Hi Yesu moꞌuwiꞌ topeguruna to uluꞌ-uluꞌna
5
1 I hampiha tempo, kolentuꞌana hi Yesu metotiꞌi i bota rano Genesareꞌ,a woriꞌhi toaꞌ to mehupaꞌ momekari-karimohi mangkodokoꞌi mampehoromua pohawaꞌna Pueꞌ Ala to nopowute hi Yesu. 2 I tempo tiꞌo, hi Yesu pangkiꞌ roꞌonu duanga i bota rano, topojalaꞌ tiꞌo mengkohoumohi ka duangara hei kolentuꞌara mowaheꞌ jalaꞌra. 3 Noloumo hi Yesu mehendeꞌ pe haꞌanu duanga, iomo duangana hi Simo, hei noperapiꞌ hingkeꞌna hi Simo mobohe duangana moꞌela hangkiuꞌ ka bota rano. Uko tiꞌo, mahuramo i duanga honiꞌi mampoturuꞌ toaꞌ to woriꞌ.4 Uko mepoturuꞌ, notiꞌi hi Yesu pe hi Simo, “Ibohemo duangama nolou pe kokuladuana, hei ipelubaꞌmo jalaꞌma hingkeꞌna pahuakei bouꞌ.”
5 Mehoniꞌ hi Simo, “Guru, ngkahaminiamoka mojalaꞌ, angkana hawaꞌi uwaꞌ howeꞌ hambaꞌa to noroa jalaꞌki. Angkana kehapoꞌi hatoꞌo, hingkiꞌ kupelubaꞌ mpuꞌu, alaꞌ Ingko to morumbaꞌa.”
6 Katoꞌo, ropelubaꞌmo mpuꞌu jalaꞌre, hei woriꞌ mpololeke bouꞌ to noroa, koꞌukoana jalaꞌra hingkiꞌ morenda. 7 Uko tiꞌo rokawemo aware to i lali duanga ntaniꞌna hingkeꞌna humeihi mepororui. Humeimohi mpuꞌu mepororui, duangara to roꞌonu tiꞌo roꞌohi bouꞌ wute hingkiꞌ mentoriꞌ nokomi komadorina.
8-9 Hokomo hi Simo Peturuꞌ hante awana pangkiꞌ hapo to mewali tiꞌo, alaꞌ nokomi koworiꞌna bouꞌ to rojalaꞌ. Iomo hinaꞌ melingkotuꞌmo hi Peturuꞌ pe hinarona hi Yesu notiꞌi, “Pueꞌ anioꞌa Ikododungkui, alaꞌ aku hieꞌe toaꞌ to madosaꞌa.” 10 Uwaꞌhi roduo awana hi Simo to hoko woꞌo pangkiꞌ hapo to pewali tiꞌo. Konaꞌra hi Yakobus hante hi Yohanes, anaꞌnahi hi Sebedeu to majama moꞌawa hante hi Simo.
Notiꞌi hi Yesu pe hi Simo, “Anioꞌko motehuꞌ. Mepongka hinewowoꞌena, haꞌiomo bouꞌ to ijalaꞌo, angkana toaꞌmo to ijalaꞌo.” 11 Uko tiꞌo, duangara roruiꞌmo nolou pe lerina hei lekiꞌ-lekiꞌna lumara ropolihi honiꞌhi metuntu pe hi Yesu.
Hi Yesu mampokoꞌoriꞌ haduo totungki
12 I hampiha, tempona hi Yesu uwaꞌ i haꞌanu kota. Itoꞌo uwaꞌ haduo toaꞌ totungki wotana. Totungki tiꞌo pangkiꞌ hi Yesu, katoꞌo melingkotuꞌmo metoungkaꞌ i hinaroNa, hei noperapiꞌ pe Io notiꞌi, “Pueꞌ, kubahaꞌ koꞌIbiaꞌne mampokoꞌoriꞌ. Ane hiniꞌKo, Ipokoꞌoriꞌa kaiaꞌ!”
13 Noperamamo hi Yesu toaꞌ tiꞌo honiꞌi notiꞌi, “Kupoꞌioꞌ mpololeke, moꞌoriꞌmoko!” Hangkaꞌ-hangkaꞌlu, hakiꞌ to mekododokui tiꞌo moholimo.
