Hi Yesu nipoꞌanaꞌki i Beteleme
2
1 Hawaꞌi morue uko ka konipoꞌanaꞌkina hi Yohanes, datu Agustu mampoꞌuwaꞌ haꞌanu hawaꞌ. Lekiꞌ-lekiꞌna toaꞌ i woiꞌ Roma hangangaa niꞌukiꞌ konaꞌre hingkeꞌna nibahaꞌi koworiꞌre. 2 Poꞌimbaꞌ toaꞌ to uluꞌ-uluꞌna ropoꞌuwaꞌ i tempona hi Kireniu mewali gubenuru i woiꞌ Siria. 3 Lekiꞌ-lekiꞌna toaꞌ nolou mampopeꞌukiꞌ konaꞌra, pe bolaꞌna tododulura haduo-haduo.4-5 Watoꞌo woꞌo hi Yusuf hiꞌoꞌalu hante hi Maria, to hingkiꞌ mewali hantambina molaimo ka bolaꞌ Nasareꞌ i Galilea pe Beteleme i woiꞌ Yudea. Hi Maria tiꞌo kolentuꞌanamo mohinonaꞌi. Betelemea tiꞌo konipoꞌanaꞌakina datu Daudi hampiha. Itoꞌo, hi Yusuf mampopeꞌukiꞌ konaꞌna hante konaꞌna hi Maria, alaꞌ io muleꞌna hi Daudi. 6 Kolentuꞌara tene i Beteleme, hupaꞌmo tempona hi Maria hingkiꞌ moꞌanaꞌ, 7 hei io moꞌanaꞌ haduo oꞌanaꞌ tomaꞌani, anaꞌna to kokokaꞌ. Anaꞌ tiꞌo nolehe hante wida to nipatimomomo umbiꞌ, honiꞌi noꞌuliꞌ i lali kolambaꞌ gimba, alaꞌ itoꞌo hawaꞌi mpuꞌu uwaꞌ kamaraꞌ to ropeꞌohaꞌi.
Topolambaꞌ hei malaꞌeka
8 Dodungku i bolaꞌ Beteleme, uwaꞌhi haꞌumbora topolambaꞌ to mampoꞌodaꞌ gimbara i popada. 9 Wini konipoꞌanaꞌakina hi Yesu, hangkaꞌ-hangkaꞌ romo hupaꞌ malaꞌekane Pueꞌ Ala, metotiꞌi i hirira topolambaꞌ hante wantana Pueꞌ Ala mowantaihi, katoꞌo motehuꞌhi mpololeke. 10 Notiꞌi malaꞌeka tiꞌo, “Inioꞌkei motehuꞌ, alaꞌ humeiꞌa mampowute kareba to moromiꞌ pe ingkei. Kareba hieꞌe hingkiꞌ mampomotanaꞌ lalina lekiꞌ-lekiꞌna toaꞌ. 11 Wini hieꞌe i bolaꞌna datu Daudi, nipoꞌanaꞌkimo Topohompoꞌ dosa, Iomo Kerisitu, Pueꞌta. 12 Hieꞌemola tandaꞌne, hingkiꞌ ihuakei haduo himidoꞌ to nilehe hante wida, hei niꞌuliꞌ i lali kolambaꞌ gimba.”
13 Hangkaꞌ-hangkaꞌ romo roꞌokiꞌ topolambaꞌ tiꞌo malaꞌeka to woriꞌ hiꞌoꞌalu hante malaꞌeka to medulu. Mampokodeꞌ Pueꞌ Ala, rotiꞌi,
14 “Topokodeꞌmo Pueꞌ Ala to i Suruga!
Romiꞌ Ngkotuwuꞌ i lumbuna toaꞌ
to uwaꞌ i duniaꞌ
to hintotoꞌ hante peleihaNa.”
15 Pahuliꞌralu malaꞌeka tiꞌo nolou pe Suruga, topolambaꞌ tiꞌo haduo hei haduo, mantiꞌi, “Hokei nolouki pe Beteleme, mampeꞌele hapo to mewali to Nopowutekimokiki Pueꞌ.” 16 Katoꞌo rohohiꞌimo mpuꞌu nolou pe Beteleme mampomehuaki hi Maria hante hi Yusuf, hante himidoꞌ to niꞌuliꞌ i lali kolambaꞌna gimba. 17 Koroꞌokiꞌnalu himidoꞌ tiꞌo, ropowute hapo to notiꞌi malaꞌeka noniuꞌ Io. 18 Hokohi lekiꞌ-lekiꞌna toaꞌ to pahori lolitara topolambaꞌ. 19 Angkana lekiꞌ-lekiꞌna to mewali tiꞌo nopoꞌilalilu hi Maria.
