Ittio Yesu Yeruthalẽm kĩ alaanĩ
(Bẽl Marĩkõ 11:1-11; Luka 19:28-38; Yoanẽ 12:12-19)
21
Ma balna ngĩ ĩĩtõ Yesu kĩ wobjiak cĩgĩnĩk õjõõntĩ Yeruthalẽma, ikiyyia ũũk nẽ ĩcĩ kõrõõk cĩ gaalawu cĩ Bethvage, Thiira cĩ Olivnyawu,a ĩthõng ition Yesu wobjiak ramma kutuwuantẽĩ, 2 ĩthõng ethek nẽ ĩnõõgõ ne, “Õõt ĩcĩ kõrõõk cĩ owu ẽẽ, amũdothicu katĩ thigiriec ĩmma cĩ ngayyi tamanoko cĩ ecebjie natẽ, arũmẽ kĩ moolet cĩnnĩ. Õõkta ĩnõõgõ, ĩthõng ayaktahangũ aneeta. 3 Ma ngĩ ajinnung eeti ĩmma athĩ ne, nyia cĩ adĩmannu wo, uduktiak ĩnõõnõ entek ne, ‘Adiim Makayyioiti ĩnõõgõ.’ Ẽlẽmacung katĩ nẽ thigirie nĩĩkẽ nĩĩco noko.”4 Ngaatĩ ẽnnẽ thõõth wũ balna aduwa Nyekuci dĩdĩ, kĩ balna ngĩ aduwa eeti cĩ õthõõth molook cĩ Nyekuco athĩ ne,
5 “Uduktiak niigia eet cĩk Thionĩb entek ne,
‘Ĩcĩnĩt ikiyyia alaanĩ cunung kĩ agiitia!
Anyĩk nẽ ẽlẽ cĩnnĩ kĩthĩmat, ĩthõng õtõda thigiriec,
õtõda moolet cĩ thigirieco.’ ”c
6 Ma balna natẽ õõt wobjiaha, ĩthõng ĩdĩmanit kĩ balna ngĩ aduwaai Yesu ĩnõõgõ. 7 Õõt thĩ baa ayakta nẽẽgẽ thigiriec kĩ moolet cĩnnĩ, ĩthõng ataddik ceremua õõgĩ bowucinẽy ĩcĩgĩk. Ngaatĩ thĩ aavẽ Yesu ĩnõõgõ. 8 Ẽthẽdaneei balna eeta cĩk meelĩk ceremua cĩgĩk gõõla, ĩthõng ẽngẽdda balna gwuak taliiban kẽẽnĩy, ĩthõng aryik gõõla. 9 Uwuantẽcĩ balna eeta gwuak Yesu ĩcĩ owu, ĩthõng õwõbta gwuak vurtia, ẽgẽrẽny nẽẽgẽ vẽlẽk athĩ ne,
“Hothana! Kubuluthit Ngẽrtĩ Davide!”
“Agatanẽ eeti cĩ aku thaarĩy ĩcĩk Makayyioktak!”de
“Hothana kĩ Nyekuc tammuatiddina!”
10 Ma baa ngĩ arawak Yesu Yeruthalẽm, ivitia atalit eeta õrrõt õlõõ cĩ gaalawu, ĩthõng ijintõy ĩĩtõ ne, “Ngẽnẽ woccia coo?”
11 Ẽdẽcĩ meelitini cĩ eetu athĩ ne, “Ẽẽn coo Yesu cĩ ẽẽn et cĩ õthõõth molook cĩ Nyekuco cĩ aku Natharẽta looca cĩ Galilea.”
Yesu Ciitha cĩ Nyekuco
(Bẽl Marĩkõ 11:15-19; Luka 19:45-48; Yoanẽ 2:13-22)
12 Õkkõ balna Yesu reerunga cĩ Ciith cĩ Nyekuco, ĩthõng itingkawek eet cĩk ũũta ijjio kĩ cĩk ũũtẽnẽ ijjio natẽ ngĩtĩvõrĩ. Utduk nẽ lõbẽlẽt cĩk eet cĩk atalõnẽ nyarobinya, kĩ eet cĩk ũũtẽnẽ kurrienya. 13 Ngaatĩ ẽthẽcĩ Yesu ĩnõõgõ ne, “Aduwa Nyaraga cĩ Nyekuco athĩ ne, ‘Ẽẽn ciith cannie, ciith cĩ lawintio.’f Aryu kẽnnẽ niigia kĩĩ, ‘Ngĩtĩ alugunyẽnĩ goryiaha.’ ”g
14 Ma natẽ, ivitiak eeta cĩk rubentĩk kĩ cĩk ngõõltĩk Yesu Ciitha cĩ Nyekuco, ngaatĩ anyĩcẽ nẽ ĩnõõgõ vẽlẽk kũbũnta. 15 Ĩthõng thĩ, ivitia avaracitõ makayyiowa cĩk paadĩrnyawu kĩ limanniok cĩk Ngiran cĩ Mutha, ngatĩ acĩnĩ thoothonniok cĩk anaat eeta cĩk atican nẽ, ĩthõng ĩthĩraritõ calcallõn cĩ doolenu reerunga cĩ Ciith cĩ Nyekuco athĩ ne, “Bulẽnĩt kĩ Ngẽrtĩ Davide.”