14 Uko tiꞌo hi Yesu moꞌopi toaꞌ tiꞌo Notiꞌi, “Anioꞌ ipetiꞌikiꞌi pe hihimo hapo to mewali hingkonia. Noloumoko dulu ipetidoꞌkimo wotama pe tadulako mpenomba hingkeꞌna noꞌoki komoꞌoriꞌmumo, hante ikomimo popenombama motuntuni Aturana hi Musa, hingkeꞌna tongawa i lekiꞌ-lekiꞌna toaꞌ komoꞌoriꞌmamo.”
15 Kehapohi niꞌopi mampowute kareba koNopokoꞌoriꞌna toaꞌ totungki tiꞌo tontona tekareba pe imbo-imbo, alana woriꞌ toaꞌ to mehupaꞌ pe hi Yesu hingkeꞌna mampehoromua lolitaNa hei Nopokoꞌoriꞌhi ka hakiꞌra. 16 Kehapoꞌi watoꞌo, hi Yesu poko nolou mekokae hadoduona i peꞌohaꞌa to monondiiꞌ.
Hi Yesu mampokoꞌoriꞌ haduo tokohu
17 I hampiha, kolentuꞌana hi Yesu mepoturuꞌ, uwaꞌhi haꞌumbora toParisi hante guru-guru agama to mahura itoꞌo. Toaꞌ to hupaꞌhi tiꞌo, ka woiꞌ Galilea, Yudea, hei ka kota Yerusale. Kuasaꞌna Pueꞌ Ala uwaꞌ i hi Yesu, iomo hinaꞌ Nobiaꞌ mampokoꞌoriꞌ toaꞌ to mohakiꞌ. 18 I tempo tiꞌo, hupaꞌhi woꞌo bahaꞌumbora toaꞌ to mangkowaꞌ haduo tokohu. Mampaliꞌhi lala hingkeꞌna hohumbohi mekahi pe lali tambi, alaꞌ dokoꞌhi mangkomi awara pe hinarona hi Yesu. 19 Angkana hawaꞌhi hohumbo mekahi, alaꞌ tambi tiꞌo buhaꞌ mpololeke hante toaꞌ. Iomo hinaꞌ ropeponeꞌki tokohu tiꞌo pe dopiꞌ tambi. Uko tiꞌo, dopiꞌ tambi rorenda, honiꞌi tokohu tiꞌo roꞌulu munaꞌu hante aliꞌna wute i hinarona hi Yesu i lumbuna toaꞌ to woriꞌ. 20 Konoꞌokiꞌna hi Yesu pepoꞌohira, Notiꞌimo pe tokohu tiꞌo, “Bee, teꞌampunimo dosama.”
21 Bahaꞌumbohi guru agama hante toParisi to pahori lolitana hi Yesu tiꞌo. Iomo hinaꞌ mantiꞌihi haduo hei haduo, “Wurani mpuꞌu toaꞌ hieꞌe, mampononaꞌa Pueꞌ Ala. Himoto to nobiaꞌ moꞌampuni dosa? Hawaꞌi uwaꞌ to nobiaꞌ, bateꞌnalu Pueꞌ Ala.”
22 Nobahaꞌ hi Yesu hapo to i lalira. Iomo hinaꞌ notiꞌikihi, “Mahamporeꞌi hinaꞌ koiꞌ lalimi? 23 Imboꞌina to mololihaꞌ nitiꞌi, ‘teꞌampunimo dosama’ ba ‘peꞌaro hei matengkaꞌmoko?’ 24 Angkana hinewowoꞌena hingkiꞌ Kupomombahakikei koꞌuwaꞌne kuasaꞌna Anaꞌ Manusiaꞌ moꞌampuni dosa i duniaꞌ.” Katoꞌo Notiꞌi pe tokohu tiꞌo, “Meꞌaromoko! Ilulumo aliꞌma, honiꞌi mahuliꞌmoko!” 25 Meꞌaromo mpuꞌu tokohu tiꞌo i hinarona toaꞌ to woriꞌ, nolulumo aliꞌne liu nokomi mahuliꞌ pe tambina. I lumbu lala, io mampokodeꞌmo Pueꞌ Ala.
