Yesu aa porithsa munu o thsikunga ku kayoano
5
Munyima thzeyi, kwekarire thsidika thso Majuda, Yesu wa kambamine ku thza ku Yerusalema. 2 Mu Yerusalema mo ka di kayoano po pepi no Thsero thzo Mangu, aka ka nethsiwa mu Thsiheverua ci Betesida.b Aka kayoano ka di no makeke o mutanu. 3 Mungi wanu wakwakukora, tupuputwa, ekunga nakwakuara kuma a rarangire pa madidi o mu makeke [ku taterera meyu ci a herathzoke. 4 Thsikati no thsikati kangeru ka Fumu kuma ka na heraurangire meyu, munu yomuhe o kutanga ku kumamo wa porithsiwire kwikora yenthzi.]c 5 Mu kaciko kwekarire mukwerume yumweya oyu wa korire mu myaka thzo 38. 6 Yesu ou a mu monine o ku na rara apo no ku dimuka ci kuma a korire myaka thzothzingi, wa mwipurire ci: “Ene waa fota ci o pore nji?”7 Mwethzi wa tawire ci: “Ñathsire wange, ka ni di noyu o ku ni paka mu kayoano meyu o ku a na herauriwa. Yoihe ni ninga ci ni thzemo, yumweya aa tanga ku ka kumamo ame o ku ni shime.”
8 Yesu wa mu amberire ci: “O katuke, o shimbe kanaha koe o ende!” 9 Popo oya mukwerume wa porire, wa shimbire kanaha kenthzi no ku enda.
Eyi kuma ya tendaharire mu diyuwa dyo Savata, 10 mweyo, aendithsi o Majuda a amberire oya mukwerume wa porithsiwire ci: “Rero po diyuwa dyo Savata, murao ka u tawethzire ci o pangeke kanaha koe.”
11 Unone aye wa tawire ci: “Oyu na ni porithsa yo na ni ambera ci: ‘O shimbe kanaha koe o ende.’ ”
12 A mwipurire ci: “Edye oyo munu na ku ambera ci o shimbe kanaha koe o ende?” 13 Uno honi oya mukwerume wa porithsiwire ka a dimukire ci nedi edye wa mu porithsire, pakuninga ci Yesu kuma a verukire mu kaci ko mbunga thzothzikuru. 14 Munyima, Yesu wa mu wanine mu Tembere, ayepo mu ambera ci: “O mone, o nekara nawa honi, mbera wa tenda thsivi karo, ngeci kadi kengeyo thsinu thsothsimango kupiterera kenge thsa ku tendahara ku koe.” 15 Oya mukwerume ngou a thzire no ku ka tongwera aendithsi o Majuda ci nedi Yesu wa mu porithsire.
Yesu aa amba ci yodiyo Mwana Nyambi
16 Mweyo, pakuninga ci Yesu kuma a kwamine eyi mu diyuwa dyo Savata, Majuda a tatekire ku mu nyandithsa. 17 Unone Yesu wa wa tawire ci: “Tata po aa kwama thsikati thsothsihe shime ku na kuma no thsino thsikati, name naa kwama.” 18 Mukaci keyi, Majuda a fotire dyo ku mwipaa, inene ka a corire pohuma murao o diyuwa dyo Savata, unone kuma ethsire karo Nyambi ci Tata wenthzi shemwa, ku monithsa ci aa cishoka na Nyambi.
19 Yesu ngou a wa tawire ci: “Naa mi tongwera yoshemwa ci kwithsa ethsi nga a kwama Mwana kokoro wenthzi thsinda, unone aa tenda pohuma eyi a mona kwa Tata wenthzi o ku i tenda. Inene eyi a tenda Tata wenthzi no Mwana yodiyo a tenda. 20 Inene Tata wa ku shima Mwana karo aa mu monithsa yoihe eyi a kwama. Karo kenge a ku mu monithsa yoikuru nene kupita eyi, ci nga mwa ku i cinjembukere. 21 Inene dyodi a pindura Tata afu no ku wa pa mwoyo, no Mwana dya a na pa mwoyo kowa a na foto ku u pa. 22 Tata ka a raturire munu, uno honi naa pa Mwana okoro ouhe o ku ratura, 23 ci anu wahe nga a remeke Mwana eci edi a remeka Tata. Yomuhe o kukana ku remeka Mwana ka a remekire Tata oyu naa mu tumu.