16 Ma natẽ, ijinit nẽẽgẽ Yesu entek ne, “Athĩrari niia thõõth cĩ aduwa doolia wo?”
Ẽdẽcĩ Yesu ĩnõõgõ ethei ne, “Ii, kathĩrari! Athii cĩ agayyu niigia thõõth cĩ aduwa Nyaraga cĩ Nyekuco athĩ ne,
“ ‘Ebellie katĩ doolia kĩ dõõlĩ cĩk nga õrõõktĩ,
anyĩk niia ĩnõõgõ kebelit dĩhĩthẽnĩt’?”h
17 Ngaatĩ balna ũũngnĩcẽ Yesu ĩnõõgõ, ĩthõng ũũk ĩcĩ kõrõõk cĩ gaalawu cĩ Bethani, ngaatĩ baa õkkõ õõngẽ natẽ.
Ĩcĩĩn Yesu mũũnec
(Bẽl Marĩkõ 11:12-14, 20-24)
18 Ma balna ngerethietĩn cĩnnĩ, ĩtĩnga Yesu ũũk ĩcĩ kõrõõk cĩ gaalawu cobbi, ĩthõng ikiyyia adak ĩnõõnõ boobo, 19 ma baa wueeta cĩnnĩ ẽẽ, ũũk nẽ, ĩthõng ĩcĩn mũũnec gõõla kabanyca. Ma balna ngĩ õkkõ acĩn ẽẽ, athii kẽnnẽ cĩ amũda mũũnĩ cĩk abiiri buu, acĩn kẽnnẽ ballõk dõ. Ngaatĩ acĩĩnĩ nẽ mũũnec nĩcẽ ẽthẽcĩ ne, “Athii katĩ niia cĩ aari mũũnĩ naboo kũdũt!” Ma natẽ noko õdõõk kẽẽt neccie.
20 Utubuantẽ balna wobjiaha õrrõt, thõõtha cĩ õdõõngnĩ mũũnecĩ tamanoko ẽẽ. Ĩthõng ĩĩtõ nẽẽgẽ ne, “Õdõõĩ gõõ kẽẽt coo tamanoko nyia?”
21 Ngaatĩ aduwacĩ Yesu ĩnõõgõ ẽthẽcĩ ne, “Ma ngĩ ayakcu niigia leminit, ĩthõng athii cĩ ayunnu thõõth ĩmma, kaduwacung dĩdĩ, adĩmannu woccia thõõth wũ balna kadĩmanei na mũũnec, ĩthõng adĩmannu woccia thõõth cĩ ijiar buu. Yoko thẽk uduktiak niigia thiir coo entek ne, ‘Tdukothĩk bũlũc cobbi,’ ĩthõng atdukothi katĩ nẽ bũlũc. 22 Ma ngĩ ayakcu niigia leminit katĩ ngĩ alawinu, anyung katĩ Nyekuci gii cĩ ajinnu niigia wo lawintia.”
Ijinit eeta Makathĩt cĩ Yesu
(Bẽl Marĩkõ 11:27-33; Luka 20:1-8)
23 Õkkõ balna ẽhẽẽt Yesu reerung cĩ Ciith cĩ Nyekuco, ĩthõng illiman eeta, ma natẽ, ivitiak ĩnõõnõ makayyiowa cĩk paadĩrnyawu kĩ eet cĩk obbitik, ĩthõng ijinit ĩnõõnõ entek ne, “Amũda da niia makathĩt coo, cĩ adĩmanẽ thoothonniok cĩkkõ wo nga? Anyi aniitia ngẽnẽ?”
24 Ẽdẽcĩ Yesu ethei ne, “Kayai na buu jinẽnĩt ĩmma ĩcunung, ma ngĩ ẽdẽccangũ, kaduwacung katĩ na buu agiitia gõõl cĩ kamũdanẽ na makathĩt cĩ kadĩmanẽ thoothonniok cĩkkõ wo. 25 Ngẽnẽ balna cĩ anyi Yoanẽ makathĩt cĩ agamẽcĩ eet batithimo? Anyi da Nyekuci, kõdẽ anyi eeti cĩ olli kaganoko?”
