Erongithsa yakwathsañuru
7
Afarithsi narongithsi amweya o murao awa a tundire mu Yerusalema a ciwanawanine ku thzingwera Yesu. 2 A monine erongwa yenthzi imweya o ku i dya no moko o dithziro, ko kukana ku ciyoa ku moko. 3 Afarithsi no Majuda wahe a shupwerire thsithsemwa thsakuru, thso kukana ku dya edya o kwa shime ku ciyoa ku moko. 4 Shaanga o kwa na tundu ku maurithsero, kwithsa ku dya shime o kwa na ciyoo tango. Ko i di enu imweya yo thsithsemwa eyi a shupwerire, eci yo ku yoa manganja, tunyungu toma no mapoto o kopa.5 Afarithsi narongithsi o murao ngou epurire Yesu ci: “Ine erongwa yoe eyi i kanena ku shupwera thsithsemwa thsakuru? Inene yaa dya no moko o dithziro?”
6 Yesu wa tawire ci: “Isaya wa shungire ou okethzire keyi yenu! Mwakwamahetaheta eci edi a ñorire ci:
“ ‘Awa anu aa ni remeka ko miromo thzo pohuma,
unone micima thzo kure thzi di nange.
7 Aa ni rombera yo tumbako,
inene aa rongithsa mirao thzanu eci thzaa tunda kwa Nyambi.’
8 “Mu na thsii thsiraerera thsa Nyambi no ku ñañerera mikarero thzo thsithsemwa thsenu.”
9 Yesu wa wa amberire karo ci: “Mu di noñurungu o ku kana thsiraerera thsa Nyambi ci mu hengeke thsithsemwa thsenu! 10 Unone Mushe wa ambire ci: ‘O remeke tata woe no mama woe,’ karo ‘Munu yomuhe o ku shwahura tata wenthzi nji mama wenthzi aa roera ku fa.’ 11 Unone amwe mwaa tawethza munu ku ambera tata wenthzi no mama wenthzi ci: ‘Ethsi mu na roera ku wana ku kwange po Kobani’ (ku amba ci thso ku tupwera Nyambi). 12 Oyo munu mu na mu tawethza honi ku kana ku kwathsa thsimweya tata wenthzi nji mama wenthzi. 13 Mweyo, mwaa kwangithsa Diywi dya Nyambi kwikara nokoro ko mikarero thzo thsithsemwa thsenu, ethsi mu thza o cirundwerera. Karo ko i di imweya yoingi eyi mu na tendanga yo ku pitura eci eyo.”
Yo ku thsireka munu
14 Yesu karo wethserire mbunga ku kwenthzi no ku wa ambera ci: “Mu ni teerere mwahe ci mu yuvithsithse eyi ni mi ambera. 15 Kadi cingwa ethsi thsi thza mu dira dyo munu ethsi nga thsi mu thsireka, unone thso ku tunda ku mucima wenthzi thsodiyo nga thsi twethsa ku mu thsireka.”
16 [Oyu di no matwi, a yuve!]
17 Yesu wa thsiire mbunga no kwingena mu nthzio, erongwa yenthzi ya mwipurire yako kathsimo. 18 Ngou a i amberire ci: “Ene namwe kadi mwa kwa ku yuvithsithsa? Kwithsa thsinu thso ku dya munu thso ku twethsa ku mu thsireka. 19 Inene edya ka i thzangire mu mucima, unone yaa thzanga mu dira no ku tundamo.” Pa ku amba kengeyo, Yesu wa monithsire ci edya yoihe ikenu pa meho a Nyambi.
20 Wa shumunine ku amba ci: “Thso ku tunda kwa munu thsodiyo thso ku twethsa ku mu thsireka. 21 Inene mu mucima o munu mo mwa tunda eanekera yoimango, yo ruthziho, withzi no kwipaa. 22 Ku rembeka, rununa, ñore, kwangera, ongurunde, mbamba, ruhopo, mununa notomba. 23 Yoihe eyo yoimango yaa tunda mu mucima o munu, yodiyo yo ku twethsa ku mu thsireka.”
Thsitawo thso mbuyama o Munukenge
24 Yesu ngou a tundire mu Galilea no ku thza ku ditunga dya Tire. Wa kengenine mu nthzio, inene ka a fotire ci anu a dimuke ci kwaa di. Unone wa kwangire ku cihoreka. 25 Mbuyama oyu wekarire no mwane o mbuyamaana, oyu wengenine mupepo oumango, ou a yuvire ya Yesu, wa keyire ku kwenthzi no ku na wera ku mauru enthzi. 26 Oyo mbuyama po nedi wa mushovo o Thsigerike aoyu erekerire mu mbongi thza Fenisia mu ditunga dya Siria. Wa rombire Yesu ci a tundithse mupepo oumango kwa mwane. 27 Yesu wa mu amberire ci: “Mu thsie anuke a dye tango no kwikuta, inene ka i roerire ku shimba edya yanuke no ku i konthzera mbwa.”
28 Aye wa tawire ci: “Fumu, eyo po ya shemwa. Unone shaanga mbwa ethzi thzi nekaranga mushi thzo tafure thzaa dyanga omwamwaethzi ou u na wanga kwanuke.” 29 Yesu wa mu amberire ci: “Mukaci ko ku tawa nawa kengeyo, o thze! Mupepo oumango u na tundu kwa mwanoe.” 30 Wa hukire ku diumbo, no ku ka wana mwane o ku na rara podidi. Mupepo oumango o ku u na tundu ku kwenthzi.
Yesu aa porithsa munu o kufa matwi
31 Yesu ou a tundire mu ditunga dya Tire wa cinakanine mu Sidoni ku thza ku Diviya dya Galilea no mu ditunga dya Dekapolisi. 32 Ngou a mu reterire anu munu o kufa matwi no kukana ku twethsa ku amba nawa, no ku mu adikanena ci a mu kambeke moko a pore.
33 Yesu wa mu twarire ku mbadi ku mukunda kokure nanu, wa pakire minwe mu matwi enthzi. Wa thsiperire mate ku minwe thzenthzi no ku mu kwata pa rudimi. 34 Yesu ngou a kengererire ku wiru no ku yoyomwethza. Wa ambire ci: “Efufata!” kuninga ci: “O vukuke!” 35 Popo matwi oyo mukwerume a vukukire no rudimi rwenthzi rwa angurukire, wa twethsire ku amba nawa.
36 Yesu ngou a wa koñomekire ku wa ambera ci katere a i tongwere munu. Unone shaanga ou a wa kanithsire ci a i tongwera munu, dyodi a wa kanithsire dya thzire o i tongora kokuhe oku a pitire. 37 Anu ou a i yuvire a komokire nene, ngou a ambire ci: “Na kwama enu yoihe nawa, mane aa yuvithsa nakwa kufa matwi, no ku ambithsa ashiamba.”