Yesu aengena mu Yerusalema
21
O kwa kokera ku Yerusalema, a kumine mu diumbo dya Betifage, pa mukinya wEtondo yo Miywera. Podiyo a tumenine Yesu idi kwirongwa yenthzi, 2 no ku i ambera ci: “Mu thze mu diumbo edi di di pa rupara rwenu, kenge mu ka wana thsindongi ethsi thsi na fungereriwa no mwanathso ku mbadi, mu ka i puture, mu ka i ni retere kuno. 3 Ngeci waa ka mipure munu, mu ka mu ambere ci: ‘Fumu na i foto,’ popo kenge a ka mi tawethza ku i shimba.”4 Eyi kuma ya tendaharire ci i citombore neyi a ambire mukwakukethza ci:
5 “Mu tongwere mbongi thza Sione ci:
O mone, Fumu woe aa keya ku koe,
na cihuthsa kushi, na pahama pa thsindongiana,
mwana thsindongi.”
6 Erongwa ya thzire no ku ka tenda dyodi a i tongwerire Yesu. 7 Ya ka retire thsindongi no mwana thso, a na yarirepo ekoveyo yo, Yesu ayepo pahamapo. 8 Mbunga thza yarire ekoveyo yo mu dikuñwa, amweya a ka tetire mite thzetondo ku na yara mu dikuñwa. 9 Anu amweya awa endire ku rupara no ku nyima thza Yesu a tatekire ku kuerera ci,
“Hosanaa Mwana Davida!
‘Wa thsiyauthzi oyu keya mu dithzina dya Fumu!’
Hosana mu diwiru!”
10 Yesu ou engenine mu Yerusalema, thsikuña thsothsihe thsemanine shakashaka no kwipura ci: “Edye oyu?”
11 Mbunga thza tawire ci: “Yodiyo Yesu mukwakukethza o ku Nazareta mu ditunga dya Galilea.”
Yesu aa kanithsa ku urithsera mu Tembere
12 Yesu ou engenine mu Tembere wa cithzacithziremo awa a urire no ku urithseramo. Wa huwire matafure owa cinjire madi no ku huwa epura yowa a urithsire mayembe. 13 Ngou a wa amberire ci: “Ku na ñoriwa ci:
“ ‘Nthzio thzange kenge mbo thzithsiwa nthzio thzerombero,
unone amwe na mu thzi pirura macihoreko ethzi.’ ”
14 Tupuputwa nekunga a keyire kwa Yesu mu Tembere, aye wa wa porithsire. 15 Akuru o mapurisita narongithsi o murao a anthzipire ou a monine ekomokithsa eyi a kwamine, nanuke awa a kuererire mu Tembere ci: “Hosana Mwana Davida!”
16 Ngou epurire Yesu ci: “O na yuvu eyi a amba awa anuke?” Aye wa wa tawire ci: “Ni na i ciyuvera nawanawa. Ene ka mwa tara eyi ya ñoriwire yo ku ninga ci:
“‘No rongithsa anuke no tumbu
ku ku shangara’?”
17 Yesu ngou a wa thsiire ku tunda mu Yerusalema ku thza ku Betania oku a ka rarire.
Yesu aa kuta thsitondo thsokuyu
18 Diyuwa edi dya randireko, Yesu o ku huka ku Yerusalema wa fire nthzara. 19 Wa monine thsitondo thsokuyu ku mbadi thzo dikuñwa. Wa thzire ku ka fotako ñuyu, unone ka a ka wanineko thsimweya shime mamuna pohuma. Ngou a amberire oo okuyu ci: “Owe o thsitondo mbera wema karo!” Popo ethso thsitondo thsa waukire.
20 Erongwa ou ya i monine eyo, ya komokire. Yepurire ci: “Ngepi u na wauka wangu ou okuyu?”
21 Yesu wa i tawire ci: “Naa mi tongwera yoshemwa ci kamona mu tawa no kukana ku tamangera, mwaa twethsa ku tenda eyi ni na tende kothsi thsitondo thsokuyu. Kadi eyo pohuma, unone kenge nga mu twethsa ku ambera nou mukinya ci: ‘O thzuruke ka cikonthzere mu diwate,’ kenge nga i dikara. 22 Kamona mu tawa kenge mwa ku tambura yoihe eyi mwa ku romba ko thsirombero.”
Yesu aepuriwa pokoro wenthzi
23 Yesu ou engenine mu Tembere, o ku rongithsa, akuru o mapurisita nakuru o Majuda a keyire ku kwenthzi ku na mwipura ci: “Ou okoro o kwamithsa eyi ne waa tunda kupi?” “Karo oyu na a u ku pa ne edye?”
