Afarithsi nAsaduki aa romba thsimonithso
16
Afarithsi nAsaduki a keyire kwa Yesu no ku na mu ereka ko ku mu romba ci a wa monithse thsimonithso thso ku tunda ku wiru.2 Aye wa wa tawire ci: “Diyuwa o ku di ka toka mwaa amba ci: ‘Peunthza kenge kwa kwikara nawa, inene diwiru di na kihi.’ 3 Mathsikuthsiku mwaa amba ci: ‘Rero mvura kenge a roka, inene diwiru di na kihi karo ku na yambayambera.’ Mwaa twethsa ku nangura yo mikarero thzo diwiru ko ku kenga pohuma ku wiru, unone mwaa kwanga ku nangura yemonithso yekati. 4 Amwe mwanu o rerodino owamango no kukana ku rurama, mwaa romba thsimonithso thso ku komokithsa, ka mu thsi piwa shime thsimonithso thsa mukwakukethza Jonasi.” Popo Yesu wa wa thsiire ayepo cithzera.
Mamene Afarithsi nAsaduki
5 Erongwa ou ya yavukire ku thza mu thsambwadiya thzo diviya, ya vuramine ku shimba ñuta. 6 Yesu wa i amberire ci: “Mu mamere, mu tunde ku mamene Afarithsi nAsaduki.”
7 Erongwa ya ciyongorire mu kaci kayo, no ku amba ci: “Eyi a na i ambera iya Yesu po pakuninga ci ka tu shimbire ñuta.”
8 Yesu wa dimukire eyi ya ambaurire, ngou a ipurire ci: “Mwaa ambera ine keyi yo kupira ñuta, amwe mwashopu thsitawo? 9 Epo no thsino thsikati kadi mwakwa ku yuvithsithsa? Ka mu vurukire uya na kuyawerire anu o 5,000 makende o mutanu? Mayongo angashi mwa yarithsire oyi ya thsiarirepo? 10 Nji uya nekutithsire waya o 4,000 ko makende o mutanu na edi, mayongo angashi mwa yarithsire oyi ya thsiarirepo? 11 Ine mu na kana ku dimukerapo ci ka ni ambire yo ñuta? Mu mamere mamene Afarithsi nAsaduki.” 12 Erongwa honi ngou ya dimukerire ci Yesu ka a ambire yo ku cinyunga ku mamene o ku kwamithsa edya, unone kwirongithsa yAfarithsi nAsaduki.
Peturu aa hokora Yesu ci yodiyo Mesiya
13 Yesu ou a kumine mu ditunga dya Sesarea Filipi, wepurire erongwa yenthzi ci: “Ene anu ne aa ninga ci Mwana Munu ne yodiyo edye?”
14 A mu tawire ci: “Amweya aa ninga ci Johani Mukwakukorovethza, amweya ci Eliya, amweya karo ci Jeremia, nji ci yumweya wakwakukethza.”
15 Yesu wa ipurire ci: “Amwe honi ne mwaa ninga ci yame nodye?”
16 Simoni Peturu wa tawire ci: “Yowe o Mesiya, Mwana Nyambi oyu yoya.”
17 Yesu ngou a mu amberire ci: “Simoni mwana Jona, o mukwa thsiyauthzi shemwa, inene kadi munu na i ku hokwera eyi, unone Tata o ku wiru yo na i ku hokwera. 18 Ame naa ku ambera ci yowe o Peturu,a karo podi diwe po na ku umbera kereke thzange. Shaanga okoro o dihere ka wa ku twethsa ku thzi popwa. 19 Kenge na ku ku pa mapao o Kutumina ko ku Wiru, ethsi wa kwanga pano pashi no ku wiru kenge thsa kwangiwa, ethsi wa ku putura pano pashi no ku wiru kenge thsa ku puturiwa.” 20 Ngou a nomenithsire erongwa yenthzi ci katere ya ku i tongwere munu ci yodiyo Mesiya.
Yesu aa tongora yo kufa no kupinduka kwenthzi kwafu
21 Ku tunda ethso thsikati, Yesu wa tatekire ku tongwera erongwa yenthzi thsitonwameho ci aa roera ku thza ku Yerusalema ci a ka nyandithsiwe nene kwakuru o mbunga, nakuru o mapurisita, mofoci kengeyo narongithsi o murao. Kenge a ku ka paiwa, unone mu diyuwa dyo muthsihatu kenge a ku pinduka kwafu.
22 Peturu ngou a mwithserire ku mbadi no ku tateka ku mu kuturura ci: “Ñathsire wange, Nyambi a tawethza enu yo kengeyo ci i tendahare ku koe!”
23 Unone Yesu wa cithsetukire no ku ambera Peturu ci: “O tunde ku kwange Satana! O thsiparaka mu dikuñwa dyange, eanekera yoe po yonu, kadi ya Nyambi.”
24 Yesu ngou a amberire erongwa yenthzi ci: “Ngeci munu aa fota ku ni shupwera, aa roera ku cishuva thsinda no ku shimba mbinda thzenthzi ku ni shupwera. 25 Inene munu yomuhe o ku fota ku nyunga mwoyo wenthzi kenge a ku u yawa, o ku yawa mwoyo wenthzi mukaci kange kenge a ku u wana. 26 Ine nga i kwathsa munu shaanga yo fuma kaye kokahe, unone aa yawa mwoyo wenthzi? Nji thsine nga a punithsa munu ci a wane mwoyo wenthzi? 27 Inene Mwana Munu kenge a ku keya mu kutethzima kwa Tata wenthzi no tungeru twenthzi. Kenge a ku na pa muyambo munu no munu kokuthza keyi naa tende. 28 Naa mi tongwera yoshemwa ci amweya awa a di muno ka ku fa o kwa shime ku mona Mwana Munu o ku keya mu Kutumina kwenthzi.”