Yesu aekutithsa anu o 4,000
8
Mwao mayuwa mbunga thzothzikuru thza ciwanawanine. Kekarire nedya, Yesu wethsire erongwa yenthzi no ku i ambera ci: 2 “Awa anu naa wa yuvera ñekeñeke, inene a na shimbi mayuwa ahatu o kwa di nange, unone ka di nedya honi. 3 Karo ci ni wa ninge ci a thze ku maumbo o no nthzara, kenge a pwererera pa kaci, inene amweya ku kwo aa tunda kokure.”4 Erongwa ya mu tawire ci: “Muno po mu murundu ne kupi nga a wana munu edya yo ku twethsa kwikutithsa anu awa kuma apa?”
5 Yesu wa ipurire ci: “Mu di no makende angashi?”
Ya mu tawire ci: “Tu di no makende mutanu na edi.”
6 Wa tuminine mbunga ci thzikare pashi. Ou a manine ku shimba ao makende o mutanu na edi no ku kanderera kwa Nyambi, wa a kuyaurire no ku pa erongwa ci i ere mbunga. 7 Karo ekarire no tuthsi totupu. Yesu wa tu fiyawerire no ku ambera erongwa yenthzi ci i tu ere mbunga.
8 Anu a dire no kwikuta. Munyima thzeyo, erongwa ya yarithsire mayongo o mutanu na edi omwamwaethzi. 9 Kuma kwekarire akwerume o ku fota kukuma mu 4,000. Ou a manine ku dya wa wa ningire ci a thze ku maumbo o. 10 Popo Yesu wa shamukerire mu wato nerongwa yenthzi no ku thza ku ditunga dya Dalumanuta.
Afarithsi aa romba thsimonithso
11 Afarithsi amweya a keyire kwa Yesu, a tatekire ku cikanyeka nenthzi. Ko ku mu ereka, a mu rombire ci a kwame thsimonithso thso ku monithsa ci okoro wenthzi waa tunda kwa Nyambi.
12 Yesu wa yoyomwethzire nene mu mupepo wenthzi no ku amba ci: “Ine eyi a rombera thsimonithso awa anu o rerodino? Naa mi tongwera yoshemwa ci kwithsa thsimonithso ethsi a piwa.” 13 Ou a manine ku amba eyi, wa yomamine mu wato no ku yavukera mu thsambwadiya thzo diviya.
Mamene Afarithsi noa a Heroda
14 Erongwa ya vuramine ku paka edya mu wato. Kuma ekarire pohuma no dikende dyofoci mu wato. 15 Yesu wa wa koñomekire ku wa ambera ci: “Mu tunde ku mamene Afarithsi noa a Heroda.”
16 Erongwa ya tatekire ku i ciyongora mu kaciko no ku amba ci: “Aa amba eyi pa ku mona ci ka tu di nedya!” 17 Yesu wa dimukire eyi a ambire, ngou a wa amberire ci: “Ine eyi mu ambawera yo kupira edya? Epo no pano tu di mu shime ku dimuka no ku yuvithsithsa? Ethzi micima thzenu ne thzaa kwanga ngepi ku kwata enu? 18 Mu di no meho, mwaa kwanga ngepi ku mona? Karo mu di no matwi, mwaa kwanga ngepi ku yuva? Ine eyi mu kanena ku vuruka? 19 Uya na kuyawerire anu o 5,000 makende o mutanu ne, kuma mwa yarithsire mayongo angashi omwamwaethzi?”
Ya mu tawire ci: “Mayongo o dikumi na edi.”
20 “No uya na kuyawerire anu o 4,000 makende o mutanu na edi ne, mayongo angashi mwa yarithsire omwamwaethzi?”
Ya tawire ci: “Mutanu na edi.”
21 Yesu ngou a ipurire ci: “No pano tu di ka mu yuvithsithsire?”
Yesu aa porithsa kapuputwa o mu Betisaida
22 Ou a na kumine mu Betisaida, anu amweya a retire kapuputwa kwa Yesu, a mu adikanenine ci a mu kwate no ku mu porithsa. 23 Yesu wa kwatererire oyo kapuputwa ku dyoko no ku mu tundithsa mu diumbo. Ngou a mu thsiperire mate pa meho no ku mu kambeka moko, wa mwipurire ci: “Ene wa twethsa ku mona thsinu?”
24 Oyo mukwerume ou a kengire wa ambire ci: “Ii, naa mona anu, unone naa wa mona eci etondo eyi i endaura.”
25 Yesu ngou a mu pakire moko pa meho enthzi karo. Popo meho enthzi a kengire, wa porire no ku mona nawa enu yoihe. 26 Yesu wa mu ningire ci a thze, no ku mu ambera ci: “O kondoroke diumbo dya Betisaida ku huka ku diumbo dyoe.”
Peturu aa amba ci Yesu po Mesiya
27 Yesu nerongwa yenthzi a tundire mu Galilea no ku thza mu maumbo aa a na cihata no mbongi thza Sesarea Filipi. Mu dikuñwa wa ipurire ci: “Anu ne a ninga ci yame nodye?”
28 Ya mu tawire ci: “Amweya aa ninga ci yowe o Johani Mukwakukorovethza, amweya ci yowe o Eliya, amweya ci o yumweya wakwakukethza.”
29 Ngou a ipurire ci: “Amwe ne mwaa ninga ci yame nodye?”
Peturu wa mu tawire ci: “Yowe o Mesiya.”
30 Yesu wa i koñomekire ku i ambera ci katere ya ku i tongwere munu ci yodiyo Mesiya.
Yesu a okethza yo kufa kwenthzi
31 Yesu ngou a tatekire ku wa tongwera ci Mwana Munu kenge a ku nyandithsiwa nene no ku kaniwa kwaendithsi, akuru o mapurisita narongithsi o murao. Karo kenge a kwipaiwa no kupinduka kwafu munyima thzo mayuwa ahatu. 32 Kuma a ambire eyi thsitonwameho. Peturu ngou a mu twarire ko kumengi no ku ka i mu kuturura.
33 Yesu wa pirukire no ku kenga erongwa yenthzi, no ku kuturura Peturu ci: “O tunde ku kwange owe Satana, eanekera yoe po yanu kadi ci ngwa ya Nyambi!”
34 Yesu wethsire mbunga nerongwa yenthzi, no ku wa ambera ci: “Munu o ku fota ku ni shupwera, a shuve mwoyo wenthzi, a shimbe mbinda thzenthzi a ni shupwere. 35 Karo munu yomuhe o ku nyunga nene mwoyo wenthzi, kenge a ku u yawa. Unone yomuhe o ku yawa mwoyo wenthzi mukaci kange no Muthzimbu Ouwa, kenge a ku u wana. 36 Owa wine o ku fuma kaye kokahe, unone waa yawa mwoyo o diyere? 37 Thsinu mwine ethsi nga a punithsa munu ci a ure mwoyo wenthzi karo? 38 Mweyo, munu o ku ni fera honyi ame no maywi ange, mo ano mayuwa o mukuta o kukana ku rurama no thsivi, Mwana Munu naye kenge a ku mu fera honyi ou a ku ka huka mu kutethzima kwa Tata no tungeru totukenu.”