Yesu aa amba yo kuumburuka ko Tembere
24
Yesu ou a tundire mu Tembere, erongwa yenthzi ya mu henyenine no ku mu nehethza eumba yo Tembere. 2 Yesu wa i amberire ci: “Mu na i mono eyi yoihe? Naa mi tongwera yoshemwa ci kwithsa diwe shaanga dyofoci edi dya ku thsiara peuru thzedi dimweya, yoihe kenge ya ku umburuka.”Makando o ku rupara
3 Yesu ou ekarire pa Mukinya wEtondo yo Miywera, erongwa yenthzi ya keyire ku kwenthzi ko kumengi no ku na amba ci: “O tu tongwere thsikati ethsi ya ku tendahara yoihe eyi o ambaura. Karo thsimonithso mwine thsa ku dimukithsa kukeya koe no kupwa ko kaye?”
4 Yesu wa wa tawire ci: “Mu mamere ci katere a ku mi yemburure munu. 5 Inene, anu owangi kenge a ku keya mu dithzina dyange no ku amba ci: ‘Yame no Krisitu,’ karo kenge a ku yemburura anu owangi. 6 Kenge mwa ku yuva yo mamvo no mapurwatwi o mamvo, unone mwa ku cithzekera. Eyo yaa roera ku tendahara, unone kadi odiyo mahurerero o kaye. 7 Ditunga kenge dya ku rwithsa ditunga dimweya, no kutumina kenge kwa ku rwithsa kutumina kumweya. Mu mandau o ku cithsiathsia kenge kwa kwikara mandombo no ku ngangama kokukuru ko kaye. 8 Eyo enu yoihe kenge ya kwikara eci matatekero a mbuyama oyu nyatithsa.
9 “Anu kenge a ku mi kwata no ku mi twara kowa a ku ka mi nyandithsa no ku ka mipaa. Mishovo thzothzihe mu kaye kenge thza ku mi thzimba mukaci ko dithzina dyange. 10 Mwethso thsikati anu owangi kenge a ku thsia thsitawo thso, amweya kenge a ku cangithsa no ku cithzimba. 11 Akwakukethza o mbango owangi kenge a ku keya no ku nangera anu owangi. 12 Kushwahura murao wa Nyambi kenge kwa ku kura nene, thsishimo thsanu owangi kenge thsa ku pupuka. 13 Unone oyu wa ku citanarithsa shime ku ka kuma ku hura kenge a ku yoyithsiwa. 14 Muthzimbu Ouwa o Kutumina kwa Nyambi kenge wa ku hongiwa mu kaye kokahe ci ikare ombangi kwanu o mishovo thzothzihe, mbeci kwa ku keye mahurerero o kaye.
Kukeya ko makando oshokuru
15 “Ou mwa ku mona omango o kupiterera o ku reta oundu ou a tongorire mukwakukethza Daniele o ku u di mu Ndau thzo Shokenu (oyu tara a yuvithsithse nawa), 16 apo honi awa di mu Judea a ku cirere ku mikinya, 17 munu oyu di pa thsituwa thso nthzio a shiruka kwingena mu nthzio thzenthzi ci a ka rongitikeye enu. 18 Karo oyu di mu dikanda a huka ku diumbo ci a ka shimbe thsikoveyo thsenthzi. 19 Mayuwane othsimo wambuyama awa a kwikara poremu nowa a ku yamwithsa mwao mayuwa! 20 Mu rombere kwa Nyambi ci kucira kwenu kwa kwikara pa kufu nji mu diyuwa dyo Savata. 21 Inene mwethso thsikati kenge kwa kwikara dikarara dyodikuru, kupita oahe aa ekarako ku tunda ku matatekero o kaye shime ku na kuma thsino thsikati, karo mbera ka dikarako. 22 Napoci Nyambi ku anekera ku tepurura koa mayuwa o makando, nga kwithsa munu oyu wa ku yoya, unone mukaci kanu awa naa cihangwera Nyambi, kenge a ku a tepurura.
23 “Kethsiya thsikati ngeci munu waa ku mi tongwere ci: ‘Mu mone, Krisitu ono kuno’ nji ci ‘Oya kuya,’ mwa ku i tawa. 24 Inene kenge kwa ku keya akrisitu o mbango nakwakukethza o mbango. Awo kenge a ku tenda emonithso nekomokithsa yoikuru yo ku komokithsa, kwangera anu, shaanga awa naa hangura Nyambi nga ayopo i tawa. 25 Mu teerere, ni na i mi tongwera ayo o ku i shime ku tendahara.
