Yesu aa ambera anu ci a cinyunge kwarongithsi o murao nAfarithsi
23
Yesu ngou a amberire mbunga nerongwa yenthzi ci: 2 “Arongithsi o murao nAfarithsi wodiyo a na shwana thsipura thsa Mushe. 3 Mweyo, mwaa roera ku hengeka no ku tenda eyi a mi ambera yoihe. Unone mwa temununa eyi a tenda, inene ka shupwerire eyi a rongithsa. 4 A anga mipango thzothziremu, no ku thzi pangekithsa anu amweya, uno honi awo ka fotire ku wa yakura shaanga no munwe pohuma.5 “Yoihe eyi a tenda a i tendera ci a wa mone anu. Mu mone, a na cishupeka ku mitwi no ku moko ekwakwati yoikuru omu mu di maywi a Nyambi, no ku vata ekoveyo yo minganja thzothzire. 6 Aa fotanga nene ku remekiwa pedika no ku fota kwikaranga mwipura yo ku rupara mu masinagoge. 7 Karo aa fotanga nene ku vumeneniwa ko direma mu maurithsero, no ku fota ci anu a wethsange ci ‘Rabi.’a
8 “Unone amwe ka mu roerire kwithsiwa ci ‘Murongithsi’, inene mwahe mwana munu yofoci, karo Murongithsi wenu po yofoci pohuma. 9 Ka mu roerire kwithsa munu pano pashi ci ‘Tata’, inene Tata wenu po yofoci pohuma oyu di mu wiru. 10 Karo ka mu roerire kwithsiwa ci: ‘Ñathsire,’ inene Ñathsire wenu po yofoci, aye Mesiya. 11 O mukuru ku kwenu apwe eci ngamba wenu. 12 Munu yomuhe o ku cithzineka kenge a ku huthsiwa kushi, o ku cihuthsa kushi kenge a ku thzinekiwa.
Yesu aa shomorora Afarithsi narongithsi o murao
13 “Mwakwothsimo amwe mwarongithsi o murao namwe mwAfarithsi, amwe mwakwamahetaheta! Mwaa yanthzera thsero thzo Kutumina ko ku Wiru ku rupara rwanu. Amwe kadi mwakwa kwingenamo, karo awa a na foto kwingenamo mwaa wa kanithsa. 14 [Mwakwothsimo amwe mwArongithsi o murao namwe mwAfarithsi, amwe mwakwamahetaheta! Inene mwaa pupirika mafakathzi no ku wethzera mu manthzio o ko mahetaheta o ku wa tenderanga erombero yoire. Mweyo, humbithso thzenu kenge thza kwikara thzothzikuru ku piterera!]b
15 “Mwakwothsimo amwe mwarongithsi o murao namwe mwAfarithsi, amwe mwakwamahetaheta! Mwaa mana matunga no ku rea mawate ku ka fota shaanga munu yofoci o ku pirura ci ekare Mujuda. O ku mu na mana ku mu pirura, mu na mu tende rwidi mwana dihere eci amwe.
16 “Mwakwothsimo amwe mwatangereri o tupuputwa! Inene mwaa rongithsa anu ci: ‘Munu o kwethza ngoro ko Tembere po ka ethzire ngoro shemwa. Uno honi o kwethza ngoro ko gauda o Tembere po yo na canga yoshemwa.’ 17 Amwe mwa tupuputwa owatomba! Thsothsikuru mu thsivaka ne gauda nji, nji Tembere ethzi thzi na kenithsanga gauda? 18 Karo mwaa rongithsanga ci: ‘Munu o kwethza ngoro ko katara ko mu Tembere ka ethzire ngoro shemwa. Unone o kwethza ngoro ko nupu ethzi thzi dipo yo na canga shemwa.’ 19 Amwe mwa tupuputwa! Thsothsikuru ne thsipi, nupu ethzi thzidi pa katara nji, nji ako katara ka na kenithsanga nupu? 20 Mukaci keyo, naa mi ambera ci, munu o kwethza ngoro ko katara nethzi ngoro ko katara neyi i dipo yoihe. 21 O kwethza ngoro ko Tembere nethzi ngoro ko Tembere no ku pakerera no Nyambi oyu wa tungumo. 22 Noyu o kwethza ngoro ko diwiru na pakerera no ngunja thza Nyambi no Nyambi oyu nekarapo.
