Erongithsa yakwathsañuru
15
Afarithsi amweya narongithsi o murao awa a tundire ku Yerusalema a keyire kwa Yesu no ku na mwipura ci: 2 “Ine erongwa yoe eyi i na kanenanga ku shupwera thsithsemwa thsakuru? Inene yaa dyanga ko kukana ku ciyoa ku nyara!”3 Yesu wa wa tawire ci: “Amwe ne ine eyi mu na reeranga thsiraerera thsa Nyambi no ku shupwera thsithsemwa thsenu? 4 Inene Nyambi wa ambire ci: ‘O remeke tata woe no mama woe,’ karo wa ambire ci: ‘Munu yomuhe o ku amba yoimango kwa tata wenthzi nji kwa mama wenthzi, aa roera ku paiwa.’ 5 Unone amwe mwaa amba ci kwithsa omango munu ku ambera tata wenthzi nji mama wenthzi ci: ‘Ekwathsa eyi ni na roera ku mi kwathsa na ni i hangwera Nyambi.’ 6 Mweyo, mwaa monithsa ci oya munu ka a roerire ku remeka tata wenthzi [nji mama wenthzi]. Apo honi mwaa pirithsa okoro diywi dya Nyambi no ku tanarithsa thsithsemwa thsenu. 7 Amwe mwakwamahetaheta! Mukwakukethza Isaya wokethzire yoshemwa keyi yenu ou a ambire ci:
8 “ ‘Awa anu aa ni remeka ko tunwa pohuma,
unone micima thzo kure thzi di nange.
9 Kwithsa neyi a ni romberera,
inene aa rongithsa erongithsa yanu eci eraerera ya Nyambi.’ ”
Enu yo ku thsireka munu
10 Yesu ngou ethserire mbunga ku kwenthzi no ku wa ambera ci: “Mu teerere karo mu yuvithsithse. 11 Ethsi a na di munu tumba thsi mu thsireka, unone thso ku tunda mu kanwa kenthzi thsodiyo thso ku thsireka munu.”
12 Erongwa ngou ya keyire ku kwenthzi no ku na mwipura ci: “O na dimuka ci Afarithsi a nepithsiwera ou a na yuvu eyi?”
13 Yesu wa i tawire ci: “Thsimena thsothsihe ethsi a kana ku kuna Tata o ku wiru kenge thsa ku thzuriwa. 14 Mwa i twara micima, awopo atangereri o tupuputwa, karo ngeci kapuputwa a tangerera muenthzenthzi kapuputwa, momu widi wo kenge a ka wera mu diteke.”
15 Peturu wa tawire ci: “O tu tongonwenene aka kathsimo.”
16 Yesu wa ambire ci: “Epo namwe no pano tu di ka mu yuvithsithsire? 17 Nji ka mu dimukire ci thsothsihe thso ku thza mu kanwa thsaa thza mu dira no ku ka tunda mwirama nji? 18 Unone thso ku tunda mu kanwa thsaa tunderera ku mucima, eyo yodiyo nga i thsireka munu. 19 Inene mu mucima o munu, modiyo ku tunda eanekera yoimango yo kwipaa, mirembe, ruthziho, withzi, ku pa ombangi o tumbako, no ruhopo. 20 Eyo yodiyo yo ku thsireka munu, uno honi ku dya ko kukana ku cihupa ku nyara tumba i thsireka munu.”
Thsitawo thsa mbuyama o Mukanana
21 Yesu ngou a tundire apo no ku thza mu ndau thza Tire na Sidoni. 22 Mbuyama o Mukanana oyu wekarire omo mu ndau wa keyire kwa Yesu o ku kumbanga ci: “Fumu, owe Mwana Davida, o ni yuvere ñeke, mwanange o mbuyamaana o di no mupepo oumango ou u mu nyandithsa nene!”
23 Unone Yesu ka a mu tawire shaanga diywi dyofoci. Erongwa yenthzi ya keyire ku kwenthzi no ku na mu romba ci: “O mu cithze, aa thza o tu tendera muyoyo.”
24 Yesu wa wa tawire ci: “Kuma na ni tumiwa pohuma kwanu a Isiraele awa a na cipitura eci mangu o ku yonga.”
25 Unone oya mbuyama, wa keyire no ku na wera ku mauru a Yesu no ku amba ci: “Fumu, o ni kwathse!”
26 Yesu wa tawire ci: “Ka i roerire ku shimba edya yanuke ku i konthzera mbwa.”
27 Aye wa tawire ci: “Fumu, eyo po ya shemwa. Unone shaanga mbwa thzaa dyanga omwamwaethzi ou u na wanga pa tafure thza hekudya thzo.”
28 Yesu ngou a mu tawire ci: “O di no thsitawo thsothsikuru owe o mbuyama! Eyi o na foto kenge i tendahara ku koe.” Popo mwane wa porire.
Yesu aa porithsa anu owangi
29 Yesu ou a tundire apo wa kurithsire Diviya dya Galilea, wa ka thzinine pa mukinya no ku kekarapo. 30 Anu owangi a keyire ku kwenthzi, a retire anu o kukana ku twethsa ku enda, tupuputwa, ekunga, ashiamba nakwakukora owangi, a na wa pakire ku mauru a Yesu, aye wa wa porithsire. 31 Anu a komokire nene ou a monine ashiamba o kwa amba, erema o ku i pora, ekunga o ku i enda nawa no tupuputwa o ku tu mona, a shangarire Nyambi wa Isiraele.
Yesu aekutithsa anu ro muthsidi
32 Yesu wethsire erongwa yenthzi no ku amba ci: “Ethzo mbunga naa thzi yuvera ñekeñeke, inene a na shimbi mayuwa ahatu o kwa di nange, karo ka di neyi yo ku dya, ka ni fotire ku wa huthsa ko kukana tango ku wa pa yo ku dya, inene kenge nga a pwererera mu dikuñwa.”
33 Erongwa ya mwipurire ci: “Kupi nga tu wana edya yo ku pa mbunga thzothzikuru kenge muno mu murundu?”
34 Yesu wa ipurire ci: “Makende angashi mu di nao?”
Ya tawire ci: “Makende mutanu na edi no tuthsi totupu.”
35 Yesu ngou a amberire mbunga ci thzikare pashi. 36 Wa shimbire ao makende o mutanu na edi noto tuthsi no ku kanderera kwa Nyambi, wa kuyaurire makende no ku cothzaura oto tuthsi no ku i pa erongwa yenthzi, ayo no ku i era anu. 37 Wahe a dire no kwikuta. Erongwa ya yarithsire mayongo o mutanu na edi edya eyi ya thsiarirepo. 38 Taro thzowa a dire nedi akwerume o 4,000 ko kukana ku tarako ambuyama nanuke. 39 Ngou honi Yesu a amberire mbunga ci thzi thze ku maumbo o. Aye no ku yomama mu wato no ku yavuka ku thza mu ditunga dya Magadana.