Yesu naminenthzi
7
Munyima thzeyo, Yesu wa thzire o pitapita mu Galilea. Ka a fotire kwikara mu Judea, inene Majuda kuma a fotire ku mwipaa. 2 Diyuwa dyo thsidika thso Majuda ethsi thsi nethsiwa Thsidika thsErombo o ku thsi di po pepi no ku tendahara, 3 amina Yesu a mu amberire ci: “O tunde muno o thze ku Judea ci erongwa yoe nayo i ka mone ekwama eyi o kwama. 4 Inene kwithsa o ku horeka ekwama yenthzi ngeci aye o ku fota ci nga na yuku. Edi i di ci waa twethsa ku kwama enu yo kengeyo, o hokoke kwanu wahe ci a ku dimuke mu kaye.” 5 Inene shaanga aminenthzi ka tawire ku kwenthzi.6 Yesu wa wa amberire ci: “Thsikati thsange thsi shime ku kuma. Uno honi amwe thsikati thsothsihe thsi di nawa. 7 Kaye tumba ka thzimbi amwe, unone aa thzimba ame mukaci ko ku ninga ci naa pa ombangi ci etenda yo imango. 8 Amwe mu thze ku thsidika. Ame ka ni thziko oku ku thsidika, inene thsikati thsange thsi shime ku kuma.” 9 Yesu ou a manine ku amba eyi, wa thsiarire mu Galilea.
Yesu aa thza ku thsidika
10 Amina Yesu ou a thzire oko ku thsidika, Yesu naye wa thzireko, kadi ko ku cimonaharithsa unone ku mukunda. 11 Majuda kuma a fotafotire Yesu pa thsidika no ku thza o wipaura ci: “Kupi a di?” 12 Kwekarire kuyaayaaya kokungi mu mbunga keyi yenthzi. Amweya ci: “Oyu po munu o muwawa.” Awa ci: “Ya kwithsa, aa pambanithsa anu oyu.” 13 Unone kwithsa oyu wa ambire yenthzi ko ku cimonaharithsa mukaci ko ku yapa Majuda.
14 Thsidika ou thsa kumine pa kaci, Yesu wa kambamine ku thza ku Tembere no ku ka tateka ku rongithsa anu. 15 Majuda a komokire no ku amba ci: “Oyu munu ne aa i dimuka ngepi eyi, inene ka a cirongithsa?”
16 Yesu ngou a wa tawire ci: “Erongithsa yange po kadi yange, unone yaa tunda koyu naa ni tumu. 17 Munu yomuhe o ku fota ku kwama eshima ya Nyambi, kenge a ku dimuka ngeci erongithsa yange yaa tunda kwa Nyambi nji naa i kwama kokoro wange. 18 Munu o ku amba kokoro wenthzi thsinda po aa fota ku shangariwa, uno honi oyu fota ci ku shangariwe oyu naa mu tumu aye wa ku amba yoshemwa karo tumba angera. 19 Ene Mushe kadi kuma a mi pire murao? Uno honi kwithsa shaanga yofoci ku kwenu oyu na u hengeka. Ine eyi mu fotera ku nipaa?”
20 Mbunga thza tawire ci: “O di no muthzimu! Edye na foto ku kwipaa?”
21 Yesu wa wa tawire ci: “Na ni tende thsikomokithsa thsofoci dyo Savata, karo shime mwaa i komoka mwahe! 22 Mushe kuma a mi raererire ku twaranga anenu wakwerumeana ku mukanda (shaanga ikare ci kadi yodiyo wa i tatekire, unone akwathsañuruenu wodiyo a i tatekire). Mane mwaa twaranga anenu wakwerumeana ku mukanda no mu diyuwa dyo Savata. 23 Ngeci amwe mwaa twaranga anenu wakwerumeana ku mukanda mu diyuwa dyo Savata ci murao wa Mushe wa coriwa, ine honi eyi mu ni anthzipera uno na ni porithsa munu erama yenthzi yoihe mu diyuwa dyo Savata? 24 Mwa ratura ko mumonaharero, unone mu rature komu ku na roera.”
Ene Yesu ne yodiyo Mesiya nji?
25 Anu amweya o mu Yerusalema a ambire ci: “Ene kadi yodiyo oyu a fota kwipaa oyu? 26 Mu na mono, oyu pano a amba thsitonwameho ku mbunga, unone kwithsa eyi a na mu ambera. Ene awa aendithsi etu ne aa tawa shemwa ci yodiyo Mesiya nji? 27 Uno honi tu na dimuka oku a tunda oyu munu, unone Mesiya aye ou a ku keya, kwithsa oyu wa ku dimuka oku a tunda.”