26 Hokomohi mpuꞌu lekiꞌ-lekiꞌna toaꞌ to pangkiꞌ, hei mampokodeꞌmohi Pueꞌ Ala. Alaꞌ nokomi komotehuꞌra iomo hinaꞌ rotiꞌi, “Mepohele mpuꞌu hapo to mewali i ando hieꞌe!”
Hi Yesu moꞌuwiꞌ hi Lewi mewali topeguruNa
27 Uko tiꞌo molaimo hi Yesu, hei i lumbu lala Io pangkiꞌ haduo toperuruꞌ sima to mahura i kantoroꞌna, konaꞌna hi Lewi. Notiꞌi hi Yesu, “Metuntumoko pe Aku.” 28 Metotiꞌimo hi Lewi, nopolihimo lekiꞌ-lekiꞌne honiꞌi metuntu pe hi Yesu.
29 I tempo tiꞌo, hi Lewi mampoꞌuwaꞌ susaꞌ ngkodeꞌ i tambina, tandaꞌ komampokodeꞌna hi Yesu. Woriꞌhi toperuruꞌ sima hei toaꞌ ntaniꞌna to nowowoi mangka moꞌawa hante iohi. 30 Itoꞌo woꞌo uwaꞌhi haꞌumbora tadulako agama hante guru agama to motuntuni pepoturuꞌra toParisi. Mosalaꞌihi hi Yesu rotiꞌi pe topeguruna, “Mahamporeꞌi hinaꞌ mangkakei hante maꞌinu moꞌawa hante toperuruꞌ sima hante toaꞌ to madosa?”
31 Nohoniꞌ hi Yesu, “Toaꞌ to hawaꞌi mohakiꞌ, hawaꞌi moparaluꞌi sando. Toaꞌ to mahakiꞌlu to paralu mampaliꞌ sando. 32 KohupaꞌKu hieꞌe hawaꞌA mowowoi toaꞌ to mononto waliara, angkana mowowoiꞌA toaꞌ to madosa hingkeꞌna nohohoꞌhi ka dosara.”
Topeguruna hi Yesu hawaꞌhi maboki
33 I tempo tiꞌo, uwaꞌhi haꞌumbora toaꞌ to meꞌitano pe hi Yesu rotiꞌi, “Topeguruna hi Yohanes pokohi maboki hei mekokae. Watoꞌo woꞌo topegurure toParisi. Mahamporeꞌi hinaꞌ topeguruMa hawaꞌhi maboki?” 34 Nohoniꞌ hi Yesu hante lolita pandiri' Notiꞌi, “Ane uwaꞌ tene tomaꞌani to nipohamoko, toaꞌ to hupaꞌ i pepohamokoa hawaꞌhi hingkiꞌ maboki. 35 Angkana i hampiha tempo intu, tomaꞌani to nipahamoko hingkiꞌ niroa ka lumbura. I tempo tiꞌomo, honiꞌhi hingkiꞌ maboki.”
36 Nopowute woꞌo hi Yesu halangkaꞌ lolita pandiri' Notiꞌi, “Hawaꞌi uwaꞌ haduo toaꞌ to modampelei baduꞌ to hohaimo hante hampepaꞌ wida to noheuꞌ ka baduꞌ to wolaꞌ. Alaꞌ ane nowaliꞌi hatoꞌo, mokodokoi rompepaꞌ parewa tiꞌo, baduꞌ to wolaꞌ hingkiꞌ mohepaꞌ hei wida to hohai hawaꞌi hintotoꞌ hante wida to wolaꞌ.
37 Watoꞌo woꞌo hawaꞌi uwaꞌ haduo toaꞌ to mantula anggoroꞌ to wolaꞌ i pebolaꞌanab to hohaimo. Alaꞌ ane nowali hatoꞌo, anggoroꞌ to wolaꞌ hingkiꞌ mampomopiheꞌ pebolaꞌa to hohaimo tiꞌo, koꞌukoana anggoroꞌ hibobo. 38 Mewaliꞌ, anggoroꞌ to wolaꞌ hangangaa nitula woꞌo i pebolaꞌana to wolaꞌ.
39 To ka maꞌinumo anggoroꞌ to moruemo, hawaꞌi nolei maꞌinu anggoroꞌ to wolaꞌ, alaꞌ anggoroꞌ to moruemo motomiꞌ nohori.”