Mwa ratura aenthzenu
(Luk 6.37-38, 41-42)
7
“Mwa ratura ci namwe katere mwa ku raturiwe. 2 Inene dyodi mu ratura amweya namwe dyo mwa ku raturiwa. Thsothsi thsianekethzithso mu cikwathsithsa, thsothsa ku cikwathsithsiwa ku kwenu.3 “Ngepi edi nga o mona kahonyi aka ka di mu dithziho dya muenthzoe, owe o ku di no thsithsini mu dithziho dyoe? 4 Ngepi edi nga o ambera muenthzoe ci: ‘O keye ni ku toore kahonyi aka ka di mu dithziho dyoe, owe o ku di no thsithsini mu dithziho dyoe?’ 5 Owe o mukwamahetaheta, o tange tango ku tundithsa thsithsini ethsi thsi di mu dithziho dyoe, mbeci o mone nawa no ku tundithsa kahonyi aka ka di mu dithziho dya muenthzoe.
6 “Mwa pa mbwa enu yoikenu, inene kenge thzi mi piruka no ku mi papaura. Karo mwa konthzera nguru enu yenu yoikuru mu thsivaka,a inene kenge thzi i dyatadyata pohuma.
Mu rombe kenge mwa ku piwa
7 “Mu rombe kenge mwa ku piwa, mu fote kenge mwa ku wana, mu ngongomone kenge mwa ku yanthzurweriwera. 8 Inene munu yomuhe o ku romba aa piwa, o ku fota aa wana, karo kwaa yanthzurweriwa oyu na ngongomona.
9 “Ene kwaa di ku kwenu oyu nga pa mwane diwe o ku na rombo dikende? 10 Nji ku mu pa diyoka o ku na rombo ethsi? Dyombo! 11 Ngeci honi amwe mwanu owamango mwaa dimuka ku pa anenu enu yoiwa, aye Tata wenu o ku wiru ne ya ku kuma kupi enu yoiwa eyi a ku pa awa a na rombo ku kwenthzi! 12 Yoihe eyi mu na foto ku mi kwama anu amweya, namwe mu wa kwame kengeyo, inene no murao wa Mushe nakwakukethza dyo i na amba.
Thsero thzo kuciomba
13 “Mwingenene mu thsero thzo kuciomba, inene thsero thzo ku twara ku kunongithsiwa po thza ku vapuka, no dikuñwa edi di thzako dya pururu, karo nowa a na endangamo angi. 14 Unone thsero thzo ku twara ku mwoyo po thza kuciomba, no dikuñwa edi di thzako dikaru, owapu pohuma o ku di wana.
Thsitondo no ima yathso
15 “Mu mamere akwakukethza o mbango, aa monahara eci mangu o kwa keya ku kwenu, unone mu kaciko po winthzi shemwa o ku kwavura. 16 Kenge mwa ku wa dimuka ketenda yo. Ene kenge nga mu koyora ñuyu ku musheunga, nji ku teta thsikocera thso ñangare ku wondo? 17 Thsitondo thsothsiwa thsa kwima ima yoiwa, karo thsitondo thsothsimango thsa kwima ima yoimango. 18 Thsitondo thsothsiwa tumba thsimi ima yoimango, karo thsitondo thsothsimango tumba thsimi ima yoiwa. 19 Thsitondo thsothsihe thso kukana kwima ima yoiwa, thsaa henduriwa no ku konthzeriwa mu mudiro. 20 Mweyo honi, kenge mwa ku dimuka akwakukethza o mbango ketenda yo.
Erongwa shemwa neyi yo mbango
21 “Kadi cingwa anu wahe awa a na nithsanga ci: ‘Fumu, Fumu,’ kenge a ku kengena mu Kutumina ko ku Wiru, dyombo! Unone shime awa a tenda eshima ya Tata o ku wiru. 22 Mu diyuwa dyo raturo owangi kenge a ku ni ambera ci: ‘Fumu, Fumu, shime twa okethza mu dithzina dyoe no ku cithza mathzimu mu dithzina dyoe, no ku kwama ekomokithsa yoingi!’ 23 Unone ame kenge na ku wa ambera ci: ‘Na diyerire ku mi dimuka amwe, mu tunde ku kwange amwe mwakwa ku shwahura murao wa Nyambi!’
Kathsimo kakwakuumba
24 “Mweyo, yomuhe o ku keya ku kwange no ku yuva aa maywi ange no ku a hengeka, aa cipitura eci munu o munyanyami oyu wa umberire nthzio thzenthzi pa diwe. 25 Mvura wa rokire, meyu o ku pupa a keyire, no dipepo dya ngundungire ku tamba apo pa nthzio, unone ka thza umburukire pakuninga ci kuma a thzi shisherire pa diwe. 26 Unone munu yomuhe o ku yuva maywi ange no kukana ku a hengeka, aa cipitura eci munu o mutomba oyu wa umberire nthzio thzenthzi pa diveevee. 27 Mvura wa rokire, meyu o ku pupa a keyire, no dipepo dya ngundungire. Yoihe eyo ya tambirepo no ku umburura nthzio. Kuumburuka kwathzo kwepire nene ku piterera.”
Okoro wa Yesu