28 Yesu o ku rongithsa kengeyo mu Tembere, wa tanarithsire ku diywi ku amba ci: “Ii, mu na ni dimuka nawa, karo mu na dimuka noku na tunda. Ka na ni keye kokoro wange nothsinda, unone oyu naa ni tumu po wa shemwa karo ka mu mu dimuka. 29 Unone ame ni na mu dimuka inene naa tunda ku kwenthzi, karo yodiyo naa ni tumu.” 30 Ngou a fotire ku mu kwata, unone kwithsa oyu wa mu pakire dyoko, inene thsikati thsenthzi ka thsa kumine.
31 Anu owangi a tawire ku kwenthzi. A ambire ci: “Shaanga ou a ku keya Mesiya ne kenge a ku na kwama emonithso yoingi kupita eyi naa kwama oyu munu nji?”
32 Afarithsi a yuvire mbunga o ku thzi yaaya eyi enu keyi ya Yesu. Akuru o mapurisita nAfarithsi ngou a tumine akwakunyunga Tembere ku ka kwata Yesu. 33 Yesu ngou a ambire ci: “Ni shime tango kwikara nenu thsikati thsothsipu, mbeci honi na ku thze koyu naa ni tumu. 34 Kenge mwa ku ni fotafota, unone ka mwa ku ni wana, inene oku na ku thza tumba mu twethsa ku kumako.”
35 Majuda a cipurire ci: “Kupi oku a fota ku thza oyu munu oku twa ku kana ku mu wana? Ene aa fota ku thza kwanuetu awa na panthzaanena ku Magerike ci a ka rongithse no Magerike nji? 36 Aa amba ine pa ku amba ci: ‘Kenge mwa ku ni fotafota, unone ka mwa ku ni wana,’ karo ci ‘Oku na ku thza tumba mu twethsa ku kumako!’ ”
Meyu o mwoyo
37 Mu diyuwa dyo mamaneneno o thsidika, adyo dyoshokuru nene, Yesu wemanine no ku amba ko ku tanarithsa ku diywi ci: “Yomuhe oyu na fu dinotwa a keye ku kwange naa nwe. 38 Yomuhe o ku tawa ku kwange, mu mucima wenthzi kenge kwa ku pupa marware o meyu o ku pa mwoyo, eci edi ku na ñoriwa mu Mañoro.” 39 Apa Yesu kuma a ambire yo Mupepo Oukenu, oyu a roerire ku tambura awa tawire ku kwenthzi. Kethsiya thsikati Mupepo o ku shime ku piwa, pakuninga ci Yesu o ku shime kwingena mu kutethzima.
40 Ou a yuvire o ku amba kengeyo, amweya kukwo a ambire ci: “Yoshemwa oyu munu yodiyo Mukwakukethza oyu na tatereriwa.” 41 Amweya a ningire ci: “Yodiyo Mesiya!” Unone awa amweya ci: “Mesiya ne kenge nga a tunderera mu Galilea nji? 42 Ene Mañoro ne ka a ambire ci Mesiya kenge a ku tunderera mu mukuta wa Davida no kwerekiwera mu Betelehema, mbongi omu a tungire Davida?” 43 Mweyo, kwekarire kucitepa mu mbunga mukaci ka Yesu. 44 Amweya a fotire ku mu kwata, unone kwithsa shaanga yofoci oyu wa mu pakire dyoko.
Kukana kutawa ko Majuda
45 Akwakunyunga Tembere a hukire kwakuru o mapurisita nAfarithsi, awo a wepurire ci: “Ine eyi mu na kana ku ka mu reta?”
46 Akwakunyunga a tawire ci: “Kwithsa munu oyu wa amba eci oya munu!”
47 Afarithsi epurire ci: “Ene namwe o na ka miangera?” 48 “Ene kwaa di kwaendithsietu nji kwAfarithsi shaanga yofoci oyu na tawa ku kwenthzi? 49 Uno honi ethzi mbunga thzo kukana ku dimuka murao na thzi kutiwa!”
50 Nikodema, yumweya o mu thsikwata thso, oya wa thzire kwa Yesu rumweya, ngou a ambire ci: 51 “Ene murao wetu ne waa tu tawethza ku ratura munu ko kukana ku tanga tango ku yuva no ku fotithsithsa eyi naa tende?”