Kathsimo ko mbuto
4
Karo Yesu wa tatekire ku rongithsa ku nganga thzo Diviya dya Galilea. Mbunga thzothzikuru nene thza mu thzingwerire, mweyo wa yomamine mu wato. Ngou a kekariremo pa diviya ku thsia mbunga thzothzihe pa dikambo. 2 Kuma a wa rongithsire enu yoingi ko tuthsimo. Mu ku wa rongithsa kwenthzi, wa wa amberire ci:3 “Mu teerere! Njimi wa thzire ku ka kuna mbuto thzenthzi. 4 O ku kuhera mbuto, thzimweya thza wererire mu dikuñwa, enyunyi ya keyire ku na thzi dya. 5 Thzimweya mbuto thza wererire pa ndau thzo mawe apa thza kanine ku wana muve oungi. Thza menine ko wanguwangu, inene ka pekarire muve oungi. 6 Unone ou wa twire mutenya, shongo thza rerire no ku kukuta, inene ka thza henyine mithzithzi. 7 Thzimweya mbuto thza wererire mu makona, makona ou a kurire a thzi nthzongonokithsire, thza kwangire ku pateka. 8 Thzimweya mbuto thza wererire mu muve o wiro. Thza menine no ku kura, thza shemine no ku wana oheke oungi. Thzimweya makumi ahatu pa dishushu, thzimweya makumi mutanu na dyofoci, ethzi thzimweya makumi dikumi.” 9 Yesu wa ambire ci: “Oyu di no matwi o ku yuvithsa a yuve.”
Yesu aa tongonona yo tuthsimo
10 Yesu ou a thsiarire yofoci, tunganda twenthzi to dikumi na twidi nerongwa imweya, ya mu rombire ci a wa tongonwenene oto tuthsimo.
11 Wa i amberire ci: “Amwe po na mu piwa ku yuvithsithsa diano dyo Kutumina kwa Nyambi. Unone kowa nathsara, enu yoihe yaa ambiwa kukwo ko tuthsimo ci:
12 “‘Shaanga wowa a mona,
kadi akwa ku monenena,
shaanga wowa a yuva,
kadi akwa ku yuvithsithsa,
ci katere a piruke,
no ku teteriwa mirandu thzo.’”
Yesu aa tongonona kathsimo ko mukwakukuna
13 Yesu ngou a wa amberire ci: “Ngeci mwaa kwanga ku yuvithsithsa a ka kathsimo ne, ngepi nga mu yuvithsithsa tuthsimo tumweya? 14 Oya njimi po muhongi o diywi dya Nyambi. 15 Anu amweya aa cipitura eci mbuto ethzi thza wererire mu dikuñwa. Aa yuva diywi dya Nyambi, unone Satana aa keya no ku na di tundithsa mu micima thzo. 16 Amweya aa cipitura no mbuto ethzi thza wererire mu muve o mawe, aa yuva diywi dya Nyambi no ku di tambura ko thsinyanyu ko wanguwangu. 17 Unone pakuninga ci ka di no mithzithzi nawa, aa citanarithsa thsikati thsothsipu. Ekarupa nji makando yoihe i keya mukaci ko diywi dya Nyambi aa wa ko wanguwangu. 18 Amweya karo aa cipitura eci mbuto ethzi thza wererire mu makona. Aa yuva diywi dya Nyambi, 19 uno honi mukaci kecoyoka yo uno mwoyo no ku yemburuka mu rufumo no ku cikumbwethza enu imweya, diywi dyaa nthzongonoka kadi dya ku pateka. 20 Amweya aa cipitura eci mbuto thzo pa muve o wiro, aa yuva diywi no ku di tambura, aa shema no ku wana oheke oungi. Thzimweya makumi ahatu pa dishushu, thzimweya makumi mutanu na dyofoci, thzimweya makumi o dikumi, ku piterera eyi ya kuniwire.”
