Kareba Moromiꞌ To Noꞌukiꞌ Hi
Markus
Hi Yohanes Toperiu mampatimomo lala
1
1 Hieꞌemo Kareba Moromiꞌ noniuꞌ Yesu Kerisitu Anaꞌna Pueꞌ Ala. 2 Lolitonana nopemoluka ka hapo to teꞌukiꞌ i lali suraꞌna Yesaiaa. I lali suraꞌ tiꞌo Pueꞌ Ala mampatiꞌiki waheꞌe:“Hieꞌemo rumbaꞌangKa
to hingkiꞌ Kurumbaꞌ medulu ka Ingko,
hingkeꞌna mampatimomo lalaMu.”
3 “Iomo to mololita nopokobue i popada woꞌoni, notiꞌi:
‘Pueꞌ hingkiꞌ hupaꞌmo!
Ipatimomomokei lalaNe.
Nipokononto lala to hingkiꞌ Nopoliuhi.’ ” \rq (Yes. 40:3)
4 To nopowute nabi Yesaia tiꞌo tebuhoꞌimo ikohupaꞌna hi Yohanes toperiu i popada woꞌoni. Io mampowute pohawaꞌna Pueꞌ Ala pe toaꞌ to woriꞌ, notiꞌi, “Mengkatobaꞌmokei ka dosami hei humeimokei mampoperiu, hingkeꞌna dosami hingkiꞌ noꞌampuni Pueꞌ Ala.” 5 Woriꞌ toaꞌ to nolou pe popada woꞌoni alaꞌ dokoꞌhi pahori lolitana hi Yohanes. Uwaꞌhi to ka woiꞌ Yudea hei ka kota Yerusale akohi mopangakuꞌ dosara, honiꞌi noriuhi hi Yohanes i uwai Yarade.
6 Baduꞌna hi Yohanes niwali ka wilolu unta. Salupiꞌna ka koliꞌ. Pangkana popae hante uwai koniuꞌ. 7 Hi Yohanes mampowute notiꞌi, “Hamboaꞌmo morue hingkiꞌ hupaꞌ woꞌo haduo Toaꞌ to meliu kuasaꞌNe ka aku. Howeꞌ moꞌuweꞌ pehiluꞌ sanalaꞌNa, hawaꞌa masipatoꞌ. 8 Aku moriukei hante uwai, angkana Io hingkiꞌ moriukei hante Inohaꞌ Mangkolehi.”
Hi Yesu noriu hi Yohanes hei nohohongkeꞌi Belisiꞌ
9 I tempo tiꞌo, hi Yesu molai ka bolaꞌ Nasareꞌ i woiꞌ Galilea, hei mampoperiu pe hi Yohanes i uwai Yarade. 10 Pengkahorinalu hi Yesu ka uwai, Io pangkiꞌ laniꞌ moweaꞌ hei Inohaꞌ Mangkolehi mengkohou i womboꞌNa hibali tinti merpati. 11 Katoꞌo pahorihi loaꞌna Pueꞌ Ala ka laniꞌ to mantiꞌi, “Ingkomo AnaꞌKu to Kupokarima hei to mampomotanaꞌ lalingKu.”
12 Uko tiꞌo, alaꞌ perandana Inohaꞌ Mangkolehi, hi Yesu nolou pe popada woꞌoni. 13 Io meꞌohaꞌ itoꞌo iba mpuluꞌ ando iba mpuluꞌ mini komoruene nohohongkeꞌi Belisiꞌ. Uwaꞌhi woꞌo pinatuwuꞌ-pinatuwuꞌ to moꞌilo itoꞌo, hei malaꞌeka-malaꞌeka morewu hi Yesu.
