Lukas 3

Hi Yohanes Toperiu mampoturuꞌ toaꞌ to woriꞌ

1 I toꞌa kohampuluꞌ limona poparentana datu ngkodeꞌ Tiberiu moparenta i kota Roma, tempo tiꞌo to mewali gubenuruꞌ i woiꞌ Yudea, iomo hi Pontius Pilatu, hante datu Antipa to moparenta i Galilea. Hi Pilipu halalina Herode, iomo to moparenta i Iturea hei i Tarakoniti, hei hi Lisania moparenta i Abilene. 2 To mewali tadulako mpenomba ngkodeꞌ i tempo tiꞌo, hi Hanas hante hi Kaiapa. I toꞌa tiꞌo, hi Yohanes anaꞌna hi Sakaria mantorimo pohawaꞌna Pueꞌ Ala i popada woꞌoni. 3 Iomo horiana hi Yohanes motengkaꞌimo bolaꞌ-bolaꞌ to i bota uwai Yarade mampowute Pohawaꞌna Pueꞌ Ala pe toaꞌ to woriꞌ notiꞌi, “Mengkatobaꞌmokei ka dosami hei humeimokei kuriu hingkeꞌna dosami noꞌampuni Pueꞌ Ala.” 4 Pajamana hi Yohanes tiꞌo mobuhoꞌi hapo to teꞌukiꞌ i lali Suraꞌna Nabi Yesaia to mantiꞌi waheꞌe,

Uwaꞌ haduo toaꞌ to meꞌoꞌando i popada woꞌoni notiꞌi,

“Hingkiꞌ hupaꞌmo Pueꞌ!

Nipatimomomo lalaNe!

Nipokononto lala to hingkiꞌ Nopoliuhi!

5 To melokeꞌ-lokeꞌ hangangaa nimongkohi,

to dingkaoꞌ hei to mebiri-biri hangangaa nipokorante.

To molengkoꞌ-lengkoꞌ hangangaa nipokononto,

hei to memongku hangangaa nipokorante.

6 Uko tiꞌo, lekiꞌ-lekiꞌna toaꞌ hingkiꞌ pangkiꞌ

Datu Topohompoꞌ to norumbaꞌ Pueꞌ Ala.” \rq (Yes. 40:3-5)

7 Woriꞌ toaꞌ nolou mampoperiu pe hi Yohanes, hei notiꞌikihi, “Hibalikei muleꞌna ule to moꞌupoꞌ! Mahamporeꞌi hinaꞌ humeikei? Ba ipekirikei hingkiꞌ himpolohoꞌkei ka kobukotana Pueꞌ Ala to hingkiꞌ mehupaꞌ? 8 Ane tuꞌu-tuꞌu mpuꞌu mengkatobaꞌmokei ka dosami, iwalimokei walia to moromiꞌ. Hei anioꞌ itiꞌikei, ‘Ingkiꞌ hieꞌe, pemuleꞌanaki hi Burahima. Hawaꞌki hingkiꞌ nohuku Pueꞌ Ala.’ Tiꞌo hawaꞌi tuꞌu! Nipehoromua, ane nolei Pueꞌ Ala, muleꞌna hi Burahima wadi Nopopewali ka watu hieꞌe. 9 Hingkiꞌ hupaꞌ pehukune Pueꞌ Ala! Pehukune tiꞌo hibali uwaꞌhi timomomo. Lekiꞌ-lekiꞌna loti to hawaꞌi mowuaꞌ moromiꞌ hingkiꞌ nitowi hei nitube pe lali api.”

10 Toaꞌ woriꞌ meꞌitano pe hi Yohanes rotiꞌi, “Ane watoꞌoꞌi, hapomo to hangangaa kiwali?”

11 Mehoniꞌ hi Yohanes, “Hihimo to merompepaꞌ baduꞌna, hampepaꞌ hangangaa nopepaꞌaniki pe toaꞌ to hawaꞌi uwaꞌ baduꞌna. Hatoꞌo woꞌo, hihimo to uwaꞌ pangkana, hangangaa nodolaꞌ pe toaꞌ to bilora.”

