Kathsimo ko mukwakukuna
13
Mwedyo diyuwa, Yesu wa tundire mu nthzio no ku thza ku kakuro ko diviya oku a kekarire. 2 Mukaci kongi anu awa a konganenine ku kwenthzi, wa shamukerire mu wato no ku kekaramo, anu wahe awo o kwa nemana pa dikambo. 3 Ngou a wa rongithsire enu yoingi ko tuthsimo ci:“Njimi yumweya wa thzire ku ka kuna mbuto. 4 O ku kuhera mbuto kengeyo, mbuto thzimweya thza wererire mu dikuñwa no ku diwa kwinyunyi. 5 Thzimweya thza wererire mu mawe mo kupira muve oungi. Thza menine ko wanguwangu, inene ka pekarire muve oungi. 6 Diyuwa ou dya kambekire, shongo thza rerire no ku kukuta pakuninga ci mithzithzi ka thza henyine mu muve. 7 Mbuto thzimweya thza wererire mu makona, makona ou a kurire, a nthzongonokithsire ekuna. 8 Unone mbuto thzimweya thza wererire mu muve o wiro, thza menine no ku shema nawa. Thzimweya thza wanine makumi o dikumi, thzimweya makumi mutanu na dyofoci, thzimweya makumi ahatu, kupita eyi ya kuniwire.” 9 Yesu ngou a ambire ci: “Oyu di no matwi o ku yuvithsa a yuve.”
Eyi na a kwamithseranga tuthsimo Yesu
10 Erongwa ya keyire ku kwenthzi no ku na mwipura ci: “Ine eyi o na amberanga nanu ko tuthsimo?”
11 Yesu wa i tawire ci: “Amwe po na mu piwa mathsaano o ku dimukera diano dyo Kutumina ko ku Wiru, unone awo ka na piwa kengeyo. 12 Inene oyu di nethsi thsimweya kenge a ku vungithseriwa ci ekare neyi yoingi. Unone oyu na piri thsimweya kenge a ku nyangiwa shaanga ako kokapu a di nako. 13 Eyi ngeyi ni na amberanga ku kwo ko tuthsimo pakuninga ci:
“Aa kenga, unone kadi akwa ku mona,
aa yuva, unone kadi akwa ku yuvithsithsa.
14 “Eyi yaa citombora neyi a ambire mukwakukethza Isaya kukare keyi yo ci:
“ ‘Ku yuva kenge mwa ku yuva, unone ka mwa ku yuvithsithsa.
Ku kenga kenge mwa ku kenga unone ka mwa ku monenena.
15 Inene micima thzowa anu kadi thza ku yuvithsithsa enu,
aa civuka mu matwi,
no ku cithzimenena ku meho,
ku yapithsa ci meho o katere a mone,
no matwi o ci katere a yuve,
no micima thzo ci katere thzi yuvithsithse,
ci katere a thsiurukere ku kwange ci ni wa porithse.’
16 “Unone amwe po mu di no thsiyauthzi, inene meho enu aa mona, no matwi enu aa yuva. 17 Naa mi tongwera yoshemwa ci akwakukethza owangi nanu owawawa owangi a cikumbwethzire ku mona eyi mu mona, unone ka i monine, karo a fotire ku yuva eyi mu yuva, unone ka i yuvire.
