Kathsimo kanjimi owamango
12
Yesu wa tatekire ku wa rongithsa ko tuthsimo, wa ambire ci: “Munu yumweya wa kunine dikanda dyo veine. Wa di thzingurukithsire thsipaka, wa thsiminemo diteke dyo thsikameno thso waine no ku yaramo otara o kwingera. Wa di thsiire mu moko anjimi ci a di nyunge, aye no ku thza ruendo. 2 Mu thsikati thso ku koyora veine, wa ka tumineko mupikenthzi ko waya anjimi ci a ka mu shimbereko veine ku veine o muya mu dikanda. 3 Unone awaya anjimi a kwatire oya mupika ku mu fura no ku mu huthsa mokomoko. 4 Thsinda thsa dikanda ngou a ka tumineko mupika yumweya. Oyo a ka mu furire ku mutwi no ku mu tenda dyodimango. 5 Karo wa tumine yumweya. Oyo aye a ka mwipaire. Wa tumineko owangi amweya, amweya a ka wa furire, awa kwipaa. 6 Thsinda thsa dikanda wa thsiarire pohuma no munu yofoci o ku tuma, mwane oyu a shima nene. Ku hura wa mu tumineko, wa ambire ci: ‘Kenge a ka mu remeka pakuninga ci mwanange.’7 “Unone awo anjimi a ciambathsanine ci: ‘Shwana wenthzi o na kumu, mwiye tu mwipae twa ku shwane dikanda!’ 8 Ngou a mu kwatire no ku mwipaa ku mu konthzera pora thzo dikanda dyo veine.”
9 Yesu wepurire ci: “Oya thsinda thsa dikanda ne ine a ku tenda ko waya anjimi? Kenge a ku keya ku na wepaa no ku na pa dikanda kwanjimi amweya. 10 Ene ka mwa tara mu Mañoro diywi dyo ku amba ci:
“ ‘Diwe edi na kende akwakuumba,
di na piruka diunthzi dyo nthzio.
11 Fumu na a kwama eyi,
karo yaa komokithsa atwe tu i mona.’?”
12 Aendithsi o Majuda a fotire ku kwata Yesu pa ku nangura ci ako kathsimo po ka shembo thzo ku thsangera ku kwo, unone a yapire mbunga. Ngou a mu thsiire no ku cithzera.
Ngudi thzo ku tera mutero
13 Yesu a mu tumithserire Afarithsi amweya nakwathsipani thsa Heroda ku na mu ta pa rudimi ko ngudi ci a mu kwaterepo. 14 A keyire no ku na mu ambera ci: “Murongithsi, tu na dimuka ci waa ambanga yoshemwa ko wa hangwera munu, karo ko wa wana mavwevwe. Waa rongithsanga dikuñwa dyo shemwa dya Nyambi. Pano o tu tongwere, ene yaa tawethziwa ci atwe tu tere mutero kwa Sesare nji dyombo? 15 Tu tere nji twa tera?”
Yesu wa dimukire mahetaheta o, ngou a wa amberire ci: “Mwaa ni tera ine pa rudimi? Mu ni retere madi o muwayawaya ni a mone!” 16 A a mu reterire, Yesu ngou a wepurire ci: “Ethsi thsikupuro nedi dithzina i dipo ne yadye?”
A mu tawire ci: “Ya Sesare!”
17 Yesu wa wa amberire ci: “Mu pe Sesare ya Sesare, no Nyambi mu mu pe ya Nyambi!” Eyi a tawire ya wa komokithsire.
Yo kupinduka kwafu
18 Kwa keyire Asaduki amweya kwa Yesu, anu awa kana ku tawa ci ko ku di kupinduka kwafu. A na mwipurire ngudi ci: 19 “Murongithsi, Mushe wa tu pire murao ci ngeci mukwerume ayepo fa ku thsia difakathzi dyo kupira mwana, mukurwe nji minenthzi aa roera ku yeka oya difakathzi ci erekere mukurwe nji minenthzi ana. 20 Kwekarire ana munu yofoci o mutanu naidi. Mukurwo wa yekire mbuyama no kufa ko kukana ku wana nenthzi mwana. 21 Oyu wa mu randire wa yekire oya difakathzi, naye karo wa fire ko kukana ku wana nenthzi mwana. Yekarire kengeyo noku koyu o muthsihatu. 22 Wahe akwa mutanu naidi a mu yekire ko kupira oyu wa wanine nenthzi mwana. Ku hura naye mbuyama wa fire. 23 Mu diyuwa dyo kupinduka kwafu ne, oya mbuyama ne kenge a kwikara munu wadye, inene wahe akwa mutanu naidi a mu yekire?”
