Yesu aa piruka no ku monahara kutethzima
17
Munyima thzo mayuwa mutanu na dyofoci, Yesu wa shimbire Peturu na Jakovo no Johani mina Jakovo, no ku wa twara pa mukinya oure apa a kekarire wafoci. 2 Yesu wa ka pirukire thsihanga pa meho o, rupara rwenthzi rwa tethzimine eci diyuwa neto yenthzi ya rwethzimine eci mwethzi. 3 Popo Mushe na Eliya a hokokire kukwo no ku ambaura na Yesu.4 Peturu ngou a amberire Yesu ci: “Fumu, i na roo eyi tu di kuno. Ngeci o na i shimi, kenge ni kwama matunu ahatu, dimweya dyoe, dimweya dya Mushe, dimweya dya Eliya.”
5 O ku amba kengeyo kwa keyire divui dyo kutethzima edi dya wa thsikire. Diywi dya ambire ku tunderera omo mu divui ci: “Oyu po Mwanange oyu na shima no ku ni roerithsa nene. Mu mu yuvere.”
6 Erongwa ou ya yuvire eyi ya yapire nene no ku wa pashi ku furumana. 7 Unone Yesu wa keyire kukwo, wa i kwatire no ku amba ci: “Mu kotoke mwa yapa.” 8 Ou ya kotokire no ku kenga, kwithsa munu oyu ya monine shime Yesu pohuma.
9 O kwa urumuka ku tunda pa mukinya, Yesu wa wa raererire ci: “Mwa ku i tongwera munu eyi mu na mono shime Mwana Munu ou a ku pinduka kwafu.”
10 Erongwa ngou ya mwipurire ci: “Ine eyi a na amberanga arongithsi o murao ci Eliya yo na roera kutanga ku keya?”
11 Yesu wa tawire ci: “Yoshemwa Eliya aa roera ku tanga ku keya ku na roithsa enu yoihe. 12 Unone naa mi tongwera ci Eliya naa keya kare, unone anu ka na mu dimuka, na mu tende omu na shimena momuhe. No Mwana Munu naye dya ku mu nyandithsa kengeyo.” 13 Erongwa ngou ya yuvithsithsire ci Yesu kuma a ambire ya Johani Mukwakukorovethza.
Yesu aa porithsa mukwerumeana o mupepo oumango
14 Yesu neyo erongwa yenthzi ou a hukire ku mbunga, kwa keyire mukwerume no ku na tongama ku manwi ku mauru a Yesu no ku amba ci: 15 “Fumu, o fere ñeke mwanange wa thsinyonya. Thsaa mu nyandithsanga nene, inene thsaa mu withseranga rorungi mu mudiro no mu meyu. 16 Ni na mu reta kwirongwa yoe, unone a na kwanga ku mu porithsa.”
17 Yesu wa tawire ci: “Amwe mwanu owamango no kupira thsitawo! Thsikati thso ku kuma kupi ni na roera kwikara nenu? Diyuwa dipi na ku mi kunda? Mu mu rete kuno oyo mwanuke.” 18 Yesu wa tuminine oo muthzimu ci u mu tunde. Wa mu tundire, no mwanuke popo wa porire.
19 Erongwa ya keyire kwa Yesu ku mukunda no ku mwipura ci: “Ine eyi tu na kwangera ku cithza uya mupepo oumango?”
20 Wa tawire ci: “Mukaci ko thsitawo thsenu opu. Naa mi tongwera yoshemwa ci nga mu di no thsitawo thso ku kuma pa dinanda dyotata, kenge nga mu twethsa ku ambera ou mukinya ci: ‘O tuturuke apo o thze paya,’ kenge nga u thza karo kwithsa ethsi nga thsi kanga ku kwenu. 21 [Shime ko thsirombero no ku cikanga no nthzara nga mu twethsa ku cithza mupepo o kengeya. Ko kupira eyo, tumba i tawa.”]a
Yesu aa amba karo yo kufa no ku pinduka kwenthzi kwafu
(Mar 9.30-32; Luk 9.43b-45)
22 Diyuwa dimweya erongwa ou ya ciwanawanine mu Galilea, Yesu wa i amberire ci: “Mwana Munu a tamba ku mu pa mu moko anu. 23 Awo kenge a ku mwipaa, unone kenge a ku pinduka kwafu mu diyuwa dyo muthsihatu.” Erongwa ya i cinyengire nene.
Mutero o Tembere
24 Yesu nerongwa yenthzi ou a kumine mu Kapenauma, aterithsi o mutero o Tembere a keyire kwa Peturu no ku na mwipura ci: “Ene murongithsi wenu ne ka a terangire mutero o Tembere nji?”
25 Peturu wa tawire ci: “Dyombo, aa teranga.” Peturu wengenine mu nthzio. Unone o ku shime no kuninga ci a ambe, Yesu wa mwipurire ci: “Simoni, owe ne waa mona ngepi? Ene mafumu o kaye ne aa terithsanga ano nji, inji anuawo?”