Yesu aa porithsa o ku ara
2
Munyima thzo mayuwa oapu, Yesu wa hukire ku Kapenauma, anu a yuvire ci ku nthzio a di. 2 A ka ciwanawanineko kongi, nthzio thza yarire ku ninga ci mane ka kwekarire karo dipenga shaanga pora thzo thsero. Yesu ngou a wa rongithsire diywi dya Nyambi. 3 Kwa keyire akwerume ane awa mu reterire munu o ku ara oyu a tengire pa kanaha. 4 Mukaci kongi anu, a kwangire dyo ku mu kumithsa kwa Yesu. Ngou a thzinine pa thsituwa no ku tuyura dicumbwa ku twarikethza apa ekarire Yesu. Ou a manine ku tuyura, a shurumweninemo oyo mukwerume o kuara o ku na rara pa kanaha. 5 Yesu ou a monine thsitawo thso, wa amberire oyo mukwerume o kuara ci: “Mwanange, evi yoe i na teteriwa.” 6 Unone arongithsi amweya o murao awa ekariremo a anekerire mu micima ci: 7 “Ine eyi a ambera kenge oyu? Aa yengwa! Edye o ku twethsa ku tetera evi, ngeci kadi shime Nyambi pohuma?”
8 Ko wanguwangu Yesu wa dimukire mu mucima wenthzi eanekera yo, ngou a wa amberire ci: “Ine eyi mu anekerera yo kengeyo mu micima thzenu?” 9 “Thsothsioto ne thsipi, ku ambera oyu mukwerume o kuara ci: ‘Evi yoe i na teteriwa,’ nji ku amba ci: ‘O katuke, o shimbe kanaha koe, o ende?’ 10 Pano honi kenge ni mi monithsa ci Mwana Munu o di nokoro o ku tetera evi mu kaye!” Wa amberire oyo mukwerume o kuara ci: 11 “O katuke, o shimbe kanaha koe o thze ku diumbo!”
12 Popo wa katukire no ku shimba kanaha kenthzi no ku thza, anu wahe o kwa na tanekera. Anu wahe a komokire nene no ku shangara Nyambi ci: “Twa diyerire ku mona enu yo kenge!”
Yesu aethsa Livi
13 Yesu wa hukire karo ku kakuro ka Galilea. Anu owangi a keyire ku kwenthzi, ngou a tatekire ku wa rongithsa. 14 Mu dikuñwa wa monine Livi mwana Alufea o ku nekara mu ofithsi thzo mutero. Wa mu amberire ci: “O ni shupwere!” Livi wa katukire no ku mu shupwera.
15 Munyima thzeyo, Yesu wa thzire ku nthzio thza Livi. O ku nekara ku tafure mu nthzio, kwekarire aterithsi owangi nanu wevi awa a na dire nenthzi nerongwa yenthzi, inene anu owangi a mu shupwerire. 16 Arongithsi amweya o murao o mu thsikwata thsAfarithsi ou a monine Yesu o ku dya nanu wevi naterithsi, epurire erongwa yenthzi ci: “Ine eyi a dyera naterithsi nanu wevi?”
17 Yesu ou a yuvire eyi, wa wa amberire ci: “Awa a di nawa mwirama tumba a foto mukwakupanga, unone shime awa a kora.” Ka na ni keyera ku nethsa owawawa, unone ku nethsa anu wevi.
Anu aepura Yesu yo ku cikanga no nthzara
18 Diyuwa dimweya, erongwa ya Johani Mukwakukorovethza nAfarithsi o kwa cikanga no nthzara, anu amweya a keyire ku nepura Yesu ci: “Ine erongwa ya Johani mukwakukorovethza neyi yAfarithsi eyi i na cikangeranga no nthzara, unone erongwa yoe ayo ka i cikangangire no nthzara?”
19 Yesu wa wa tawire ci: “Ngepi nga a cikanga no nthzara awa a na raiwa, mukwakuyeka o ku dino? Dyombo! Tumba a tende kengeyo aye oku dino. 20 Uno honi thsikati kenge thsa ku keya mukwakuyeka ou a ku tundithsiwa kukwo. Mwedyo diyuwa honi kenge a ku cikanga no nthzara.
21 “Kwithsa munu oyu nga fumena thsikamba thsothsipe pa thsikoveyo thsothsikurukuru. Ngeci ayepo tenda kengeyo, thsikamba thsothsipe kenge thsi yatura thsikoveyo thsothsikurukuru, dicumbwa kenge dikara dyodikuru kupita pa kutanga. 22 Karo kwithsa munu o ku rongera waine omupe mu tuhupa totukurukuru. Ngeci ayepo tenda kengeyo, waine omupe kenge a yatura tuhupa, mweyo, tuhupa no waine kenge ipa yoihe. Dyombo, waine omupe aa roera ku rongeriwa mu tuhupa totupe.”
Yesu po Fumu o diyuwa dyo Savata
23 Diyuwa dimweya dyo Savata Yesu wa pitire mu makanda. Mu dikuñwa, erongwa yenthzi ya tatekire ku cora mashakara o mahangu. 24 Afarithsi a mu amberire ci: “O mone, ine eyi i tendera eyi i na kana ku tawethziwa mu diyuwa dyo Savata?”
25 Yesu wa wa tawire ci: “Ene ka mwa tara eyi a tendire Davida diyuwa dimweya ou a fire nthzara nowa a endire nenthzi?” 26 Wengenine mu nthzio thza Nyambi nowa a endire nenthzi, no ku ka dya ku makende aa a tupwerire Nyambi, aa a tawethziwire ku diwa pohuma ku mapurisita. Eyi kuma ya tendaharire Abiatare o ku di mupurisita shokuru.