Ivitia ijintõy nẽẽgẽ nyaguana ĩĩtõ ne, “Ma ngĩ kathĩ ne, ‘Aku makathĩtĩ coo tammuatiddina,’ ajinnet katĩ enneccet ne, ‘Ĩthõng da athii cĩ elemnyu ĩnõõnõ nyia?’ 26 Ĩthõng thĩ, ma ngĩ kennei ne, ‘Aku makathĩtĩ coo eetĩnẽy,’ Kongollie naaga eeta, nyatarka ahad nẽẽgẽ vẽlẽk athĩ ne, ẽẽn Yoanẽ et cĩ õthõõth molook cĩ Nyekuco.”
27 Ngaatĩ ẽdẽcĩ nẽẽgẽ Yesu ẽthẽcĩ ne, “Athii cĩ kagayya.”
Ĩthõng ethek Yesu ĩnõõgõ ne, “Athii thĩ na buu cĩ kaduwacung agiitia ngatĩ kadĩmani na thoothonniok cĩkkõ makathĩta ĩcĩ ngẽnẽ.”
Iyiainit cĩ owovothi lõgõõ cĩk ẽẽn ramma
28 Ĩthõng õthõõth Yesu ĩĩ ne, “Kaduwacung yoko na agiitia iyiainit ĩmma cĩ et ĩmma cĩ ayak lõgõõ cĩk ẽẽn ramma. Ĩthõng katĩ uduktahangũ thõõth cĩ ahaddu niigia. Õkkõ balna ethei baatĩnnẽ ngẽrĩnĩ cobbi ne, ‘Bĩt wanĩco ticcanõy manatõ cĩ kẽẽn cĩk vĩnõwak kõr coo!’
29 “Ẽdẽcĩ ngẽrĩnẽ athĩ ne, ‘Athii cĩ kõkkõ,’ ma vurtia, ikiyyia ũtũwũ muwẽẽnĩt cĩnnĩ ẽẽ, ngaatĩ õkõyyĩ manatõ.
30 “Ma natẽ, ũũk uduwak baatĩnnẽ ngẽrĩnĩ ĩmma, thõõth nĩcẽ dõ noko. Ẽdẽcĩ ngẽrĩnẽ athĩ ne, ‘Kõkkõ katĩ na baang,’ ĩthõng ĩthĩnga õkkõ buu.
31 “Ma ngĩ ahaddu niigia, logoo cĩ maacĩ jang cĩ athĩrar thõõth cĩ aduwaai baatĩnnẽ wo?”
Ẽdẽcĩ paadĩrnya cĩk obbitik kĩ makayyiok cĩk eetu athĩ ne, “Logoo cĩ maacĩ cĩ owu ẽẽ.”
Ngaatĩ aduwacĩ Yesu ĩnõõgõ ẽthẽcĩ ne, “Kaduwacung na agiitia thõõth dĩdĩ, ẽhẽẽt katĩ eeta cĩk alũt mũcũrrũ kĩ eet cĩk tẽgẽmĩk kabicoc cĩ Nyekuco ĩcĩ owu ĩcunung! 32 Nyatarka balna aku Yoanẽ Batithta kikiyyia keyelewung gõõl cĩ bũnnathẽtĩnõ cĩ adiim Nyekuci, ĩthõng athii balna kẽnnẽ cĩ elemnyu niigia ĩnõõnõ, avvu balna ẽlẽmĩ eeta cĩk alũt mũcũrrũ kĩ eet cĩk tẽgẽmĩk ĩnõõnõ. Ĩthõng thĩ, balna ngĩ icintu niigia thoothonniok cĩkkõ vẽlẽk, nga balna athii cĩ uungniccu niigia gerthetin cunung, ĩthõng elemtu ĩnõõnõ.”
Ticcianniok cĩk mana cĩ vĩnõwo
(Bẽl Marĩkõ 12:1-12; Luka 20:9-19)
33 “Ĩthĩrarit iyiainit ĩmma cĩ owovothi cĩ alĩta eet cĩ athĩ ne, aavĩ balna eeti ĩmma cĩ õkkõ akatĩ kẽẽn cĩk vĩnõwaki mana cĩnnĩ, ĩthõng ũlũk lũwat kõyõkõn kurumõy, ĩthõng ada look cĩ amacũwẽnĩ nyegeruana,j ĩthõng ĩdĩman lobele cĩ behinto. Ma natẽ, ikiyyia aanyĩk evyiok kebektek ĩnõõnõ mana cĩnnĩ, ngaatĩ ẽhẽrõnĩ nẽ õkõyyĩ looca ĩmmanĩ. 34 Ma balna ngĩ ikiyyia kõr cĩ teedintio, itiona nẽ ticcianniok cĩgĩnĩk kõõt kayaktak ĩnõõnõ vĩnõ cĩk ibbiritõ.
