Yesu aa rongithsa yo kufa ko maruo
10
Yesu ou a tundire mu Kapenauma, wa thzire mu ditunga dya Judea no mu thsambwadiya thzo Rware rwa Jorodani. Mbunga karo thza nongumanine ku kwenthzi, eci edi a tendangire wa tatekire ku wa rongithsa.2 Afarithsi amweya a keyire ku kwenthzi ku na mu ereka ku mu ta pa rudimi ko ku na mwipura ci: “Ene mukwerume ne aa tawethziwa ci a kane munu wenthzi nji?”
3 Yesu wa wa tawire ko ngudi ci: “Mushe ne ngepi a mi raererire?”
4 Awo ngou a mu tawire ci: “Mushe kuma a tawethzire ci mukwerume a ñorere diñoro munu wenthzi dyo ku mu rukurura no ku mu kondora.”
5 Unone Yesu wa wa amberire ci: “Mukaci kokaru o micima thzenu yodiyo a mi pererire Mushe ethsi thsiraerera. 6 Ku tunda ku matatekero Nyambi ou ombire enu yoihe, wombire mukwerume no mbuyama. 7 Mukaci keyo, mukwerume kenge mba a thsia tata wenthzi no mama wenthzi no ku cikwata na munuwenthzi. 8 Awo aidi kenge mba piruka thsirama thsofoci. Mweyo kadi aidi karo, unone thsirama thsofoci. 9 Mweyo, ethsi naa waneka Nyambi, munu katere a thsi tepe.”
10 Yesu o ku di mu nthzio, erongwa yenthzi ya i mwipurire karo eyo. 11 Wa i amberire ci: “Mukwerume yomuhe o ku rukurura munuwenthzi no ku yeka wao o na rembeka. 12 No mbuyama o ku kana munuwenthzi no ku yekiwa kwa mukwerume wao o na rembeka.”
Yesu aa fiyawera anuke
13 Anu a retire twanuke kwa Yesu ci na a tu kambeke moko no ku tu fiyawera, unone erongwa ya wa kutururire.
14 Ou a i monine eyo Yesu, wa anthzipire no ku ambera erongwa yenthzi ci: “Mu thsie twanuke tu keye ku kwange, mwa tu kanithsa, inene Kutumina kwa Nyambi po kwanu o kwikara eci ato. 15 Naa mi tongwera yoshemwa ci munu o kukana ku tambura Kutumina kwa Nyambi eci mwanuke, mbera kaengenamo.” 16 Ngou a pakire oto twanuke pa moko enthzi, wa tu kambekire moko no ku tu fiyawera.
Mushumba o fumanyi
17 Yesu ou a katukire ci a thze, kwa keyire ku kwenthzi mukwerume oyu wa keyire o cira. Wana tongamine ku rupara rwa Yesu no ku mwipura ci: “Murongithsi o muwawa, ine eyi ni na roera ku tenda ci ni wane mwoyo o diyere?”
18 Yesu wa mu tawire ci: “Ine eyi o ni thsera ci o muwawa? Kwithsa o muwawa shime Nyambi yofoci! 19 O na dimuka eraerera yo kuninga ci: ‘Kadi o mukwa kwipaa, kadi o mukwa ku rembeka, kadi o mukwa kwithza, kadi o mukwa ku pa ombangi o tumbako, kadi o mukwa ku kupakupa muenthzoe, o remeke tata oe no mama oe.’ ”
20 Oyo mukwerume wa tawire ci: “Murongithsi, na i hengeka yoihe eyo ku tunda ku wanuke wange!”
21 Yesu wa mu kengererire ko thsishimo, no ku mu ambera ci: “Ku na ku thsiarera thsinu thsofoci pohuma. O thze, o ka urithse eyi o di nayo yoihe, ao madi o ka a pe ahepwe ci wa kwikare no rufumo mu wiru. Ku tunda apo, o keye no ni shupwere.”
22 Oyo mukwerume wa enine ou a yuvire eyo, wa thzire o cishoshomwa, pakuninga ci kuma a fumine nene.
23 Yesu wa endithsire meho no ku ambera erongwa yenthzi ci: “Ikaru nene afumanyi kwingena mu Kutumina kwa Nyambi!” 24 Erongwa yenthzi ya komokire ao maywi, unone Yesu wa shumunine ku amba ci: “Anange, ikaru nene kwingena mu Kutumina kwa Nyambi! 25 Mane ioto ci kamere engene mu dithziho dyo thsonga, kupita ci fumanyi engene mu Kutumina kwa Nyambi!”
26 Erongwa ya komokire kupita pa kutanga, no ku cipura ci: “Edye ne nga yoyithsiwa?”
27 Yesu wa i kengererire no ku amba ci: “Kwanu po tumba i tawa, unone kwa Nyambi po yaa tawa, inene kwa Nyambi po enu yoihe yaa tawa.”
