Uduwak Yesu eet kegenyito makayyiõĩ ĩcĩk paadĩrnyawu
(Bẽl Marĩkõ 12:38-40; Luka 11:37-52; 20:45-47)
23
Aduwaai balna Yesu meelitin cĩ eetu kĩ wobjiak cĩgĩnĩk ethei ne, 2 “Ẽẽn limanniowa cĩk Ngiran cĩ Mutha kĩ Varithei eet cĩk aduwa Ngiran cĩ Mutha. 3 Ĩthĩrarit ĩnõõgõ, ĩthõng ĩdĩmantu thoothonniok vẽlẽk cĩk aduwaccung nẽẽgẽ. Nyĩ adĩmannu thoothonniok cĩk adĩman nẽẽgẽ, nyatarka athii cĩ adĩman nẽẽgẽ thoothonniok cĩk aliman nẽẽgẽ. 4 Anyi nẽẽgẽ eet ijjio cĩk adingdingi kodongit gaavũanĩy cĩgĩk, ĩthõng athii nẽẽgẽ cĩ ẽẽl ĩnõõgõ buu.5 “Atican nẽẽgẽ thoothonniok vẽlẽk, kĩĩ katĩ kĩcĩnĩt eeta thoothonniok cĩgĩk. Ecebei nẽẽgẽ thoothonniok cĩk Nyekucak cĩk eheeddi ootinẽy, kõdẽ ĩbatinẽy ĩcĩgĩk, ĩthõng itihimit ceremua cĩk ayak vocunya cĩk wuuntik. 6 Atarnanĩ nẽẽgẽ taabĩt cĩk aatẽ eeta cĩk obbitik peyiana kĩ taabĩt cĩk aatĩ ĩcowu Ciithẽnẽy cĩk Lawintiak. 7 Atarnanĩ nẽẽgẽ ngatĩ ĩthaawĩ eeta ĩnõõgõ ngatĩ tũwẽnto ẽthẽcĩ ne, ‘Limannioit.’
8 “Ĩthõng thĩ, athii woccia cĩ ethecung eeta ne, ‘Limannioit,’ nyatarka ayakcu niigia Makayyioit codoi dõ, ĩthõng niigia vẽlẽk eeginnu gõtõõnõk kĩ ngõõnõk. 9 Ĩthõng nyĩ avvuyyu et ĩmma loota ngato enneccu ne, ‘Baang,’ nyatarka Nyekuc dõ cĩ aavĩ tammuatiddina cĩ ẽẽn Baaba cunung. 10 Kõdẽ nyĩ avvuyyu et ĩmma enneccu ne, ‘Limannioit,’ nyatarka ayakcu niigia limannioit codoi, ĩnõõnõ Kiristo. 11 Anycĩk et cobbi kõrgẽna cunung kĩĩ ticciannioit cunung. 12 Nyatarka eeti cĩ õdõng ẽlẽ cĩnnĩ kijiar gõõnõgĩ, amiiri katĩ nẽ kĩĩ dĩca, ĩthõng eeti cĩ anyi ẽlẽ cĩnnĩ kĩĩ dĩc, odongnyie katĩ nẽ kĩĩ maka.
13 “Pĩrnanẽt ĩcunung, limanniok cĩk Ngiran cĩ Mutha kĩ Varithei, niigia volongnyiaha! Anyukju niigia kabicoc cĩ tammutiddino kẽbẽrẽnĩy ĩcĩk eetu. Ĩthõng athii woccia niigia cĩ iithioyyu kabicoc cĩ tammutiddino, kõdẽ athii cĩ ẽlẽmacu eet cĩk adiim iithio. 14 Pĩrnanẽt ĩcunung, limanniok cĩk Ngiran cĩ Mutha kĩ Varithei, niigia volongnyiaha! Agamanu niigia ijjio cĩk ngaay cĩk bõyyĩk ciithẽnẽy ĩcĩgĩk, ĩthõng alawinu kuumuc, kĩĩ katĩ kicintung eeta agiitia. Ĩthõng thĩ, uukenu katĩ niigia õrrõt.
15 “Pĩrnanẽt ĩcunung, limanniok cĩk ngiranak kĩ Varithei, niigia volongnyiaha! Ovvoyyu loociok kĩ bulucua vẽlẽk wo, kĩĩ katĩ anycĩk et codoi doo kĩĩ wobjiait cunung, ĩthõng ma ngĩ ĩdĩmantu ĩnõõnõ ngõnana ramma kaavu kĩ niigia, anyiccu katĩ ĩnõõnõ kũũk guyyia cĩ alna kũdũt.