20 Uko tiꞌo, topolambaꞌ tiꞌo molaimohi nolou pe popada polambaꞌara. I lumbu lala mampomotanaꞌhi hei mampokodeꞌ Pueꞌ Ala, alaꞌ lekiꞌ-lekiꞌna to rohori hei to roꞌokiꞌ, tuꞌu-tuꞌu mewali, hintotoꞌ hante hapo to nopowute malaꞌeka.
Himidoꞌ nikokeneꞌi hi Yesu
21 Ganaꞌmo umuruꞌne walu ando, himidoꞌ tiꞌo nibulabaꞌmo motuntuni adaꞌna toYahudi, hei nikokeneꞌi hi Yesu motuntuni pohawaꞌna malaꞌeka kohandoaꞌana tene nopohinonaꞌiki inoꞌNa.
22 Ganaꞌmo tempone hi Yusuf hante hi Maria mororaꞌai hibali to nipokononto i atura to teꞌukiꞌ i suraꞌna hi Musa, toduluna hi Yesu mangkomi Anaꞌra tiꞌo nolou pe Tambina Pueꞌ Ala i Yerusale ako nipeserakaki pe Pueꞌ Ala. 23 Alaꞌ teꞌukiꞌmo i lali Suraꞌ Aturana Pueꞌ waheꞌe, “Lekiꞌ-lekiꞌna oꞌanaꞌ tomaꞌani to kokokaꞌ hangangaa nipeserakaki pe Pueꞌ Ala hingkeꞌna mewali toaꞌNa.” 24 Mangkomihi woꞌo popenombara hibali to nipokononto i lali Suraꞌ Aturana Pueꞌ iomo, hamoko tinti merpati ba rombaꞌa anaꞌ tinti kokou,b
Hi Simeo hante hi Hana
25-26 I Yerusale, uwaꞌ haduo toaꞌ to nikokeneꞌi hi Simeo. Io haduo toaꞌ to moromiꞌ hei mengkoruꞌ pe Pueꞌ Ala hante nopoꞌohi kohingkiꞌ hupaꞌne tempona Pueꞌ Ala hingkiꞌ morumbaꞌ datu Topohompoꞌ hingkeꞌna mamposalamaꞌ toSaraeli. Hei io nopoꞌowoni Inohaꞌ Mangkolehi to mampopebahaꞌ kohawaꞌna hingkiꞌ mahi ane hawaꞌi tene pangkiꞌ datu Topohompoꞌ to nodandi Pueꞌ Ala. 27 Alaꞌ Inohaꞌ Mangkolehi uwaꞌ i lalina hi Simeo, io nolou pe Tambina Pueꞌ Ala. I tempora hi Yusuf hante hi Maria mangkomi hi Yesu hingkiꞌ nipeserakaki pe Pueꞌ Ala motuntuni suraꞌna hi Musa, 28 hi Simeo moroa himidoꞌ tiꞌo, noꞌawiꞌ honiꞌi mampokodeꞌ Pueꞌ Ala, notiꞌi,
29 “O Pueꞌ, kuꞌokiꞌmo himidoꞌ hieꞌe
hei tongawa koꞌIpobuhoꞌinamo dandiMu,
hinewowoꞌena wadimoꞌa mahi i lali kolebaꞌ lali.
30 Kuꞌokiꞌmo mpuꞌu datu Topohompoꞌ to Ipopehupaꞌ humei,
31 to Ipatimomo hingkiꞌ mohompoꞌ lekiꞌ-lekiꞌna toaꞌ ka pehuku dosa.
32 Datu Topohompoꞌ hieꞌe hibali wanta
to hingkiꞌ mampokononto lalira toaꞌ to haꞌiohi toSaraeli
hingkeꞌna robahaꞌKo Pueꞌ.
Moliu i oꞌanaꞌ hieꞌe,
toaꞌMu toSaraeli hingkiꞌ ropokodeꞌ.”
