ana kenge a ku rwithsa ashemi wo no ku wa paithsa. 13 Anu wahe kenge a ku mi thzimba mukaci ko dithzina dyange, unone oyu wa ku ootera shime ku ka kuma ku mahurerero kenge a ku yoyithsiwa.
Makando oakuru
14 “Ou mwa ku mona ‘omangoa o kupiterera o kwipithsa’ o ku u di mu ndau omu u na kana ku roera kwikara, (oyu tara a nangure), apo honi awa a di mu Judea a ku cirere ku mikinya. 15 Oyu di pa thsituwa thso nthzio a ku shiruka kwingena mu nthzio ci a ka shimbemo thsimweya. 16 Noyu di ku dikanda ka a ku twethsa ku huka ku diumbo ci a ka shimbe thsikoveyo thsenthzi. 17 Mayuwane othsimo wambuyama awa kwikara poremu nowa a ku yamwithsa mwao mayuwa. 18 Mu rombere kwa Nyambi ci eyo katere ya ku tendahare pa kufu. 19 Inene mwao mayuwa kenge kwa kwikara dikarara dyo kuninga ci dya diyerire dikarako ku tunda apa omberire Nyambi enu yoihe, karo mbera ka dikarako. 20 Napoci Fumu ku tepurura kwao mayuwa, nga kwithsa oyu wa ku para. Unone mukaci kowa na a hangura, na a tepurura kwao mayuwa.
21 “Mwao mayuwa ngeci munu waa ku mi ambere ci: ‘O mone, Krisitu oya kuya!’ nji ci ‘Ono kuno!’ Mwa ku i tawa. 22 Inene akrisitu o mbango nakwakukethza o mbango kenge a ku keya no ku na kwama emonithso nekomokithsa kwangera owangi, mane shaanga awa na a hangura Nyambi, nga ayopo i tawa. 23 Mu mamere ne honi! Ni na mi tongwera enu yoihe o ku i shime ku tendahara!
Kukeya kwa Mwana Munu
24 “Unone mwao mayuwa, munyima thzao makando,
“ ‘diyuwa kenge dya ku nyora,
no ngonda ka thza kwikara no mwethzi,
25 matungwethzi kenge a ku wa ku wiru,
neyi yoshokoro yo mu wiru kenge ya ku ngangamithsiwa.’
26 “Kethsiya thsikati anu kenge a ku mona Mwana Munu o ku keya mu mavui kokoro oukuru no kutethzima. 27 Karo kenge a ku tuma tungeru twenthzi ku waneka anuenthzi awa na a hangura, ku tunderera mu mandau ane oahe o kaye. Ku tunda ku hura thzo kaye shime ku ka kuma ku hura thzo diwiru.
Erongithsa yo thsitondo thsokuyu
28 “Uno honi mu cirongithse thsimweya pa thsitondo thsokuyu. Mite thzathso kamona thziotopa no ku hoka mamuna oape, mu dimuke ci thsikati thso mvura pepi thsi di. 29 Mweyo, ou mwa ku mona eyo o ku i tendahara, mu dimuke ci kukeya kwenthzi pepi ku di, mane pa thsero. 30 Naa mi tongwera yoshemwa ci mukuta o rerodino ka wa ku pwa shime yoihe eyi o ku i na tendahara. 31 Diwiru no kaye kenge ya ku pwa, unone maywi ange mbera ka a pu.
Kwithsa oyu na dimuka edyo diyuwa nji ethso thsikati
32 “Kwithsa oyu na dimuka edyo diyuwa nji ethso thsikati, shaanga tungeru to mu wiru, shaanga Mwana, shime Tata pohuma yofoci yo na i dimuka. 33 Pakuninga ci ka mu dimukire thsikati, mu taterere no ku ciroithsera!
34 “Kwaa cipitura eci munu oyu di mu ruendo. Aa thsia nthzio thzenthzi no ku pa okoro apikenthzi. Aa pa munu no munu ekwama, no ku raerera mukwakunyunga pa thsero ci a kuñwere. 35 Mweyo, mu kuñwere, inene ka mu dimukire thsikati ethsi a ku ka huka thsinda thsa nthzio, nji kenge ya kwikara runguro, nji pa kaci kothsiku, nji ñombwe o kwiya, nji mu ruura. 36 Kuinashimi ayepo keya ko thsiundumukera, katere a ku na mi wane o ku mu na rara. 37 Eyi ni mi tongwera, yodiyo ni tongwera anu wahe kuninga ci mu mamere!”