Kõr cĩ tiẽnto
(Bẽl Luka 14:15-24)
22
Ma natẽ ikiyyia uduwak Yesu eet naboo iyiainit cĩ owovothi cĩ alĩta eet, ethei ne, 2 “Aavĩ kabicocĩ cĩ tammutiddino kĩ alaanĩ cĩ adĩmaneei peyian cĩ tihẽnĩt cĩ abulie cĩ ngẽrĩnĩ. 3 Ition balna alaanĩ ticcianniok cĩgĩnĩk kõõt kayakta eet wũk avvũ nẽ kivitia kõrra ĩcĩ tiẽnto, ĩthõng thĩ, ũtũbũrĩt nẽẽgẽ ngĩ avvu.4 “Ngaatĩ itionĩ ticcianniok õõgĩ naboo ethei ne, ‘Õõt uduktiak eet cĩk avvu tihẽnĩt entek ne, kĩdĩmaneha na peyian cĩ tiẽnto vẽlẽk, kucuwana tõmõnya kĩ tĩĩn cĩk adĩhĩ, ĩthõng ĩdĩmanothĩk gii vẽlẽk jurrung. Ivitia tihẽnta.’
5 “Ĩthõng thĩ, athii kẽnnẽ cĩ athĩrar eeta neekie, ngaatĩ õkõyyĩ ĩmma mana cĩnnĩ, ĩthõng ũũk ĩmma tiica cĩnnĩ. 6 Ngaatĩ agamĩ gwuak ticcianniok cĩk alaanak ẽẽ, ĩthõng ĩdĩmanit buth, ĩthõng uruit ĩnõõgõ. 7 Anyi balna thõõth coo alaan kavarac õrrõt kũdũt, ĩthõng ition nyĩcẽkẽr cĩgĩnĩk kõõt kuruit rukciok nĩĩkẽ, ĩthõng ũtũũthĩtõ kõrõõk cĩ gaalawu cĩnĩng ẽẽ.
8 “Ngaatĩ aduwacĩ ticcianniok cĩgĩnĩk ẽẽ, ẽthẽcĩ ne, ‘Kĩdĩmaneha peyian cĩ tiẽnto vẽlẽk, ĩthõng thĩ, eeta wũk kokoleei na thooc athii cĩ ẽtẽmanõy ngatĩ avvunni. 9 Õõt ngatĩ arumone goolliowa vẽlẽk, ĩthõng ngĩ icintu eet vẽlẽk, cĩk amũdanu utuvvuyyia ĩnõõgõ kivitia tihẽnĩt.’ 10 Ngaatĩ õvõyyĩ ticcianniowa goolliowẽy, ĩthõng ulluttia eet vẽlẽk cĩk amũda nẽẽgẽ, cĩk abũnna kĩ cĩk gerthek kĩbbĩtĩt ciith cĩ peyiano ẽẽ.
11 “Ĩthõng thĩ, ma balna ngĩ aku acĩn alaanĩ kerenniok cĩgĩnĩk ẽẽ, ikiyyia ijiowa nẽ et ĩmma cĩ balna athii cĩ ahimit ceremua cĩk tihẽntak. 12 Ngaatĩ ajini nẽ ĩnõõnõ ẽthẽcĩ ne, ‘Laang, iithiowa te niia ngittio kuu, athii aniitia ceremuana cĩk tihẽntak tõ?’ Athii balna thõõth cĩ aduwa eeti neccie tõ.
13 “Ngaatĩ ẽthẽcĩ alaanĩ ticcianniok cĩgĩnĩk ne, ‘Ecebit ĩnõõnõ athĩn kĩ thoo vẽlẽk, ĩthõng utdukteewu ĩnõõnõ ngatĩvõrĩ muwuratõ, ngatĩ katĩ õvvõ alue eeta, ĩthõng adait nẽẽgẽ nyĩgĩt wuciitha cobbi.’ 14 “Nyatarka mẽẽlĩ eeta cĩk avvuay thõng, ĩthõng dĩcẽ cĩk eberyiay.”