12 Uwaꞌhi woꞌo toperuruꞌ sima to nolou mampoperiu pe hi Yohanes. Meꞌitanohi rotiꞌi, “Guru, hapomo to hangangaa kiwali?”

13 Mehoniꞌ hi Yohanes, “Inioꞌkei mesingaraꞌ sima meliu ka to nopokononto topoparenta.”

14 Uwaꞌhi surodadu to nolou meꞌitano pe hi Yohanes rotiꞌi, “Hade ingka, hohumbomoka? Hapomo to hangangaa kiwali?”

Notiꞌikihi, “Inioꞌkei mamperompoꞌi parewana toaꞌ ntaniꞌna, hei inioꞌkei mowuti pe toaꞌ hingkeꞌna nipaꞌanikei doiꞌ. Ganaꞌlu haromi to ipakeꞌkei.”

15 I tempo tiꞌo, toaꞌ to woriꞌ mampekauhi kohupaꞌna Datu Topohompoꞌ to nodandi Pueꞌ Ala. Iomo hinaꞌ meꞌitanohi haduo hei haduo rotiꞌi, ba hi Yohanesmo tiꞌo Datu Topohompoꞌ. 16 Hi Yohanes mehoniꞌ, “Ane aku, kuriulukei hante uwai. Angkana uwaꞌ Haduo to hingkiꞌ humei to meliu kuasaꞌNe ka aku. Howeꞌ moꞌuweꞌ pehiluꞌ sanalaꞌNa, hawaꞌa masipatoꞌ. Io to hingkiꞌ moriukei hante Inohaꞌ Mangkolehi hei api. 17 Io nipandiriꞌ hibali haduo toaꞌ to mantopihi kina hingkeꞌna kina to moꞌohi hingkiꞌ tepohida ka kina to langkoꞌ. Kina to moꞌohi nopopekahi i lali buhoꞌ, hei to langkoꞌ hingkiꞌ nitube pe api to hawaꞌi hingkiꞌ pideꞌ.”

18 I tempona hi Yohanes mampowute Kareba Moromiꞌ pe toaꞌ to woriꞌ, woriꞌ langkaꞌna pepoturuꞌ to nopowute. 19 Io mokamoroki datu Antipa, gubenuru i woiꞌ Galilea, alaꞌ io moroa hi Herodia, hantambina kokaꞌna, hingkeꞌna nopohantambi. Haꞌio-iolu to Nokamoroki hi Yohanes. Woriꞌ tene waliana to kodake. 20 Konohorinalu Herode konokamorokine hi Yohanes tiꞌo, io hawaꞌi mampohinte waliana to kodake, angkana wuloko notambai, io morumbaꞌ surodaduna hingkeꞌna hi Yohanes nihokiꞌ hei rotarungkuꞌ.

Hi Yesu Noriu hi Yohanes

21 Kohandoaꞌna tene nitarungkuꞌ hi Yohanes, woriꞌ toaꞌ to nolou mampoperiu pe io. Hi Yesu woꞌo nolou mampoperiu pe hi Yohanes. I tempona hi Yesu noriu, Io mekokae. Kolentuꞌana Mekokae, tebungkahimo laniꞌ, 22 hei Inohaꞌ Mangkolehi mengkohoumo pe Io hibali tinti merpati. Hante uwaꞌ mowiharo ka Suruga to mantiꞌi, “Ingkomo Anaꞌka to Kupokarima hei to mampomotanaꞌ lalingKu.”

