Thsidika thso wenga mu Kana
2
Munyima thzo mayuwa edi, kwekarire thsidika thso wenga mu diumbo edi di nethsiwa Kana mu ditunga dya Galilea. Mama wa Yesu naye kwa ekarire. 2 Yesu nerongwa yenthzi nawo a raiwire oko ku wenga. 3 Waine ou a pwire, Yesu wa mu amberire mama wenthzi ci: “O na wa pwera waine.”4 Yesu wa tawire ci: “Mama, ine yo ku ni pakera mwinu yo kengeyo? Thsikati thsange thsi shime ku kuma.”
5 Mama wenthzi wa amberire angamba ci: “Mu kwame yoihe eyi a mi ambera.”
6 Apo kwekarire manafe o mawe o mutanu na dyofoci aa a cikwathsithsangire Majuda ku cikenithsa ko thsithsemwa. Dinafe no dinafe dyaa ronga makopokopo ane nji o mutanu. 7 Yesu wa amberire angamba ci: “Mu yarithse aa manafe o mawe meyu.” Ngou a a yarithsire katere ko ku miromo. 8 Wa wa amberire karo ci: “Mu vetemo honi mu twarere muendithsi o thsidika.” Awo ngou a a mu twarerire.
9 Muendithsi o thsidika wa humburire mwao meyu a pirukire waine. Ka a dimukire oku a tundire, shaanga ci angamba awa vetavetire meyu a dimukire. Ngou ethsire mukwakuyeka. 10 Wa mu amberire ci: “Anu wahe aa tanganga ku pa waine o mutowi, o kwa na nu wahe kukwana mbeci honi a rete waine o muhamu. Uno honi owe kuma o na tureka waine o mutowi tango shime ku na kuma thsino thsikati!”
11 Ethsi thsimonithso thso ku komokithsa a tendire Yesu mu Kana o mu Galilea thsodiyo thso kutanga kwimonithso yenthzi ku hokora kutethzima kwenthzi. Erongwa yenthzi ya tawire ku kwenthzi.
12 Munyima thzeyo, Yesu wa urumukire ku thza ku Kapenauma na mama wenthzi, naminenthzi nerongwa yenthzi oku a kekarire mayuwa oapu pohuma.
Yesu aa kanithsa anu ku urithsera mu Tembere
13 Thsidika thso Majuda ethsi thsi nethsiwa Paseka o ku thsi di po pepi no ku tendahara, Yesu wa kambamine ku thza ku Yerusalema. 14 Ou a thzire ku Tembere wa ka wanine anu awa urithseriremo ngombe no mangu no mayembe. Karo wa monine akwakucinja madi o kwa nekara ku matafure. 15 Yesu wa kwamine thsiwepu pa miothzi no ku wa cithzacithza wahe mu Tembere mofoci kengeyo no mangu no ngombe thzo. Wa thzire o hanyahanya muwayawaya wakwakucinja madi no ku huwa matafure o. 16 Wa amberire awa urithsire mayembe ci: “Mu i tundithse muno eyi! Mwa pirura nthzio thza Tata maurithsero!”
17 Erongwa ya vurukire eyi i na ñoriwa mu Mañoro yo ku amba ci: “Thsishimo thsange thso nthzio thzoe thsaa ni pithsa ku mucima eci mudiro.”
18 Unone Majuda epurire Yesu ci: “Thsimonithso mwine o tenda ethsi thsi tu monithsa ci yo shemwa waa roera ku tenda kengeyo?”
19 Yesu wa wa tawire ci: “Mu umburure thzino Tembere, ame kenge na ku thzi pindura mu mayuwa ahatu.” 20 Majuda a mu amberire ci: “Ethzi Tembere thza shimbire myaka thzo makumi ane no mutanu na ofoci ku thzi umba. Owe honi ne ngepi nga wa ku thzi pindura no ku thzi umba mu mayuwa ahatu?” 21 Uno honi Tembere ethzi a ningire Yesu po erama yenthzi. 22 Munyima thzo ku pinduriwa kwafu, erongwa yenthzi ya vurukire ci shime aa wa tongwera eyi. Mweyo a tawire eyi i na ñoriwa mu Mañoro neyi a ambire Yesu.
Yesu o na dimuka eanekera yo munu
23 Yesu o ku di mu Yerusalema pa Thsidika thso Paseka, anu owangi a tawire ku kwenthzi mukaci kemonithso yo ku komokithsa eyi a tendire. 24 Unone Yesu aye ka a wa kuruperire, inene wahe kuma a wa dimukerire nawa. 25 Yesu ka a ningire ci shime munu a mu tongwere yanu, inene aye thsinda wa dimukire eyi yekarire mu micima thzo.