Kathsimo ko thsidika thso wenga
22
Yesu wa ambireno karo mu tuthsimo ci: 2 “Kutumina ko ku Wiru kwaa cipitura eci fumu oyu wa kwamenine mwane thsidika thso wenga. 3 Thsidika ou thsa kwanine, wa tumine apikenthzi ku ka tongwera awa a raire ku thsidika. Unone wahe a kanine ku keya!4 “Karo wa tumineko apikenthzi amweya ku ka wa tongwera ci: ‘Thsidika thsi na kwana. Mapuru no mangomwana oanunu a na kañariwa, nenu yoihe i na roithsiwa. Mu keye ku thsidika.’ 5 Unone awa a raiwire a i thsembururire, a cithzererire kwako yumweya ku dikanda dyenthzi, yumweya ku muuro wenthzi. 6 Uno honi amweya a kwatire awo apika a tumiwire, ku wa tenda dyodimango no ku wepaa.
7 “Fumu wa anthzipire nene, wa tumineko mashwarare enthzi ku kepaa waya epaanu, no ku ka tumeka mbongi thzo. 8 Ngou honi a amberire apikenthzi ci: ‘Thsidika thso wenga thsi na kwana, unone anu awa na ni raa ka roerire edyo direma. 9 Pano honi mu thze mu mikwakwa thzothzikuru, mu kethsere ku wenga yomuhe oyu mu ka wana.’ 10 Apika a thzire mu mikwakwa no ku ka konga wahe awa a ka wanine, owawawa nowa owamango no nthzio thzo wenga thza yarire thzanu.
11 “Unone fumu ou engenine ku ka kenga awa ethsire, wa monine munu oyu wa kanine ku vata evata yo thsidika. 12 Wa mwipurire ci: ‘Shadi, ngepi o nengena muno mu thsidika ko kupira evata yo thsidika?’ Unone aye ka a wanine yo ku mu tawa. 13 Fumu wa amberire anduthzienthzi ci: ‘Mu mu kwate mu mwange ku moko no ku mauru, mu mu konthzere pora mu mirema, omu a ka direra no ku cihuma nwaeo.’
14 “Inene angi awa a nethsiwa, unone apu awa a na hanguriwa.”
Yo ku tera mutero kwa Sesare
15 Afarithsi ngou a ciwanine pofoci ku ceka mangudi o ku twethsa ku kwaterapo Yesu. 16 A tumine erongwa yo nakwathsipani thsa Heroda ku kwenthzi. A ka mwipurire ci: “Murongithsi, twaa dimuka ci o di noshemwa, karo waa rongithsa dikuñwa dya Nyambi koshemwa. Ko wa wana ci oyu ne edye, inene ko wana mavwevwe. 17 O tu tongwere, waa mona ngepi, ene yaa tawethziwa ci atwe tu tere mutero kwa Sesare nji dyombo?”
18 Unone Yesu wa dimukire eanekera yo yoimango, ngou a ambire ci: “Amwe mwakwamahetaheta! Ine eyi mu ni tera pa rudimi? 19 Mu ni monithse ao madi mu na cikwathsithsanga ku tera!” A mu tambekire ao madi o muwayawaya, 20 aye wepurire ci: “Ethsi thsikupuro nedi dithzina i dipo ne yadye?”
21 A tawire ci: “Ya Sesare.”
Yesu ngou a wa amberire ci: “Mu pe Sesare ya Sesare, no Nyambi mu mu pe ya Nyambi.”
22 Ou a yuvire kengeyo a komokire nene, a mu thsiire no ku cithzera.
Yo ku pinduka kwafu
23 Mwedyo diyuwa karo Asaduki a keyire kwa Yesu, anu awa a kanine ku tawa ci ko ku di kupinduka kwafu. Epurire ci: 24 “Murongithsi, Mushe kuma a ambire ci: ‘Ngeci mukwerume aa fa ko kupira mwana, minenthzi aa roera ku yeka oya difakathzi ci erekere mukurwenthzi ana.’ 25 Uno honi kwekarire ana munu yofoci o mutanu naidi wakwerume. O kutanga wa yekire mbuyama no ku fa o ku shime ku wana nenthzi ana, ngou a thsierire minenthzi oya difakathzi. 26 Ya dikarire kengeyo koyu o muthsidi noyu o muthsihatu, mane shime ku ka kuma koyu o muthsitanu naidi. 27 Ku hura mbuyama naye wa fire. 28 O tu tongwere, oya mbuyama ne kenge mba ekara munu wadye mu diyuwa dyo kupinduka kwafu? Inene wahe akwa mutanu naidi a mu yekire.”
29 Yesu wa wa tawire ci: “Mu na yongo, inene ka mu dimukire Mañoro, no kukana ku dimuka okoro wa Nyambi. 30 Inene pa kupinduka kwafu po anu mbera ka yeke nji ku yekiwa. Kenge mbekara eci tungeru to mu wiru. 31 Uno honi, keyi yo kupinduka kwafu ne, ene ka mwa tara mu Mañoro eyi a ambire Nyambi ci: 32 ‘Yame no Nyambi wa Aburahama, Nyambi wa Isaka, no Nyambi wa Jakovo’? Eyo yaa monithsa ci Nyambi po kadi Nyambi wafu, unone Nyambi wayumi.”
33 Mbunga ou thza yuvire eyi, thza komokire erongithsa yenthzi.
Thsiraerera thsothsikuru mu thsivaka
34 Unone Afarithsi ou a yuvire ci Yesu na tutwarithsa Asaduki komu a wa tawerire, a ciwanine pofoci. 35 Yumweya ku kwo, mukwakutongonona murao o Thsijuda, wa erekire ku mu ta pa rudimi ko ku mwipura ci: 36 “Murongithsi, thsipi thsiraerera thsothsikuru nene mu thsivaka mu murao wa Mushe?” 37 Yesu wa tawire ci: “ ‘O shime Fumu Nyambi woe ko mucima woe ouhe, ko mwoyo woe ouhe, no maano oe oahe.’ 38 Ethsi po thsodiyo thsiraerera thso kutanga karo thsodiyo thsothsikuru mu thsivaka. 39 Thso muthsidi thso ku cipitura nothsi po ethsi, ‘O shime muenthzoe eci edi wa cishima othsinda.’ 40 Murao wa Mushe ouhe nerongithsa yakwakukethza yoihe i nemana mweyi eraerera idi.”
Krisitu ne Mwana edye?
41 Afarithsi ou a ciwanine pofoci, Yesu wa wepurire ci: 42 “Amwe ne mwaa anekera ngepi keyi ya Mesiya? Mwana edye?”
A mu tawire ci: “Mwana Davida.”
43 Wa wa amberire ci: “Ine honi Davida eyi ethserire Mesiya ko Mupepo Oukenu ci: ‘Fumu wange’? Inene Davida wa ambire ci:
44 “ ‘Fumu wa amberire Fumu wange ci:
“O wikare ku dyoko dyange dyo rudyo,
shime apa mbo ni pakera akwethzimbo yoe
kushi thzedyato yoe.” ’