23 “Mwakwothsimo amwe mwarongithsi o murao namwe mwAfarithsi, amwe mwakwamahetaheta! Inene mwaa panga Nyambi thso mudikumi keyi mu na dimanga yo ku pitura eci minta, anisi no kumini. Ii, mwaa roera ku pa thso mudikumi, unone ka mu roerire ku thsierera eyi erongithsa yoikuru mu thsivaka yo murao, yo ku pitura eci kupira dipethso, ñeke norurami. Eyi yodiyo mu na roera ku tenda ko kukana ku thsiererako thsimweya! 24 Amwe mwaendithsi o tupuputwa! Mwaa cimburamo nthzi mu meyu enu, unone mwaa mina kamere.
25 “Mwakwothsimo amwe mwarongithsi o murao namwe mwAfarithsi, amwe mwakwamahetaheta! Inene mwaa yoanga manganja no turonga peuru, unone mushi mu na yara enu yo rununa necikumbwethza yoimango. 26 Owe o Mufarithsi o kapuputwa, o tange tango ku yoa nganja no karonga mushi, kenge i kena no peuru.
27 “Mwakwothsimo amwe mwarongithsi o murao namwe mwAfarithsi, amwe mwakwamahetaheta! Inene mwaa cipitura eci idi yo ku wethsa okenu peuru, yaa monahara nawa peuru, unone mushi ku na yara eshoko yanu o kufa nenu yo kwora. 28 Namwe dyo mu di kengeyo, anu wahe aa mona ci mwawawa, unone mu micima thzenu mu na yara mahetaheta no ku shwahura murao wa Nyambi.
Yesu aa amba yo humbithso thzarongithsi o murao nAfarithsi
29 “Mwakwothsimo amwe mwarongithsi o murao namwe mwAfarithsi, amwe mwakwamahetaheta! Inene mwaa umba idi yakwakukethza no ku yenga idi yanu owawawa. 30 Karo mwaa amba ci: ‘Mu mayuwa o ku manyima, nga ko twekarire, nga ka twa vandire kwikwama yakwathsañuruetu yo kwipaa akwakukethza.’
31 “Mweyo, mwaa pa ombangi mwathsinda ci mwanahoka o waya paire akwakukethza. 32 Apa i di kengeyo, mu shumune eyi a tatekire akwathsañuruenu.
33 “Amwe mwa mayoka! Amwe mwana epidi! Ngepi mwa ku para ku humbithso thzo dihere?
34 “Mweyo, mu teerere! Pano naa mi tumithsera akwakukethza nanu owanyanyami narongithsi o murao. Amweya ku kwo kenge mwa ku wepaa, awa amweya kenge mwa ku wamba pa mbinda, amweya kenge mwa ku wa furera mu masinagoge enu o ku mu thza o wa cithzacithza mu mbongi no mbongi. 35 Mweyo, murandu o kwipaa anu owawawa pa kaye kenge wa ku mi thsimanena mwahe. Ku tatekera pa kwipaiwa kwa Abele oyu wekarire o muwawa, shime ku na kuma pa kwipaiwa kwa Zakariya mwana Barakia oyu mwepaerire mu Tembere mu kaci ko Ndau thzo Shokenu no katara. 36 Naa mi tongwera yoshemwa ci ethzo raturo kenge thza ku wera anu o rerodino.
Yesu aa direrera Yerusalema
37 “Mayuwane Yerusalema, Yerusalema, owe o nepaanga akwakukethza no ku povauranga no mawe tunganda twa Nyambi. Kadi edi ni na fotanga ku paka pofoci anoe eci ñathzishushwa edi a na pakanga tuciyociyo twenthzi mu mando enthzi, unone ko i fotire! 38 Mu na mono honi, pano nthzio thzenu kenge thza kwikara diundu. 39 Naa mi tongwera ci ku tunda pano ka mwa ku ni mona karo, shime ou mba mu amba ci: ‘Wa thsiyauthzi oyu keya mu dithzina dya Fumu!’ ”