Kathsimo kambanda o dikumi
25
“Mwethso thsikati Kutumina ko ku Wiru kenge kwa kwikara eci ambanda o dikumi awa shimbire tumbarambara two ku ka taterera mukwakuyeka. 2 O mutanu ku kwo nedi a tomba, karo o mutanu nedi a nyanyami. 3 Awo owatomba a shimbire tumbarambara, unone ka shimbire maathzi amweya ku mbadi. 4 Owanyanyami awo a shimbire tumbarambara no maathzi amweya ku mbadi mu tufuma. 5 Mukwakuyeka kuma a katapire ku keya, wahe a tatekire ku nyongera no ku thza pa turo ku rara.6 “Pa kaci kothsiku kakumbo ka yuvaharire ci: ‘Mukwakuyeka na kumu!’ ‘Mu keye mu mu shambawere!’
7 “Ambanda wahe o dikumi a pindukire no ku roaroithsa tumbarambara two. 8 Awo owatomba a amberire owanyanyami ci: ‘Mu tu peko ku maathzi enu, tumbarambara twetu koku thzimana kwato.’
9 “Unone owanyanyami awo a tawire ci: ‘Dyombo, ka i tawa, ka a tu kwana atwe namwe. Mu thze kowa na urithsa maathzi mu ka ciurere enu.’
10 “Awaya ambanda ou a thzire ku ka ura maathzi, kuno kunyima mukwakuyeka wa kumine. Ambanda waya a ciroithserire engenine na mukwakuyeka mu nthzio thzo thsidika no thsero thza patiwire.
11 “Ou kwa pitire thsikati thsothsipu, awaya ambanda amweya nawo a kumine no ku na amba ci: ‘Ñathsire wetu, ñathsire wetu! O tu yanthzurwere!’
12 “Unone mukwakuyeka wa wa tawire ci: ‘Naa mi ambera yoshemwa ka ni mi dimuka.’
13 “Mweyo, namwe mu ciroithsere, inene ka mu dimukire diyuwa nji thsikati.”
Kathsimo kangamba ahatu
14 “Karo, Kutumina kwa Nyambi kenge kwa kwikara eci mukwerume oyu wa thzire ruendo. Wethsire angambenthzi no ku wa pa ku nyunga rufumo rwenthzi. 15 O ku tanga aa mu pa tuthsaka mutanu to madi o muwayawaya o silivera, o muthsidi tuthsaka twidi, wa pire o muthsihatu kathsaka kofoci. Wa pire munu no munu komu a twethserire, aye no ku thza mu ruendo rwenthzi. 16 Oya munu wa tamburire tuthsaka mutanu, wa kwamithsire aya madi no ku wanenapo tuthsaka mutanu peuru. 17 Noya wa tamburire tuthsaka twidi, wa waneninepo tuthsaka twidi peuru. 18 Unone oya wa tamburire kathsaka kofoci, wa thzire no ku ka thsima diteke mu muve ku vumbekamo madi a ñathsire wenthzi ku a horeka.
19 “Ou kwa pitire thsikati thsothsire ñathsire o waya angamba wa ka hukire no ku na tarururano thsitoko. 20 Oya mukwerume wa tamburire tuthsaka mutanu wa henyenine kwa ñathsire wenthzi no ku mu pa tuthsaka mutanu otu a waneninepo. Wa ambire ci: ‘Ñathsire wange kuma wa ni pire tuthsaka mutanu, o mone, na ni wanenapo to mutanu peuru.’
21 “Ñathsire wenthzi wa mu tawire ci: ‘No tende nawa owe o ngamba o muwawa karo o mururami! No tende nawa penu yoipu, kenge ni ku pa ku endithsa enu yoingi. O keye na tu nyanyukere pofoci!’
22 “Noya wa tamburire tuthsaka twidi wa keyire. Wa ambire ci: ‘Ñathsire wange, kuma wa ni pire tuthsaka twidi, o mone, na ni wanenapo twidi peuru.’
23 “Ñathsire wenthzi wa mu tawire ci: ‘No tende nawa owe o ngamba o muwawa karo o mururami! No tende nawa penu yoipu, kenge ni kupa ku endithsa enu yoingi. O keye na tu nyanyukere pofoci!’