Yesu aa tongonona kathsimo ko mukwakukuna
18 “Mu teerere honi kathsimo ko mukwakukuna eyi ka amba. 19 Munu yomuhe o ku yuva diywi dyo Kutumina ko ku Wiru, unone kadi wa ku di yuvithsithsa, aa cipitura no mbuto ethzi thza wererire mu dikuñwa. O Mumango aa keya no ku na tundithsa diywi mu mucima wenthzi. 20 Mbuto thzo ku wera mu muve o mawe po munu o ku yuva diywi no ku di tambura ko thsinyanyu, 21 unone pakuninga ci ka a di no mithzithzi, aa tanara thsikati thsothsipu, dikarara nji kunyandithsiwa mukaci ko diywi dyange yoihe i keya aa wa ko wanguwangu. 22 Mbuto thzo ku wera mu makona, thzaa cipitura no munu o ku yuva diywi, unone ecoyoka yo uno mwoyo netumaura yo rufumo yaa di kwangithsa ci dikare no ima. 23 Unone mbuto thzo ku wera mu muve o wiro, thzaa cipitura no munu o ku yuva diywi no ku di yuvithsithsa. Aa pateka no ku shema, dimweya makumi o dikumi, dimweya makumi mutanu na dyofoci, dimweya makumi ahatu.”
Kathsimo ko dimbya
24 Yesu wa wa terire kathsimo kamweya ci: “Kutumina ko ku Wiru kwaa cipitura eci munu oyu wa kunine mbuto thzothziwa mu dikanda dyenthzi. 25 Unone othsiku anu wahe o kwa na rara, mukwathsithzimbo thsenthzi wa keyire no ku na kuna dimbya mu kaci ko vuroto no ku cithzera. 26 Vuroto ou wa kurire no ku rupura, no dimbya nadyo dya monaharire.
27 “Apika oya munu a keyire no ku na mu ambera ci: ‘Ñathsire wetu, ene kadi mbuto thzothziwa thziya no kunu mu dikanda dyoe? Kupi honi oku na di tundu edi dimbya?’
28 “Aye wa tawire ci: ‘Mukwathsithzimbo naa i tende eyi.’
“Apikenthzi a mwipurire ci: ‘Ene tu ka di thzuremo diya dimbya nji?’
29 “Aye wa tawire ci: ‘Dyombo, ou mu ka thzura dimbya kenge nga mu ka thzurerera no vuroto. 30 Mu i thsie i kurere pofoci, shime ku ka kuma mu thsikati thso ku cora. Wangu honi na ku ambere akwakucora ci: “Mu tange ku tundithsamo dimbya mu di ange etungu, wangu mu i tumeke. Unone mu shimbe vuroto mu u pake mu thsishete thsange.” ’ ”
Kathsimo ko dinanda dyotata
31 Wa wa terire kathsimo kamweya ci: “Kutumina ko ku Wiru kwaa cipitura eci dinanda dyotata edi a kunine munu mu dikanda. 32 Shaanga ci dionye ku nanda thzothzihe, unone o ku di na mene dyaa kura kupita emena yoihe yo mu dikanda. Dyaa piruka thsitondo ku ninga ci mane nenyunyi yaa keya ku na kwamena mataratara ku mite thzathso.”
Kathsimo ko mamene
33 Wa wa terire karo kathsimo kamweya ci: “Kutumina ko ku Wiru kwaa cipitura eci mamene aa a na pakerera mbuyama noshunga oungi ku ruva dikende, no ku di haheka ci di tunduruke.”
Yesu kuma a kwamithsangire tuthsimo
34 Yesu kuma a ambire eyi yoihe ku mbunga mu tuthsimo, kwithsa eyi a ambire ko kupira ku cikwathsithsa kathsimo. 35 Kuma a tendire kengeyo ci i citombore neyi a ambire mukwakukethza yo kuninga ci:
“Kenge na ku cikwathsithsa tuthsimo o ku ni ambano.
Kenge na ku wa ambera enu eyi ya horekiwa ku tunda apa kombiwerire kaye.”
Ku tongonona kathsimo ko vuroto no dimbya
36 Yesu ngou a thsiire mbunga no kwingena mu nthzio. Erongwa yenthzi ya keyire ku kwenthzi no ku mu ambera ci: “O tu tongonwene yo kathsimo ko dimbya mu dikanda.”