Dũmaninit cĩ mũcũrrũ wo
(Bẽl Marĩkõ 12:13-17; Luka 20:20-26)
15 Ma natẽ, uluttie Varithei, ĩthõng õõt ĩdĩmantek gõõl cĩ katĩ ẽdẽtĩ Yesu thõõtha cĩ katĩ aduwa nẽ. 16 Ma natẽ, itionitõ nẽẽgẽ wobjiak cĩgĩk kĩ eet cĩk Ẽrõõdĩ, kõõt ĩcĩnnĩ. Kõõt kuduktiak nẽẽgẽ ĩnõõnõ kentek ne, “Limannioit, kagayyi naaga eeni niia et cĩ abũnna, ĩthõng alimani thõõth cĩ Nyekuco gõõla cĩ ẽẽn dĩdĩ. Acini niia eet vẽlẽk gõõla cĩ aduwõy thõng, ĩthõng kolli thõõth cĩ angalĩtẽ niia ĩnõõgõ. 17 Duwaet da muwẽẽnĩt cunni, ngĩ edeemothi ngatĩ kadũmanẽcĩ mũcũrrũ alaan cobbi cĩ Rũma,a kõdẽ athii tõ?”
18 Aga balna Yesu muwẽẽnĩt cĩnĩng cĩ gerthe ẽẽ, ngaatĩ ẽthẽcĩ ĩnõõgõ ne, “Niigia volongnyiaha, adiimnyu ẽdẽtanangũ niigia aneeta thõng nyia? 19 Eyeliehangũ da nyarobiiac cĩ adũmanuu mũcũrrũ wo.” Ngaatĩ anyĩcẽ nẽẽgẽ ĩnõõnõ nyarobiiac cĩ ẽẽn thiihit codoi, 20 ĩthõng ikiyyia ijin Yesu ĩnõõgõ ethei ne, “Cĩ ngẽnẽ ririwacĩ cĩ ayak nyarobiiacĩ coo wo? Ĩthõng cĩ ngẽnẽ teheedineti cĩ aavĩ ngato wo?”
21 Ẽdẽcĩ nẽẽgẽ ethei ne, “Cĩ alaan cobbi cĩ Rũma.”
Ẽdẽcĩ Yesu ethei ne, “Anycĩk thĩ alaan cobbi cĩ Rũma kaal cĩgĩnĩk, ĩthõng anyciwu Nyekuc kaal cĩgĩnĩk.”
22 Ma balna ngĩ athĩhĩ nẽẽgẽ thõõth coo wo, utubuantẽ nẽẽgẽ õrrõt, ngaatĩ ũũngnĩcẽ nẽẽgẽ ĩnõõnõ, ĩthõng õõta.
Rũgũthanĩt cĩ arũgnanĩ eeta looca
(Bẽl Marĩkõ 12:18-27; Luka 20:27-40)
23 Athii balna cĩ ẽlẽmĩ Thaduthei ngatĩ woccia arũknanĩ eeta vurtia cĩ daaĩtho naboo. Ma kõr nĩcẽ noko, ivitia ijinit nẽẽgẽ Yesu entek ne, 24 “Limannioit, aduwacet balna Mutha ageeta enneccet ne, ngĩ adaaĩ eeti nga kẽyẽk dõõlĩ, agam woccia gotonia ngaa cĩ bõyyĩ ẽẽ, kĩĩ katĩ kitirriak nẽ gõtõnĩ cĩ balna adaak ẽẽ, dõõlĩ.b 25 Ĩthõng yoko aatĩ balna lõgõõ cĩk ẽẽn gõtõõnõk cĩk ẽẽn tũrgẽrẽm cĩk karũmẽna ngato. Ikiyyia itiwõõy cĩ owu, ĩthõng adaaha, ĩthõng thĩ, nyatarka ngaanĩ kittiria dõõlĩ, ikiyyia ũtũngẽẽĩ ngaa cĩnnĩ gõtõnĩ. 26 Ũũk baa daaĩthĩ neccie kõdõlan gõtõnĩ cĩnĩng cĩ ẽẽn ramma kĩ cĩ ẽẽn iyyio kĩ cĩ ẽẽn tũrgẽrẽm tirria ẽẽ. 27 Ma balna vurtia, ikiyyia adaak ngaa cĩ bõyyĩ neccie buu. 28 Ma tĩna kõr cĩ arũknanĩ eeta, ẽẽn katĩ ngaa coo cĩ ngẽnẽ gotoonoginiy ĩcĩk ẽẽn tũrgẽrẽm wo, baa ngĩ itihit nẽẽgẽ vẽlẽk?”