24 “Ngou kwa keyire honi oya ngamba a pire kathsaka kofoci, wa na ambire ci: ‘Ñathsire wange, na ni dimuka ci o munu o mukaru, o ku twethsa ku cora omu no kana ku kuna, no ku kongora omu no kana ku kuwa mbuto. 25 Mweyo, na ni yapa ngou na ni vumbeka madi oe mu muve. O mone, madi oe aa ni na ka a huthsa.’
26 “Ñathsire wenthzi wa mu tawire ci: ‘Owe o ngamba o mumango o muva! No dimuka ci naa coranga omu na ni kana ku kuna, no ku kongora omu na ni kana ku kuwa mbuto? 27 Ine eyi no kana ku paka aa madi mu panga, ci uno ni na ka huka nga ni na wanenapo ko peuru?
28 “‘Mu mu nyange ako kathsaka ko madi, mu ka pe oyu di notu to dikumi. 29 Inene oyu di nethsi thsimweya kenge a ku vungithsiwera ci ekare neyi yoingi, unone oyu na piri kenge a ku nyangiwa shaanga kokapu aka a di nako. 30 Oyu ngamba o mumango mu mu konthzere pora mu mirema, omu a ka direra no ku cihuma nwaeo.’
Raturo thzo mahurerero
31 “Ou mba a keya Mwana Munu mu kutethzima kwenthzi, no tungeru totuhe, kenge mba ekara pa ngunja thzo kutethzima. 32 Anu o mu matunga oahe, kenge mba kongeriwa pa rupara rwenthzi, karo kenge mba a tepa anu eci mudithsani oyu tepa mangu ku membe. 33 Kenge mba a paka mangu ku rudyo rwenthzi no membe ku rumoho rwenthzi.
34 “Fumu kenge mba a ambera honi awa o ku rudyo rwenthzi ci: ‘Mu keye, amwe naa fiyawera Tata, na mu tambure Kutumina oku mwa roithsiwerire ku tunda ku matatekero o kaye. 35 Inene ou na fire nthzara mwa ni pire edya, ou na fire dinotwa mwa ni pire meyu o ku nwa, nekarire mwenda mwa ni tamburire, 36 ou na fire wira mwa ni pire evata, ou na korire mwa ni korithsire, ou nekarire mu kamenga mwa ni thzingurire.’
37 “Owawawa kenge mba mwipura ci: ‘Fumu, diyuwa dipi twa ku monine o ku na fu nthzara atwepo tu ku pa edya, nji oku na fu dinotwa atwepo tu ku pa meyu o ku nwa? 38 Kupi twa ku monine o ku di mwenda atwepo tu ku tambura, nji o ku di mu wira atwepo tu ku pa evata. 39 Diyuwa dipi twa ku monine o ku kora nji o ku di mu kamenga atwepo tu ka ku thzingura?’
40 “Fumu kenge mba a wa tawa ci: ‘Naa mi tongwera yoshemwa ci yoihe eyi na mu tende koyu omuonye kowa aenthzange owaonye yame na mu i tende.’
41 “Uno honi kenge mba a ambera o ku rumoho rwenthzi ci: ‘Mu tunde ku kwange amwe mwakwa thsikuto, mu thze mu mudiro o diyere ou wa roithsiwerire shamaonga no tungeru twenthzi! 42 Inene ou na fire nthzara ka mwa ni pire edya, ou na fire dinotwa ka mwa ni pire meyu o ku nwa, 43 ou nekarire mwenda ka mwa ni tamburire, ou nekarire mu wira ka mwa ni pire evata, ou na korire no kwikara mu kamenga ka mwa ni thzingurire.’
44 “Nawo kenge mba mu tawa ci: ‘Fumu, diyuwa dipi twa ku monine o ku na fu nthzara, o ku na fu dinotwa nji o ku di mwenda nji o ku di mu wira nji o ku kora nji kwikara mu kamenga, unone atwepo tu kwanga ku ku kwathsa?’
45 “Aye kenge mba a wa tawa ci: ‘Naa mi tongwera yoshemwa ci munu yomuhe oyu mwa kanine ku kwathsa kowa owaonye, yame mwa kanine ku kwathsa.’
46 “Awo kenge mba thza mu humbithso thzo diyere, unone owawawa awo kenge mba thza mu mwoyo o diyere.”