37 Aye wa i tawire ci: “Mukwa ku kuna mbuto thzothziwa po Mwana Munu. 38 Dikanda po kaye, mbuto thzothziwa po thzaemanena ana o mu Kutumina, dimbya po ana oyu o Mumango, 39 mukwathsithzimbo oyu naa kunu dimbya po shamaonga. Dicora po kupwa ko kaye, akwakucora po tungeru.
40 “Eci dimbya edi di thzuriwa no ku tumekiwa mu mudiro, dyo kwa kwikara pa kupwa ko kaye. 41 Mwana Munu kenge a ku tuma tungeru twenthzi, ku na tundithsa mu Kutumina kwenthzi enu yoihe eyi i retera anu ku tenda thsivi, nakwa ku shwahura murao wa Nyambi wahe. 42 Tungeru kenge twa ku konthzera anu owamango mu mudiro mu dirungu, omu a ku direra no ku cihuma nwaeo. 43 Unone owawawa kenge a ku vyakima eci diyuwa mu Kutumina kwa Tata. Oyu di no matwi a yuve.
Rufumo ro ku horekiwa
44 “Kutumina ko ku Wiru kwaa cipitura eci rufumo ro ku horekiwa mu dikanda. Yoihe a ru wana munu, naye karo aa ru horeka. Ko thsinyanyu aa thza no ku ka urithsa yoihe eyi a di nayo, no ku na ura edyo dikanda.
45 “Karo, Kutumina ko ku Wiru kwaa cipitura eci mukwamiuro oyu fota mawe oawa oakuru mu thsivaka.a 46 Yoihe a wana diwe dyo kutura nene, aa thza no ku ka urithsa eyi a di nayo yoihe no ku na di ura.
Kathsimo ko dituwa
47 “Karo, Kutumina ko ku Wiru kwaa cipitura eci dituwa dyo ku kuhera mu diviya no ku kundura ethsi thzo mishovoshovo. 48 O ku di na yara ethsi, athsinda aa di kokera pa dikambo. Aekara pashi no ku hangura ethsi, thzothziwa aa thzi paka mu mayongo, thzothzimango aa thzi konthza. 49 Dyo ya kwikara no pa kupwa ko kaye. Tungeru kenge twa ku na tepa owamango kowa owawawa. 50 Owamango no ku wa konthzera mu mudiro mu dirungu, omu a ku direra no ku cihuma nwaeo.”
51 Yesu wepurire ci: “Ene mu na yuvithsithsa eyi enu yoihe?”
Awo a tawire ci: “Ii, Fumu, tu na yuvithsithsa.”
52 Ngou a wa amberire ci: “Mweyo, murongithsi o murao yomuhe o ku piruka thsirongwa thso Kutumina ko ku Wiru, aa cipitura eci thsinda thsa nthzio o ku reta enu yoipe neyi yoikurukuru ku ka tundithsa mu thsinyungero thsenthzi.”
Yesu aa kaniwa mu Nazareta
53 Yesu ou a manine ku wa tera tuthsimo, wa tundire muya mu ndau. 54 Wa hukire mu mbongi omu a kurerire, wa tatekire ku rongithsa anu mu sinagoge thzo. Anu a komokire nene, no ku cipura ci: “Oyu munu ne aa wana kupi onyanyami o ku rongithsa, nokoro o ku kwama ekomokithsa?” 55 “Ene kadi yodiyo oyu mwana muyuwi? Mama wenthzi po kadi yodiyo Madiya? Karo aminenthzi po kadi wodiyo awa a Jakovo, Josefa, Simoni na Juda? 56 Andumbuthzenthzi wahe po kadi wodiyo awa tu na tunguno? Kupi oku na a i wana yoihe eyi?” 57 A mu anthziperire no ku mu kana.
Unone Yesu wa wa amberire ci: “Mukwakukethza po aa remekiwa kokuhe, shime mu ditunga dyenthzi no mu mwanda wenthzi modiyo a kana ku mu remeka.”
58 Mweyo, ka a kwaminemo ekomokithsa yoingi, inene ka tawire ku kwenthzi.