Yesu aekutithsa anu o 5,000
6
Munyima thzeyi, Yesu wa yavukire ku thza mu thsambwadiya thzo Diviya dya Galilea, edi di nethsiwa karo ci Diviya dya Tiberiya. 2 Mbunga thzothzingi thza mu shupwerire, inene a monine emonithso eyi a kwamine yo ku porithsa akwakukora. 3 Yesu ngou a thzinine pa mukinya no ku kekara pashi nerongwa yenthzi. 4 Thsidika thso Majuda ethsi thsi nethsiwa Paseka thsekarire po pepi no ku tendahara. 5 Yesu ou a kamburire meho no ku mona mbunga thzothzikuru o ku thzi keya ku kwenthzi, wa amberire Filipu ci: “Kupi oku nga tu twethsa ku ura edya yo ku pa wahe awa anu?” 6 Kuma a ambire kengeyo ku mu ereka, inene aye wa dimukire eyi nga a kwamine.7 Filipu wa tawire ci: “Shaanga madi o mihorero thzo maonda mutanu na edi tumba nga a uru edya yo ku ninga ci munu no munu kukwo a dye shaanga kokapu.”
8 Thsimweya kwirongwa yenthzi, Andereasi mina Simoni Peturu wa mu amberire ci: 9 “Pa a di pano mukweru-meana oyu di no makende o mutanu no tuthsi totuonye twidi. Uno honi, ine nga i kwathsa ethzi mbunga thzi kuma apa.”
10 Yesu wa ambire ci: “Mwikarithse anu pashi.” Ngou ekarire wahe pashi pa mwenge. Akwerumeko pohuma a fotire ku kwana 5,000. 11 Yesu ngou a shimbire ao makende, wa kandererire kwa Nyambi no ku a era anu. Munyima thzeyo, wa tendire kengeyo no ku thsi. Yesu wa wa pire momuhe omu a foterire. 12 Anu wahe ou ekutire, Yesu wa amberire erongwa yenthzi ci: “Mungere omwamwaethzi ou u na thsiarapo ci kwekara eyi i cipera.” 13 Ngou a u toratorire no ku yarithsa mayongo o dikumi na edi omwamwaethzi ou a thsiirepo awaya a dire aya makende o mutanu.
14 Anu ou a monine ethso thsimonithso a kwamine, a ambire ci: “Yoshemwa oyu yodiyo mukwakukethza oyu na roera ku keya mu kaye.” 15 Yesu ou a monine ci anu kuma a fotire ku mu ootera ci ekare fumu wo, wa tuturukerire karo ku mukinya yofoci.
Yesu aa enda pa meyu
16 Runguro erongwa yenthzi ya thzire ku diviya. 17 Unone ou peraurire pashi Yesu kadi wa ku na kuma, ya yomamine mu wato no ku hunyuna ku yavuka diviya ku thza ku Kapenauma. 18 Kwekarire mañithsingi mu diviya mukaci ko dyungu dyodikuru edi dya ngundungire. 19 Ou ya vuire tunano to ku twethsa ku kwana mutanu nji mutanu na kofoci, ya monine Yesu o ku kokera ku wato o ku enda pa meyu, ayopo i yapa nene. 20 Unone wa i amberire ci: “Mwa yapa, yame.” 21 Ya nyanyukire nene ku mu yomeka mu wato, popo wato wa thsekerire pa dikambo apa ya thzire.
Yesu yodiyo dikende dyo mwoyo
22 Diyuwa edi dya randireko anu awa a thsiarire pa thsambwadiya thzo diviya a nangurire ci shime wato ofoci wekarireko, unone Yesu ka a yomamineno mu wato, erongwa yenthzi kuma ya thzire yofoci. 23 Mato amweya aa a tundire ku diumbo edi di nethsiwa Tiberiya a na kumine po pepi nopa a dyererire makende, Fumu ou a manine ku kanderera. 24 Awo anu awo ou a monine ci Yesu nerongwa yenthzi kekarireko, a yomamine mu mato no ku yavuka ku ka fotaura Yesu mu Kapenauma.
25 Ou a ka mu wanine mu thsambwadiya thzo diviya a mwipurire ci: “Murongithsi, diyuwa dipi no keya kuno?” 26 Yesu wa wa tawire ci: “Naa mi tongwera yoshemwa ci ka mu ni fotawerire mukaci ko kuninga ci na mu mono emonithso, unone mwaa ni fotaura pakuninga ci na mu di makende no kwikuta. 27 Mwa kwamena edya yo ku twethsa kwipa, unone mu kwamene edya yo kukana kwipa karo yo ku pa mwoyo o diyere, eyi a ku mi pa Mwana Munu. Inene Nyambi Tata na a mu paka thsitamba thsenthzi.”
28 Ngou a mwipurire ci: “Ine tu na roera ku tenda ci tu kwame ekwama ya Nyambi?” 29 Yesu wa wa tawire ci: “Thsikwama ethsi a fota Nyambi ci mu thsi kwame po ethsi, mu tawe koyu naa tumu.” 30 A tawire ci: “Thsimonithso mwine nga o tu monithsa ci nga tu tawe ku koe? Ine o kwama? 31 Akwathsañuruetu a dire maana mu dikunguthsitu eci edi i na ñoriwa ci: ‘Wa wa pire makende o ku tunda ku wiru ci a dyea.’ ”
32 Yesu wa wa tawire ci: “Naa mi tongwera yoshemwa ci kadi cingwa Mushe oyu wa mi pire makende o ku tunda ku wiru, unone Tata yodiyo oyu mi pa dikende dyo shemwa dyo ku tunda ku wiru. 33 Inene dikende dya Nyambi po oyu wa tunda ku wiru no ku pa kaye mwoyo.” 34 A mu amberire ci: “Ñathsire wetu, o tu pange kwedyo dikende thsikati thsothsihe.” 35 Yesu wa wa tawire ci: “Yame no dikende dyo mwoyo, yomuhe o ku keya ku kwange mbera ka a fu nthzara, karo yomuhe o ku tawa ku kwange mbera ka a fu dinotwa.