Hi Yesu mowowoi topeguruNa to uluꞌ-uluꞌna
14 Kolentuꞌana hi Yohanes Toperiu nitarungkuꞌ. I tempo tiꞌo, hi Yesu nolou pe woiꞌ Galilea mampowute Kareba Moromiꞌ to ka Pueꞌ Ala, 15 Notiꞌi, “Dongkaꞌmo tempo to nopokononto Pueꞌ Ala. Hamboaꞌmo morue Pueꞌ Ala hingkiꞌ moparenta! Mewaliꞌ mengkatobaꞌmokei ka dosami hei mepoꞌohikei i Kareba Moromiꞌ.”
16 Hampiha tempo, hi Yesu matengkaꞌ i bota rano Galilea, hei Noꞌokiꞌ hi Simo hante hineeꞌna to nikokeneꞌi hi Andaria kolentuꞌara mojalaꞌ, alaꞌ tiꞌolu jamare. 17 Notiꞌi hi Yesu, “Humeimokei metuntu Aku! Hingkiꞌ Kupopewalikei topojalaꞌ toaꞌ.” 18 Kaliuꞌ ropohentemo mpuꞌu jalaꞌre, hei metuntumohi pe hi Yesu.
19 Uko tiꞌo, nopololiumo hi Yesu patengkaꞌaNe, hei Io pangkiꞌ womo hi Yakobus hante hineeꞌna to nikokeneꞌi hi Yohanes, anaꞌna hi Sebedeu, kolentuꞌara mangkoromiꞌi jalaꞌra i lali duanga. 20 Kaliuꞌhi nowowoi hi Yesu hingkeꞌna metuntuhi pe Io. Katoꞌo, ropolihimo mpuꞌu umoꞌre i lali duanga moꞌawa hante topajamana, hei metuntuhi pe Yesu.
Hi Yesu mampokoꞌoriꞌ toaꞌ to nopekahii tokodake
21 Uko tiꞌo, hi Yesu hante topeguruNa nolouhi pe bolaꞌ Kapenau. I ando penombahara toYahudi, hi Yesu mekahi pe lali tambi penombahara hei mepoturuꞌ. 22 Toaꞌ to pahori poturuꞌna lemeniahi, alaꞌ Io mepoturuꞌ hibali toaꞌ to makuasaꞌ, hawaꞌi hibali guru-guru agamara.
23 I tempo tiꞌo, uwaꞌ haduo toaꞌ to nopekahii tokodake mekahi woꞌo pe tambi penombaha, hei moloaꞌ-loaꞌ notiꞌi, 24 “O Yesu toNasare! Hingkiꞌ Ipohampoka! Ba hingkiꞌ ipokarugiꞌka? Kubahaꞌ koꞌIngkonamo Suro to Mangkolehi ka Pueꞌ Ala.”
25 Angkana nokamoroki hi Yesu Notiꞌi, “Mondiiꞌko! Pesuwu ka toaꞌ hieꞌe!” 26 Tokodake tiꞌo mampomororidiꞌ wotana toaꞌ tiꞌo, moloaꞌ-loaꞌ hei mesuwu.
27 Ropolomomenia toaꞌ to pangkiꞌ hapo to pewali tiꞌo, hei mometenei-teneihi haduo hei haduo, rotiꞌi, “Haporeꞌito hieꞌe? Hieꞌe poturuꞌ to wolaꞌ. Toaꞌ hieꞌe makuasaꞌ mpololeke! Howeꞌ tokodake mampetuntui hawaꞌNa!”
28 Mepongka katoꞌo, hapo to nowali hi Yesu tekarebamo i humanele woiꞌ Galilea.
Woriꞌ toaꞌ nopokoꞌoriꞌ hi Yesu
29 Kopahuliꞌralu ka tambi penombaha tiꞌo, hi Yesu hante topeguruNa kaliuꞌhi nolou pe tambina hi Simo hante hi Andaria. Hi Yakobus hante hi Yohanes metuntuhi woꞌo. 30 Kohupaꞌralu i tambi tiꞌo uwaꞌ toaꞌ to mampetiꞌiki pe hi Yesu, ponianana hi Simo towoweꞌe turu alaꞌ mohakiꞌi hoholeꞌ. 31 Katoꞌo hi Yesu tolou pe koturuana, Notiko korawene hei Noꞌaro, kaliuꞌ moꞌoriꞌ katoꞌo liu ako morewuhi.
