AkwaNazareta aa kana Yesu
6
Yesu wa tundire omo no ku thza ku Nazareta ku mbongi thzo diumbo dyenthzi, erongwa yenthzi ya mu shupwerire. 2 Mu diyuwa dyo Savata wa tatekire ku rongithsa mu sinagoge. Ongi wanu awa a mu yuvire a komokire no ku amba ci: “Oyu munu ne kupi naa i wana eyi? Wa ngepi ou onyanyami naa piwa oyu? Ine eyi ekomokithsa yoikoro a kwama? 3 Ene kadi yodiyo oya muyuwi oyu, mwana Madiya? Aminenthzi wodiyo awa a Jakovo na Josesi no Juda no Simoni? Andumbu thzenthzi ne kadi wodiyo awa tu na tunguno?” Eyi ya wa retithserire ci a mu anthzipere.4 Yesu ngou a wa amberire ci: “Mukwakukethza po aa remekiwa kokuhe, shime mu ditunga dyenthzi kwapenthzi nowa o mu mwanda ofoci nenthzi.” 5 Mukaci ko kukana ku tawa kwo, ka a twethsire ku kwama thsikomokithsa, shime akwakukora owapu a porithsire ko ku wa kambeka moko. 6 Yesu wa komokire pa kupira kwo thsitawo.
Yesu aa tuma erongwa yo dikumi na idi
Yesu ngou a thzire o rongithsa anu mu diumbo no diumbo. 7 Wethsire erongwa yenthzi yo dikumi na idi, wa i tumine idi idi no ku i pa okoro o ku cithza mathzimu. 8 Wa i raererire ci ya shimba thsinu moro ruendo, ikare ñuta nji mikotana nji madi mwipaupau yo, shime muramu pohuma o ku endera. 9 Wa i amberire karo ci: “Mu vate mashangu, unone mwa shimba ekoveyo idi.”
10 Karo wa i amberire ci: “O ku mu na kumu mu mwanda, mu kekaremo, shime ou mwa ku tundamo omo mu mbongi. 11 Mu ndau omu a ku ka kana ku mi tambura nji ku mi teerera, mwa ku ka kukumune dikungu kwidyato yenu o ku mu tundamo, ci ikare ombangi ou wa ku wa wemeka.”
12 Ngou a thzire no ku ka honga anu ci a cere evi yo. 13 A cithzire mathzimu oangi no ku porithsa akwakukora owangi ko ku wa wethsa maathzi.
Kufa kwa Johani Mukwakukorovethza
14 Fumu Heroda wa yuvire ya Yesu, pakuninga ci dithzina dya Yesu kuma dya yukire nene. Anu amweya kuma ambire ci: “Johani Mukwakukorovethza na a pinduka kwafu, ngeyi ekarera nokoro o kukwama ekomokithsa yo kenge.” 15 Awa amweya ci: “Mukwakukethza Eliya.” Awa karo ci: “Mukwakukethza o ku cipitura eci akwakukethza o kukare.”
16 Unone Heroda ou a i yuvire wa ningire ci: “Johani oya na tetire mutwi, o na pinduriwa kwafu!”
17 Yodiyo mwene Heroda oyu wa tuminine ci Johani angiwe no ku pakiwa mu kamenga. Eyi kuma a i kwamine ci a nyanyukithse Herodiasi, oyu a nyangire minenthzi Filipu. 18 Johani kuma a amberangire Heroda ci: “Ko tawethziwire ku yeka munu wa minoe.” 19 Herodiasi wa thzimbire Johani mane no ku fota ku mwipaa. Unone wa kwangire dyo ku tenda. 20 Mukaci ka Heroda ku yapa Johani pa ku mu dimuka ci munu o muwawa o mukenu, wa mu nyungire nawa. Heroda ou a yuvangire eyi a rongithsangire Johani, ya mu korithsangire ku mucima shaanga ci kuma a fotangire ku teerera ku kwenthzi.
21 Ku hura Herodiasi wa wanine thsikati. Mu diyuwa dyo thsidika thso kwerekiwa kwa Heroda, ou a kwamine dishambirera oku ethserire manduna, akuru o mashwarare no mangumengume o mu Galilea. 22 Kwengenine mbuyamaana, mwana Herodiasi. Wa tatekire ku kina no ku nyanyukithsa Heroda nendenthzi. Ngou fumu Heroda a amberire oyo mbuyamaana ci: “O rombe thsothsihe ethsi o na foto kenge ni thsi ku pa.” 23 Wa cethzerire ngoro ci: “Kenge ni ku pa thsothsihe ethsi o romba, shaanga kaci ko kutumina kwange kenge ni ku ku pa!”
24 Ngou a punine pora no ku kepura mama wenthzi ci: “Ine eyi ni ka romba?” Aye ngou a tawire ci: “Mutwi wa Johani Mukwakukorovethza!”
25 Popo oyo mbuyamaana wa yokororire ku huka kwa fumu no ku ka amba ci: “Naa fota ci o ni pe po pano mutwi wa Johani Mukwakukorovethza pa dironga!”