24 Yesu wa wa tawire ci: “Mu na yongo, inene ka mu dimukire eyi ya ñoriwire mu Mañoro nji okoro wa Nyambi. 25 Inene afu ou mba pinduka, akwerume mbera ka yeke nji ambuyama ku thza ku maruo, unone kenge mbekara eci tungeru to mu wiru.
26 “Keyi yo kupinduka kwafu ne ka mwa tara mu vuka thza Mushe yo thsipukumuna thso ku yuuma, Nyambi ou a amberire Mushe ci: ‘Yame no Nyambi wa Aburahama, Nyambi wa Isaka no Nyambi wa Jakovo’? 27 Aye po kadi cingwa Nyambi wafu, unone wayumi. Apopo mu na yongo nene!”
Thsiraerera thsoshokuru
28 Murongithsi yumweya o murao wa keyire no ku wa yuva o kwa cikanyeka. Karo wa monine ci Yesu wa wa tawire nawa. Wa mwipurire ci: “Thsipi thsiraerera thsothsikuru nene mu thsivaka kupita yoihe?”
29 Yesu wa mu tawire ci: “Thsiraerera thsothsikuru po ethsi, ‘O teerere, owe Isiraele, Fumu Nyambi wetu, Fumu po yofoci. 30 Mweyo, waa roera ku shima Fumu Nyambi woe ko mucima woe ouhe no mwoyo woe ouhe no maano oe oahe nokoro woe ouhe.’ 31 Thsiraerera thso muthsidi po ethsi, ‘O shime muenthzoe eci edi wa cishima othsinda.’ Kwithsa thsiraerera thso kupita eyi kukuru.”
32 Oya murongithsi o murao wa tawire ci: “O na amba nawa Murongithsi! O na amba yoshemwa pa ku amba ci Nyambi po yofoci pohuma kwithsa wao karo, shime aye pohuma. 33 Munu aa roera ku shima Nyambi ko mucima wenthzi ouhe no mathsaano enthzi oahe nokoro wenthzi ouhe, no ku shima muenthzenthzi eci edi a cishima thsinda. Ethzo mirao thzikuru mu thsivaka kupita nupu mutumbi thzothzihe thzo ku tumekera pofoci neyambero yoihe.”
34 Yesu wa monine ci wa tawire konyanyami, wa mu amberire ci: “Ko di kokure no Kutumina kwa Nyambi.” Ku tunda apo kwithsa munu oyu wa keshukire ku mwipura thsimweya.
Krisitu ne mwana edye?
35 Yesu ou a rongithsire mu Tembere, wa wepurire ci: “Ine eyi a na amberanga arongithsi o murao ci Mesiya po mwana Davida? 36 Ngeci Davida aye thsinda ko ku tangereriwa ku Mupepo Oukenu wa ambire ci:
‘Fumu wa amberire Fumu wange ci:
“O wikare ku rudyo rwange,
shime ku ka kuma apa na ku pakera akwethzimbo yoe kushi thzedyato yoe.” ’
37 “Davida aye thsinda aa mwithsa ci Fumu, ngepi karo edi nga ekara mwane.” Mbunga thzothzikuru thza mu teererire ko thsinyanyu.
Yesu aa shomorora arongithsi o murao
38 Yesu o ku rongithsa wa ambire ci: “Mu mamere arongithsi o murao, aa thzimbanga ku endaura o kwa na vata evata yoire no ku fota ku vumeneniwa mu maurithsero. 39 Awa anu awo aa shima epura yoikuru mu thsivaka mu masinagoge, no mandau o direma pedika. 40 Aethzeranga mafakathzi etere yo mu manthzio o ko mahetaheta o ku wa tenderanga erombero yoire. Humbithso thzo kenge thza kwikara thzothzikuru nene.”
Nupu thza difakathzi
41 Yesu wekarire po pepi no kakoño mu Tembere, wa tanekerire mbunga edi thza konthzeriremo madi. Afumanyi owangi a konthzeriremo madi oangi. 42 Kwa keyire difakathzi o hepwe, wa na konthzeriremo tuwayawaya twidi.
43 Yesu wethsire erongwa yenthzi no ku i ambera ci: “Naa mi tongwera yoshemwa ci oyu difakathzi o hepwe o na konthzera oangi kupita wahe awa a na konthzera omu mu kakoño. 44 Inene wahe kuma a na shimbanga pa rufumo rwo oru ru na piri ku konda. Unone aye muhepwe wenthzi, o na ka cikothsora kokahe apa nga aa yoyera.”