Kathsimo ko kambarambara
21 Yesu wa ambire ci: “Ene kenge nga o reta kambarambara mu nthzio no ku ka furumeka kafuma, nji ku ka paka mushi thzodidi? Ene nga ko ka kureka pa thsimeko thsako? 22 Mweyo, yoihe eyi i na horekiwa kenge ya ku hokoriwa, neyi i na thzindiwa kenge mba i keya mu mwethzi no ku dimukiwa kwanu wahe. 23 Yomuhe oyu di no matwi a yuve.”
24 Yesu wa wa amberire karo ci: “Mu teerere nawa no ku pakera maano kweyi mu yuva! Thsothsi thsianekethzithso mu cikwathsithsa, thsothsa ku cikwathsithsiwa ku kwenu mane kupita omu mu kwamena. 25 Yomuhe oyu di nethsi thsimweya kenge a ku vungithsiwera, unone oyu na piri kenge a ku nyangiwa noka kokapu a di nako.”
Kathsimo ko mbuto ethzi thzi kura
26 Yesu wa ambire karo ci: “Kutumina kwa Nyambi kwaa cipitura no mbuto ethzi a kuwire munu pa muve. 27 Othsiku no mutenya, o ku na rara nji o ku kenga, mbuto thzaa mena no ku kura aye kokukana ku dimuka. 28 Muve ao othsinda odiyo u na menithsanga vuroto. Thso kutanga muthsithsi, mbeci ku keye dishakara, mbeci honi nona thzi kore mu dishakara. 29 Nona yoihe thzi kora, popo njimi aa shimba cekithsi ku yanga, inene thsikati thso ku yanga thsi na kumu.”
Kathsimo ko dinanda dyotata
30 Yesu karo wa ambire ci: “No thsine nga tu ku piturithsa Kutumina kwa Nyambi? Nji kathsimo mwine nga tu cikwathsithsa ku ku tongonona? 31 Kwaa cipitura no dinanda dyotata edi di na kuniwa mu muve. Dyodiyo dinanda dyo dionye kupita nanda thzothzihe mu kaye. 32 Unone o ku di na kuniwa, dyaa kura kupita ekuniwa yoihe kukuru no kwikara no mite thzothzikuru ci shaanga enyunyi yaa na yarako mataratara mu mumvure wadyo.”
33 Yesu wa rongithsangire ko tuthsimo to ku cipitura eci otu ci anu a twethse ku yuvithsithsa. 34 Ka a ambangireno ko kukana ku cikwathsithsa tuthsimo. Unone o ku di yofoci nerongwa yenthzi, wa i tongonwenangire enu yoihe.
Yesu aa tutwarithsa dyungu
35 Edyo diyuwa runguro, Yesu wa amberire erongwa yenthzi ci: “Tu yavukerenu mu thsambwadiya thzo diviya.” 36 A thsiire mbunga thzothzihe, a yomamine mu wato na Yesu no ku hunyuna. Kwekarire mato amweya aa a yavukerire pofoci na Yesu. 37 Kwa keyire dyungu dyodikuru nene no mañithsingi a furire pa wato ku ninga ci mane shime waa fota ku rowera.
38 Yesu aye kuma a rarire ku dihuto dyo kunyima o ku na thsatera pa muthsato, erongwa ya mu pindurire no ku mu ambera ci: “Ñathsire wetu, ene ka i ku korithsire ku mucima ci twaa fa?”
39 Wa pindukire no ku kuturura dyungu no ku ambera mañithsingi ci: “O tutware! O onge!” Dyungu dya tutwarire, no ku onga kwa ongire nene. 40 Wa amberire erongwa yenthzi ci: “Ine eyi mu na yapera nene? Epo no thsino thsikati ka mu di no thsitawo?”
41 A yapire nene no ku cipaura ci: “Oyu ne edye? O ku ninga ci shaanga mupepo no mañithsingi yaa mu yuvera!”