26 Fumu wa i cinyengire nene, unone wa kwangire dyo ku i kana, pakuninga ci kuma a tangire ku cethzera ngoro pa meho endenthzi awa ethserire ku thsidika. 27 Ngou a tumine wanguwangu dishwarare ku ka teta mutwi wa Johani no ku ka u mu retera. Dishwarare dya thzire no ku ka teta Johani mutwi mu kamenga. 28 Wa retire oo mutwi pa dironga no ku na u tambeka oyo mbuyamaana. Aye wa u twarire kwa mama wenthzi. 29 Erongwa ya Johani ou ya i yuvire, ya thzire ku ka shimba thsithzimbi no ku ka thsi vumbeka mu thsidi.
Yesu aekutithsa anu o 5,000
30 Tunganda twa hukire kwa Yesu no ku ka mu tongwera yoihe eyi twa ka kwamine, neyi twa ka rongithsire. 31 Mukaci kongi nene anu awa a ningire awa ku keya awa ku thza, Yesu nerongwa yenthzi a pirire no thsikati thso ku dya. Wa amberire erongwa yenthzi ci: “Tu thzenu kokumengi mu ka turumwithseko kamanana.”
32 Ngou a hunyunine ku thza kokumengi wafoci. 33 Unone anu owangi a wa monine o kwa thza karo a wa dimukire. Anu a tundire mu mambongi oahe no ku thza o cira mu kakuro no ku ka kuma ku diya awo o kwa shime ku ka thsekera. 34 Yesu ou a shamukire mu wato no ku mona mbunga thzothzikuru, wa wa yuverire ñekeñeke, inene kuma cipiturire eci mangu o kupira mudithsani. Ngou a wa rongithsire enu yoingi.
35 Runguro diyuwa o ku di toka, erongwa ya keyire kwa Yesu no ku mu ambera ci: “Muno tu di po mu murundu no diyuwa dyaa toka. 36 O ambere anu a cithzere mu maumbo no mu maumboana aa a di po pepi ci a ka ciurere edya.”
37 Unone Yesu wa i tawire ci: “Mu wa pe edya yoyamwe.”
Erongwa ya mu amberire ci: “Ene waa fota ci tu shimbe madi o kukwana 200 o muwayawaya tu ka wa urere edya na dye nji?”
38 Yesu wepurire ci: “Makende angashi mu di nao? Nga mu thze mu ka mone.” Ou a ka hukire a na mu tongwerire ci: “Makende mutanu no thsi thzidi.”
39 Yesu ngou a amberire erongwa ci i tongwere anu wahe ekare pashi pa mwenge kekwatakwata. 40 Ngou ekarire kekwatakwata, ekwata imweya ya kumine mu makumi o dikumi, imweya makumi o mutanu.
41 Yesu wa shimbire ao makende o mutanu no thsi thzidi no ku diamena ku wiru, wa kandererire no ku i kuyaura. Ngou a i pire erongwa yenthzi ci i ere anu. Wa tendire kengeyo no ku thsi ku kwanithsa wahe. 42 Anu wahe a dire no kwikuta, 43 erongwa ya yarithsire mayongo o dikumi na edi omwamwaethzi o makende no thsi. 44 Ku tarako pohuma akwerume awa a dire aa kuma mu 5,000.
Yesu aa enda pa meyu
45 Popo Yesu wa ooterire ci erongwa yenthzi i shamukere mu wato i citangethze mu thsambwadiya thzo diviya ku thza ku Betisaida, aye kuma a thsiarire ku ambera anu ci a thze ku maumbo o. 46 Ou a manine ku vumenena anu, wa thzire pa mukinya ku ka rombera.
47 Ou peraurire pashi, wato o ku ka endera pa kaci ko diviya, uno honi Yesu aye o ku di yofoci pa dikambo. 48 Yesu wa monine ci erongwa yenthzi yaa vua ko ku karupera, pakuninga ci kuma ya tambire oku wa tundererire mupepo. Mu kaci ko thsikati thso muthsihatu nethsi thso mutanu na thsofoci thso mathsikuthsiku wa keyire kukwo o ku thza o enda pa meyu, wa ningire eci aa fota ku wa piterera, 49 unone erongwa ou ya mu monine o ku enda pa meyu, ya anekerire ci ngwa thsirumba. Ya kumbire, 50 inene yoihe ya mu monine karo ya yapire nene.
Unone popo Yesu wa ambire nayo ci: “Mu tanare micima! Mwa yapa, yame.” 51 Ngou a shamukerire mu wato, popo mupepo wa ongire. Erongwa ya cinjembukerire pohuma, 52 shaanga uya a kwamine thsikomokithsa thso makende nothsi, erongwa ka ya i yuvithsithsire, inene micima thzayo thzikaru o ku kwata enu.
Yesu aa porithsa akwakukora mu Genesareta
53 Ou a yavukire, a ka thsekerire mu ditunga dya Genesareta no ku kokera wato. 54 Popa a shamukire mu wato, popo anu a mu dimukire ci Yesu. 55 A cirerire mu mandau oahe ku ka shimba akwakukora o kwa di pa tunaha two, no ku wa reta kokuhe oku a yuvire ci kodiyo a di Yesu. 56 Kokuhe oku a pitire Yesu mu mambongi no mu maumbo, anu a retangire pa mambanthza akwakukora. A rombangire Yesu ci a wa tawethze shaanga ku kwata ku minganja thzo thsikoveyo thsenthzi. Awa a kwatangireko wahe a porangire.