9
Wa shumunine ku amba ci: “Naa mi tongwera yoshemwa ci amweya awa a di pano ka ku fa o kwa shime ku mona Kutumina kwa Nyambi o ku ku keya kokoro.”Yesu aa piruka no ku monahara kutethzima
2 Munyima thzo mayuwa o mutanu na dyofoci Yesu wa shimbire Peturu, Jakovo no Johani no ku wa twara pa mukinya oure apa a kekarire wafoci. Apo paa ka pirukerire o kwa na mu tanekera. 3 Evata yenthzi ya tethzima nene, okenu o kuninga ci kwithsa o ku twethsa ku u kwama mu kaye. 4 Kwa monaharire Eliya na Mushe awa a ambaurire na Yesu.
5 Peturu ngou a amberire Yesu ci: “Murongithsi, i na roo eyi tu di kuno, tu kwame matunu ahatu, dimweya dyoe, dimweya dya Mushe nedi dya Eliya.” 6 Aye na enthzenthzi kuma a yapire nene, ka a dimukire neyi a ambire.
7 Kwa keyire divui edi dya wa thsikire, karo diywi dya tundire mu divui edi dya ambire ci: “Oyu po Mwanange oyu na shima, mu mu yuve!” 8 Erongwa ou ya kengire nokunoku kwithsa oyu ya monine shime Yesu pohuma oyu wekarireno.
9 O kwa urumuka ku tunda pa mukinya, Yesu wa i raererire ci ya ka tongwera munu eyi i na ka mona, shime Mwana Munu ou a kupinduka kwafu. 10 Ya hengekire aa maywi mu micima thzayo, unone ya cipaurire mu kaci kayo ci: “Eyi yo kupinduka kwafu ne yo ine?”
11 Ngou yepurire Yesu ci: “Ine eyi a na amberanga arongithsi o murao ci Eliya yo na roera kutanga ku keya?”
12 Yesu wa i tawire ci: “Yoshemwa Eliya o na roera kutanga ku keya no ku na huthsera enu yoihe. Unone ine honi eyi ku na ñoriwera ci Mwana Munu aa roera ku nyanda nene no ku kaniwa? 13 Uno honi naa mi tongwera ci Eliya naa keya, na na mu kwama yoihe eyi na foto eci edi ya ñoriwire keyi yenthzi.”
Yesu aa porithsa mukwerumeana o mupepo oumango
14 Ou a kokerire kwirongwa imweya, a monine anu owangi awa i pakire mu kaci narongithsi o murao awa a cikanyekireno. 15 Mbunga thzothzihe popa thza monine Yesu thza komokire nene no kungumukera ku kwenthzi ku ka mu vumenena.
16 Yesu wepurire arongithsi o murao ci: “Ine eyi mu cikanyekano?”
17 Mukwerume mu mbunga wa tawire ci: “Murongithsi, kuma ni na reta mwanange o mukwerumeana ku koe oyu na wingena mupepo oumango ou u na mu kwangithsa ku amba. 18 Ou mupepo popahe apa u na mu kwateranga waa mu huwera pashi kokoro. Karo waa mu tupurithsanga kafuthzi ku miromo no ku citafuna ku maeo no ku ara. Ni na rombo erongwa yoe ci i u cithze ou mupepo, unone ka i twethsire.”
19 Yesu wa ambire ci: “Amwe mwanu o kupira thsitawo! Thsikati thso ku kuma kupi na kwikara nenu? Thsikati thso ku kuma kupi na ku mi kunda amwe? O u ni retere oyo mukwerumeana.”
20 A mu retire kwa Yesu. Mupepo oumango popa wa monine Yesu, wa huwerire oya mwanuke pashi no ku hanyahanya no ku tupura kafuthzi ku kanwa.
21 Yesu wepurire tata oya mwanuke ci: “Thsikati thso ku kuma kupi na i mu shimbi oyu mwanuke?”
Wa tawire ci: “Ku tunda ku wanuke wenthzi. 22 Rorungi o ku u fota ku mwipaa pa ku mu huweranga mu mudiro no mu meyu. O tu yuvere ñekeñeke, o tu kwathse, ngeci waa twethsa.”
23 Yesu wa mu amberire ci: “Waa ninga ci ngeci waa twethsa? Enu yoihe yaa tawa kwa munu kamona ayepo tawa pohuma.”
24 Ko wanguwangu oya tata oya mwanuke, ou a i yuvire, wa karumukire ku amba ci: “Ni na tawa, o ni kwathse mu kupira kwange thsitawo.”