29 Ẽdẽcĩ Yesu ethei ne, “Abaccu natẽ, nyatarka nga agaac niigia Nyaraga cĩ Nyekuco, kõdẽ tiirthẽt cĩnnĩ. 30 Ĩthõng kõr cĩ katĩ anyĩcẽ Nyekuci eet kũrũkta naboo, athii katĩ ngaay cĩ atihẽnĩ, kõdẽ athii katĩ cĩ ngaanĩ atik eeta cĩk maacĩk ngaay, aatĩ katĩ nẽẽgẽ kĩ anjĩlẽta cĩk aatĩ tammuatiddina. 31 Ĩthõng thĩ, thõõth cĩ katĩ arũknanĩ eeta daaĩtha naboo, nga balna ebelit niigia thõõth wũ balna aduwa Nyekuci athĩ ne, 32 ‘Keeni na Nyekuc cĩ Abrahamĩ, Nyekuc cĩ Aĩthaĩ kĩ Nyekuc cĩ Yokobĩ’cd? Athii Nyekuci cĩ ẽẽn Nyekuc cĩ eet cĩk adaaĩ, ĩthõng thĩ, ẽẽn nẽ Nyekuc cĩ eet cĩk arugi.” 33 Ma balna ngĩ athĩrar meelitini cĩ eetu liman cĩnnĩ wo, ivitia nẽẽgẽ ukulliek jien õrrõt.
Tĩrĩthẽnĩt cĩ tiiri õrrõt
(Bẽl Marĩkõ 12:28-34; Luka 10:25-28)
34 Ma balna ngĩ athĩrar Varithei ngatĩ amaacĩ Yesu Thaduthei wo, ivitia ũrũmĩt nẽẽgẽ eleeti cĩgĩk. 35 Ikiyyia Varitheniti codoi cĩ aga Ngiran cĩ Mutha jurrung, ĩthõng ijin Yesu jinẽnta ĩcĩ ẽdẽtĩ ĩnõõnõ athĩnnĩ ne, 36 “Limannioit, tĩrĩthẽnĩt jang cĩ tiiri õrrõt Ngirana vẽlẽk?” 37 Ẽdẽcĩ Yesu ethei ne, “ ‘Mĩnan Makayyioit Nyekuc cunni, thĩnĩna cunni vẽlẽk, kĩ ririwaca cunni vẽlẽk kĩ muwẽẽnta cunni vẽlẽk.’e 38 Tĩrĩthẽnĩt cĩ tiiri õrrõt cĩ owu Ngirana cĩ Nyekuco vẽlẽk coo. 39 Ĩthõng õgõõn cĩ ẽẽn ramma kĩcĩ athĩ ne, ‘Mĩnan et cĩ abakanonu kaavu kĩcĩ amĩnani niia ẽlẽ cunni.’fg 40 Agam tĩrĩthẽntiowa cĩkkõ cĩk ẽẽn ramma wo tĩrĩthẽntiok vẽlẽk wũk Ngiran cĩ Mutha kĩ thoothonniok cĩk eet cĩk õthõõth molook cĩ Nyekuco.”
Ẽẽn Kiristo Ngẽrtĩ ngẽnẽ?
(Bẽl Marĩkõ 12:35-37; Luka 20:41-44)
41 Ma balna ngaanĩ alũtẽ Varithei ngatĩ odoi, ikiyyia ijin Yesu ĩnõõgõ ethek ne, 42 “Ahaddu koccia niigia athinnu ne, ẽẽn Kiristo ngẽnẽ? Ngẽrtĩ ngẽnẽ nẽ?”
Ẽdẽcĩ nẽẽgẽ ĩnõõnõ ethei ne, “Ẽẽn nẽ ngẽrtĩ Davide.”
43 Ẽdẽcĩ Yesu ĩnõõgõ ethei ne, “Ĩthõng da anyĩk Ririwacĩ cĩ Dĩhĩmĩ Davide kũtũvvũ ĩnõõnõ kennek ne, ‘Makayyioit’ kuu? Nyatarka balna athĩ Davide ne,
44 “ ‘Aduwaai Makayyioiti Makayyioit cannĩh ethei ne,
“Avvu niia ĩcĩ athiit cannĩ cĩ athio,i
kuumuc gii ngĩ kaarĩha mĩrõk cugunik
thoonĩy cugunik.” ’j