Yesu no mbuyama o Musamaria
4
Afarithsi a yuvire ci Yesu aa wana no ku korovethza erongwa yoingi kupita Johani, 2 uno honi kadi Yesu wa korovethzire, unone nedi erongwa yenthzi. 3 Yesu ou a yuvire eyo, wa tundire mu Judea no ku huka ku Galilea.4 Ku thza ku Galilea, shime ou a pitire mu ditunga dya Samaria. 5 Wa kumine mu mbongi thzo mu Samaria ethzi thzi nethsiwa Sikare, pepi no dikanda edi a pire Jakovo mwane Josefa. 6 Apo podiyo dyekarire dithsima dya Jakovo. Yesu wa thzire no ku kekara ku mbadi thzedyo dithsima mukaci ko ku aya ko ruendo karo diyuwa o ku di di pa kaci ko mutwi.
7 Kwa keyire mbuyama o mu Samaria ku na veta meyu. Yesu wa mu rombire ci: “Ni peko meyu o ku nwa.” 8 Erongwa yenthzi ayo o ku i na thzi mu mbongi ku ka ura edya.
9 Oyo mbuyama o Musamaria wa amberire Yesu ci: “Owepo o Mujuda, ngepi honi edi nga o ni romba meyu o ku nwa ame no Musamaria?” Inene Majuda ka cipakererangire no Masamaria.
10 Yesu wa mu tawire ci: “Nga o na dimuka thsipa thsa Nyambi, no ku dimuka oyu na ku rombo meyu ci edye, nga yowe o na mu rombo karo nga na ku pa meyu o mwoyo.”
11 Oya mbuyama wa mu amberire ci: “Ñathsire wange, owe ko di no thsivetithso karo edi dithsima di thzungi. Oku honi nga o wana ao meyu o mwoyo ne kupi? 12 Ene owe ne o mukuru mu thsivaka kupita mukwathsañuru wetu Jakovo oyu wa tu pire edi dithsima? Wa nwinemo aye nanenthzi nemuna yenthzi yoihe.”
13 Yesu wa mu tawire ci: “Munu yomuhe o ku nwa aa meyu kenge a ku fa dinotwa karo, 14 unone yomuhe o ku nwa meyu o ku mu pa ame mbera ka a fu karo dinotwa, inene meyu aa na ku mu pa kenge a ku piruka ku kwenthzi dinowa dyo meyu o kukana ku pwerera, o ku pupera ku mwoyo o diyere.”
15 Oyo mbuyama wa mu amberire ci: “Ñathsire wange, ngo ni peko oko ku meyu ci mbera na ku fa dinotwa karo, ni thsie no ku na vetanga meyu kuno.”
16 Yesu wa mu amberire ci: “O thze o kethse munu woe, wangu o ka huke kuno.”
17 Oyo mbuyama wa tawire ci: “Ka ni di no munuwange.” Yesu wa mu amberire ci: “Wa amba yoshemwa yo ku ninga ci ko di no munuwoe, 18 inene akwerume mutanu a ku yekire, oyu o di nenthzi pano kadi cingwa munu woe. Eyi o na amba ya shemwa.”
19 Oya mbuyama wa mu amberire ci: “Ñathsire wange, naa mona ci o mukwakukethza owe. 20 Akwathsañuruetu a romberangire Nyambi po uno mukinya, uno honi amwe mwa Majuda mwaa ninga ci mu Yerusalema mo tu na roera ku mu rombera.”
21 Yesu wa mu amberire ci: “Owe o mbuyama, o tawe eyi ni ku ambera. Thsikati thsaa keya ethsi mwa ku kana ku rombera Tata po uno mukinya nji mu Yerusalema. 22 Amwe mwa Masamaria ka mu dimuka oyu mu rombera. Atwe twa Majuda tu na dimuka oyu tu rombera, inene kuyoyithsiwa kwaa tunderera ku Majuda. 23 Unone thsikati thsaa keya mane thsi na kumu kare, akwakurombera o shemwa ou a ku rombera Tata ko mupepo noshemwa. Akwakurombera o kengeyo wodiyo a fota Tata ci a mu rombere. 24 Nyambi po Mupepo, mweyo, awa mu rombera aa roera ku mu rombera ko mupepo noshemwa.”
25 Oya mbuyama wa mu amberire ci: “Ni na dimuka ci Mesiya oyu nethsiwa Krisitu aa keya. Ou a ku keya kenge a ku na tu tongonwena enu yoihe.”
