Yesu aa porithsa munu o kuara
9
Yesu wa yomamine mu wato, ku yavuka ku thza mu mbongi omu a kurerire. 2 Anu amweya a retire mukwerume o kuara o ku na rara podidi. Yesu ou a monine thsitawo thso, wa amberire oya mukwerume o kuara ci: “O tanare mucima mwanange, evi yoe i na teteriwa.”3 Arongithsi amweya o murao a anekerire mu micima thzo ci: “Oyu munu aa yengwa!”
4 Yesu wa dimukire eanekera yo, ngou a wa amberire ci: “Ine eyi mu anekerera yoimango mu micima thzenu? 5 Thsothsoto ne thsipi no ku amba ci: ‘Evi yoe i na teteriwa,’ nji ku amba ci: ‘O katuke o ende’? 6 Naa mi monithsa honi ci Mwana Munu po o di nokoro mu kaye o ku tetera evi.” Ngou a amberire oyo mukwakuara ci: “O katuke, o shimbe kanaha koe, o thze ku diumbo.” 7 Oyo mukwerume wa katukire no ku thza ku diumbo. 8 Mbunga ou thza monine eyi, thza yapire nene no ku shangara Nyambi pa ku pa okoro o kengeyo kwanu.
Yesu aethsa Mateu
9 Yesu o ku tunda muya mu ndau wa monine muterithsi o dithzina dyo Mateu o ku nekara mu ofithsi thzenthzi. Wa mu amberire ci: “O ni shupwere!” Popo Mateu wa katukire no ku mu shupwera.
10 Yesu o ku dya murarero mu nthzio thza Mateu, aterithsi owangi nanu wevi a dire nenthzi nerongwa yenthzi. 11 Afarithsi ou a i monine epurire erongwa yenthzi ci: “Murongithsi wenu ne ine eyi a dyera naterithsi nanu wevi?”
12 Yesu ou a i yuvire, wa ambire ci: “O kukana ku kora tumba foto mukwakupanga, shime anu o ku kora wodiyo o ku fota mukwakupanga. 13 Unone mu thze mu ka fotithsithse eyi a amba aa maywi o kuninga ci: ‘Naa fota ñeke kadi eyambero yeyama.’ Inene ka na ni keyera ku nethsa owawawa, unone naa keyera anu wevi.”
Ngudi mukaci ko ku cikanga no nthzara
14 Erongwa ya Johani yepurire Yesu ci: “Erongwa yoe ne ine eyi i na kananga ku cikanganga no nthzara eci edi tu na tendanga atwe nAfarithsi?”
15 Yesu wa i tawire ci: “Ene ambusha mukwakuyeka ne kenge nga ekara mu mathsiwa o kwa di na mukwakuyeka nji? Dyombo! Unone thsikati thsaa keya mukwakuyeka ou a ku tundithsiwa mu kaciko, mbeci a ku cikange no nthzara.
16 “Kwithsa munu o ku fumena thsikamba thso thsito thsothsipe pa thsito thsothsikurukuru, inene thsikamba thso thsito thsothsipe kenge thsi cikokera no ku yatukapo no ku kwama dicumbwa dyodikuru kupita pa kutanga. 17 Kwithsa munu o ku rongera waine omupe mu tuhupa totukurukuru. Ngeci ayepo tenda kengeyo, tuhupa totukurukuru kenge tu yatuka. Waine kenge a mwaara no tuhupa kenge twipa. Waine omupe a roera ku rongeriwa mu tuhupa totupe. Mweyo, momu widi wayo kenge ikara nawa.”
Mwana Jairosi o mbuyamaana no mbuyama o kukora
18 Yesu o ku amba eyi kukwo, muendithsi o Majuda wa keyire no ku na tongama ku manwi no ku amba ci: “Mwanange o mbuyamaana ñanyiñanyi a na fu. Unone o keye o ka mu kambeke dyoko dyoe karo kenge a yoya.” 19 Yesu wa katukire nerongwa yenthzi no ku thza nenthzi.
20 Popo mbuyama oyu wa korire diropa myaka thzo dikumi na thzidi wa keyire munyima thza Yesu. Wa kwatire ku minganja thzo thsikoveyo thsa Yesu. 21 Kuma a anekerire ci: “Nga o ni kwate shaanga ku thsikoveyo thsenthzi kenge nga ni pora.”
22 Yesu wa pirukire, ou a mu monine, wa mu amberire ci: “O tanare mucima mwanange, thsitawo thsoe thsi na ku yoyithsa.” Popo oya mbuyama wa porire.
23 Yesu ou a ka kumine ku nthzio thzoyo muendithsi, wa ka wanine anu o kwemba membo o thsidiro no mbunga o ku thzi firika. 24 Ngou a ambire ci: “Mu pune pora, oyu mbuyamaana ka a fire aa rara pohuma.” Unone awo a mu teururire. 25 Munyima thzo ku punithsera mbunga pora, Yesu wengenine mu nthzio no ku kwata oyo mbuyamaana ku dyoko ayepo pinduka. 26 Muthzimbu weyo wa yukire nene mo diya ditunga dyodihe.
Yesu aa porithsa tupuputwa no shiamba
27 Yesu o ku tunda muya mu ndau, akwerume aidi o tupuputwa a mu shupwerire o kwa ka thza o kumba ci: “Mwana Davida, o tu fere ñeke!”
28 Yesu ou engenine mu nthzio, tupuputwa twa keyire ku kwenthzi. Ngou a twipurire ci: “Ene mwaa tawa ci kenge nga ni twethsa ku tenda kengeyo nji?”
Oto tupuputwa twa tawire ci: “Ii, Fumu!”
29 Yesu ngou a wa kwatire pa meho no ku amba ci: “Kokuthza ko thsitawo thsenu, i dikare kengeyo.” 30 Popo meho o a thsikukire. Yesu wa wa nomenithsire nene ci: “Katere mu i tongwere munu eyi!” 31 Unone awo a thzire o yukithsa ya Yesu mu ditunga dyodihe.
32 Popa a thzire awo, anu a retire kwa Yesu munu o muthzimu, ou wa mu kwangithsire ku amba. 33 Mupepo oumango ou wa mu tundire, shiamba wa twethsire ku amba. Anu a komokire nene no ku amba ci: “Twa diyerire ku mona enu yo kenge ku i tendahara mu Isiraele!”
34 Unone Afarithsi a ambire ci: “Ñathsire o mathzimu oyu mu pa okoro o ku cithza mathzimu.”
Yesu aa fera anu ñeke
35 Diyuwa dimweya Yesu wa thzire o pita mu mambongi oahe no mu maumbo. Wa thzire o rongithsa mu masinagoge no ku honga yo Muthzimbu Ouwa o Kutumina ko ku Wiru, no ku porithsa ekora yo mishovoshovo yoihe no mawethzi. 36 Ou a monine mbunga, wa thzi yuverire ñekeñeke, inene kuma thza shupekire no ku topwera eci mangu o kupira mudithsani. 37 Ngou a amberire erongwa yenthzi ci: “Dicora adyo po dikuru shemwa, unone akwakucora awo apu. 38 Mweyo, mu rombere kwa Fumu o dicora ci a tume akwakucora owangi mu dicora dyenthzi.”