28 Peturu ngou a mu amberire ci: “O na mono, atwe po na tu thsii enu yoihe no ku ku shupwera!”
29 Yesu wa mu tawire ci: “Naa mi tongwera yoshemwa ci kwithsa munu oyu na a thsii nthzio thzenthzi, nji akurwenthzi nji aminenthzi, nji andumbuthzenthzi, nji tata wenthzi no mama wenthzi, nji anenthzi nji makanda enthzi mukaci kange no mukaci ko Muthzimbu Ouwa, 30 oyu wa kukana ku tambura makumi o dikumi mo thsino thsikati pa thsinu no thsinu ethsi na a thsii, ikare manthzio, nji akurwenthzi nji aminenthzi, andumbuthzenthzi, mama wenthzi, tata wenthzi, anenthzi no makanda enthzi pofoci kengeyo no makando, karo a ku wane mwoyo o diyere mu kaye aka ka keya. 31 Unone owangi awa di ku rupara thsino thsikati kenge a kwikara kunyima, karo awa a di kunyima thsino thsikati kenge a kwikara ku rupara.”
Yesu aa tongora ro muthsihatu yo kufa no kupinduka kwenthzi
32 O kwa thza mu dikuñwa ku kambama ku thza ku Yerusalema, Yesu kuma a endire ku rupara, erongwa yenthzi ya komokire. Karo nanu awa mu shupwerire a yapire. Yesu wethserire erongwa yenthzi yo dikumi na idi ku mbadi no ku i tongawera eyi ya ku mu keyera. 33 Wa i amberire ci: “Mu teerere, twaa kambama ku thza ku Yerusalema, oku a ku ka piwa Mwana Munu mu moko akuru o mapurisita narongithsi o murao. A ku ka mu ratwere kufa no ku mu pa mu moko Anukenge. 34 Awo kenge a ku ka mu teurura, kenge a ku ka mu thsipera mate, a ku ka mu fure no ku mwipaa, unone munyima thzo mayuwa ahatu kenge a ku pinduka kwafu.”
Thsiromba thsa Jakovo na Johani
35 Ngou Jakovo na Johani ana Zebedea, a keyire kwa Yesu no ku mu ambera ci: “Murongithsi, ko i di eyi tu romba ci nga o i tu kwamene.”
36 Yesu wa wepurire ci: “Ine eyi mu na foto ci ni mi kwamene?”
37 Awo a mu tawire ci: “Ou wa ku keya mu kutethzima koe, wa ku tu tawethze twa kwikare oyu ku rudyo rwoe, oyu ku rumoho rwoe.”
38 Unone Yesu wa wa tawire ci: “Ka mu dimukire eyi mu romba. Ene kenge nga mu twethsa ku nwa omu mu nganja thzo makando na ku nwa, nji ku korovethziwa ko korovethzo thzo makando ethzi na ku korovethziwa?”
39 Awo a mu tawire ci: “Twaa twethsa.”
Yesu wa ambire ku kwo ci: “Ii, yoshemwa, kenge mwa ku nwa mu nganja omu na ku nwa, karo kenge mwa ku korovethziwa ko korovethzo ethzi na ku korovethziwa. 40 Unone eyo yo kwikara ku rudyo nji ku rumoho rwange po ka ni di nokoro o ku i pa. Nyambi pohuma yodiyo o di nokoro o ku i pa awa naa i roithsera.”
41 Erongwa imweya yo dikumi ou ya yuvire eyi a rombire a Jakovo na Johani ya wa anthziperire. 42 Yesu ngou a ithserire pofoci yoihe no ku i ambera ci: “Mu na dimuka ci awa a na shimbiwa ci aendithsi wAnukenge aa dyaterera anu awa a na endithsa, karo awa a di neturo yoikuru aa monithsa okoro wo ku mbunga. 43 Uno honi ku kwenu ka ku di kengeyo. Oyu na foto kwikara o mukuru a pwe ngamba wenu. 44 Oyu na foto kwikara o kutanga ku kwenu ekare mupikenu mwahe. 45 Inene shaanga Mwana Munu ka na a keyera ci naa kwameniwe, unone aa keyera ku na kwamena anu amweya no ku na pa mwoyo wenthzi kwikara thsipaturithso thsa anu owangi.”
Yesu aa porithsa kapuputwa o dithzina dyo Batimea
46 A na kumine mu Jeriko, Yesu nerongwa yenthzi, no mbunga thzothzikuru o kwa tunda mu mbongi, mukwerume o kapuputwa o dithzina dyo Batimea, mwana Timea, kuma ekarire ku mbadi thzo mukwakwa ku romba ekwathsa. 47 Ou a yuvire ci Yesu wa Nazareta oyu pita, wa tatekire ku kumba ci: “Yesu, Mwana Davida! Ni fere ñeke!”
48 Anu owangi a mu kutururire no ku mu ambera ci a tutware.
Unone aye mbeci a kumbe nene ci: “Mwana Davida, o ni fere ñeke!”
49 Yesu ou a mu yuvire, wemanine no ku amba ci: “Mu mu tongwere a keye kuno.”
Ngou a tongwerire oya kapuputwa ci: “O tanare mucima, o katuke! Aa kwithsa!” 50 Wa konthzire thsikoveyo thsenthzi no ku vayumuka ku thza kwa Yesu.
51 Yesu wa mwipurire ci: “Waa fota ci ni ku kwamene ine?” Oyo kapuputwa wa mu tawire ci: “Ñathsire wange, naa fota ku mona!”
52 Yesu wa mu amberire ci: “O thze! Thsitawo thsoe thsi na ku porithsa!” Popo wa monine, no ku shupwera Yesu mu mukwakwa.