24 “Naa mi tongwera yoshemwa ci yomuhe o ku yuva maywi ange, no ku tawa koyu naa ni tumu o di no mwoyo o diyere. Mbera ka raturiwa, inene naa para ku kufa no ku wana mwoyo.
25 “Naa mi tongwera yoshemwa ci thsikati thsaa keya, mane thsi na kumu kare, ou a ku yuva afu diywi dya Mwana Nyambi. Karo awa ku di yuva kenge a ku yoya. 26 Inene dyodi a di Tata no mwoyo mu mwenthzi, dyo naa pa no Mwana kwikara no mwoyo mu mwenthzi thsinda. 27 Karo naa mu pa okoro o ku ratura munu yomuhe, pakuninga ci yodiyo Mwana Munu. 28 Mwa i komoka, inene thsikati thsaa keya afu wahe awa a di mu mararo ou a ku yuva diywi dyenthzi 29 no ku tundamo. Awa na tende yoiwa a ku pindukere mwoyo o diyere, unone awa na tende yoimango a ku pindukere raturo.
Ombangi keyi ya Yesu
30 “Kwithsa ethsi nga ni kwama kokoro wange nothsinda. Naa ratura dyodi ni yuva kwa Nyambi. Mweyo, raturo thzange thza kuoroka, inene ka ni erekire ku kwama eshima yange unone eshima yoyu na a ni tumu. 31 Ngeci naa pa ombangi keyi yange ame nothsinda, ombangi wange ka wa ku tamburiwa ci wa shemwa. 32 Unone kwaa di oyu pa ombangi keyi yange, karo ni na dimuka ci yoihe eyi a amba keyi yange yashemwa. 33 Mwa tumine anu kwa Johani ku ka mu teerera, karo ombangi wenthzi keyi yange nedi wa shemwa. 34 Kadi cingwa naa fota ombangi o munu, unone naa amba eyi ci mu yoyithsiwe. 35 Johani wa cipiturire eci kambarambara aka ka yuuma no ku muneka, karo mwa nyanyukerire mwethzi wenthzi mu thsikati thsothsipu.
36 “Uno honi ni di nombangi oukuru kupita wa Johani. Inene ekwama eyi naa ni pa Tata ci ni i mane, yodiyo shemwa ekwama eyi ni kwama, karo yaa monithsa ci Tata naa ni tumu. 37 Tata oyu naa ni tumu aa pa ombangi keyi yange aye thsinda. Mwa diyerire ku yuva diywi dyenthzi nji ku mona thsihanga thsenthzi. 38 Diywi dyenthzi ka di di mu micima thzenu, inene ka mu tawire koyu naa tumu.
39 “Mwaa fotithsithsa nawa mu Mañoro, inene mwaa anekera ci kenge mu wanamo mwoyo o diyere. Karo aa Mañoro aa pa ombangi keyi yange! 40 Uno honi mwaa kana ku keya ku kwange ci mu wane mwoyo.
41 “Ka ni fotire ku remekiwa kwanu, 42 inene ni na dimuka ci mu micima thzenu ka mu shimine shemwa Nyambi. 43 Na ni keya mu dithzina dya Tata, uno honi ka mu ni tamburire. Unone ngeci yumweya waa ku keye mu dithzina dyenthzi aye thsinda, kenge mwa ku mu tambura ko thsinyanyu. 44 Ngepi nga mu tawa, amwe mu tambura direma kwamweya, uno honi ka mu fotire direma edi di tunda ku kwenthzi aye Nyambi yofoci.
45 “Mwa anekera ci kenge na ku mi thzekithsa kwa Tata. Oyu wa ku mi thzekithsa po Mushe oyu mu na kurupera. 46 Inene nga kuma mwa tawire shemwa kwa Mushe, nga mu na tawa noku ku kwange, inene kuma a ñorire keyi yange. 47 Uno honi ngeci ka mu tawire eyi a ñorire ne, ngepi nga mu tawa eyi ni mi ambera?”