24 Yesu wa wa tawire ci: “Name tango ni mipure ngudi thzofoci pohuma, ngeci o mu thzi ni tawe name kenge ni mi tongwera oku u tunda ou okoro ni kwamithsa eyi. 25 Johani ne kupi a wanine okoro o ku korovethza, ku wiru nji kwanu?” A i ciyongorire mu kaciko ci: “Ngeci o tu ninge ci: ‘Ku wiru,’ kenge a twipura ci: ‘Ine honi na mu kana ku tawa yenthzi?’ 26 Karo ngeci o tu ninge ci: ‘Kwanu,’ twaa yapa mbunga, inene wahe aa tawa ci Johani po mukwakukethza.”
27 Ngou a tawire Yesu ci: “Ka tu dimuka.” Yesu naye wa wa amberire ci: “Name ka ni mi tongwera oku u tunda ou okoro ni kwamithsa eyi enu.”
Kathsimo kana aidi
28 “Mwaa anekera ngepi? Kwekarire munu oyu wekarire nana aidi wakwerume. Wa thzire koyu o kutanga no ku ka mu ambera ci: ‘Mwanange, o thze o ka kwame ku dikanda dyo veine rero.’ 29 Mwanamunu wa kanine ci: ‘Ka ni fotire,’ unone munyima wa pirurire eanekera yenthzi no ku thza. 30 Tatawamunu wa thzire koyu yumweya no ku ka mu ambera maywi o ku cipitura. Aye wa tawire ci: ‘Naa thza tata,’ unone ka a thzireko.
31 “Edye powa aidi oyu wa kwamine eshima ya tata wenthzi?”
A tawire ci: “O kutanga.” Yesu wa ambire ci: “Naa mi tongwera yoshemwa ci aterithsi nambuyama o maherehere wa kwikara ku rupara rwenu kwingena mu Kutumina kwa Nyambi. 32 Inene Johani Mukwakukorovethza wa keyire ku na mi monithsa dikuñwa dyowawa, unone ka mwa tawire yenthzi, aterithsi nambuyama o maherehere awo na tawa yenthzi. Karo shaanga ou mwa i monine, ka mwa cerire no ku tawa yenthzi.”
Kathsimo kakwakunyunga owamango
33 Yesu wa ambire ci: “Mu teerere kathsimo kamweya. Kwekarire munu yumweya oyu wa dimine dikanda dyo veine no ku di thzingurukithsa thsipaka, wa thsiminemo thsikameno thso waine no ku yaramo otara o kwingera. Ayepo di paka mu moko akwakunyunga no ku thza ruendo. 34 Thsikati thso ku koyora veine ou thsa kokerire, wa ka tumine apikenthzi kowa akwakunyunga ci a ka mu shimbereko veine wenthzi. 35 Unone awaya akwakunyunga a kwatire waya apika, oyu a mu furire, oyu a mwipaire, o muthsihatu a mu povaurire no mawe. 36 Ngou a tumineko apika owangi kupita o kutanga, nawo karo a ka wa tendire diya a tendire o kutanga.
37 “Ku hura wa tumineko honi mwane no ku amba ci: ‘Kenge a ka remeka mwanange.’
38 “Unone awaya akwakunyunga ou a monine mwane a ciambathsanine ci: ‘Na kumu shwana, mwiye tu mwipae tu shwane dikanda.’ 39 Ngou a mu kwatire no ku mu koka ku mu tundithsa mu dikanda no ku ka mwipaa.”
40 Yesu wa wepurire ci: “Ou a ku keya thsinda thsa dikanda ne ngepi a ku na wa tenda awaya akwakunyunga?”
41 A mu tawire ci: “Kenge a ku nepaa awaya akwakunyunga owamango, no ku na paka dikanda mu moko akwakunyunga awo awa a ku mu pangako yenthzi mu thsikati thso ku koyora.”
42 Yesu wa wa amberire ci: “Ene ka mwa tara mu Mañoro yo ku ninga ci:
“ ‘Diwe edi na kende akwakuumba,
di na piruka diunthzi dyo nthzio,
eyi yo na a tende Fumu,
karo atwe i na tu komokithsa!’
43 “Mweyo, naa mi ambera ci kenge mwa ku nyangiwa Kutumina kwa Nyambi no ku ku pa kwanu awa a ku mu retera rukuru. 44 Munu yomuhe oyu wa ku werako oku ku diwe kenge a ku cinathzoka tupinthzipinthzi, ngeci edi diwe adyopo di wera munu, kenge dya ku mwororora.”