Pohuntu-huntuana poꞌumoꞌana hi Yesu

23-38 Ganaꞌmo tolu mpuluꞌ ntoꞌana tinuwuꞌNa, hi Yesu mepongkamo majama to nopaꞌaniki Pueꞌ Ala. Motuntuni pahuara toaꞌ,

Yesu iomo anaꞌna hi Yusuf, hi Yusuf anaꞌna hi Eli,

Hi Eli anaꞌna hi Mata, hi Mata anaꞌna hi Lewi,

Hi Lewi anaꞌna hi Maki, hi Maki anaꞌna hi Yanai,

Hi Yanai anaꞌna hi Yusuf, hi Yusuf anaꞌna hi Matika,

Hi Matika anaꞌna hi Amos, hi Amos anaꞌna hi Nahum,

Hi Nahum anaꞌna hi Heseli, hi Heseli anaꞌna hi Nagai,

Hi Nagai anaꞌna hi Maa, hi Maa anaꞌna hi Matika,

Hi Matika anaꞌna hi Simei, hi Simei anaꞌna hi Yose,

Hi Yose anaꞌna hi Yoda, hi Yoda anaꞌna hi Yohana,

Hi Yohana anaꞌna hi Rese, hi Rese anaꞌna hi Serubabel,

Hi Serubabel anaꞌna hi Sealtie, hi Sealtie anaꞌna hi Neri,

Hi Neri anaꞌna hi Maliki, hi Maliki anaꞌna hi Adi,

Hi Adi anaꞌna hi Kosa, hi Kosa anaꞌna hi Emada,

Hi Emada anaꞌna hi Ere, hi Ere anaꞌna hi Yesua,

Hi Yesua anaꞌna hi Eliese, hi Eliese anaꞌna hi Yori,

Hi Yori anaꞌna hi Mata, hi Mata anaꞌna hi Lewi,

Hi Lewi anaꞌna hi Simeo, hi Simeo anaꞌna hi Yehuda,

Hi Yehuda anaꞌna hi Yusuf, hi Yusuf anaꞌna hi Yona,

Hi Yona anaꞌna hi Eliaki, hi Eliaki anaꞌna hi Malea,

Hi Malea anaꞌna hi Mina, hi Mina anaꞌna hi Matata,

Hi Matata anaꞌna hi Nata, hi Nata anaꞌna hi Daudi,

Hi Daudi anaꞌna hi Isai, hi Isai anaꞌna hi Obeꞌ,

Hi Obe anaꞌna hi Boas, hi Boas anaꞌna hi Samo,

Hi Samo anaꞌna hi Nahaso, hi Nahaso anaꞌna hi Aminada,

Hi Aminada anaꞌna hi Adimi, hi Adimi anaꞌna hi Arini,

Hi Arini anaꞌna hi Hesro, hi Hesro anaꞌna hi Peresi,

Hi Peresi anaꞌna hi Yehuda, hi Yehuda anaꞌna hi Akoꞌ,

Hi Akoꞌ anaꞌna hi Isaki, hi Isaki anaꞌna hi Burahima,

Hi Burahima anaꞌna hi Tera, hi Tera anaꞌna hi Nahor,

Hi Nahori anaꞌna hi Seru, hi Seru anaꞌna hi Rehu,

Hi Rehu anaꞌna hi Pele, hi Pele anaꞌna hi Ebere,

Hi Ebere anaꞌna hi Samo, hi Samo anaꞌna hi Kena,

Hi Kena anaꞌna hi Aripasa, hi Aripasa anaꞌna hi Semu,

Hi Semu anaꞌna hi Nohoꞌ, hi Nohoꞌ anaꞌna hi Lame,

Hi Lame anaꞌna hi Metusala, hi Metusala anaꞌna hi Henoꞌ,

Hi Henoꞌ anaꞌna hi Yareꞌ, hi Yareꞌ anaꞌna hi Mahalale,

Hi Mahalale anaꞌna hi Kena, hi Kena anaꞌna hi Eno,

Hi Eno anaꞌna hi Set, hi Set anaꞌna hi Adama,

Hi Adama anaꞌna Pueꞌ Ala.