26 Yesu wa mu amberire ci: “Yame, oyu o ambaura noe.”
27 Popo erongwa yenthzi ya kumine, ya komokire ku na mu wana o ku ambaura no mbuyama. Unone kwithsa oyu wa mwipurire ci: “Ine eyi o fota ku kwenthzi?” nji ci “Ine eyi o ambawera nenthzi?” 28 Oya mbuyama wa thsiire kafuma kenthzi no ku huka mu mbongi ku ka tongwera anu ci: 29 “Mu keye na mu mone munu oyu na ni tongwera yoihe eyi na tenda. Ene kenge nga ikara ci yodiyo Mesiya nji?” 30 Anu a kungurukire mu mbongi ku thza kwa Yesu.
31 Kethsiya thsikati erongwa yenthzi ya mu ooterire ci: “Murongithsi, o dye tango!” 32 Unone aye wa i tawire ci: “Ame po ni di nedya yo ku dya eyi mu na kana ku dimuka amwe.”
33 Erongwa ya cipurire ci: “Ene kwaa di oyu na mu retera edya nji?”
34 Yesu wa i amberire ci: “Edya yange po ku tenda eshima ya Nyambi oyu naa ni tumu no ku mana ekwama yenthzi eyi naa ni pa. 35 Mu na dimuka diambo dyo ku ninga ci: ‘Ku na thsiara maonda ane ci thsikati thso ku cora thsi kume.’ Unone ame naa mi ambera ci mu kambure meho enu no ku mona makanda. Edya i na pi, thsikati thso ku cora thsi na kumu. 36 Mukwakucora aa horithsiwa no ku kongwera mwoyo o diyere dicora, ci mukwakukuna na mukwakucora a nyanyukere pofoci. 37 Inene edi diambo dya shemwa dyo ku ninga ci: ‘Oyu aa kuna, oyu aa cora.’ 38 Na mi tumine ku ka cora dikanda edi mwa kana ku dima, edi a dimine anuawo amwe mwaa na wanenapo pekwama yo.”
Masamaria owangi aa tawa
39 Masamaria owangi omo mu mbongi a tawire kwa Yesu pakuninga ci oya mbuyama wa pire ombangi ci: “Na ni tongwera eyi na tenda yoihe.” 40 Mweyo, Masamaria ou a na kumine ku kwenthzi, a mu rombire ci ekareno, ngou ekarireno mayuwa edi. 41 Mukaci ko maywi enthzi, owangi amweya karo a tawire ku kwenthzi. 42 A amberire oya mbuyama ci: “Ka tu tawire honi mukaci keyi o na tu tongwera pohuma, unone tu na na u ciyuvera twathsinda. Pano honi tu na dimuka ci yodiyo shemwa Muyoyithsi o kaye.”
Yesu aa porithsa mwana nduna
43 Munyima thzo kwikara mayuwa edi, Yesu wa tundiremo ku thza ku Galilea. 44 Yesu aye shemwa wa ambire ci: “Mukwakukethza ka a remekiwa mu ditunga dyenthzi.” 45 Ou a ka kumine mu Galilea, anu o mu Galilea a ka mu tamburire nawa, inene a ka monine yoihe eyi a ka kwamine mu Yerusalema pa thsidika thso Paseka, pakuninga ci nawo shime aa thzako.
46 Yesu wa thzire karo ku Kana o mu Galilea kuya a ka pirurire meyu waine. Kwekarire nduna o mukuru o kutumina oyu wekarire no mwanenthzi o mukwerumeana oyu wa korire mu Kapenauma. 47 Oyu mukwerume ou a yuvire ci Yesu na ka huka mu Galilea ku ka tunda ku Judea, wa thzire ku kwenthzi no ku ka mu adikanena ci a keye ku Kapenauma na a mu porithsere mwanenthzi oyu wa kokangerire.
48 Yesu wa mu amberire ci: “Ku kwenu po kwithsa oyu mbo tawa shime o ku na mono emonithso nekomokithsa.” 49 Oyo nduna o kutumina wa mu amberire ci: “Ñathsire wange, tu thzenu pano a shime ku fa mwanange.”
50 Yesu wa mu amberire ci: “O thze, mwanoe kenge a yoya!” Oya mukwerume wa tawire maywi a Yesu, ayepo thza.
51 O ku di mu dikuñwa, a mu shambawerire angambenthzi no ku mu tongwera ci: “Mwanoe muyumi!” 52 Ngou a wepurire thsikati ethsi a tatekire ku ciyuva nawa. A mu amberire ci: “Yana diyuwa o ku di na thsiuruka, po na di mu pwera dihokoma.” 53 Tata wa mwanuke wa vurukire ci thsodiyo shemwa thsikati a mu amberire Yesu ci: “Mwanoe kenge a yoya!” Aye no mwanda wenthzi ouhe a tawire kwa Yesu. 54 Ethsi thsodiyo thsimonithso thso muthsidi ethsi a kwamine Yesu o ku na ka huka mu Galilea ku ka tunda ku Judea.