33 Hoko hi Maria hante hi Yusuf pahori lolitana hi Simeo noniu' i Anaꞌra. 34 Uko tiꞌo, hi Simeo mobarakatihi hante mantiꞌi pe hi Maria, “Kotuꞌuana Anaꞌ hieꞌe to nopokonontomo Pueꞌ hingkiꞌ humei mohuku hante mamposalamaꞌ toSaraeli, alaꞌ Io hingkiꞌ mampatidoꞌki pe toaꞌ hapo to tuꞌu ka Pueꞌ Ala. Io hingkiꞌ mewali tandaꞌ ka Pueꞌ Ala, to hingkiꞌ hawaꞌi notorimo toaꞌ woriꞌ. 35 Hingkeꞌ tongawa hapo to uwaꞌ i lali pekirira. Hei ingko Maria, kohandodoihamu hingkiꞌ hibali konobeloimu piho to motari.”
36-37 I Tambina Pueꞌ Ala, uwaꞌ woꞌo haduo nabi towoweꞌe to nikokeneꞌi hi Hana. Io anaꞌna hi Panueli, muleꞌna hi Aser. Tinuwuꞌna hi Hana tiꞌo walu mpuluꞌ iba ntoꞌamo. Io kahampihamo momaꞌani, angkana pitu ntoꞌalu hamoko, mahimo maꞌanine. Mepongka kobembaꞌana, io ando-ando nolou menomba pe Tambina Pueꞌ Ala. Ando-ando hei wini hi Hana mekokae hei maboki. 38 Ikonoꞌokiꞌnalu hi Yesu i Tambina Pueꞌ Ala, io mampokodeꞌ Pueꞌ Ala, hei mololita woꞌo noniu' i Anaꞌ tiꞌo pe lekiꞌ-lekiꞌna toaꞌ to mampekau konipohintena toYerusale ka poniꞌra.
Hi Yusuf hante hi Maria mahuliꞌmohi nolou pe Nasareꞌ
39 Koꞌukora hi Yusuf hante hi Maria motuntuni lekiꞌ-lekiꞌna atura to teꞌukiꞌ i lali Aturana hi Musa, molaimohi nolou pe bolaꞌ Nasareꞌ i woiꞌ Galilea. 40 Anaꞌra tiꞌo kokodeꞌ-kodeꞌa hei komaroho-rohoa. Mononto mpuꞌu laline, hei nobarakati Pueꞌ Ala.
Hi Yesu i Tambina Pueꞌ Ala
41 Toꞌa-toꞌana, inoꞌna hante umoꞌna hi Yesu nolouhi pe Yerusale ako motuntuni ando ngkodeꞌra toYahudi to nikokeneꞌi Ando Posusaꞌa Pokalintora. 42 Ganaꞌmo hampuluꞌ rontoꞌa umuruꞌna hi Yesu, noloumohi todulune pe posusaꞌa tiꞌo hibali kobiasara, hei hi Yesu woꞌo rokomi. 43 Koꞌukora motuntuni ando ngkodeꞌ tiꞌo, mahuliꞌmohi nolou pe bolaꞌra i Nasareꞌ, angkana hi Yesu hawaꞌi metuntu pe iohi. Io holampi tene i Yerusale, angkana hawaꞌi nobahaꞌ tomotodina. 44 Ropekiri reaꞌ uwaꞌlu moꞌawa-awa hante awara matengkaꞌ. Haꞌandomohi matengkaꞌ, honiꞌi ropaliꞌ i lumbuna awara hante i halalira. 45 Nokomi kohawaꞌna rohua, mahuliꞌwomohi nolou pe Yerusale. 46 Ikotolu andona ropaliꞌ, honiꞌi rohua i tanobaꞌana Tambina Pueꞌ Ala. Hi Yesu kolentuꞌana mahura i iliꞌna guru-guru agama, mampehoromua pololitara, hei meꞌitano woꞌo pe iohi. 47 Hokohi lekiꞌ-lekiꞌna toaꞌ to pahori pehoniꞌNa hante rotiꞌi, “Mapande mpuꞌu Anaꞌ tiꞌo. Woriꞌ to Nobahaꞌ!” 48 Koroꞌokiꞌnalu hi Yesu, hokohi inoꞌne hante umoꞌna. Notiꞌi inoꞌne, “Anaꞌku, mahamporeꞌi hinaꞌ watoꞌo waliaMa? Aku hante umoꞌmu, maporiꞌ kihori mampaliꞌKo!”
49 Angkana mehoniꞌ hi Yesu Notiꞌi, “Mahamporeꞌi hinaꞌ ipaliꞌAkei? Hawaꞌreꞌi ibahaꞌkei, Aku hangangaa uwaꞌA i lali tambina Umoꞌku?” 50 Angkana hawaꞌi robahaꞌ palaihane lolitaNa.