35 “Avvu kẽnnẽ agam evyiowa ticcianniok cĩgĩnĩk wo, ĩthõng uukitõ ĩmma, uruit ĩmma, ĩthõng ovoccit cĩ ẽẽn iyyio ẽẽ, bĩĩyẽnĩy. 36 Ma natẽ, ition nẽ ticcianniok õõgĩ naboo, cĩk meelĩk cĩk ijiar wũk balna ottinu, kõõt ĩcĩnĩng. Õvvõ kẽggẽ adĩman evyiowa ĩnõõgõ buu buth gõõla wũ balna dõ noko. 37 Ma balna vurtia cĩnnĩ, ikiyyia ition baatĩnnẽ ngẽrĩnĩ wĩnnĩ kir, nyatarka amuk nẽ athĩ ne, ‘Õvvõ katĩ ongollie nẽẽgẽ ngẽrnanĩ cannĩ.’
38 “Ma balna ngĩ acĩn nẽẽgẽ ngẽrtĩ baatĩ manu ngĩ aku wo, ivitia othoothitõ nyaguana ĩĩtõ ne, ‘Kuruit ĩnõõnõ! Ĩthõng kootti mana coo kĩĩ cĩnac, kĩĩ katĩ athii cĩ aku aragĩth nẽ.’ 39 Ngaatĩ agamĩ nẽẽgẽ ĩnõõnõ, ĩthõng ootti manatõ ĩcĩ kẽẽn cĩk vĩnõwak ĩcĩ gõlla, ĩthõng õõt uruit ĩnõõnõ natẽ.
40 “Ĩthõng thĩna, mĩ katĩ ngĩ õbõda baatĩ manu, aku katĩ adaĩ evyiok cĩkkõ nyia?”
41 Ẽdẽcĩ paadĩrnya cĩk obbitik kĩ makayyiok athĩ ne, “Aku katĩ aruk nẽ ĩnõõgõ gõõla cĩ gerthe õrrõt. Ĩthõng katĩ anyĩk nẽ mana cĩnnĩ wo, eet cĩk õthõl katĩ kĩ ĩnõõnõ nyegerua cĩk ẽtẽda nẽẽgẽ mana cĩnnẽ ẽẽ.”
42 Ngaatĩ baa ẽthẽcĩ Yesu ĩnõõgõ ne, “Agayyu niigia balna ngĩ aduwa Nyaraga cĩ Nyekucok athĩ da ne, nyia?
“ ‘Ũtũbũrĩt balna tengenyiowa bĩĩ,
ĩthõng ikiyyia ĩthĩ bĩĩ coo tiir õrrõt ciitha,
gii cĩ balna adĩman Makayyioiti coo,
ĩthõng kĩcĩnta kẽbẽrẽnĩy ĩcĩgak,
ĩthõng ubulanet nẽ ageeta õrrõt kũdũt.’l
43 “Ĩthõng thĩna, kaduwacung na agiitia kethecung ne, agammiay katĩ kabicocĩ cĩ Nyekuco ĩcunung, ĩthõng anyĩwothĩk eet cĩk adĩman thõõth cĩ edeemothi. 44 Ĩthõng eeti cĩ katĩ ĩdda bĩĩ coo, aduuli katĩ nẽ bẽlẽhẽnyẽk. Ĩthõng thĩ, eeti katĩ cĩ atdukai bĩĩ neccie, aduul katĩ ĩnõõnõ kĩĩ kõyõkkõyõk.”
45 Ma balna ngĩ ĩthĩraritõ makayyiowa cĩk paadĩrnyawu kĩ Varithei iyiaintiok cĩk owovi Yesu thõng wo, ivitia agaacõ nẽẽgẽ, monogo õthõõth Yesu ĩnõõgõ. 46 Ngaatĩ balna ẽrẽpanĩ nẽẽgẽ gõõl cĩ adiim agamĩ ĩnõõnõ, ĩthõng thĩ, kẽnnẽ ongollie balna nẽẽgẽ meelitin cĩ eetu, nyatarka balna amuk eeta athĩ ne, ẽẽn Yesu et cĩ õthõõth molook cĩ Nyekuco.