26 “Mweyo, shaanga anu wa ku mi tongwere ci: ‘Ono kuno mu dikunguthsitu,’ mwa ku thzako. Nji ci ‘Mu mone, o na cihoreka kuya,’ mwa ku i tawa. 27 Inene dyodiya ku nekaranga kwethsa ko mvura ku tunda ku muvo ku thza ku mutoko, no kukeya kwa Mwana Munu dyo kwa kwikara. 28 Oku ku di thsinu thso kufa kodiyo a ciwanawanena makwi.
Kukeya kwa Mwana Munu
29 “Popa a ku pwa ao mayuwa o makando, diyuwa kenge dya kwiraura, ngonda ka thza kwikara no mwethzi, matungwethzi kenge a ku wa ku wiru, karo yoshokoro yo mu wiruwiru kenge ya ku ngangama.
30 “Ngou honi athso thsimonithso thso kukeya kwa Mwana Munu thsa ku monahara mu wiru. Mishovo thzothzihe thzo kaye kenge thza ku dira, karo kenge a ku cimonena Mwana Munu o ku keya mu mavui o diwiru kokoro no kutethzima kokukuru. 31 Kenge a ku tuma tungeru twenthzi, karo kenge kwa ku dira muvumo oukuru o torombita. Kenge twa ku paka pofoci awa na a hangura mu mambango ane o kaye, ku tatekera ku matatekero o diwiru shime ku ka kuma ku mamaneneno adyo.
Erongithsa yo thsitondo thsokuyu
32 “Mu cirongithse thsimweya pa thsitondo thsokuyu, kamona thziotopa mite thzao no ku hoka mamuna mwaa dimuka ci mvura pepi a di. 33 Mofoci, ou mwa ku mona yoihe eyi o ku i tendahara mu dimuke ci Mwana Munu pepi a di, mane pa thsero mwene. 34 Naa mi tongwera yoshemwa ci anu awa yoya kethsino thsikati ka ku fa wahe eyi yoihe o ku i shime ku tendahara. 35 Diwiru no kaye kenge ya ku pwa, unone maywi ange ao mbera ka a pu.
Thsikati thso mahurerero
36 “Unone yo diyuwa no thsikati kwithsa oyu na i dimuka, shaanga tungeru to ku wiru, nji Mwana, shime Tata pohuma yofoci yo na i dimuka.
37 “Kukeya kwa Mwana Munu kenge kwa ku cipitura eci thsikati thsa Nuwe. 38 Mwao mayuwa dimina o ku di shime, anu a dire, a nwine, a yekire, a yekithsire, mane shime ku ka kuma mu diyuwa edi engenine Nuwe mu areka. 39 Ka dimukire thsimweya shime dimina ou dya kumine no ku na wa pukithsa wahe, dyo ya kwikara no mu diyuwa dyo kukeya kwa Mwana Munu.
40 “Kethso thsikati, kwakwerume aidi awa kwikara mu dikanda, yumweya kenge a ku shimbiwa, yumweya kenge a ku thsiiwa. 41 Kwambuyama aidi awa a ku twa mu kakunthzu, yumweya kenge a ku shimbiwa, yumweya kenge a ku thsiiwa.
42 “Mu mamere, inene ka mu dimukire diyuwa edi a ku keya Fumu wenu. 43 Mu dimuke ci nga thsinda thsa nthzio aa dimukanga thsikati ethsi a keya mwithzi, nga aa kuñweranga ku nyunga nthzio thzenthzi karo tumba nga a tanekera nthzio thzenthzi o ku thzi tuviwa. 44 Namwe mwikare o ku mu na ciroithsera thsikati thsothsihe, inene Mwana Munu kenge a ku keya thsikati ethsi mu na kana ku taterera.
Kathsimo ko ngamba o muwawa noyu o mumango
45 “Edye ngamba o mururami karo o munyanyami, oyu a pire ñathsire wenthzi ku endithsa aenthzenthzi angamba no ku wa panga edya ko thsikati ethsi thsi na roera? 46 Wa thsiyauthzi oyo ngamba ngeci ñathsire wenthzi waa ku na mu wane o ku tendanga kengeyo ou a ku na kuma. 47 Naa mi tongwera yoshemwa ci ñathsire wenthzi kenge a ku mu pa ku endithsa rufumo rwenthzi roruhe. 48 Unone ngeci oyo ngamba po mumango, karo waa ku ambe mu mucima wenthzi ci: ‘Ñathsire wange ka a ku ka huka wangu’, 49 no ku tateka ku furanga aenthzenthzi angamba, no ku dya no ku nwa netakwa, 50 ñathsire oya ngamba ou a ku ka huka mu diyuwa edi a na kana ku mu taterera no mu thsikati ethsi a na kana ku dimuka, 51 kenge a ku mu thsanyaura no ku mu pa humbithso ethzi thzi na roera akwamahetaheta, oku a ku ka direra no ku cihuma nwaeo.”