Belisiꞌ mohohongkeꞌi hi Yesu
4
1 Uko tiꞌo, hi Yesu nokomi Inohaꞌ Mangkolehi nolou pe popada woꞌoni hingkeꞌna nohohongkeꞌi Belisiꞌ. 2 Itoꞌo hi Yesu maboki iba mpuluꞌ ando hei iba mpuluꞌ wini komoruene, iomo horiana hi Yesu biloramo mpololeke. 3 I tempo tiꞌo, Belisiꞌ mohohongkeꞌi hi Yesu, notiꞌi, “Ane tuꞌu-tuꞌuKo mpuꞌu AnaꞌNa Pueꞌ Ala, Ipopewalimo watu hieꞌe mewali kopongkona!”4 Hi Yesu Mehoniꞌ, “I lali Suraꞌ Mangkolehi teꞌukiꞌ waheꞌe: ‘Manusiaꞌ hawaꞌi podo tuwuꞌ ka kopongkonalu, angkana to toparalu iomo mampoꞌilali pohawaꞌna Pueꞌ Ala.’ ”
5 Uko tiꞌo, Belisiꞌ mangkomi hi Yesu nolou pe Yerusale, kota to manobaꞌ, hei nopopetotiꞌi i wumbu Tambina Pueꞌ Ala, 6 notiꞌiki, “Ane tuꞌu-tuꞌuKo mpuꞌu AnaꞌNa Pueꞌ Ala, mengkonawuꞌmoKo! Hawaꞌko hingkiꞌ mahampo-hampo, alaꞌ uwaꞌ teꞌukiꞌ i lali Suraꞌ Mangkolehi:
‘Pueꞌ Ala hingkiꞌ morumbaꞌ malaꞌekaNahi mohulaweꞌKo, hingkeꞌna kapuꞌMu hawaꞌi noniuꞌ watu.’ ” \rq (Mas. 91:11-12)
7 Nohoniꞌ hi Yesu, “Uwaꞌ woꞌo teꞌukiꞌ i lali Suraꞌ Mangkolehi to mantiꞌi waheꞌe: ‘Inioꞌko mohohongkeꞌi Pueꞌ Alamu.’ ”
8 Uko tiꞌo, Belisiꞌ mangkomi womo hi Yesu nolou pe biri to dingkaoꞌ mpololeke, hei notidoꞌki lekiꞌ-lekiꞌne kodatua i duniaꞌ hante komanobaꞌna kodatua tiꞌo, 9 notiꞌi, “Ane melingkotuꞌKo menomba pe aku, lekiꞌ-lekiꞌna hieꞌe hingkiꞌ kupaꞌanikiKo.”
10 Nohoniꞌ hi Yesu, “Polai Belisiꞌ! Alaꞌ teꞌukiꞌmo i lali Suraꞌ Mangkolehi waheꞌe: ‘Hangangaa menombako pe Pueꞌ Alamu, alaꞌ Iolu to masipatoꞌ ipengkoruꞌi.’ ” 11 Katoꞌo molaimo Belisiꞌ tiꞌo mampolihi hi Yesu, honiꞌi hupaꞌmohi malaꞌeka morewahi hi Yesu.
Jamana hi Yesu i woiꞌ Galilea (4:12—18:35)
Hi Yesu mepongka majama i Galilea
12 Handoaꞌi tene morue katoꞌo, hi Yohanes Toperiu nihokiꞌ hei nitarungkuꞌ. Konohorinalu hi Yesu kareba tiꞌo, molaimo nolou pe bolaꞌ Nasareꞌ i woiꞌ Galilea. 13 Honiꞌi loliu nolou meꞌohaꞌ i bolaꞌ Kapenau. Bolaꞌ tiꞌo i bota rano Galilea, i woiꞌ Sebulo hante Natali. 14 Hi Yesu mampowute Pohawaꞌna Pueꞌ pe toaꞌ to meꞌohaꞌ itoꞌo, hingkeꞌna tebuhoꞌi lolita to nopowute nabi Yesaia hampiha to mantiꞌi waheꞌe:
15 “Woiꞌra toSebulo hante toNatali
to dodungku i rano Galilea,
uwaꞌ tinaꞌ i hanupe uwai Yarade.
