Yesu aa porithsa munu o mupepo oumango
5
Yesu nerongwa yenthzi a ka thsekerire mu thsambwadiya thzo Diviya dya Galilea, mu ditunga dya Geraseni. 2 Popa a shamukire Yesu mu wato, wa mu hanganyekire mukwerume o mupepo oumango oyu wa tundererire pa mararo. 3 Oyu munu kuma ekarangire mu kaci ko idi pa mararo, karo kwithsa oyu wa twethsire ku mwanga, shaanga no madyenge. 4 Inene wangiwangire no madyenge no tungongoro, unone wa i cinunangire. Kwithsa munu oyu wekarire nokoro o ku mu oomeka. 5 Mutenya nothsiku kuma a thzangire o endaura mu mararo no mu mikinya, o ku thza o kumbanga no ku cikuraura no mawe.6 Ou a monine Yesu o ku endera kokure, wa mu cirerire no ku ka tongama ku manwi ku rupara rwenthzi. 7 Ngou a karumukire ku amba ci: “Ine eyi o fota ku kwange Yesu, owe o Mwana Nyambi, aye o Kuthzinama Nene? Naa ku romba ko dithzina dya Nyambi, wa ni nyandithsa!” 8 Kuma a ambire kengeyo pakuninga ci Yesu wa ambire ci: “Owe o mupepo oumango, o tunde koyu munu!”
9 Ngou honi Yesu a mwipurire ci: “Yowe odye dithzina dyoe?” Aye wa mu tawire ci: “Yame no Mungi, pakuninga ci twangi.” 10 Karo mupepo oumango wa adikanenine Yesu ci a u cithza ku u tundithsa muya mu ditunga.
11 Kwekarire mutanga oukuru o nguru ou wa dyererire ku mbadi thzo mukinya po pepi. 12 Mipepo thzothzimango thza adikanenine Yesu ci: “O tu tumithse kothziya nguru, o tu tawethze tu kengenemo.”
13 Yesu wa thzi tawethzire. Ethzo mipepo thzothzimango ngou thza tundire koya munu no ku kengena ku nguru. Mutanga ouhe o nguru o ku fota kukwana 2,000 wa rundumukire ku urumuka pa muurumuko ku wera mu diviya no ku ka feramo ku meyu.
14 Awa thzi futithsire a cirire no ku ka tongora eyo enu eyo mu mbongi no mu maumbo. Anu ngou a thzire ku ka mona eyi ya tendaharire. 15 A keyire kwa Yesu no ku na wana oya munu wekarire no mipepo thzothzimango thzothzingi o ku nekara o ku na vata, karo maano o ku a di nawa. Wahe a yapire. 16 Awa i monine a tongawerire waya a keyire eyi ya tendaharire koya mukwerume o mathzimu no thziya nguru. 17 Ngou a adikanenine Yesu ci a tunde mu ditunga dyo.
18 Popa a shamukerire Yesu mu wato oya munu wekarire no mipepo thzothzimango wa adikanenine Yesu ci a thze nenthzi. 19 Unone ka a mu tawethzire, wa mu amberire ci: “Dyombo, o thze ku diumbo dyoe kwapoe, o ka wa tongawere yoihe eyi a na ku kwamena Fumu nedi a na ku fera ñeke.” 20 Oyo mukwerume ngou a thzire mu Mambongi Dikumia o ku thza o tongaura okuru weyi a mu kwamenine Yesu, wahe a i cinjembukerire.
Mwana Jairosi no mbuyama wekora yo diropa
21 Ou a hukire karo Yesu no wato mu thsambwadiya thzo diviya, mbunga thzothzikuru thza mu thsindakanine ku mu paka mu kaci kuya ku diya. 22 Kwa keyire muendithsi o sinagoge o dithzina dyo Jairosi. Ou a monine Yesu, wa tongamine ku mauru enthzi, 23 no ku mu adikanena ci: “Mwanange o mbuyamaana aa kokangera, naa ku romba tu thze o ka mu kambeke moko a pore a yoye.”
24 Yesu wa thzire nenthzi. Mbunga thzothzikuru thza mu shupwerire no ku mu paka mu kaci kuninga ci mane thza mu thsindakanithsire. 25 Omo mu mbunga mwekarire mbuyama oyu wa korire ekora yo diropa myaka thzo dikumi na thzidi. 26 Wa nyandire nene kwakwakupanga owangi awa a mu manenine yoihe eyi ekarire nayo, unone ka mu kwathsire thsimweya, ekora mbeci i shumune ku kura. 27 Ou a yuvire ya Yesu, wa keyire munyima mu mbunga no ku na kwata ku thsikoveyo thsa Yesu. 28 Wa tendire kengeyo pakuninga ci kuma a anekerire ci: “Ou nga ni kwata pohuma shaanga ku thsikoveyo thsenthzi, kenge nga ni pora.” 29 Ko wanguwangu diropa dyemanine, wa ciyuvire mwirama ci na poro kuya kwikora.
30 Kethsiya thsikati Yesu wa ciyuvire ci okoro wa tundire ku kwenthzi, popo wa cithsetukire no kwipura mbunga ci: “Edye na ni kwata ku thsikoveyo?” 31 Erongwa ya mu tawire ci: “O mone, owe po anu aa ku thsindakana ne ngepi edi nga o wipura ci edye na ni kwata?”
32 Unone Yesu wa endithsire anu ku meho ci a mone oyu na mu kwata. 33 Oya mbuyama pa ku dimuka eyi ya tendaharire ku kwenthzi, wa keyire o tutuma ko ku yapa no ku na wera ku mauru a Yesu no ku na mu tongawera shemwa yoihe eyi ya tendaharire ku kwenthzi. 34 Yesu wa mu amberire ci: “Mwanange, thsitawo thsoe thsi na ku porithsa. O thze mu thsiyaro karo o pore kwikora yoe.”
35 Yesu o ku amba eyo, kwa kumine anu awa a tundire ku nthzio thza Jairosi muendithsi o sinagoge. A mu tongwerire ci: “Mwanoe o na nyanda, kwithsa eyi o cakanithsera murongithsi karo!”
36 Ou a i yuvire eyo Yesu ka i twarire mucima, wa amberire Jairosi ci: “Wa yapa, o tawe pohuma.”
37 Wa kanithsire anu ku mu shupwera shime Peturu, Jakovo no minenthzi Johani. 38 Ou a ka kumine oko ku nthzio thzoyo muendithsi o sinagoge, wa ka wanine anu o kwa firika no ku dira makuano. 39 Wengenine no ku wepura ci: “Kwa ine kokuhe oku kufirika no makuano? Oyu mwanuke po ka a fire aa rara pohuma.”
40 Mbunga thza mu teururire, unone aye wa cithzire anu wahe ci a punene pora. Wa shimbire pohuma tata oya mwanuke no mama oya mwanuke, nerongwa iya ya keyire nenthzi, no kwingenano muya a pakire oya mwanuke. 41 Wa kwatire ku dyoko dyoya mwanuke no ku amba ci: “Talita kumi!” apopo kuninga ci: “Owe o mbuyamaana naa ku ninga ci o pinduke!” 42 Popo oya mbuyamaana wa katukire no ku tateka ku endaura. Nedi wa myaka thzo dikumi na thzidi. Popo anu a i cinjembukerire. 43 Yesu wa wa kanithsire nene ci a i tongwera munu, karo wa wa amberire ci a mu pe edya.