Erongithsa yo kufa ko maruo
19
Yesu ou a manine ku amba eyo, wa tundire mu Galilea no ku thza mu ditunga dya Judea mu thsambwadiya thzo Rware rwa Jorodani. 2 Mbunga thzothzikuru thza mu shupwerireko, wa ka porithsire awa a korire.3 Afarithsi amweya a keyire no ku na mu ereka. A mwipurire ci: “Ene mukwerume ne aa tawethziwa ku rukurura munuwenthzi pa ngara thsinu nji?”
4 Yesu wa tawire ci: “Ene ka mwa tara eyi i na ñoriwa mu Mañoro ci ku matatekero ‘Nyambi kuma ombire mukwerume no mbuyama nji?’ 5 Ngou a ambire ci: ‘Mukwerume kenge mba a thsia tata wenthzi no mama wenthzi no ku cikwata na munuwenthzi, karo awo aidi kenge mba piruka thsirama thsofoci.’ 6 Apo honi kadi anu aidi karo, unone a na piruka thsirama thsofoci. Mweyo, ethsi a na waneka Nyambi, munu a thsi tepa.”
7 Afarithsi ngou epurire Yesu ci: “Mushe honi ne ine eyi a raererire mukwerume ku pa diñoro munuwenthzi dyo ku mu rukurura no ku mu kondora?”
8 Yesu wa tawire ci: “Mushe kuma a mi tawethzire ku rukurura anuwenu mukaci kokaru o micima thzenu, unone ku matatekero Nyambi ka a i pakire kengeyo. 9 Naa mi ambera ci mukwerume yomuhe o ku rukurura munuwenthzi no ku yeka wao na rembeka, shime ngeci aa mu rukurwera yo mirembe.”
10 Erongwa yenthzi ya mu amberire ci: “Ngeci dyo i di kengeyo mu kaci ka mukwerume na munuwenthzi, kandi ku di nawa honi ne kukana ku yeka.”
11 Yesu wa tawire ci: “Eyo po kadi cingwa ya munu yomuhe, shime awa naa i pa Nyambi. 12 Inene amweya aa kwanga ku yeka mukaci ko ku ninga ci dyerekiwire, amweya aa kwanga ku yeka mukaci ko ku i wa kwama anu. Amweya aa cihangwera kukana ku yeka mukaci ko Kutumina ko ku Wiru. O ku twethsa ku tambura eyi erongithsa a i tambure.”
Yesu aa fiyawera anuke
13 Diyuwa dimweya anu a retire twanuke kwa Yesu ci a tu kambeke moko no ku tu romberera. Unone erongwa ya wa kutururire.
14 Yesu wa i amberire ci: “Mu thsie twanuke tu keye ku kwange, mwa tu kanithsa, inene Kutumina ko ku Wiru po kwanu o kwikara eci ato.” 15 Yesu wa tu kambekire moko, ou a manine wa thzire.
Mushumba o fumanyi
16 Munu yumweya wa keyire kwa Yesu ku na mwipura ci: “Murongithsi, enu mwine yoiwa eyi ni na roera ku kwama ci nga ni wane mwoyo o diyere?”
17 Yesu wa mu tawire ci: “Waa nipwera ine keyi yoiwa? O muwa po yofoci pohuma. O hengeke eraerera ngeci waa fota kwingena mu mwoyo.”
18 Aye wepurire ci: “Eraerera ipi?”
Yesu wa mu amberire ci: “ ‘Kadi o mukwa kwipaa, kadi o mukwa ku rembeka, kadi o mukwa kwithza, kadi o mukwa ku pa ombangi o tumbako. 19 O remeke tata woe no mama woe,’ karo ‘o shime muenthzoe eci edi wa cishima othsinda.’ ”
20 Oyo mushumba wa tawire ci: “Na i hengeka yoihe eyo eraerera. Ine karo eyi ni na roera ku kwama?”
21 Yesu wa mu amberire ci: “Ngeci waa fota kwikara o kwononoka, o thze o ka urithse eyi o di nayo yoihe, madi o a pe ahepwe, wangu wa kwikare no rufumo mu wiru. Ku tunda apo o ni shupwere.”
22 Oyo mushumba ou a yuvire eyo wa thzire o ku na cinyenge nene pakuninga ci kuma a fumine nene. 23 Yesu ngou a amberire erongwa yenthzi ci: “Naa mi tongwera yoshemwa ci ku karu nene fumanyi kwingena mu Kutumina ko ku Wiru. 24 Karo naa shumuna ku mi ambera kenge ci kenge nga iotopa ci kamere engene mu dithziho dyo thsonga, kupita ci fumanyi engene mu Kutumina kwa Nyambi.”
25 Erongwa ou ya i yuvire ya komokire nene no ku amba ci: “Edye ne honi mbo yoyithsiwa?”
26 Yesu wa i kengererire no ku amba ci: “Kwanu po tumba i tawa, unone kwa Nyambi po enu yoihe yaa tawa.”
27 Peturu wa mu amberire ci: “O na mono, atwe tu na thsii enu yetu yoihe no ku ku shupwera, ine eyi twa ku wana?”
28 Yesu wa tawire ci: “Naa mi tongwera yoshemwa ci mu kaye kokape, Mwana Munu ou mba ekara mu ngunja thzenthzi thzo kutethzima, namwe amwe mu na ni shupwera kenge mba mwikara mu mangunja o dikumi na edi, ku ratura mikuta thzo dikumi na thzidi thza Isiraele. 29 Wahe awa na thsii manthzio, akurwo namino, atata wo namama wo, nano, nji makanda mukaci kange, kenge a ku wana ñambeko thzo makumi o dikumi peuru, ku hura a ku wane no mwoyo o diyere. 30 Unone owangi awa a di ku rupara kethsino thsikati kenge a kwikara ku manyima, awa a di ku manyima kenge a kwikara ku rupara.