Woiꞌ tiꞌo iomo Galilea to ropeꞌohaꞌi woriꞌ toaꞌ ntaniꞌ to handoꞌio toYahudi.
16 Toaꞌ to itoꞌo, meꞌohaꞌhi i lali komokorindiana,
Angkana hinewowoꞌena pangkiꞌmohi wanta to kodeꞌ,
hei toaꞌ to nokuasaꞌi komahia,
nowantaimohi Haduo to mepaꞌani kotuwuꞌ.” \rq (Yes. 9:1-2)
17 Katoꞌo hi Yesu mepongkamo mampowute pohawaꞌna Pueꞌ, Notiꞌi, “Mengkatobaꞌmokei ka dosami, alaꞌ hamboaꞌmo morue, Pueꞌ Ala hingkiꞌ moparenta i duniaꞌ.”
Hi Yesu mowowoi topeguruNa to uluꞌ-uluꞌna
18 Kolentuꞌana hi Yesu matengkaꞌ i bota rano Galilea, Noꞌokiꞌ roduo topohalali, konaꞌra hi Simo to rotiꞌi woꞌo hi Peturuꞌ hante hi Andaria, hineeꞌna. I tempo tiꞌo, kolentuꞌara mojalaꞌ i rano, alaꞌ simata iolu jamare. 19 Notiꞌikihi hi Yesu, “Humeimokei metuntu pe Aku! Hingkiꞌ Kupopewalikei topojalaꞌ toaꞌ.” 20 Mepongka katoꞌo, kaliuꞌ mampolihimohi mpuꞌu jamara, hei metuntumohi pe hi Yesu.
21 Hi Yesu mampololiu patengkaꞌNa, Noꞌokiꞌ womo roduo topohalali: hi Yakobus hante hi Yohanes hineeꞌna, anaꞌnahi hi Sebedeu. Tempo tiꞌo, kolentuꞌara mangkoromiꞌi jalaꞌra i lali duanga hante umoꞌra. Nowowoihi woꞌo hi Yesu hingkeꞌna metuntuhi pe Io. 22 Mewaliꞌ kaliuꞌ ropolihi duangare hante umoꞌra, honiꞌi metuntuhi woꞌo pe hi Yesu.
Hi Yesu mepoturuꞌ hei woriꞌ toaꞌ Nopokoꞌoriꞌ
23 Hi Yesu matengkaꞌ i humanele woiꞌ Galilea hei mepoturuꞌ i woriꞌ tambi penombahara toYahudi. Io mampowute Kareba Moromiꞌ noniuꞌ poparentana Pueꞌ Ala, hei mampokoꞌoriꞌ woꞌo lekiꞌ-lekiꞌna toaꞌ to hawaꞌi polido. 24 Hapo to Nowali tiꞌo tekareba wute i humanele woiꞌ Siria, horiana woriꞌ toaꞌ to mangkodokoꞌi nolou mohidupaꞌ hante hi Yesu. Toaꞌ tiꞌo mangkomihi lekiꞌ-lekiꞌna toaꞌ to molangkaꞌ-langkaꞌ hakiꞌna. Uwaꞌhi woꞌo to nopekahii tokodake, to mohakiꞌ mahi-mahi manuꞌ, hei tokohu. Lekiꞌ-lekiꞌra tiꞌo nopokoꞌoriꞌ hi Yesu. 25 I tempo tiꞌo, woriꞌ mpololeke toaꞌ to metuntu nturusi pe Io: uwaꞌhi to ka woiꞌ Galilea, ka Dekapoli, ka Yerusale, ka woiꞌ Yudea, hei uwaꞌhi woꞌo to ka hanupe uwai Yarade.