O mukuru ne edye?
18
Kethsiya thsikati erongwa ya keyire kwa Yesu no ku mwipura ci: “Edye o mukuru nene mu Kutumina ko ku Wiru?”2 Yesu wethsire kanuke no ku kemeka mu kaciko. 3 Wa ambire ci: “Naa mi tongwera yoshemwa ci ngeci ka mwa ku piruka kwikara eci twanuke, mbera ka mwingena mu Kutumina ko ku Wiru. 4 Mweyo, yomuhe o ku cihuthsa kushi eci aka kanuke yo mukuru nene mu Kutumina ko ku Wiru. 5 Yomuhe o ku tambura kanuke eci aka mu dithzina dyange yame a na tambura.
Etumaura yo ku twara ku thsivi
6 “Unone yomuhe o ku retera yumweya kowa owaonye awa na tawa ku kwange ci a tende thsivi, ku di nawa ci nga a angereriwa diwe dyodikuru mu thsingo no ku konthzeriwa mu diwate. 7 Kaye ka di nothsimo mukaci keyi i dimo eyi i retera anu ci a tende thsivi. Etumaura kenge ikarangako thsikati thsothsihe, unone o di nothsimo mukwa ku i reta!
8 “Mweyo, ngeci dyoko dyoe nji thsidyato thsoe yaa ku twara ku thsivi, i teteko no ku i konthza. Ku di nawa ci o wingene mu mwoyo o ku di thsirema nji thsikunga kupita kwikara no moko edi nji edyato idi, unone waa konthzeriwa mu mudiro o diyere. 9 Karo ngeci dithziho dyoe dyaa ku twara ku thsivi, o dithzongoremo no ku di konthza. Ku di nawa ci o wingene mu mwoyo no dithziho dyofoci kupita ku konthzeriwa mu mudiro o dihere no meho edi.
Kathsimo ko dingu dyo ku yonga
10 “Mu mamere ci mwa shwahurapo yumweya powa owaonye. Naa mi ambera yoshemwa ci tungeru two mu wiru pa meho a Tata tu di thsikati thsothsihe. 11 [Inene Mwana Munu aa keyera ku na yoyithsa awa na yongo.]a
12 “Mwaa anekera ngepi? Ngeci munu o di no mangu o makumi dikumi, apopo pa yonga dyofoci, ine nga a tenda oya munu? Ene nga ka a thsii ao o 99 o ku a dyera ku nganga thzo mukinya no ku ka fota edi di na yongopo nji? 13 Ngeci ayepo ka di wana, naa mi tongwera yoshemwa ci kenge a di nyanyukera nene kupita ao o 99 aa a na kana ku yonga! 14 Mofoci, kadi eshima ya Tata o mu wiru ci pa yonge shaanga yofoci powa owaonye.
O ku na kwipithsera muenthzoe
15 “Ngeci muenthzoeb ayepo kwipithsera, o mu thzere o ka mu ambere ku mukunda eyi a nepithsa. Ngeci ayepo ku yuvera, o na mu kwathsa. 16 Ngeci ayepo kana ku ku yuvera, o shimbeko yofoci nji aidi ku thza noe ku kwenthzi, ci eyi o ka amba i ka tanarere pa mambangi edi nji ahatu.c 17 Ngeci ayepo kana ku wa yuva, o ka i tongore ku kereke. Ngeci ayepo kana ku yuvera kereke, o mu shimbe eci Munukenge nji eci muterithsi.
18 “Naa mi tongwera yoshemwa ci yoihe eyi mwa kwanga pano pashi, no mu wiru kenge ya kwangiwa; karo yoihe eyi mwa ku putura pano pashi, kenge ya ku puturiwa no mu wiru.
19 “Naa mi ambera karo ci ngeci anu aidi ku kwenu awopo a ciyuva ku romberera thsinu pano pashi, Tata mu wiru kenge a ku thsi wa tendera. 20 Inene anu aidi nji ahatu yoihe a ciwana pofoci mu dithzina dyange, name mu kaciko ni di.”
Kathsimo ko ngamba o kukana ku tetera
21 Peturu wa keyire kwa Yesu no ku mwipura ci: “Fumu, miendo thzingashi ni na roera ku tetera muenthzange o ku ni pithseranga. Miendo mutanu na thzidi nji?”
22 Yesu wa tawire ci: “Dyombo, kadi miendo mutanu na thzidi, unone miendo thzo makumi mutanu na edi ku thzi taimithsa ko mutanu na thzidi.
23 “Mweyo, Kutumina ko ku Wiru kwaa cipitura eci fumu oyu wa anekerire ku tatufa mavuka o madi kwangambenthzi. 24 Ou a tatekire ku tatufa, a mu reterire mukwamakongo oyu wa mu koroterire madi oangi nene. 25 Pakuninga ci ka a twethsire ku futura ao makongo, ñathsire wenthzi wa tuminine ci oyo munu a urithsiwe mofoci kengeyo na munuwenthzi, nanenthzi netere yenthzi yoihe ci a kure ao makongo.
26 “Unone oyo ngamba wa tongamine ku manwi no ku adikanena ñathsire wenthzi ci: ‘O nimaneneko, kenge na ku futura oahe ao makongo.’ 27 Ñathsire wenthzi wa mu yuverire ñekeñeke, wa mu teterire murandu wenthzi no ku mu thsia ci a thze.
28 “Unone ou a thsiire ñathsire wenthzi, oya ngamba wa wanine yumweya kwaenthzenthzi angamba oyu wa mu koroterire madi oapu.d Wa mu kwatire no ku mu ngama pa mudyu no ku amba ci: ‘O future makongo ange.’
29 “Oyo muenthzenthzi ngamba wa tongamine ku manwi no ku mu adikanena ci: ‘O nimaneneko, kenge na ku futura makongo oe.’
30 “Unone aye wa kanine, wa mwangithsire no ku mu paka mu kamenga shime apa mba a futwera makongo oahe. 31 Aenthzenthzi angamba ou a monine eyi ya tendaharire, a i cinyengire nene. A thzire kwa ñathsire wo no ku ka mu tongwera yoihe eyi ya tendaharire.
32 “Ñathsire wenthzi ngou a mwithsire no ku mu ambera ci: ‘Owe ngamba omumango, na ni ku tetera aya makongo ange pakuninga ci shime waa ni adikanena. 33 Kuma no roera ku fera ñeke muenthzoe ngamba eci diya na ni ku fera ñeke nowe.’ 34 Ñathsire wenthzi wa anthzipire nene, ngou a mu tumithsire ku kamenga ci a ka humbithsiwe shime ou mba a futura makongo enthzi oahe.”
35 Yesu wa shumunine ku amba ci: “Tata oyu di ku wiru kenge mba a mi tenda kengeyo ngeci kadi mwakwa ku tetera aenthzenu ku tunderera ku micima thzenu shemwa.”