32 Ikopentoriꞌnalu ando, woriꞌ toaꞌ nolou mangkomi to mohakiꞌ hei to nopekahii to kodake pe hi Yesu, 33 woriꞌ tumpu bolaꞌ nolou mororampu i tanobaꞌa tambina hi Simo. 34 Woriꞌ toaꞌ to nopokoꞌoriꞌ hi Yesu ka hakiꞌra to woriꞌ langkaꞌ hei mampokoꞌoriꞌ toaꞌ to nopekahii tokodake. Hei lomoa tiꞌo hawaꞌhi Nopoliu hi Yesu mampololita kohihimona hi Yesu, alaꞌ robahaꞌlu woꞌo kohihimoNa hi Yesu.
Hi Yesu mepoturuꞌ i bolaꞌ ntaniꞌna
35 Dodungku ando, meꞌaromo hi Yesu honiꞌi molai nolou pe komonondiiꞌana ako mekokae hadoduoNa. 36 Hei hi Simo hante awanahi nolouhi mampaliꞌI. 37 IkorohuaNalu rotiꞌi, “Guru, woriꞌ toaꞌ to mampaliꞌKo.”
38 Katoꞌo hi Yesu mehoniꞌ, “Hangangaa nolouki pe bolaꞌ-bolaꞌ to dodungku, hingkeꞌna Kupowute woꞌo i iohi Kareba Moromiꞌ, alaꞌ tiꞌomo tungkaihangKa humei iseꞌe.” 39 Katoꞌo noloumohi hi Yesu hante topeguruNa mampowute pohawaꞌna Pueꞌ Ala i bolaꞌ-bolaꞌ i woiꞌ Galilea. Io mepoturuꞌ i lali tambi-tambi penombaha, hei mampopesuwu lomoa to mekahi pe toaꞌ.
Hi Yesu mampokoꞌoriꞌ haduo toaꞌ tokusta
40 Uwaꞌ haduo toaꞌ to kehakiꞌ kusta ako melingkotuꞌ i hinarona hi Yesu notiꞌi, “Ane hiniꞌluKo, sulungiꞌakae! Ipokoꞌoriꞌa.”
41 Iomo horiana marima laline hi Yesu pangkiꞌ toaꞌ tiꞌo. Katoꞌo Notiko hei Notiꞌi, “HiniꞌluꞌA! Moꞌoriꞌmoko!” 42 Kaliuꞌ moꞌoriꞌ toaꞌ tiꞌo ka hakiꞌna. 43 Uko tiꞌo, norumbaꞌmo hi Yesu molai, hei Notiꞌiki, 44 “Jagako! Inioꞌ itiꞌi-tiꞌiꞌi pe hihimo hapo to mewali hingkenia. Noloumoko ipetidoꞌki wotama pe tadulako mpenomba, hingkeꞌna noꞌokiꞌi komoꞌoriꞌmamo. Alaꞌ moꞌorimoko ikomimo popenombama motuntuni Aturana hi Musa, hingkeꞌna mombaha pe lekiꞌ-lekiꞌna toaꞌ komoꞌoriꞌmamo.” 45 Angkana, i imbolu koꞌakoana toaꞌ tiꞌo, nololita nturusi konopokoꞌoriꞌne hi Yesu, alana hi Yesu hamboaꞌmo rahi mampopeꞌokiꞌ i lali bolaꞌ, horiana Io meꞌohaꞌ romo i howali bolaꞌ i komonondiiꞌana. Angkana kehapoꞌi hatoꞌo, woriꞌ toaꞌ ka imbo-imbolu to nolou mampohidupaꞌki hi Yesu.