36 “Uno honi na ni mi ambera ci mu na ni mono, unone kadi mwakwa ku tawa ku kwange. 37 Wahe awa naa ni pa Tata kenge a ku keya ku kwange karo yomuhe o ku keya ku kwange mbera ka ni mu cithzi. 38 Inene na ni shiruka ku keya pashi ku tunda ku wiru ku na kwama eshima yoyu naa ni tumu, kadi eshima yange. 39 Eyi yodiyo eshima yoyu naa ni tumu, ci na ku yawa shaanga yofoci powa naa ni pa, unone naa roera ku wa pindura kwafu mu diyuwa dyo mahurerero. 40 Inene eyi po yeshima ya Tata ci wahe o ku mona Mwana no ku tawa ku kwenthzi mba wane mwoyo o diyere. Kenge na ku wa pindura mu diyuwa dyo mahurerero.”
41 Majuda ngou a tatekire ku shonaura, inene kuma a ambire ci: “Yame no dikende edi na di tundu ku wiru.” 42 A ambire ci: “Ene ka di yodiyo Yesu oyu mwana Josefa? Tu na dimuka tata wenthzi no mama wenthzi. Ngepi honi nga a amba ci aa tunda ku wiru?”
43 Unone Yesu wa wa tawire ci: “Mu thsie ku shonaura mukaci keyi ni na amba. 44 Kwithsa munu o ku twethsa ku keya ku kwange shime ngeci Tata oyu naa ni tumu aa mu kokera ku kwange karo kenge na ku mu pindura kwafu mu diyuwa dyo mahurerero. 45 Akwakukethza a ñorire ci: ‘Wahe kenge a ku wa rongithsa Nyambi.’b Yomuhe o ku yuva Tata no ku cirongithsa ku kwenthzi aa keya ku kwange.
46 “Kadi cingwa kwaa di oyu wa mona po Tata, shime aye oyu naa tundu kwa Nyambi, yodiyo pohuma naa mono Tata.
47 “Naa mi tongwera yoshemwa ci yomuhe o ku tawa o di no mwoyo o diyere. 48 Yame no dikende dyo mwoyo. 49 Akwathsañuruenu a dire maana mu dikunguthsitu, uno honi a fire. 50 Dino po dyodiyo dikende dyo ku tunda ku wiru, yomuhe o ku dyako mbera ka a fu. 51 Yame no dikende edi di yoya edi na di tundu ku wiru. Yomuhe o ku dya kodi dikende kenge a ku yoya diyere. Edi dikende na ku pa ci kaye ka yoye po erama yange.”
52 Majuda a tatekire ku cikananithsa mu kaciko no ku cipura ci: “Ngepi nga a tu pa erama yenthzi oyu munu ci tu i dye?”
53 Yesu ngou a wa amberire ci: “Naa mi tongwera yoshemwa ci shime ci mu dye erama yange ame no Mwana Munu no ku nwa onyinga wange, tumba nga mu wana mwoyo o diyere. 54 Unone yomuhe o ku dya erama yange no ku nwa onyinga wange o di no mwoyo o diyere karo kenge na ku mu pindura kwafu mu diyuwa dyo mahurerero. 55 Inene erama yange po edya shemwa nonyinga wange enwa shemwa. 56 Yomuhe o ku dya erama yange no ku nwa onyinga wange aa yoya mu mwange name naa yoya mu mwenthzi. 57 Naa yoya mukaci ko kuninga ci Tata oyu naa ni tumu aa yoya. Mweyo, yomuhe o ku dya erama yange kenge a ku yoya naye mukaci kange. 58 Dino dyodiyo dikende edi na di tundu ku wiru. Ka di cishokire eci maana oyu a dire akwathsañuruenu, unone a fire. Uno honi yomuhe o ku dya dino dikende kenge a ku yoya diyere.”
59 Yesu wa ambire eyi o ku rongithsa mu sinagoge thzo mu Kapenauma.
Maywi o mwoyo o diyere
60 Ongi werongwa yenthzi ou ya yuvire eyo, yaa ambire ci: “Eyi erongithsa po ikaru nene, edye o ku twethsa ku i yuvithsithsa?”
61 Unone Yesu pa ku dimuka ci erongwa yenthzi kuma ya shonaurire mukaci keyo, wa i amberire ci: “Ene i na mi pithsera eyi nji? 62 Ngepi nga i dikara ci mu mone Mwana Munu o ku thzina mu wiru omu ekarire pa kutanga? 63 Oyu na panga mwoyo po Mupepo, nyama tumba thzi twethsa. Maywi aa ni na mi ambera po a Mupepo no mwoyo. 64 Unone amweya ku kwenu ka tawire.” (Inene ku tunda ku matatekero Yesu wa dimukire awa kanine ku tawa, karo wa dimukire ci edye wa ku mu omba). 65 Ngou a i amberire ci: “Eyi ngeyi na mi amberire ci kwithsa o ku twethsa ku keya ku kwange shime ci a i mu pe Tata.”
66 Munyima thzeyo, ongi werongwa yenthzi ya hukire munyima no ku thsia ku mu shupwera. 67 Yesu ngou a thsiurukerire kowaya o dikumi naidi no ku wepura ci: “Amwe ne kenge mu thsia namwe ku ni shupwera nji?” 68 Simoni Peturu wa tawire ci: “Fumu, kwadye oku nga tu thza? Yowe o di no maywi o ku pa mwoyo o diyere.