16 “Pĩrnanẽt ĩcunung, eeta cĩk eeginnu rubẽnẽ cĩk ũũwayyu eeta, nyatarka alimannu niigia eet athinnu ne, ‘Ma ngĩ abũtan eeti thaarĩy ĩcĩk Ciith cĩ Nyekuco, athii bũtanĩ cĩ agam et, ĩthõng thĩ, ma ngĩ abũtan eeti thaarĩy ĩcĩk daab cĩ Ciith cĩ Nyekuco, abũnna thẽk ma ngĩ athũnnĩ nẽ kir bũtan dĩdĩ!’ 17 Niigia giithiaha cĩk eeginnu rubẽnẽ wo! Jang cĩ ijiarĩ, daab, kõdẽ Ciith cĩ Nyekuco, cĩ anyi daab kingiranẽ wo? 18 Ĩthõng naboo athinnu niigia ne, ‘Mĩ abũtan eeti thaarĩy ĩcĩk ngĩtĩ todongintio, athii bũtanĩ cĩ agam et, ĩthõng thĩ, mĩ abũtan eeti thaarĩy ĩcĩk anyinit cĩ ngĩtĩ todongintio, abũnna thẽk ma ngĩ athũnnĩ nẽ kir bũtan dĩdĩ!’ 19 Niigia eeta cĩk eeginnu rubenniak wo! Jang cĩ ijiarĩ, anyinit, kõdẽ ngĩtĩ otodongini gii cĩ cavĩto cĩ anyi anyinit kingiranẽ wo? 20 Ĩthõng thĩ, eeti cĩ ũbũtan nginiwa ĩcĩ todongintio, ũbũtan nẽ giiwa cĩ cavĩto vẽlẽk cĩ aavĩ natẽ. 21 Ĩthõng eeti cĩ ũbũtan Ciitha cĩ Nyekuco, ũbũtan nẽ Nyekuc cĩ aavĩ natẽ. 22 Ĩthõng ngĩ abũtan eeti thaarĩy ĩcĩk tammutiddino aduwõy kĩ ngĩ abũtan eeti taabawa cĩ Nyekuco, ĩthõng ũbũtan thaarĩy ĩcĩk Nyekuc cĩ aavẽ taaba cĩnnĩ.
23 “Pĩrnanẽt ĩcunung, limanniok cĩk Ngiranak kĩ agiitia Varithei, niigia volongnyiaha! Anyiccu niigia Nyekuc anyinit cĩ dĩcĩa cĩ õgõõn kĩ kaala cĩk kĩdĩk cĩk ariwothi diatia, ĩthõng erektewung thoothonniowa cĩk õkõmĩ cĩk Ngiran cĩ õgõõn kĩ, bũnnathĩtĩ, tamati, kĩ thõõth cĩ athunnu niigia cĩ abũtannu. Adĩmannu woccia niigia thoothonniok cĩk tiirtik, ĩthõng athii cĩ anyiccu kerektewung thoothonniowa cĩk Ngiranak cĩk kĩdĩk. 24 Niigia makayyiowa cĩk rubentĩk wo! Acuddu niigia maam cĩk ayak kĩrõnga, kĩĩ katĩ athii cĩ akuyyu ĩnõõgõ, ĩthõng thĩ, ukuyyu nyaakal.
25 “Pĩrnanẽt ĩcunung, niigia limanniowa cĩk Ngiranak kĩ agiitia Varithei, niigia volongnyiaha! Uunyu niigia lõkũlkũlẽt kĩ dũũcẽ ngĩtĩvõrĩ dõ jurrung, ĩthõng thinnetinẽy cuguk eeginnu ngarubẽ, ĩthõng iittu kiddiak! 26 Niia Varitheniti cĩ rubenĩ wo! Tũũny nõõnõ lõkũlkũl kĩ dũwũc ĩcĩtõ, ĩthõng katĩ ĩdĩhĩmẽ ngatĩvõrĩ buu.
