Erongithsa mukaci ko ku kwathsa ahepwe
6
“Mu mamere ci mwa kwamena ekwama yenu yowawa pa meho anu ci a mi shangarerepo. Kamona amwepo mu tenda kengeyo, ka mwa ku wana muyambo kwa Tata wenu o ku wiru.2 “Mweyo, yoihe o kwathsa oyu na piri, wa i monithsa kwanu eci edi a na tendanga akwamahetaheta mu masinagoge no mu makuñwa. Eyo po aa i tenderanga ci anu a wa shangare. Naa mi tongwera yoshemwa ci na wana kare muyambo wo. 3 Unone owe yoihe o kwathsa oyu na piri, o mu pere ku mukunda ci shaanga dyoko dyoe dyo rumoho dya dimuka eyi di tenda dyo rudyo, 4 ci kupa koe kwikare ko ku mukunda. Tata woe oyu na mono yo ku mukunda kenge a ku ku pa muyambo.
Erongithsa mukaci ko ku rombera
5 “Yoihe mu rombera, mwa tendanga eci edi a na tendanga akwamahetaheta awa a na shimanga kwimana mu masinagoge no pa mahanganthzira ci a wa mone anu wahe. Naa mi tongwera yoshemwa ci na wana kare muyambo wo. 6 Uno honi owe yoihe o rombera, o thze mu kapingwethzi koe, o yanthzere thsero no ku rombera kwa Tata woe ku mukunda. Mweyo, Tata woe oyu na mono eyi o tenda ku mukunda kenge a ku ku pa muyambo.” 7 O ku mu rombera ka mu roerire ku torombosha eci edi a na tendanga mahedeni awa a na anekeranga ci Nyambi aa twethsa ku wa yuva ko ku amba maywi oangi nene. 8 Mwa cipiturano, inene Tata wenu o na dimuka eyi mu na foto o ku mu shime no ku i romba.
9 “Mweyo mu rombere kenge ci:
“ ‘Tata wetu oyu di mu wiru,
dithzina dyoe di hengekiwe dyodikenu,
10 Kutumina koe kwiye,
eshima yoe i tendiwe pano pa kaye,
eci edi i di mu wiru.
11 O tu pe rero edya yetu yo diyuwa no diyuwa.
12 O tu tetere mirandu thzetu,
eci edi tu na teteranga natwe awa a na twipithseranga.
13 Karo wa tu twara mwitumaura,
unone o tu amwene koyu o Mumango. [Inene kutumina po koe, nokoro, no kutethzima, diyere na diyere. Ameni.’]a
14 “Inene kamona mu tetera amweya mirandu thzo, no Tata wenu o ku wiru kenge a ku mi tetera namwe. 15 Unone ngeci kadi mwakwa ku tetera amweya mirandu thzo, no Tata wenu ka a ku mi tetera namwe mirandu thzenu.
Erongithsa mukaci ko kucikanga no nthzara
16 “Yoihe mu cikanga no nthzara, ka mu roerire ku monahara ku fwinyutuka mu rupara eci edi a na tendanga akwamahetaheta. Inene a fwinyutukanga mu rupara ci anu wahe a dimuke ci aa cikanga no nthzara. Naa mi tongwera yoshemwa ci na wana kare muyambo wo. 17 Unone owe ngeci waa cikanga no nthzara, o cihupe ku rupara no ku shakura huki thzoe, 18 o tende kengeyo ci anu katere a dimuke ci waa cikanga no nthzara. I moniwe pohuma kwa Tata woe shimoniwa, aye o ku mona enu yoihe yo ku mukunda kenge a ku ku pa muyambo.
Rufumo ro ku wiru
19 “Mwa cipakera rufumo pano pashi, apa pa di menje no ñarawe, apa pa di ethzi o ku twethsa ku tuva manthzio enu no kwithza. 20 Unone mu cipakere rufumo ku wiru, ko kupira menje no ñarawe yo ku rwipithsa, omu ku na piri nethzi o ku twethsa ku tuva manthzio no kwithza. 21 Inene oku ru di rufumo rwoe no mucima woe kodiyo u di.
Mwethzi werama
22 “Dithziho po odiyo mumunyi werama. Ngeci dithziho dyoe dyaa mona nawa, erama yoe yoihe yaekara mu mwethzi. 23 Unone ngeci meho oe ka a mona nawa, erama yoe yoihe yaekara mu mirema. Ngeci mwethzi ou u di ku koe awopo wikara mirema, ethzo mirema kenge thza kwikara thzothzikuru nene.
Mwa cithzekera
24 “Kwithsa munu o ku twethsa ku kwamena añathsire aidi. Inene kenge a thzimbapo yofoci no ku shima yumweya, nji ku remekapo yumweya no ku shwahura yumweya. Tumba mu twethsa ku kwamena Nyambi no ku kwamena madi.
25 “Mweyo, naa mi ambera ci mwa cithzekera yo mwoyo wenu ci ine mwa ku dya nji ku nwa, nji ci ine mwa ku vata. Ene mwoyo ne kadi ukuru mu thsivaka kupita edya, nerama ikuru mu thsivaka kupita evata? 26 Mu monene kwinyunyi, ka ya dima nji ku cora nji ku paka edya mwitaravo, unone Tata wenu o ku wiru aa i rera. Amwe po kadi mwakuru nene mu thsivaka ku i pita? 27 Edye ku kwenu o ku twethsa ku shumuna ku mwoyo wenthzi shaanga thsitunde thsofoci pohuma ko ku cithzekera?
28 “Ine yo ku cithzekerera yevata? Mu mone matemo o mu murundu edi a kura, ka a kwama nji ku hota wanda, 29 unone naa mi tongwera ci shaanga Fumu Solomoni mu kutethzima kwenthzi kokuhe ka ekarire nevata yoiwa eci ao matemo. 30 Ngeci Nyambi aa twethsa ku vateka kengeyo muhonyi o mu murundu o kuninga ci rero ko u di, peunthza waa kuheriwa mu dirungu ne, ene nga ka a twethsa ku mi yenga amwe? Mayuwane amwe mwanu mwa shopu thsitawo?
31 “Mweyo, mwa cithzekera ci: ‘Ine twa ku dya?’ nji ci ‘Ine twa ku nwa?’ nji ci ‘Ine twa ku vata?’ 32 Inene eyi yoihe po yodiyo a na randarandanga mahedeni. Tata wenu o ku wiru po o na dimuka ci yaa fotahara ku kwenu yoihe eyi. 33 Unone mu fote tango Kutumina kwa Nyambi nowawa wenthzi, aye kenge a ku mi pa eyi enu yoihe.
34 “Mweyo, mwa cithzekera ne honi keyi yo peunthza, inene diyuwa dyo peunthza kenge dya ku keya necithzekera yadyo. Diyuwa no diyuwa di di no mapacaca adyo.