25 Yesu ou a monine ci mbunga thzaa keya o cirera ku kwenthzi, wa kutururire oo mupepo oumango ci: “Owe o mupepo o shiamba no kufa matwi, naa ku tumina o tunde koyu mwanuke karo katere wa ku ka huke ku kwenthzi.”
26 Mupepo oumango ngou wa kumbire no ku huwera oya mukwerumeana pashi no ku hanyahanya nene, mbeci u tunde ku kwenthzi, ku mu thsia eci thsithzimbi ku ninga ci mane anu owangi a ambire ci: “O na fu!” 27 Unone Yesu wa mu kwatire ku dyoko ku mu katukithsa, ayepo o wimana.
28 Yesu ou ekarire nerongwa yenthzi mu nthzio wafoci, ya mwipurire ci: “Ine eyi tu na kwangera atwe ku u tundithsa ou mupepo oumango?”
29 Wa wa tawire ci: “Mupepo oumango o mushovo ou tumba u twethsa ku tundithsiwa ko thsinu thsathso shime ko thsirombero.”
Yesu a okethza yo kufa kwenthzi
(Mat 17.22-23; Luk 9.43b-45)
30 A tundire muya mu ndau, a cinakanine ditunga dya Galilea pa kaci. Yesu ka a fotire ci anu a dimuke oku ekarire. 31 Inene kuma aa fotire kwikara nerongwa yenthzi o ku i rongithsa. Wa i amberire ci: “Mwana Munu kenge a ku piwa mu moko anu, awo kenge a ku mwipaa. Ou a ku pwa ku paiwa, kenge a ku pinduka kwafu munyima thzo mayuwa ahatu.” 32 Unone ka ya yuvithsithsire eyi a ambire, karo ya yapire ku i mwipura.
O mukuru ne edye?
33 A kumine mu Kapenauma. Ou engenine mu nthzio, Yesu wepurire erongwa yenthzi ci: “Ine iya mu na cikanyeka mu dikuñwa?” 34 Ka ya mu tawire thsimweya, inene eyi ya cikanyekire po yo kuninga ci o mukuru ku kwo ne edye? 35 Yesu wekarire no kwithsa tunganda to dikumi na twidi no ku tu ambera ci: “Yomuhe o ku fota ci ekare o kutanga aa roera kwikara ku hura no kwikara ngamba wanu wahe.”
36 Wa shimbire kanuke no ku kemeka mu kaciko. Wa ka yerurire no ku ka paka pa moko enthzi no ku wa ambera ci: 37 “Munu yomuhe o ku tambura kanuke eci aka mu dithzina dyange, yame a na tambura. O ku ni tambura ka a tamburire ame pohuma, unone aa tambura aye oyu naa ni tumu.”
O kukana ku tu rwithsa aa twimanena
38 Johani wa amberire Yesu ci: “Murongithsi, tu na mono munu oyu na cithzi mathzimu ko dithzina dyoe, tu na mu kanithsa, inene kadi wa thsipani thsetu.”
39 Unone Yesu wa wa amberire ci: “Nga ka mu mu kanithsire. Kwithsa munu o ku kwama ekomokithsa ko dithzina dyange o ku twethsa ku ni piruka ku amba yoimango ku kwange, 40 o kukana ku tu rwithsa, aa twimanena. 41 Munu yomuhe o ku mi pa shaanga nganja thzo meyu mukaci ko kuninga ci mwakwa Krisitu, naa mi tongwera yoshemwa ci kenge a ku wana muyambo wenthzi.
Enu yo ku twara ku thsivi
42 “Karo ngeci kwaa di oyu wa ku huwapo munu kowa owaonye awa na tawa ku kwange, i di nawa ci nga a angereriwa diwe dyodikuru mu thsingo no ku konthzeriwa mu diwate. 43 Ngeci dyoko dyoe dyaa ku twara ku thsivi, o di teteko. Ku di nawa ku koe kwingena mu mwoyo no dyoko dyofoci kupita ku thza no moko edi mu dihere mu mudiro o kukana ku thzimana, 44 [mu mavinyo a shifu no mu mudiro u shithzimana.] 45 Ngeci diuru dyoe dyaa ku twara ku thsivi, o di teteko. Ku di nawa kwingena mu mwoyo o ku di thsirema kupita ku konthzeriwa mu dihere no mauru edi, 46 [mu mavinyo a shifu no mu mudiro u shithzimana]. 47 Ngeci po dithziho dyoe dyaa ku twara ku thsivi, o di thzongoremo. Ku di nawa ku thza mu Kutumina kwa Nyambi no dithziho dyofoci kupita ku konthzeriwa no meho edi mu dihere, 48 mu mavinyo a shifu no mu mudiro u shithzimana.