27 “Pĩrnanẽt ĩcunung, limanniok cĩk Ngiranak kĩ agiitia Varithei, niigia volongnyiaha! Attiyyu niigia kĩ loowuana cĩk eet cĩk adaaitõ cĩk aari eeta bĩĩyẽn cĩk wuuntik, cĩk dĩhĩmĩk ngatĩvõrĩ, ĩthõng ĩcĩtõ abbĩththĩ ammẽ cĩk eet cĩk adaaitõ kĩ kaal vẽlẽk cĩk ẽẽn riiriny. 28 Ĩthõng gõõla codoi dõ, acĩnnung eeta ngatĩvõrĩ eeginnu eet cĩk edeemicu thoothonniok, ĩthõng thinnetinẽy tõõ cuguk, monogo eeginnu niigia volongnyiak, ĩthõng eeginnu gẽrẽthanniok.
29 “Pĩrnanẽt ĩcunung, limanniok cĩk Ngiranak kĩ agiitia Varithei, niigia volongnyiaha! Engenyettu niigia loowua cĩk eet cĩk õthõõth molook cĩ Nyekuco kĩ cĩk eet cĩk edeemi thoothonniok. 30 Ĩthõng iittu ne, ‘Ma baalia kũrũmtea kõdõwẽ kĩ õõ baatĩ baatĩ baangĩ, athii woyyia baalia cĩ karukca eet cĩk õthõõth molook cĩ Nyekuco kõdõwẽ kĩ ĩnõõgõ.’ 31 Ĩthõng ngĩ othooththu noko, ẽyẽlanu niigia eleeti cuguk mĩn, athinnu ne, eeginnu dõõlĩ cĩk eet wũk balna aruk eet cĩk õthõõth molook cĩ Nyekuco. 32 Ĩdĩmanit noko, edeciak thõõth wũ balna ẽgẽrẽthan baajigu!
33 “Eeginnu niigia kũwaanya, ĩthõng naboo eeginnu dõõlĩ cĩk kũwaanyawu! Alĩĩtanu katĩ niigia ukwẽẽnĩt cĩ guo cĩ alna kũdũt kuu? 34 Kitionacung katĩ na eet cĩk õthõõth molook cĩ Nyekuco kĩ eet cĩk ẽgẽẽnyĩ kĩ limanniok. Arukcu katĩ õõgĩ, ĩthõng otoddoyyiewu õõgĩ kurucea, ĩthõng uuktu õõgĩ Ciithẽnẽy ĩcuguk ĩcĩk Lawintiak, ĩthõng itingkayyewu õõgĩ kõrõõk cĩ gaalawu, kõõt õlõõ ĩmmanĩ ĩcĩ gaalawu. 35 Ĩthõng thĩ, ketee anganyinu katĩ niigia daaĩthiowẽy cĩk eet vẽlẽk cĩk Nyekucak, ẽtẽrẽhanĩ ĩcĩ Abẽlĩb et wũ edeemi thoothonniok kõdõlan Thakariyac ngẽrtĩ Berekia, wũ balna aruk baajigu kõrgẽna cĩ Ciith cĩ Nyekuco kĩ ngatĩ todongintio. 36 Kaduwacung na dĩdĩ, adĩmanothicung katĩ agiitia kaala cĩkkõ erkinyiay ĩcĩk katĩ avvu!
Amĩnan Yesu eet cĩk Yeruthalẽmĩ
(Bẽl Luka 13:34-35)
37 “Niigia eeta cĩk Yeruthalẽmĩ, uruktu niigia eet cĩk õthõõth molook cĩ Nyekuco, ĩthõng ũgũdantawu eet wũk itioniacung eeta agiitia bĩĩyẽnĩy. Kadiimi balna gõõ na ngĩ kalũta dõõlĩ cuguk kĩ tũwũlũcĩ cĩ alũteei jõõrõ cĩgĩnĩk kavutẽnẽy cĩgĩnĩk, ĩthõng thĩ, athii kẽnnẽ cĩ ẽlẽmaciangũ buu. 38 Ĩcĩnĩt thĩ da, ũtũngothĩk Ciith cunung cĩ Nyekuco aavu kaganoko. 39 Ĩthõng kaduwacung na dĩdĩ, ĩthĩnga katĩ naboo acĩnnangũ niigia aneeta naboo, gii ngĩ othooththu athinnu ne, ‘Agatanẽ eeti cĩ aku thaarĩy ĩcĩk Makayyioktak.’ ”de