Yesu na Nikodema
3
Kwekarire mukwerume o dithzina dyo Nikodema, nedi nduna o Majuda o mu thsikwata thsAfarithsi. 2 Wa keyire kwa Yesu othsiku no ku na mu ambera ci: “Murongithsi, tu na dimuka ci Nyambi naa ku tumu ku na tu rongithsa, inene kwithsa munu o ku twethsa ku kwama emonithso yo mushovo ou shime ngeci Nyambi nenthzi a di.”3 Yesu wa mu tawire ci: “Naa ku tongwera yoshemwa ci kwithsa munu oyu wa ku mona Kutumina kwa Nyambi shime ci erekiwe ro muthsidi.”
4 Nikodema wa mwipurire ci: “Munu ne ngepi edi nga a twethsa kwerekiwa ro muthsidi o ku na kuru? Ene kenge nga i tawa ci munu a hukere mu dira dya mama wenthzi no kwerekiwa ro muthsidi?”
5 Yesu wa mu tawire ci: “Naa ku tongwera yoshemwa ci kwithsa o ku twethsa kwingena mu Kutumina kwa Nyambi ko kukana kwerekiwa ko meyu no Mupepo. 6 Thso kwerekiwa ko nyama po nyama, karo thso kwerekiwa ko Mupepo po mupepo. 7 Wa i komoka eyi ni na ku ambera ci waa roera kwerekiwa ro muthsidi. 8 Mupepo waa pepera kokuhe oku u na shimi, owe waa twethsa ku yuva muyoyo wao, unone tumba o twethsa ku dimuka oku u tunderera noku u thza. Dyo i di no ku munu yomuhe o ku tambura kwerekiwa kokupe ko ku tunderera ku Mupepo.”
9 Nikodema wa mwipurire ci: “Ene ngepi nga i dikara enu yo kenge?”
10 Yesu wa mu tawire ci: “Owe po o murongithsi wa Isiraele, ine eyi o kana ku yuvithsithsa eyi enu? 11 Naa mi tongwera yoshemwa ci twaa amba eyi tu na dimuka no ku pa ombangi weyi tu na mono, unone amwe kadi mwa kwa ku tambura ombangi wetu. 12 Ngeci naa mi tongwera enu yo kaye unone kadi mwa kwa ku tawa, ngepi honi nga mu tawa ou nga ni mi tongwera yo ku wiru. 13 Kwithsa munu oyu wa thzina mu wiru shime Mwana Munu oyu wa tundire ku wiru. 14 Dyodi a kurekire Mushe diya diyoka dyo kopa ku thsitondo mu dikunguthsitua, no Mwana Munu naye dyaa na roera ku kurekiwa, 15 ci yomuhe oyu wa ku tawa ku kwenthzi a ku wane mwoyo o diyere.
16 “Inene Nyambi wa shimine nene kaye ku ninga ci mane wa ka pire Mwane yofoci pakamutwa ci munu yomuhe o ku tawa ku kwenthzi a ku nonga, unone a ku wane mwoyo o diyere. 17 Inene Nyambi kadi cingwa kuma a tumine Mwane mu kaye ku na ka ratura, unone ci kaye nga ka yoyithsiwe kenthzi.
18 “Yomuhe o ku tawa ku kwenthzi ka a ku raturiwa, unone yomuhe o kukana ku tawa o na raturiwa kare, inene ka a tawire kwa Mwana Nyambi yofoci pakamutwa. 19 Ethsi na thsi reta raturo po ethsi: Mwethzi na u keya mu kaye, unone anu a shimine mirema kupita ku shima mwethzi, inene etenda yo po nedi imango. 20 Munu yomuhe o ku tenda yoimango aa thzimba mwethzi karo tumba a henyena ku mwethzi ku yapithsa ci ekwama yenthzi ya dimukiwa. 21 Unone yomuhe o ku tenda yo shemwa aa keya mu mwethzi ci nga i monahare nawa etenda yenthzi ci yaa kwamiwa ko ku hengeka eraa ya Nyambi.”
Johani aa pa karo ombangi keyi ya Yesu
22 Munyima thzeyi, Yesu nerongwa yenthzi a thzire mu ditunga dya Judea. Wa kekarirekono no ku ka korovethza anu.
23 Johani naye kuma a korovethzire mu Enoni pepi no Salimu, inene kwekarire meyu oangi. Anu a thzangire ku kwenthzi karo wa wa korovethzangire. 24 Eyi kuma ya tendaharire Johani o ku shime ku pakiwa mu kamenga. 25 Erongwa imweya ya Johani ya tatekire ku cikanyeka no Mujuda yumweya keyi yo thsithsemwa thso kucikenithsa. 26 A keyire kwa Johani no ku na mu ambera ci: “Murongithsi, oya mukwerume wekarire nenthzi mu thsambwadiya thzo Rware rwa Jorodani, oya wa tongaurire keyi yenthzi, aa korovethza anu, karo wahe aa thza ku kwenthzi.”
27 Johani wa tawire ci: “Kwithsa munu o ku twethsa ku tambura thsinu shime Nyambi o ku na thsi mu pa. 28 Amwe po mwa mambangi ange, shime naa amba ci: ‘Kadi yame no Krisitu, unone ame kuma na ni tumiwa ku rupara rwenthzi.’ 29 Mwenga po wa mukwakuyeka, unone mbusha mukwakuyeka aemana po pepi ku mu teerera, no ku nyanyuka yoihe a yuva diywi dya mukwakuyeka. Mweyo, pano honi thsinyanyu thsange thsi na kwanenena. 30 Aye aa roera ku kura, ame naa roera ku popwa.”
31 O ku tunda ku wiru o di peuru thzenu yoihe, unone o ku tunda mu kaye wa mu kaye, karo aa amba yo mu kaye. O ku tunda ku wiru o di peuru thzenu yoihe. 32 Aa pa ombangi weyi naa mono no ku yuva, unone kwithsa oyu na tambura ombangi wenthzi. 33 Yomuhe o ku tambura ou ombangi aa tanarithsa ci Nyambi po wa shemwa. 34 Inene oyu naa tumu Nyambi wa ku amba maywi a Nyambi, inene Nyambi aa perereranga Mupepo Oukenu. 35 Tata aa shima Mwane karo o na paka enu yoihe mu moko enthzi. 36 Yomuhe o ku tawa kwa Mwana o di no mwoyo o diyere, unone yomuhe o kukana ku yuvera Mwana, mbera ka a mono mwoyo o diyere, Nyambi kenge mba a mu anthzipera diyere.