Kathsimo kakwakukwama mu dikanda dyo veine
20
“Kutumina ko ku Wiru kwaa cipitura eci thsinda thsa dikanda oyu wa menekerire ku ka fota anu o ku na kwama mu dikanda dyenthzi dyo veine. 2 Wa ciyuvireno ku wa horithsa madi o muhorero o diyuwa dyofoci, ngou a wa tumithsire ku ka kwama mu dikanda dyenthzi dyo veine.3 “Wa thzire karo ku maurithsero ko thsikati thso 9, wa ka monine akwerume amweya awa a cikarerire kwithsa yo ku kwama. 4 Wa wa amberire ci: ‘Mu thze namwe mu ka kwame mu dikanda dyange dyo veine, kenge ni mi horithsa omu ku na roera.’ 5 Nawo a thzire ku ka kwama. Wa thzire karo mu thsikati thso mutenya no ku di na thsiuruka diyuwa o ku tendanga kengeyo. 6 Runguro wa hukire ku maurithsero, wa ka wanine karo amweya awa cikarerire. Ngou a wepurire ci: ‘Ine eyi mu na cikarerera kengeyo diyuwa mutumbi kwithsa thso ku kwama?’
7 “Awo a tawire ci: ‘Kwithsa oyu na tu pa ekwama.’ Wa wa amberire ci: ‘Mu thze namwe mu ka kwame mu dikanda dyange dyo veine.’
8 “Kanguronguro, thsinda thsa dikanda dyo veine wa amberire muendithsi wekwama yenthzi ci: ‘O withse akwakukwama wahe no wa horithse madi o, o tatekere waya o mahurerero, no ku manenena ko waya o kutanga.’
9 “Ou a kumine awa engenine pekwama runguro, munu no munu wa horire madi o muhorero o diyuwa dyofoci. 10 Awa a tangire pekwama ou a keyire ku kuhora, a anekerire ci kenge a hora madi oangi kupita awa engenine munyima. Unone nawo a horire madi o muhorero o diyuwa dyofoci. 11 A shimbire madi o no ku tateka ku cithsimoka kwa thsinda thsa dikanda. 12 A ambire ci: ‘Awa a nengena pekwama ku mahurerero a na kwama thsitunde thsofoci, unone atwe tu na kwama diyuwa mutumbi o ku tu pya mutenya, uno honi o na wa pa madi mofoci eci atwe.’
13 “Unone aye wa tawire yumweya ku kwo ci: ‘O na yuvu shadi, ka ni mipithserire, kuma tu na ciyuvu madi o muhorero o diyuwa dyofoci. 14 O shimbe madi oe o thze ku diumbo. Dyo i na i shimi ku pa o mahurerero madi eci aa ni na ku pa. 15 Ene ka ni tawethziwire ku tenda omu ni na shimena pa madi ange? Nji waa ni tendera mbamba pa kupa kwange?’
16 “Mweyo, o mamaneneno kenge a kwikara o kutanga, karo o kutanga kenge a kwikara o mamaneneno.”
Yesu aa amba karo yo kufa no ku pinduka kwenthzi kwafu
17 Yesu o ku di mu dikuñwa dyo ku thza ku Yerusalema, wa shimbire erongwa yenthzi yo dikumi na idi ku thzano kokumengi no ku ka wa ambera ci: 18 “Mu teerere, twaa thza ku Yerusalema oko Mwana Munu a ku ka piwa kwakuru o mapurisita narongithsi o murao. Kenge a ku ka mu ratwera kufa. 19 Kenge a ku ka piwa mu moko Anukenge awa a ku mu varaera, ku mu fura no ku mwamba pa mbinda, unone kenge a ku pinduriwa kwafu mu diyuwa dyo muthsihatu.”
Thsiromba thsa mama wa Jakovo na Johani
20 Mama wa Jakovo na Johani, ana Zebedea, ngou a keyire kwa Yesu nanenthzi aidi wakwerume, wa na tongamine ku manwi pa rupara rwenthzi no ku romba ci a mu tende nawa.
21 Yesu wa mwipurire ci: “Ine eyi o fota?” Aye wa mu tawire ci: “O ni kumbwethze ci awa anange, momu widi wo ci a kwikare yumweya ku rudyo rwoe, yumweya ku rumoho rwoe mu Kutumina koe.”
22 Yesu wa tawire ci: “Ka mu dimuka ethsi mu romba. Ene kenge nga mu twethsa ku nwena mu nganja thzo makando ethzi na ku nwena nji?” A mu tawire ci: “Twaa twethsa.”
23 Yesu wa ambire ci: “Yoshemwa kenge mwa ku nwena mu nganja thzange, uno honi yo kwikara ku rudyo nji ku rumoho rwange po kadi cingwa yame na ku i fungura. Ao mandau po a ku piwa kowa naa a roithsera Tata.”
24 Erongwa yo dikumi ou ya yuvire eyo, ya anthziperire Jakovo na minenthzi Johani. 25 Yesu ngou a ithserire yoihe pofoci no ku i ambera ci: “Mu na dimuka ci aendithsi wAnukenge po a di nokoro peuru thzowa a na endithsa, karo nowa a di neturo yoshokuru a di nokoro o ku wa endithsa omu a na shimena. 26 Unone ya dikara kengeyo mu kaci kenu, oyu na foto kwikara o mukuru mu kaci kenu a piruke ngamba wenu. 27 Oyu na foto kwikara o kutanga a piruke mupikenu, 28 eci Mwana Munu edi na a kana ku keyera ci anu a mu kwamene, unone aa keyera ku na kwamena anu no ku shuva mwoyo wenthzi kwikara thsipaturithso thsanu owangi.”
Yesu aa porithsa akwerume aidi o tupuputwa
29 Yesu nerongwa yenthzi ou a tundire ku Jeriko, anu owangi a mu shupwerire. 30 Anu aidi o tupuputwa ekarire ku mbadi thzo dikuñwa. Ou a yuvire ci Yesu aa pita, a kumbire ci: “Fumu, Mwana Davida, o tu yuvere ñeke!”
31 Mbunga thza wa kutururire ci a tutware, unone awo a kumbire nene ku amba ci: “Fumu, Mwana Davida, o tu yuvere ñeke!”
32 Yesu wemanine, wa wethsire no ku na wepura ci: “Mwaa fota ci ni mi kwamene ine?”
33 A tawire ci: “Fumu, twaa fota ku mona.”
34 Yesu wa wa yuverire ñekeñeke, ngou a wa kwatire pa meho. Popo a monine, awopo a mu shupwera.